| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૫. વિજ્જાભાગિયસુત્તવણ્ણના
5. Vijjābhāgiyasuttavaṇṇanā
૩૫. પઞ્ચમે સમ્પયોગવસેન વિજ્જં ભજન્તિ, સહજાતઅઞ્ઞમઞ્ઞનિસ્સયસમ્પયુત્તઅત્થિઅવિગતાદિપચ્ચયવસેન તાય સહ એકીભાવં ગચ્છન્તીતિ વિજ્જાભાગિયા. અથ વા વિજ્જાભાગે વિજ્જાકોટ્ઠાસે વત્તન્તિ વિજ્જાસભાગતાય તદેકદેસે વિજ્જાકોટ્ઠાસે પવત્તન્તીતિ વિજ્જાભાગિયા. તત્થ વિપસ્સનાઞાણં, મનોમયિદ્ધિ, છ અભિઞ્ઞાતિ અટ્ઠ વિજ્જા. પુરિમેન અત્થેન તાહિ સમ્પયુત્તધમ્મા વિજ્જાભાગિયા. પચ્છિમેન અત્થેન તાસુ યા કાચિ એકાવ વિજ્જા વિજ્જા, સેસા વિજ્જાભાગિયા. એવં વિજ્જાપિ વિજ્જાય સમ્પયુત્તધમ્માપિ ‘‘વિજ્જાભાગિયા’’ત્વેવ વેદિતબ્બા. ઇધ પન વિપસ્સનાઞાણસમ્પયુત્તા સઞ્ઞાવ વિજ્જાભાગિયાતિ આગતા, સઞ્ઞાસીસેન સેસસમ્પયુત્તધમ્માપિ વુત્તા એવાતિ દટ્ઠબ્બં. અનિચ્ચાનુપસ્સનાઞાણેતિ અનિચ્ચાનુપસ્સનાઞાણે નિસ્સયપચ્ચયભૂતે ઉપ્પન્નસઞ્ઞા, તેન સહગતાતિ અત્થો. સેસેસુપિ એસેવ નયો.
35. Pañcame sampayogavasena vijjaṃ bhajanti, sahajātaaññamaññanissayasampayuttaatthiavigatādipaccayavasena tāya saha ekībhāvaṃ gacchantīti vijjābhāgiyā. Atha vā vijjābhāge vijjākoṭṭhāse vattanti vijjāsabhāgatāya tadekadese vijjākoṭṭhāse pavattantīti vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammā vijjābhāgiyā. Pacchimena atthena tāsu yā kāci ekāva vijjā vijjā, sesā vijjābhāgiyā. Evaṃ vijjāpi vijjāya sampayuttadhammāpi ‘‘vijjābhāgiyā’’tveva veditabbā. Idha pana vipassanāñāṇasampayuttā saññāva vijjābhāgiyāti āgatā, saññāsīsena sesasampayuttadhammāpi vuttā evāti daṭṭhabbaṃ. Aniccānupassanāñāṇeti aniccānupassanāñāṇe nissayapaccayabhūte uppannasaññā, tena sahagatāti attho. Sesesupi eseva nayo.
વિજ્જાભાગિયસુત્તવણ્ણના નિટ્ઠિતા.
Vijjābhāgiyasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૫. વિજ્જાભાગિયસુત્તં • 5. Vijjābhāgiyasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫. વિજ્જાભાગિયસુત્તવણ્ણના • 5. Vijjābhāgiyasuttavaṇṇanā
