| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. வினயபெய்யாலங்
3. Vinayapeyyālaṃ
201. த்³வேமே , பி⁴க்க²வே, அத்த²வஸே படிச்சாதி, பி⁴க்க²வே, த்³வே அத்தே² நிஸ்ஸாய த்³வே காரணானி ஸந்தா⁴ய. ஸிக்கா²பத³ங் பஞ்ஞத்தந்தி ஸிக்கா²கொட்டா²ஸோ ட²பிதோ. ஸங்க⁴ஸுட்டு²தாயாதி ஸங்க⁴ஸ்ஸ ஸுட்டு²பா⁴வாய, ‘‘ஸுட்டு², ப⁴ந்தே’’தி வத்வா ஸம்படிச்ச²னத்தா²யாதி அத்தோ². ஸங்க⁴பா²ஸுதாயாதி ஸங்க⁴ஸ்ஸ பா²ஸுவிஹாரத்தா²ய. து³ம்மங்கூனந்தி து³ஸ்ஸீலானங். பேஸலானந்தி பீயஸீலானங். தி³ட்ட²த⁴ம்மிகானங் ஆஸவானந்தி தி³ட்ட²த⁴ம்மே இமஸ்மிங்யேவ அத்தபா⁴வே வீதிக்கமபச்சயா படிலத்³த⁴ப்³பா³னங் வத⁴ப³ந்த⁴னாதி³து³க்க²த⁴ம்மஸங்கா²தானங் ஆஸவானங். ஸங்வராயாதி பித³ஹனத்தா²ய. ஸம்பராயிகானந்தி ததா²ரூபானங்யேவ அபாயது³க்க²ஸங்கா²தானங் ஸம்பராயே உப்பஜ்ஜனகஆஸவானங். படிகா⁴தாயாதி படிஸேத⁴னத்தா²ய. வேரானந்தி அகுஸலவேரானம்பி புக்³க³லவேரானம்பி. வஜ்ஜானந்தி தோ³ஸானங். தே ஏவ வா து³க்க²த⁴ம்மா வஜ்ஜனீயத்தா இத⁴ வஜ்ஜாதி அதி⁴ப்பேதா. ப⁴யானந்தி சித்துத்ராஸப⁴யானம்பி ப⁴யஹேதூனங் தேஸங்யேவ து³க்க²த⁴ம்மானம்பி. அகுஸலானந்தி அக்க²மட்டே²ன அகுஸலஸங்கா²தானங் து³க்க²த⁴ம்மானங். கி³ஹீனங் அனுகம்பாயாதி கி³ஹீஸு உஜ்ஜா²யந்தேஸு பஞ்ஞத்தஸிக்கா²பத³ங் கி³ஹீனங் அனுகம்பாய பஞ்ஞத்தங் நாம. பாபிச்சா²னங் பக்கு²பச்சே²தா³யாதி பாபிச்சா² பக்க²ங் நிஸ்ஸாய ஸங்க⁴ங் பி⁴ந்தெ³ய்யுந்தி தேஸங் பக்கு²பச்சே²த³னத்தா²ய. அப்பஸன்னானங் பஸாதா³யாதி புப்³பே³ அப்பஸன்னானம்பி பண்டி³தமனுஸ்ஸானங் ஸிக்கா²பத³பஞ்ஞத்திஸம்பத³ங் தி³ஸ்வா பஸாது³ப்பத்திஅத்தா²ய. பஸன்னானங் பி⁴ய்யோபா⁴வாயாதி பஸன்னானங் உபரூபரிபஸாத³பா⁴வாய. ஸத்³த⁴ம்மட்டி²தியாதி ஸத்³த⁴ம்மஸ்ஸ சிரட்டி²தத்த²ங். வினயானுக்³க³ஹாயாதி பஞ்சவித⁴ஸ்ஸாபி வினயஸ்ஸ அனுக்³க³ண்ஹனத்தா²ய.
201.Dveme, bhikkhave, atthavase paṭiccāti, bhikkhave, dve atthe nissāya dve kāraṇāni sandhāya. Sikkhāpadaṃ paññattanti sikkhākoṭṭhāso ṭhapito. Saṅghasuṭṭhutāyāti saṅghassa suṭṭhubhāvāya, ‘‘suṭṭhu, bhante’’ti vatvā sampaṭicchanatthāyāti attho. Saṅghaphāsutāyāti saṅghassa phāsuvihāratthāya. Dummaṅkūnanti dussīlānaṃ. Pesalānanti pīyasīlānaṃ. Diṭṭhadhammikānaṃ āsavānanti diṭṭhadhamme imasmiṃyeva attabhāve vītikkamapaccayā paṭiladdhabbānaṃ vadhabandhanādidukkhadhammasaṅkhātānaṃ āsavānaṃ. Saṃvarāyāti pidahanatthāya. Samparāyikānanti tathārūpānaṃyeva apāyadukkhasaṅkhātānaṃ samparāye uppajjanakaāsavānaṃ. Paṭighātāyāti paṭisedhanatthāya. Verānanti akusalaverānampi puggalaverānampi. Vajjānanti dosānaṃ. Te eva vā dukkhadhammā vajjanīyattā idha vajjāti adhippetā. Bhayānanti cittutrāsabhayānampi bhayahetūnaṃ tesaṃyeva dukkhadhammānampi. Akusalānanti akkhamaṭṭhena akusalasaṅkhātānaṃ dukkhadhammānaṃ. Gihīnaṃ anukampāyāti gihīsu ujjhāyantesu paññattasikkhāpadaṃ gihīnaṃ anukampāya paññattaṃ nāma. Pāpicchānaṃ pakkhupacchedāyāti pāpicchā pakkhaṃ nissāya saṅghaṃ bhindeyyunti tesaṃ pakkhupacchedanatthāya. Appasannānaṃ pasādāyāti pubbe appasannānampi paṇḍitamanussānaṃ sikkhāpadapaññattisampadaṃ disvā pasāduppattiatthāya. Pasannānaṃ bhiyyobhāvāyāti pasannānaṃ uparūparipasādabhāvāya. Saddhammaṭṭhitiyāti saddhammassa ciraṭṭhitatthaṃ. Vinayānuggahāyāti pañcavidhassāpi vinayassa anuggaṇhanatthāya.
202-230. பாதிமொக்க²ங் பஞ்ஞத்தந்தி பி⁴க்கு²பாதிமொக்க²ங் பி⁴க்கு²னிபாதிமொக்க²ந்தி து³வித⁴ங் பாதிமொக்க²ங் பஞ்ஞத்தங். பாதிமொக்கு²த்³தே³ஸோதி பி⁴க்கூ²னங் பஞ்ச, பி⁴க்கு²னீனங் சத்தாரோதி நவ பாதிமொக்கு²த்³தே³ஸா பஞ்ஞத்தா. பாதிமொக்க²ட்ட²பனந்தி உபோஸத²ட்ட²பனங். பவாரணா பஞ்ஞத்தாதி சாதுத்³த³ஸிகா பன்னரஸிகாதி த்³வே பவாரணா பஞ்ஞத்தா. பவாரணட்ட²பனங் பஞ்ஞத்தந்தி ஸாபத்திகஸ்ஸ பி⁴க்கு²னோ பவாரணா உத்தியா வத்தமானாய பவாரணட்ட²பனங் பஞ்ஞத்தங். தஜ்ஜனீயகம்மாதீ³ஸு பி⁴க்கூ² வாசாஸத்தீஹி விதுத³ந்தானங் பண்டு³கலோஹிதகானங் பி⁴க்கூ²னங் தஜ்ஜனீயகம்மங் (சூளவ॰ 1 ஆத³யோ) பஞ்ஞத்தங். பா³லஸ்ஸ அப்³யத்தஸ்ஸ ஸெய்யஸகஸ்ஸ பி⁴க்கு²னோ நியஸ்ஸகம்மங் பஞ்ஞத்தங். குலதூ³ஸகே அஸ்ஸஜிபுனப்³ப³ஸுகே பி⁴க்கூ² ஆரப்³ப⁴ பப்³பா³ஜனீயகம்மங் (சூளவ॰ 21 ஆத³யோ) பஞ்ஞத்தங். கி³ஹீனங் அக்கோஸகஸ்ஸ ஸுத⁴ம்மத்தே²ரஸ்ஸ படிஸாரணீயகம்மங் (சூளவ॰ 33 ஆத³யோ) பஞ்ஞத்தங். ஆபத்தியா அத³ஸ்ஸனாதீ³ஸு உக்கே²பனீயகம்மங் பஞ்ஞத்தங். க³ருகாபத்திங் ஆபன்னஸ்ஸ படிச்ச²ன்னாய ஆபத்தியா பரிவாஸதா³னங் பஞ்ஞத்தங். பரிவாஸே அந்தராபத்திங் ஆபன்னஸ்ஸ மூலாய படிகஸ்ஸனங் பஞ்ஞத்தங். படிச்ச²ன்னாயபி அப்படிச்ச²ன்னாயபி ஆபத்தியா மானத்ததா³னங் பஞ்ஞத்தங். சிண்ணமானத்தஸ்ஸ அப்³பா⁴னங் பஞ்ஞத்தங். ஸம்மா வத்தந்தஸ்ஸ ஓஸாரணீயங் பஞ்ஞத்தங். அஸம்மாவத்தனாதீ³ஸு நிஸ்ஸாரணீயங் பஞ்ஞத்தங்.
202-230.Pātimokkhaṃ paññattanti bhikkhupātimokkhaṃ bhikkhunipātimokkhanti duvidhaṃ pātimokkhaṃ paññattaṃ. Pātimokkhuddesoti bhikkhūnaṃ pañca, bhikkhunīnaṃ cattāroti nava pātimokkhuddesā paññattā. Pātimokkhaṭṭhapananti uposathaṭṭhapanaṃ. Pavāraṇā paññattāti cātuddasikā pannarasikāti dve pavāraṇā paññattā. Pavāraṇaṭṭhapanaṃ paññattanti sāpattikassa bhikkhuno pavāraṇā uttiyā vattamānāya pavāraṇaṭṭhapanaṃ paññattaṃ. Tajjanīyakammādīsu bhikkhū vācāsattīhi vitudantānaṃ paṇḍukalohitakānaṃ bhikkhūnaṃ tajjanīyakammaṃ (cūḷava. 1 ādayo) paññattaṃ. Bālassa abyattassa seyyasakassa bhikkhuno niyassakammaṃ paññattaṃ. Kuladūsake assajipunabbasuke bhikkhū ārabbha pabbājanīyakammaṃ (cūḷava. 21 ādayo) paññattaṃ. Gihīnaṃ akkosakassa sudhammattherassa paṭisāraṇīyakammaṃ (cūḷava. 33 ādayo) paññattaṃ. Āpattiyā adassanādīsu ukkhepanīyakammaṃ paññattaṃ. Garukāpattiṃ āpannassa paṭicchannāya āpattiyā parivāsadānaṃ paññattaṃ. Parivāse antarāpattiṃ āpannassa mūlāya paṭikassanaṃ paññattaṃ. Paṭicchannāyapi appaṭicchannāyapi āpattiyā mānattadānaṃ paññattaṃ. Ciṇṇamānattassa abbhānaṃ paññattaṃ. Sammā vattantassa osāraṇīyaṃ paññattaṃ. Asammāvattanādīsu nissāraṇīyaṃ paññattaṃ.
ஏஹிபி⁴க்கூ²பஸம்பதா³ ஸரணக³மனூபஸம்பதா³ ஓவாதூ³பஸம்பதா³ பஞ்ஹாப்³யாகரணூபஸம்பதா³ ஞத்திசதுத்த²கம்மூபஸம்பதா³ க³ருத⁴ம்மூபஸம்பதா³ உப⁴தோஸங்கே⁴ உபஸம்பதா³ தூ³தேன உபஸம்பதா³தி அட்ட²விதா⁴ உபஸம்பதா³ பஞ்ஞத்தா. ஞத்திகம்மங் நவ டா²னானி க³ச்ச²தீதி ஏவங் நவட்டா²னிகங் ஞத்திகம்மங் பஞ்ஞத்தங். ஞத்திது³தியகம்மங் ஸத்த டா²னானி க³ச்ச²தீதி ஏவங் ஸத்தட்டா²னிகமேவ ஞத்திது³தியகம்மங் பஞ்ஞத்தங். ஞத்திசதுத்த²கம்மங் ஸத்த டா²னானி க³ச்ச²தீதி ஏவங் ஸத்தட்டா²னிகமேவ ஞத்திசதுத்த²கம்மங் பஞ்ஞத்தங். பட²மபாராஜிகாதீ³னங் பட²மபஞ்ஞத்தி அபஞ்ஞத்தே பஞ்ஞத்தங். தேஸங்யேவ அனுபஞ்ஞத்தி பஞ்ஞத்தே அனுபஞ்ஞத்தங். த⁴ம்மஸம்முக²தா வினயஸம்முக²தா ஸங்க⁴ஸம்முக²தா புக்³க³லஸம்முக²தாதி இமஸ்ஸ சதுப்³பி³த⁴ஸ்ஸ ஸம்முகீ²பா⁴வஸ்ஸ வஸேன ஸம்முகா²வினயோ பஞ்ஞத்தோ. ஸதிவேபுல்லப்பத்தஸ்ஸ கீ²ணாஸவஸ்ஸ அசோத³னத்தா²ய ஸதிவினயோ பஞ்ஞத்தோ. உம்மத்தகஸ்ஸ பி⁴க்கு²னோ அமூள்ஹவினயோ பஞ்ஞத்தோ. அப்படிஞ்ஞாய சுதி³தகஸ்ஸ ஆபத்தியா அதரணத்த²ங் படிஞ்ஞாதகரணங் பஞ்ஞத்தங். ப³ஹுதரானங் த⁴ம்மவாதீ³னங் லத்³தி⁴ங் க³ஹெத்வா அதி⁴கரணவூபஸமனத்த²ங். யேபு⁴ய்யஸிகா பஞ்ஞத்தா. பாபுஸ்ஸன்னஸ்ஸ புக்³க³லஸ்ஸ நிக்³க³ண்ஹனத்த²ங் தஸ்ஸபாபியஸிகா பஞ்ஞத்தா. ப⁴ண்ட³னாதி³வஸேன ப³ஹுங் அஸ்ஸாமணகங் கத்வா ஆபத்திங் ஆபன்னானங் பி⁴க்கூ²னங் ட²பெத்வா து²ல்லவஜ்ஜங் ட²பெத்வா கி³ஹிபடிஸங்யுத்தஞ்ச அவஸேஸாபத்தீனங் வூபஸமனத்தா²ய திணவத்தா²ரகோ பஞ்ஞத்தோ.
Ehibhikkhūpasampadā saraṇagamanūpasampadā ovādūpasampadā pañhābyākaraṇūpasampadā ñatticatutthakammūpasampadā garudhammūpasampadā ubhatosaṅghe upasampadā dūtena upasampadāti aṭṭhavidhā upasampadā paññattā. Ñattikammaṃ nava ṭhānāni gacchatīti evaṃ navaṭṭhānikaṃ ñattikammaṃ paññattaṃ. Ñattidutiyakammaṃ satta ṭhānāni gacchatīti evaṃ sattaṭṭhānikameva ñattidutiyakammaṃ paññattaṃ. Ñatticatutthakammaṃ satta ṭhānāni gacchatīti evaṃ sattaṭṭhānikameva ñatticatutthakammaṃ paññattaṃ. Paṭhamapārājikādīnaṃ paṭhamapaññatti apaññatte paññattaṃ. Tesaṃyeva anupaññatti paññatte anupaññattaṃ. Dhammasammukhatā vinayasammukhatā saṅghasammukhatā puggalasammukhatāti imassa catubbidhassa sammukhībhāvassa vasena sammukhāvinayo paññatto. Sativepullappattassa khīṇāsavassa acodanatthāya sativinayo paññatto. Ummattakassa bhikkhuno amūḷhavinayo paññatto. Appaṭiññāya cuditakassa āpattiyā ataraṇatthaṃ paṭiññātakaraṇaṃ paññattaṃ. Bahutarānaṃ dhammavādīnaṃ laddhiṃ gahetvā adhikaraṇavūpasamanatthaṃ. Yebhuyyasikā paññattā. Pāpussannassa puggalassa niggaṇhanatthaṃ tassapāpiyasikā paññattā. Bhaṇḍanādivasena bahuṃ assāmaṇakaṃ katvā āpattiṃ āpannānaṃ bhikkhūnaṃ ṭhapetvā thullavajjaṃ ṭhapetvā gihipaṭisaṃyuttañca avasesāpattīnaṃ vūpasamanatthāya tiṇavatthārako paññatto.
வினயபெய்யாலங் நிட்டி²தங்.
Vinayapeyyālaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. வினயபெய்யாலங் • 3. Vinayapeyyālaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. வினயபெய்யாலங் • 3. Vinayapeyyālaṃ
