| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
வினீதவத்து²வண்ணனா
Vinītavatthuvaṇṇanā
223. ஸெக்க²பூ⁴மியந்தி இமினா ஜா²னபூ⁴மிம்பி ஸங்க³ண்ஹாதி. திண்ணங் விவேகானந்தி காயசித்தஉபதி⁴விவேகானங்.
223.Sekkhabhūmiyanti iminā jhānabhūmimpi saṅgaṇhāti. Tiṇṇaṃ vivekānanti kāyacittaupadhivivekānaṃ.
பிண்டா³ய சரணஸ்ஸ போ⁴ஜனபரியோஸானத்தா வுத்தங் ‘‘யாவ போ⁴ஜனபரியோஸான’’ந்தி. பு⁴த்வா ஆக³ச்ச²ந்தஸ்ஸபி புன வுத்தனயேனேவ ஸம்பா⁴வனிச்சா²ய சீவரஸண்ட²பனாதீ³னி கரொந்தஸ்ஸ து³க்கடமேவ.
Piṇḍāya caraṇassa bhojanapariyosānattā vuttaṃ ‘‘yāva bhojanapariyosāna’’nti. Bhutvā āgacchantassapi puna vuttanayeneva sambhāvanicchāya cīvarasaṇṭhapanādīni karontassa dukkaṭameva.
225. ஆராத⁴னீயோ, ஆவுஸோ, த⁴ம்மோ ஆரத்³த⁴வீரியேனாதி வத்து²த்³வயங் ஏகஸதி³ஸம்பி த்³வீஹி பி⁴க்கூ²ஹி விஸுங் விஸுங் ஆரோசிதத்தா ப⁴க³வதா வினிச்சி²னிதங் ஸப்³ப³ம்பி வினீதவத்தூ²ஸு ஆரோபேதப்³ப³ந்தி பாளியங் ஆரோபிதங்.
225.Ārādhanīyo, āvuso, dhammo āraddhavīriyenāti vatthudvayaṃ ekasadisampi dvīhi bhikkhūhi visuṃ visuṃ ārocitattā bhagavatā vinicchinitaṃ sabbampi vinītavatthūsu āropetabbanti pāḷiyaṃ āropitaṃ.
226. பஸாத³ப⁴ஞ்ஞந்தி கேவலங் பஸாத³மத்தேன ப⁴ணனங், ந பன ‘‘ஸபா⁴வதோ ஏதே அரஹந்தோயேவா’’தி சிந்தெத்வா. தேனேவெத்த² அனாபத்தி வுத்தா. யதி³ பன ‘‘ஏதே ஸபா⁴வதோ அரஹந்தோயேவா’’தி மஞ்ஞமானோ ‘‘ஆயந்து பொ⁴ந்தோ அரஹந்தோ’’திஆதீ³னி வத³தி, ந ஸம்படிச்சி²தப்³ப³ங்.
226.Pasādabhaññanti kevalaṃ pasādamattena bhaṇanaṃ, na pana ‘‘sabhāvato ete arahantoyevā’’ti cintetvā. Tenevettha anāpatti vuttā. Yadi pana ‘‘ete sabhāvato arahantoyevā’’ti maññamāno ‘‘āyantu bhonto arahanto’’tiādīni vadati, na sampaṭicchitabbaṃ.
227. பத³ஸா க³மனங் ஸந்தா⁴ய கதிகாய கதத்தா ‘‘யானேன வா’’திஆதி³மாஹ. தத்த² விஜ்ஜாமயித்³தி⁴ங் ஸந்தா⁴ய ‘‘இத்³தி⁴யா’’தி வுத்தங். அஞ்ஞமஞ்ஞங் ரக்க²ந்தீதி ‘‘யோ இமம்ஹா ஆவாஸா பட²மங் பக்கமிஸ்ஸதி, தங் மயங் ‘அரஹா’தி ஜானிஸ்ஸாமா’’தி ஏவங் கதிகாய கதத்தா அபுப்³பா³சரிமங் அஸுத்³த⁴சித்தேன க³ச்ச²ந்தாபி ஸஹ நிக்க²ந்தபா⁴வதோ அஞ்ஞமஞ்ஞங் ரக்க²ந்தி. கேசி பன ‘‘ஹத்த²பாஸங் அவிஜஹித்வா அஞ்ஞமஞ்ஞஸ்ஸ ஹத்த²ங் க³ண்ஹந்தோ விய க³ச்ச²ந்தோபி ‘உட்டே²த² க³ச்சா²ம, ஏத² க³ச்சா²மா’தி ஏவங் ஸங்வித³ஹித்வா க³மனே புப்³பா³பரங் க³ச்ச²ந்தோபி நாபஜ்ஜதீ’’தி வத³ந்தி. ஏதங் பன அத⁴ம்மிகங் கதிகவத்தந்தி ‘‘இத⁴ அரஹந்தோயேவ வஸந்தூதி யதி³ பி⁴க்கூ² கதிகங் கரொந்தி, ஏதங் அத⁴ம்மிகங் கதிகவத்த’’ந்தி சூளக³ண்டி²பதே³ வுத்தங். ஹெட்டா² வுத்தங் பன ஸப்³ப³ம்பி கதிகவத்தங் ஸந்தா⁴ய ஏதங் வுத்தந்தி அம்ஹாகங் க²ந்தி, வீமங்ஸித்வா க³ஹேதப்³ப³ங். நானாவேரஜ்ஜகாதி நானாஜனபத³வாஸினோ. ஸங்க⁴லாபோ⁴தி யதா²வுட்³ட⁴ங் அத்தனோ பாபுணனகொட்டா²ஸோ. அயஞ்ச படிக்கே²போ இமினாவ நீஹாரேன ப³ஹிஸீமட்டா²னங் அவிஸேஸேன ஸங்க⁴லாப⁴ஸ்ஸ ஸாமிபா⁴வாபாத³னங் ஸந்தா⁴ய கதோ. விஸேஸதோ பன ப³ஹிஸீமட்டா²னம்பி பரிச்சி²ந்தி³த்வா ஏகேககொட்டா²ஸதோ ‘‘எத்தகங் தா³துங், ஈதி³ஸங் வா தா³துங், எத்தகானங் வா தா³துங், ஈதி³ஸஸ்ஸ வா தா³துங் ருச்சதி ஸங்க⁴ஸ்ஸா’’தி அபலோகனகம்மங் கத்வா தா³துங் வட்டதி.
227. Padasā gamanaṃ sandhāya katikāya katattā ‘‘yānena vā’’tiādimāha. Tattha vijjāmayiddhiṃ sandhāya ‘‘iddhiyā’’ti vuttaṃ. Aññamaññaṃ rakkhantīti ‘‘yo imamhā āvāsā paṭhamaṃ pakkamissati, taṃ mayaṃ ‘arahā’ti jānissāmā’’ti evaṃ katikāya katattā apubbācarimaṃ asuddhacittena gacchantāpi saha nikkhantabhāvato aññamaññaṃ rakkhanti. Keci pana ‘‘hatthapāsaṃ avijahitvā aññamaññassa hatthaṃ gaṇhanto viya gacchantopi ‘uṭṭhetha gacchāma, etha gacchāmā’ti evaṃ saṃvidahitvā gamane pubbāparaṃ gacchantopi nāpajjatī’’ti vadanti. Etaṃ pana adhammikaṃ katikavattanti ‘‘idha arahantoyeva vasantūti yadi bhikkhū katikaṃ karonti, etaṃ adhammikaṃ katikavatta’’nti cūḷagaṇṭhipade vuttaṃ. Heṭṭhā vuttaṃ pana sabbampi katikavattaṃ sandhāya etaṃ vuttanti amhākaṃ khanti, vīmaṃsitvā gahetabbaṃ. Nānāverajjakāti nānājanapadavāsino. Saṅghalābhoti yathāvuḍḍhaṃ attano pāpuṇanakoṭṭhāso. Ayañca paṭikkhepo imināva nīhārena bahisīmaṭṭhānaṃ avisesena saṅghalābhassa sāmibhāvāpādanaṃ sandhāya kato. Visesato pana bahisīmaṭṭhānampi paricchinditvā ekekakoṭṭhāsato ‘‘ettakaṃ dātuṃ, īdisaṃ vā dātuṃ, ettakānaṃ vā dātuṃ, īdisassa vā dātuṃ ruccati saṅghassā’’ti apalokanakammaṃ katvā dātuṃ vaṭṭati.
228. ஆயஸ்மா ச லக்க²ணோதிஆதீ³ஸு கோ பனாயஸ்மா லக்க²ணோ, கஸ்மா சஸ்ஸ லக்க²ணோதி நாமங் அஹோஸி, கோ சாயஸ்மா மஹாமொக்³க³ல்லானோ, கஸ்மா ச ஸிதங் பாத்வாகாஸீதி தங் ஸப்³ப³ங் பகாஸேதுங் ‘‘ய்வாய’’ந்திஆதி³ ஆரத்³த⁴ங். லக்க²ணஸம்பன்னேனாதி புரிஸலக்க²ணஸம்பன்னேன. ப்³ரஹ்மஸமேனாதி ப்³ரஹ்மத்தபா⁴வஸமேன. ஈஸகங் ஹஸிதங் ஸிதந்தி வுச்சதீதி ஆஹ ‘‘மந்த³ஹஸித’’ந்தி. அட்டி²கஸங்க²லிகந்தி நயித³ங் அவிஞ்ஞாணகங் அட்டி²ஸங்க²லிகமத்தங், அத² கோ² ஏகோ பேதோதி ஆஹ ‘‘பேதலோகே நிப்³ப³த்தங் ஸத்த’’ந்தி. ஏதே அத்தபா⁴வாதி பேதத்தபா⁴வா. ந ஆபாத²ங் ஆக³ச்ச²ந்தீதி தே³வத்தபா⁴வா விய பகதியா ஆபாத²ங் ந ஆக³ச்ச²ந்தி. தேஸங் பன ருசியா ஆபாத²ங் ஆக³ச்செ²ய்யுங். மனுஸ்ஸானங் து³க்கா²பி⁴பூ⁴தானங் அனாத²பா⁴வத³ஸ்ஸனபத³ட்டா²னா கருணாதி ஆஹ ‘‘காருஞ்ஞே கத்தப்³பே³’’தி. அத்தனோ ச ஸம்பத்திங் பு³த்³த⁴ஞாணஸ்ஸ ச ஸம்பத்திந்தி பச்சேகங் ஸம்பத்தி-ஸத்³தோ³ யோஜேதப்³போ³. தது³ப⁴யங் விபா⁴வேதுங் ‘‘தஞ்ஹீ’’திஆதி³ வுத்தங். தத்த² ‘‘அத்தனோ ச ஸம்பத்திங் அனுஸ்ஸரித்வா ஸிதங் பாத்வாகாஸீ’’தி பத³ங் ஆனெத்வா ஸம்ப³ந்தி⁴தப்³ப³ங். த⁴ம்மதா⁴தூதி ஸப்³ப³ஞ்ஞுதஞ்ஞாணங் ஸந்தா⁴ய வத³தி, த⁴ம்மதா⁴தூதி வா த⁴ம்மானங் ஸபா⁴வோ. உபபத்தீதி ஜாதி. உபபத்திஸீஸேன ஹி ததா²ரூபங் அத்தபா⁴வங் வத³தி. து³ஸ்ஸத்³தா⁴பயா ஹொந்தி, தத³ஸ்ஸ தேஸங் தீ³க⁴ரத்தங் அஹிதாய து³க்கா²ய. து³ஸ்ஸத்³தா⁴பயாதி இத³ஞ்ச ந லக்க²ணத்தே²ரங் ஸந்தா⁴ய வுத்தங், யே பன ஸுணந்தி ‘‘ஏவங் கிர வுத்த’’ந்தி, தே ஸந்தா⁴ய. அத² லக்க²ணத்தே²ரோ கஸ்மா ந அத்³த³ஸ, கிமஸ்ஸ தி³ப்³ப³சக்கு² நத்தீ²தி? நோ நத்தி², மஹாமொக்³க³ல்லானோ பன ஆவஜ்ஜெந்தோ அத்³த³ஸ, இதரோ அனாவஜ்ஜனேன ந அத்³த³ஸ.
228.Āyasmā ca lakkhaṇotiādīsu ko panāyasmā lakkhaṇo, kasmā cassa lakkhaṇoti nāmaṃ ahosi, ko cāyasmā mahāmoggallāno, kasmā ca sitaṃ pātvākāsīti taṃ sabbaṃ pakāsetuṃ ‘‘yvāya’’ntiādi āraddhaṃ. Lakkhaṇasampannenāti purisalakkhaṇasampannena. Brahmasamenāti brahmattabhāvasamena. Īsakaṃ hasitaṃ sitanti vuccatīti āha ‘‘mandahasita’’nti. Aṭṭhikasaṅkhalikanti nayidaṃ aviññāṇakaṃ aṭṭhisaṅkhalikamattaṃ, atha kho eko petoti āha ‘‘petaloke nibbattaṃ satta’’nti. Ete attabhāvāti petattabhāvā. Na āpāthaṃ āgacchantīti devattabhāvā viya pakatiyā āpāthaṃ na āgacchanti. Tesaṃ pana ruciyā āpāthaṃ āgaccheyyuṃ. Manussānaṃ dukkhābhibhūtānaṃ anāthabhāvadassanapadaṭṭhānā karuṇāti āha ‘‘kāruññe kattabbe’’ti. Attano ca sampattiṃ buddhañāṇassa ca sampattinti paccekaṃ sampatti-saddo yojetabbo. Tadubhayaṃ vibhāvetuṃ ‘‘tañhī’’tiādi vuttaṃ. Tattha ‘‘attano ca sampattiṃ anussaritvā sitaṃ pātvākāsī’’ti padaṃ ānetvā sambandhitabbaṃ. Dhammadhātūti sabbaññutaññāṇaṃ sandhāya vadati, dhammadhātūti vā dhammānaṃ sabhāvo. Upapattīti jāti. Upapattisīsena hi tathārūpaṃ attabhāvaṃ vadati. Dussaddhāpayā honti, tadassa tesaṃ dīgharattaṃ ahitāya dukkhāya. Dussaddhāpayāti idañca na lakkhaṇattheraṃ sandhāya vuttaṃ, ye pana suṇanti ‘‘evaṃ kira vutta’’nti, te sandhāya. Atha lakkhaṇatthero kasmā na addasa, kimassa dibbacakkhu natthīti? No natthi, mahāmoggallāno pana āvajjento addasa, itaro anāvajjanena na addasa.
விதுடெ³ந்தீதி வினிவிஜ்ஜி²த்வா டெ³ந்தி, அஸிதா⁴ரூபமேஹி திகி²ணேஹி லோஹதுண்ட³கேஹி விஜ்ஜி²த்வா விஜ்ஜி²த்வா இதோ சிதோ ச க³ச்ச²ந்தீதி அத்தோ². தேனாஹ ‘‘வினிவிஜ்ஜி²த்வா க³ச்ச²ந்தீ’’தி. ‘‘விதுத³ந்தீ’’தி வா பாடோ². பா²ஸுளந்தரிகாஹீதி பு⁴ம்மத்தே² நிஸ்ஸக்கவசனங். லோஹதுண்ட³கேஹீதி லோஹஸலாகாஸதி³ஸேஹி, காளலோஹமயேஹேவ வா துண்ட³கேஹி. பஸாது³ஸ்ஸதா³தி இமினா அட்டி²ஸங்கா⁴தமத்தங் ஹுத்வா பஞ்ஞாயமானானம்பி காயப்பஸாத³ஸ்ஸ ப³லவபா⁴வங் த³ஸ்ஸேதி. பக்கக³ண்ட³ஸதி³ஸாதி இமினா பன அதிவிய முது³ஸபா⁴வதங் த³ஸ்ஸேதி. அச்ச²ரியங் வதாதி க³ரஹனச்ச²ரியங் நாமேதங்.
Vituḍentīti vinivijjhitvā ḍenti, asidhārūpamehi tikhiṇehi lohatuṇḍakehi vijjhitvā vijjhitvā ito cito ca gacchantīti attho. Tenāha ‘‘vinivijjhitvā gacchantī’’ti. ‘‘Vitudantī’’ti vā pāṭho. Phāsuḷantarikāhīti bhummatthe nissakkavacanaṃ. Lohatuṇḍakehīti lohasalākāsadisehi, kāḷalohamayeheva vā tuṇḍakehi. Pasādussadāti iminā aṭṭhisaṅghātamattaṃ hutvā paññāyamānānampi kāyappasādassa balavabhāvaṃ dasseti. Pakkagaṇḍasadisāti iminā pana ativiya mudusabhāvataṃ dasseti. Acchariyaṃ vatāti garahanacchariyaṃ nāmetaṃ.
சக்கு²பூ⁴தாதி ஸம்பத்ததி³ப்³ப³சக்கு²கா, லோகஸ்ஸ சக்கு²பூ⁴தாதி ஏவங் வா எத்த² அத்தோ² த³ட்ட²ப்³போ³. யத்ராதி ஹேதுஅத்தே² நிபாதோதி ஆஹ ‘‘யத்ராதி காரணவசன’’ந்தி. அப்பமாணே ஸத்தனிகாயே, தே ச கோ² விபா⁴கே³ன காமப⁴வாதி³பே⁴தே³ ப⁴வே, நிரயாதி³பே⁴தா³ க³தியோ, நானத்தகாயனானத்தஸஞ்ஞீஆதி³விஞ்ஞாணட்டி²தியோ, ததா²ரூபே ஸத்தாவாஸே ச ஸப்³ப³ஞ்ஞுதஞ்ஞாணஞ்ச மே உபனேதுங் பச்சக்க²ங் கரொந்தேன.
Cakkhubhūtāti sampattadibbacakkhukā, lokassa cakkhubhūtāti evaṃ vā ettha attho daṭṭhabbo. Yatrāti hetuatthe nipātoti āha ‘‘yatrāti kāraṇavacana’’nti. Appamāṇe sattanikāye, te ca kho vibhāgena kāmabhavādibhede bhave, nirayādibhedā gatiyo, nānattakāyanānattasaññīādiviññāṇaṭṭhitiyo, tathārūpe sattāvāse ca sabbaññutaññāṇañca me upanetuṃ paccakkhaṃ karontena.
கோ³கா⁴தகோதி கு³ன்னங் அபி⁴ண்ஹங் ஹனநகோ. தேனாஹ ‘‘வதி⁴த்வா வதி⁴த்வா’’தி. தஸ்ஸாதி கு³ன்னங் ஹனநகம்மஸ்ஸ. அபராபரியகம்மஸ்ஸாதி அபராபரியவேத³னீயகம்மஸ்ஸ. ப³லவதா கோ³கா⁴தககம்மேன விபாகே தீ³யமானே அலத்³தோ⁴காஸங் அபராபரியவேத³னீயங், தஸ்மிங் விபக்கவிபாகே இதா³னி லத்³தோ⁴காஸங் ‘‘அவஸேஸகம்ம’’ந்தி வுத்தங். கம்மஸபா⁴க³தாயாதி கம்மஸ்ஸ ஸபா⁴க³பா⁴வேன ஸதி³ஸபா⁴வேன. ஆரம்மணஸபா⁴க³தாயாதி ஆரம்மணஸ்ஸ ஸபா⁴க³பா⁴வேன ஸதி³ஸபா⁴வேன. யாதி³ஸே ஹி ஆரம்மணே புப்³பே³ தங் கம்மங் தஸ்ஸ ச விபாகோ பவத்தோ, தாதி³ஸேயேவ ஆரம்மணே இத³ங் கம்மங் இமஸ்ஸ விபாகோ ச பவத்தோதி கத்வா வுத்தங் ‘‘தஸ்ஸேவ கம்மஸ்ஸ விபாகாவஸேஸேனா’’தி. ப⁴வதி ஹி தங்ஸதி³ஸேபி தப்³போ³ஹாரோ யதா² ஸோ ஏவ தித்திரோ, தானியேவ ஓஸதா⁴னீதி. யஸ்மா கம்மஸரிக்க²கவிஸயே ‘‘கம்மங் வா கம்மனிமித்தங் வா’’தி த்³வயமேவ வுத்தங், யஸ்மா ச க³தினிமித்தங் விய கம்மங் கம்மனிமித்தஞ்ச கம்மதோ பி⁴ன்னங் விஸுங் ஹுத்வா ந திட்ட²தி, தஸ்மா ஸரிக்க²கவிபாகதா³னஸ்ஸ காரணபா⁴வதோ யத்த² கம்மஸரிக்க²கேன விபாகேன ப⁴விதப்³ப³ங், தத்த² கம்மங் வா கம்மனிமித்தங் வா க³ஹெத்வா படிஸந்தி⁴ ஹோதீதி வத³ந்தி. தேனேவாஹ – ‘‘தஸ்ஸ கிர…பே॰… நிமித்தங் அஹோஸீ’’தி. தத்த² நிமித்தங் அஹோஸீதி புப்³பே³ கதூபசிதஸ்ஸ பேதூபபத்தினிப்³ப³த்தனவஸேன கதோகாஸஸ்ஸ தஸ்ஸ கம்மஸ்ஸ நிமித்தபூ⁴தங் இதா³னி ததா² உபட்ட²ஹந்தங் தஸ்ஸ விபாகஸ்ஸ நிமித்தங் ஆரம்மணங் அஹோஸி. ஸோதி கோ³கா⁴தகோ. அட்டி²கஸங்க²லிகபேதோ ஜாதோ கம்மஸரிக்க²கவிபாகவஸேன.
Goghātakoti gunnaṃ abhiṇhaṃ hananako. Tenāha ‘‘vadhitvā vadhitvā’’ti. Tassāti gunnaṃ hananakammassa. Aparāpariyakammassāti aparāpariyavedanīyakammassa. Balavatā goghātakakammena vipāke dīyamāne aladdhokāsaṃ aparāpariyavedanīyaṃ, tasmiṃ vipakkavipāke idāni laddhokāsaṃ ‘‘avasesakamma’’nti vuttaṃ. Kammasabhāgatāyāti kammassa sabhāgabhāvena sadisabhāvena. Ārammaṇasabhāgatāyāti ārammaṇassa sabhāgabhāvena sadisabhāvena. Yādise hi ārammaṇe pubbe taṃ kammaṃ tassa ca vipāko pavatto, tādiseyeva ārammaṇe idaṃ kammaṃ imassa vipāko ca pavattoti katvā vuttaṃ ‘‘tasseva kammassa vipākāvasesenā’’ti. Bhavati hi taṃsadisepi tabbohāro yathā so eva tittiro, tāniyeva osadhānīti. Yasmā kammasarikkhakavisaye ‘‘kammaṃ vā kammanimittaṃ vā’’ti dvayameva vuttaṃ, yasmā ca gatinimittaṃ viya kammaṃ kammanimittañca kammato bhinnaṃ visuṃ hutvā na tiṭṭhati, tasmā sarikkhakavipākadānassa kāraṇabhāvato yattha kammasarikkhakena vipākena bhavitabbaṃ, tattha kammaṃ vā kammanimittaṃ vā gahetvā paṭisandhi hotīti vadanti. Tenevāha – ‘‘tassa kira…pe… nimittaṃ ahosī’’ti. Tattha nimittaṃ ahosīti pubbe katūpacitassa petūpapattinibbattanavasena katokāsassa tassa kammassa nimittabhūtaṃ idāni tathā upaṭṭhahantaṃ tassa vipākassa nimittaṃ ārammaṇaṃ ahosi. Soti goghātako. Aṭṭhikasaṅkhalikapeto jāto kammasarikkhakavipākavasena.
229. பேஸியோ கத்வாதி கா³விங் வதி⁴த்வா வதி⁴த்வா கோ³மங்ஸங் பா²லெத்வா பேஸியோ கத்வா. ஸுக்கா²பெத்வாதி காலந்தரங் ட²பனத்த²ங் ஸுக்கா²பெத்வா. ஸுக்கா²பிதமங்ஸபேஸீனஞ்ஹி வல்லூரஸமஞ்ஞாதி. நிப்பக்க²சம்மேதி விக³தபக்க²சம்மே. உரப்³பே⁴ ஹந்தீதி ஓரப்³பி⁴கோ. ஏளகேதி அஜே. நிவாபபுட்டே²தி அத்தனா தி³ன்னநிவாபேன போஸிதே அஸினா வதி⁴த்வா வதி⁴த்வா விக்கிணந்தோ. ஏகங் மிக³ந்தி தீ³பகமிக³ங். காரணாஹீதி யாதனாஹி. ஞத்வாதி கம்மட்டா²னங் ஞத்வா. பேஸுஞ்ஞுபஸங்ஹாரவஸேன இதோ ஸுதங் அமுத்ர, அமுத்ர வா ஸுதங் இத⁴ ஸூசேதீதி ஸூசகோ. அனயப்³யஸனங் பாபேஸி மனுஸ்ஸேதி ஸம்ப³ந்தோ⁴.
229.Pesiyo katvāti gāviṃ vadhitvā vadhitvā gomaṃsaṃ phāletvā pesiyo katvā. Sukkhāpetvāti kālantaraṃ ṭhapanatthaṃ sukkhāpetvā. Sukkhāpitamaṃsapesīnañhi vallūrasamaññāti. Nippakkhacammeti vigatapakkhacamme. Urabbhe hantīti orabbhiko. Eḷaketi aje. Nivāpapuṭṭheti attanā dinnanivāpena posite asinā vadhitvā vadhitvā vikkiṇanto. Ekaṃ miganti dīpakamigaṃ. Kāraṇāhīti yātanāhi. Ñatvāti kammaṭṭhānaṃ ñatvā. Pesuññupasaṃhāravasena ito sutaṃ amutra, amutra vā sutaṃ idha sūcetīti sūcako. Anayabyasanaṃ pāpesi manusseti sambandho.
வினிச்ச²யாமச்சோதி ரஞ்ஞா அட்³ட³கரணே ட²பிதோ வினிச்ச²யமஹாமத்தோ. ஸோ ஹி கா³மஜனகாயங் கூடட்டே²ன வஞ்சேதீதி ‘‘கா³மகூடோ’’தி வுச்சதி. கேசி ‘‘தாதி³ஸோயேவ கா³மஜெட்ட²கோ கா³மகூடோ’’தி வத³ந்தி. ஸமேன ப⁴விதப்³ப³ங் த⁴ம்மட்டோ²தி வத்தப்³ப³தோ. ரஹஸ்ஸங்கே³ நிஸீத³னவஸேன விஸமா நிஸஜ்ஜா அஹோஸி. பு²ஸந்தோதி தெ²ய்யாய பு²ஸந்தோ.
Vinicchayāmaccoti raññā aḍḍakaraṇe ṭhapito vinicchayamahāmatto. So hi gāmajanakāyaṃ kūṭaṭṭhena vañcetīti ‘‘gāmakūṭo’’ti vuccati. Keci ‘‘tādisoyeva gāmajeṭṭhako gāmakūṭo’’ti vadanti. Samena bhavitabbaṃ dhammaṭṭhoti vattabbato. Rahassaṅge nisīdanavasena visamā nisajjā ahosi. Phusantoti theyyāya phusanto.
230. அனிஸ்ஸரோதி மாதுகா³மோ ஸஸாமிகோ அத்தனோ ப²ஸ்ஸே அனிஸ்ஸரோ. த⁴ங்ஸித்வாதி ப⁴ஸ்ஸித்வா அபக³ந்த்வா. மங்க³னவஸேன உலதீதி மங்கு³லி, விரூபபீ³ப⁴ச்ச²பா⁴வேன பவத்ததீதி அத்தோ². தேனாஹ ‘‘விரூபங் து³த்³த³ஸிகங் பீ³ப⁴ச்ச²’’ந்தி.
230.Anissaroti mātugāmo sasāmiko attano phasse anissaro. Dhaṃsitvāti bhassitvā apagantvā. Maṅganavasena ulatīti maṅguli, virūpabībhacchabhāvena pavattatīti attho. Tenāha ‘‘virūpaṃ duddasikaṃ bībhaccha’’nti.
உத்³த⁴ங் உத்³த⁴ங் அக்³கி³னா பக்கஸரீரதாய உப்பக்கங், ஹெட்ட²தோ பக்³க⁴ரணவஸேன கிலின்னஸரீரதாய ஓகிலினீ, இதோ சிதோ ச அங்கா³ரஸம்பரிகிண்ணதாய ஓகிரினீ. தேனாஹ ‘‘ஸா கிரா’’திஆதி³. அங்கா³ரசிதகேதி அங்கா³ரஸஞ்சயே. ஸரீரதோ பக்³க⁴ரந்தி அஸுசிது³க்³க³ந்த⁴ஜேகு³ச்சா²னி ஸேத³க³தானி. தஸ்ஸ கிர ரஞ்ஞோதி காலிங்க³ஸ்ஸ ரஞ்ஞோ. நாடகினீதி நச்சனகிச்சே அதி⁴க³தா இத்தீ². ஸேத³ந்தி ஸேத³னங், தாபனந்தி அத்தோ².
Uddhaṃ uddhaṃ agginā pakkasarīratāya uppakkaṃ, heṭṭhato paggharaṇavasena kilinnasarīratāya okilinī, ito cito ca aṅgārasamparikiṇṇatāya okirinī. Tenāha ‘‘sā kirā’’tiādi. Aṅgāracitaketi aṅgārasañcaye. Sarīrato paggharanti asuciduggandhajegucchāni sedagatāni. Tassa kira raññoti kāliṅgassa rañño. Nāṭakinīti naccanakicce adhigatā itthī. Sedanti sedanaṃ, tāpananti attho.
அஸீஸகங் கப³ந்த⁴ங் ஹுத்வா நிப்³ப³த்தி கம்மாயூஹனகாலே ததா² நிமித்தக்³க³ஹணபரிசயதோ. லாமகபி⁴க்கூ²தி ஹீனாசாரதாய லாமகோ, பி⁴க்கு²வேஸதாய பி⁴க்கா²ஹாரேன ஜீவனதோ ச பி⁴க்கு². சித்தகேளிந்தி சித்தருசியங் தங் தங் கீளந்தோ. அயமேவாதி பி⁴க்கு²வத்து²ஸ்மிங் வுத்தனயோ ஏவ.
Asīsakaṃ kabandhaṃ hutvā nibbatti kammāyūhanakāle tathā nimittaggahaṇaparicayato. Lāmakabhikkhūti hīnācāratāya lāmako, bhikkhuvesatāya bhikkhāhārena jīvanato ca bhikkhu. Cittakeḷinti cittaruciyaṃ taṃ taṃ kīḷanto. Ayamevāti bhikkhuvatthusmiṃ vuttanayo eva.
231. நிஸ்ஸேவாலபணககத்³த³மோதி திலபீ³ஜகாதி³பே⁴தே³ன ஸேவாலேன நீலமண்டூ³கபிட்டி²வண்ணேன உத³கபிட்ட²ங் சா²தெ³த்வா நிப்³ப³த்தபணகேன கத்³த³மேன ச விரஹிதோ. ஸுந்த³ரேஹி தித்தே²ஹீதி ஸுகா²வகா³ஹணட்டா²னதாய கத்³த³மாதி³தோ³ஸவிரஹதோ ச ஸுந்த³ரேஹி தித்தே²ஹி. ததோ உத³கத³ஹதோ தங்ஹேது, தங் உபனிஸ்ஸாயாதி அத்தோ². நாக³ப⁴வனக³தோபி ஹி ஸோ ரஹதோ³ ததோ உபரிமனுஸ்ஸலோகே ஜலாஸயேன ஸம்ப³ந்தோ⁴ ஹோதி. தேன வுத்தங் ‘‘ததோ அயங் தபோதா³ ஸந்த³தீ’’தி. அத² வா ததோதி நாக³ப⁴வனே உத³கத³ஹதோ அயங் தபோதா³ ஸந்த³தி. தஞ்ஹி உபரிபூ⁴மிதலங் ஆரோஹதி, உண்ஹபா⁴வேன தபனதோ தபங் உத³கங் ஏதிஸ்ஸாதி அன்வத்த²னாமவஸேன தபோதா³தி வுச்சதி. பேதலோகோதி பேதானங் ஆவாஸட்டா²னங். கேசி பன ‘‘பேதலோகோதி லோஹகும்பீ⁴னிரயா இதா⁴தி⁴ப்பேதா’’தி வத³ந்தி, நக³ரஸ்ஸ பன பரிதோ பப்³ப³தபாத³வனந்தரேஸு ப³ஹூ பேதாவாஸாபி ஸந்தேவ. ஸ்வாயமத்தோ² பேதவத்து²பாளியா லக்க²ணஸங்யுத்தேன இமாய ச வினீதவத்து²பாளியா தீ³பேதப்³போ³.
231.Nissevālapaṇakakaddamoti tilabījakādibhedena sevālena nīlamaṇḍūkapiṭṭhivaṇṇena udakapiṭṭhaṃ chādetvā nibbattapaṇakena kaddamena ca virahito. Sundarehi titthehīti sukhāvagāhaṇaṭṭhānatāya kaddamādidosavirahato ca sundarehi titthehi. Tato udakadahato taṃhetu, taṃ upanissāyāti attho. Nāgabhavanagatopi hi so rahado tato uparimanussaloke jalāsayena sambandho hoti. Tena vuttaṃ ‘‘tato ayaṃ tapodā sandatī’’ti. Atha vā tatoti nāgabhavane udakadahato ayaṃ tapodā sandati. Tañhi uparibhūmitalaṃ ārohati, uṇhabhāvena tapanato tapaṃ udakaṃ etissāti anvatthanāmavasena tapodāti vuccati. Petalokoti petānaṃ āvāsaṭṭhānaṃ. Keci pana ‘‘petalokoti lohakumbhīnirayā idhādhippetā’’ti vadanti, nagarassa pana parito pabbatapādavanantaresu bahū petāvāsāpi santeva. Svāyamattho petavatthupāḷiyā lakkhaṇasaṃyuttena imāya ca vinītavatthupāḷiyā dīpetabbo.
கதஹத்தா²தி தி²ரதரங் லக்கே²ஸு அவிரஜ்ஜ²னஸரக்கே²பா. ஈதி³ஸா பன தத்த² வஸீபூ⁴தா கதஹத்தா² நாம ஹொந்தி, தஸ்மா யோ ஸிப்பமேவ உக்³க³ண்ஹாதி, ஸோ கதஹத்தோ² நாம ந ஹோதி, இமே பன கதஹத்தா², சிண்ணவஸீபா⁴வாதி வுத்தங் ஹோதி. ஸிப்பத³ஸ்ஸனவஸேன கதங் ராஜகுலானி உபேச்ச அஸனங் ஸரக்கே²போ ஏதேஹீதி கதுபாஸனா, ராஜகுலாதீ³ஸு த³ஸ்ஸிதஸிப்பாதி வுத்தங் ஹோதி. பப⁴க்³கோ³தி பராஜிதோ.
Katahatthāti thirataraṃ lakkhesu avirajjhanasarakkhepā. Īdisā pana tattha vasībhūtā katahatthā nāma honti, tasmā yo sippameva uggaṇhāti, so katahattho nāma na hoti, ime pana katahatthā, ciṇṇavasībhāvāti vuttaṃ hoti. Sippadassanavasena kataṃ rājakulāni upecca asanaṃ sarakkhepo etehīti katupāsanā, rājakulādīsu dassitasippāti vuttaṃ hoti. Pabhaggoti parājito.
232. தோ³ஸத³ஸ்ஸன புப்³ப³க ரூப விராக³ பா⁴வனா ஸங்கா²த படிபக்க² பா⁴வனாவஸேன படிக⁴ஸஞ்ஞானங் ஸுப்பஹீனத்தா மஹதாபி ஸத்³தே³ன அரூபஸமாபத்திதோ ந வுட்டா²தி, ததா² பன ந ஸுப்பஹீனத்தா ஸப்³ப³ரூபாவசரஸமாபத்திதோ வுட்டா²னங் ஸியாதி இத⁴ ஆனேஞ்ஜஸமாதீ⁴தி சதுத்த²ஜ்ஜா²னஸமாபத்தி அதி⁴ப்பேதாதி ஆஹ ‘‘அனேஜங் அசலங் காயவாசாவிப்ப²ந்த³விரஹிதங் சதுத்த²ஜ்ஜா²னஸமாதி⁴’’ந்தி. அஞ்ஞத்த² பன ஸமாதி⁴பச்சனீகானங் அதிதூ³ரதாய ந இஞ்ஜதீதி ஆனேஞ்ஜோதி அரூபாவசரஸமாதி⁴ வுச்சதி. ஸமாதி⁴பரிபந்த²கே த⁴ம்மேதி விதக்கவிசாராதி³கே ஸந்தா⁴ய வத³தி. விதக்காதீ³ஸு ஆதீ³னவஸல்லக்க²ணஸ்ஸ ந ஸுட்டு²கதபா⁴வங் ஸந்தா⁴யாஹ ‘‘ந ஸுட்டு² பரிஸோதெ⁴த்வா’’தி.
232. Dosadassana pubbaka rūpa virāga bhāvanā saṅkhāta paṭipakkha bhāvanāvasena paṭighasaññānaṃ suppahīnattā mahatāpi saddena arūpasamāpattito na vuṭṭhāti, tathā pana na suppahīnattā sabbarūpāvacarasamāpattito vuṭṭhānaṃ siyāti idha āneñjasamādhīti catutthajjhānasamāpatti adhippetāti āha ‘‘anejaṃ acalaṃ kāyavācāvipphandavirahitaṃ catutthajjhānasamādhi’’nti. Aññattha pana samādhipaccanīkānaṃ atidūratāya na iñjatīti āneñjoti arūpāvacarasamādhi vuccati. Samādhiparipanthake dhammeti vitakkavicārādike sandhāya vadati. Vitakkādīsu ādīnavasallakkhaṇassa na suṭṭhukatabhāvaṃ sandhāyāha ‘‘na suṭṭhu parisodhetvā’’ti.
நனு சாயமாயஸ்மா மஹாமொக்³க³ல்லானோ ப⁴க³வதோ பட²மவஸ்ஸேவ அபி⁴னவப்பத்தஅரஹத்தோ, இத³ஞ்ச உத்தரிமனுஸ்ஸத⁴ம்மபாராஜிகங் வீஸதிமவஸ்ஸதோ உபரி பஞ்ஞத்தங், கத²ங் இமஸ்ஸ வத்து²னோ இமஸ்மிங் பாராஜிகே ப⁴க³வதா வினிச்சி²தபா⁴வோ வுத்தோதி? நாயங் தோ³ஸோ. அயஞ்ஹெத்த² ஆசரியானங் கதா²மக்³கோ³ – அபஞ்ஞத்தேபி ஸிக்கா²பதே³ தே²ரஸ்ஸ வசனங் ஸுத்வா ‘‘அத்தனோ அப்பதிரூபங் உத்தரிமனுஸ்ஸத⁴ம்மங் ஏஸ வத³தீ’’தி மஞ்ஞமானா பி⁴க்கூ² தே²ரஸ்ஸ தோ³ஸங் ஆரோபெந்தா உஜ்ஜா²யிங்ஸு. ப⁴க³வா ச தே²ரஸ்ஸ ததா²வசனே காரணங் த³ஸ்ஸெத்வா நித்³தோ³ஸபா⁴வங் கரொந்தோ ‘‘அனாபத்தி, பி⁴க்க²வே, மொக்³க³ல்லானஸ்ஸா’’தி ஆஹ. ஸங்கீ³திகாரகா பன உத்தரிமனுஸ்ஸத⁴ம்மாதி⁴காரத்தா தம்பி வத்து²ங் ஆனெத்வா இத⁴ ஆரோபேஸுந்தி.
Nanu cāyamāyasmā mahāmoggallāno bhagavato paṭhamavasseva abhinavappattaarahatto, idañca uttarimanussadhammapārājikaṃ vīsatimavassato upari paññattaṃ, kathaṃ imassa vatthuno imasmiṃ pārājike bhagavatā vinicchitabhāvo vuttoti? Nāyaṃ doso. Ayañhettha ācariyānaṃ kathāmaggo – apaññattepi sikkhāpade therassa vacanaṃ sutvā ‘‘attano appatirūpaṃ uttarimanussadhammaṃ esa vadatī’’ti maññamānā bhikkhū therassa dosaṃ āropentā ujjhāyiṃsu. Bhagavā ca therassa tathāvacane kāraṇaṃ dassetvā niddosabhāvaṃ karonto ‘‘anāpatti, bhikkhave, moggallānassā’’ti āha. Saṅgītikārakā pana uttarimanussadhammādhikārattā tampi vatthuṃ ānetvā idha āropesunti.
ஸாவகானங் உப்படிபாடியா அனுஸ்ஸரணங் நத்தீ²தி த³ஸ்ஸேதுங் ‘‘ந உப்படிபாடியா’’தி ஆஹ. அஸஞ்ஞஸமாபத்திந்தி ஸஞ்ஞாவிராக³பா⁴வனாய வாயோகஸிணனிப்³ப³த்திதங் சதுத்த²ஜ்ஜா²னஸமாபத்திங் வத³தி. புப்³பே³னிவாஸஞாணங் சுதிபடிஸந்தி⁴ங் க³ண்ஹந்தம்பி அனந்தரபச்சயக்கமவந்தானங் அரூபத⁴ம்மானங் வஸேனேவ க³ண்ஹாதீதி ஆஹ – ‘‘ததியே அத்தபா⁴வே சுதிமேவ அத்³த³ஸா’’தி. நயதோ ஸல்லக்கே²ஸீதி வட்டே ஸங்ஸரணகஸத்தானங் க²ந்தா⁴னங் அபா⁴வகாலோ நாம நத்தி², அஸஞ்ஞப⁴வே பன அசித்தகா ஹுத்வா பஞ்ச கப்பஸதானி பவத்தந்தி, இமினா நயேன ஸல்லக்கே²ஸி. து³க்கரங் கதந்தி க²ந்த⁴விகலஸ்ஸ புப்³பே³னிவாஸஸ்ஸ அனுஸ்ஸரணங் ட²பெத்வா ஸம்மாஸம்பு³த்³த⁴ங் ந ஸக்கா அஞ்ஞேஹி காதுந்தி நயதோ ஸல்லக்கெ²ந்தேனபி து³க்கரங் கதந்தி அதி⁴ப்பாயோ. படிவித்³தா⁴தி படிவித்³த⁴ஸதி³ஸா. யதா² நாம கோசி த⁴னுஸிப்பே கதஹத்தோ² ஏகங் கேஸஸங்கா²தங் வாலங் ஸதக்க²த்துங் விதா³லெத்வா ததோ ஏகங் அங்ஸுங் க³ஹெத்வா வாதிங்க³ணப²லஸ்ஸ மஜ்ஜ²ட்டா²னே ப³ந்தி⁴த்வா அபரங் அங்ஸுங் கண்ட³ஸ்ஸ அக்³க³கோடியங் யதா² தஸ்ஸ அங்ஸுஸ்ஸ ஊகாமத்தங் வா லிக்கா²மத்தங் வா கண்ட³ஸ்ஸ அக்³க³கோடிதோ அதி⁴கங் ஹுத்வா திட்ட²தி, ஏவங் ப³ந்தி⁴த்வா உஸப⁴மத்தே டா²னே டி²தோ கண்ட³ப³த்³தா⁴ய வாலகோடியா வாதிங்க³ணப³த்³த⁴ங் வாலஸ்ஸ கோடிங் படிவிஜ்ஜெ²ய்ய , ஏவமேவ இமினாபி கதங் து³க்கரந்தி வுத்தங் ஹோதி. ஏதத³க்³க³ந்தி ஏஸோ அக்³கோ³. யதி³த³ந்தி யோ அயங். லிங்க³விபல்லாஸவஸேனேதங் வுத்தங்.
Sāvakānaṃ uppaṭipāṭiyā anussaraṇaṃ natthīti dassetuṃ ‘‘na uppaṭipāṭiyā’’ti āha. Asaññasamāpattinti saññāvirāgabhāvanāya vāyokasiṇanibbattitaṃ catutthajjhānasamāpattiṃ vadati. Pubbenivāsañāṇaṃ cutipaṭisandhiṃ gaṇhantampi anantarapaccayakkamavantānaṃ arūpadhammānaṃ vaseneva gaṇhātīti āha – ‘‘tatiye attabhāve cutimeva addasā’’ti. Nayato sallakkhesīti vaṭṭe saṃsaraṇakasattānaṃ khandhānaṃ abhāvakālo nāma natthi, asaññabhave pana acittakā hutvā pañca kappasatāni pavattanti, iminā nayena sallakkhesi. Dukkaraṃ katanti khandhavikalassa pubbenivāsassa anussaraṇaṃ ṭhapetvā sammāsambuddhaṃ na sakkā aññehi kātunti nayato sallakkhentenapi dukkaraṃ katanti adhippāyo. Paṭividdhāti paṭividdhasadisā. Yathā nāma koci dhanusippe katahattho ekaṃ kesasaṅkhātaṃ vālaṃ satakkhattuṃ vidāletvā tato ekaṃ aṃsuṃ gahetvā vātiṅgaṇaphalassa majjhaṭṭhāne bandhitvā aparaṃ aṃsuṃ kaṇḍassa aggakoṭiyaṃ yathā tassa aṃsussa ūkāmattaṃ vā likkhāmattaṃ vā kaṇḍassa aggakoṭito adhikaṃ hutvā tiṭṭhati, evaṃ bandhitvā usabhamatte ṭhāne ṭhito kaṇḍabaddhāya vālakoṭiyā vātiṅgaṇabaddhaṃ vālassa koṭiṃ paṭivijjheyya , evameva imināpi kataṃ dukkaranti vuttaṃ hoti. Etadagganti eso aggo. Yadidanti yo ayaṃ. Liṅgavipallāsavasenetaṃ vuttaṃ.
வினீதவத்து²வண்ணனா நிட்டி²தா.
Vinītavatthuvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வினீதவத்து²வண்ணனா • Vinītavatthuvaṇṇanā
