| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. விபாகத்திகவண்ணனா
3. Vipākattikavaṇṇanā
1-23. விபாகத்திகே விபாகங் த⁴ம்மங் படிச்ச விபாகோ த⁴ம்மோ உப்பஜ்ஜதி ஹேதுபச்சயாதி யே ஹேதுபச்சயே தேரஸ வாரா வுத்தா, தே ஸங்கி²பித்வா க³ணனாய த³ஸ்ஸேதுங் ஹேதுயா தேரஸாதி வுத்தங். ஆரம்மணே பஞ்சாதிஆதீ³ஸுபி ஏஸேவ நயோ. ஏவமெத்த² தேரஸ பஞ்ச நவ ஸத்த தீணி த்³வேதி ச² க³ணனபரிச்சே²தா³, தேஸங் வஸேன பச்சயஸங்ஸந்த³னே ஹெட்டா² வுத்தனயேனேவ க³ணனா வேதி³தப்³பா³.
1-23. Vipākattike vipākaṃ dhammaṃ paṭicca vipāko dhammo uppajjati hetupaccayāti ye hetupaccaye terasa vārā vuttā, te saṅkhipitvā gaṇanāya dassetuṃ hetuyā terasāti vuttaṃ. Ārammaṇe pañcātiādīsupi eseva nayo. Evamettha terasa pañca nava satta tīṇi dveti cha gaṇanaparicchedā, tesaṃ vasena paccayasaṃsandane heṭṭhā vuttanayeneva gaṇanā veditabbā.
24-52. பச்சனீயேபி விபாகங் த⁴ம்மங் படிச்ச விபாகோ த⁴ம்மோ உப்பஜ்ஜதி நஹேதுபச்சயாதி யே நஹேதுபச்சயே த³ஸ வாரா வுத்தா, தே ஸங்கி²பித்வா க³ணனாய த³ஸ்ஸேதுங் நஹேதுயா த³ஸாதி வுத்தங். ந ஆரம்மணே பஞ்சாதிஆதீ³ஸுபி ஏஸேவ நயோ. ஏவமெத்த² த³ஸ பஞ்ச தேரஸ த்³வாத³ஸ த்³வே ஏகங் நவ தீணீதி அட்ட² க³ணனபரிச்சே²தா³, தேஸங் வஸேன பச்சயஸங்ஸந்த³னே ஹெட்டா² வுத்தனயேனேவ வித்தா²ரதோ க³ணனா வேதி³தப்³பா³. பாளி பன ஸங்கி²த்தா, ஏதேஸஞ்ஞேவ பன லத்³த⁴க³ணனரபரிச்சே²தா³னங் வாரானங் வஸேன ஸங்ஸந்தி³த்வா அனுலோமபச்சனீயங் பச்சனீயானுலோமஞ்ச வேதி³தப்³ப³ங்.
24-52. Paccanīyepi vipākaṃ dhammaṃ paṭicca vipāko dhammo uppajjati nahetupaccayāti ye nahetupaccaye dasa vārā vuttā, te saṅkhipitvā gaṇanāya dassetuṃ nahetuyā dasāti vuttaṃ. Na ārammaṇe pañcātiādīsupi eseva nayo. Evamettha dasa pañca terasa dvādasa dve ekaṃ nava tīṇīti aṭṭha gaṇanaparicchedā, tesaṃ vasena paccayasaṃsandane heṭṭhā vuttanayeneva vitthārato gaṇanā veditabbā. Pāḷi pana saṅkhittā, etesaññeva pana laddhagaṇanaraparicchedānaṃ vārānaṃ vasena saṃsanditvā anulomapaccanīyaṃ paccanīyānulomañca veditabbaṃ.
ஸஹஜாதவாரோ இமினாவ ஏகக³திகோ. பச்சயனிஸ்ஸயஸங்ஸட்ட²ஸம்பயுத்தவாரா யதா²பாளிமேவ நிய்யந்தி.
Sahajātavāro imināva ekagatiko. Paccayanissayasaṃsaṭṭhasampayuttavārā yathāpāḷimeva niyyanti.
92. பஞ்ஹாவாரே குஸலாகுஸலே நிருத்³தே⁴தி ஏதஸ்மிங் விபஸ்ஸனாவஸேன பவத்தே குஸலே ஸாரஜ்ஜனாதி³வஸேன பவத்தே அகுஸலே ச நிருத்³தே⁴. விபாகோ ததா³ரம்மணதா உப்பஜ்ஜதீதி காமாவசரவிபாகோ ததா³ரம்மணதாய உப்பஜ்ஜதி. யே பன ‘‘விபஸ்ஸனாஜவனானங் விசிகிச்சு²த்³த⁴ச்சானஞ்ச பரியோஸானே ததா³ரம்மணங் நத்தீ²’’தி வத³ந்தி, தே இமாய தந்தியா படிஸேதே⁴தப்³பா³. ஆகாஸானஞ்சாயதனகுஸலங் விஞ்ஞாணஞ்சாயதனஸ்ஸ கிரியஸ்ஸ ஆரம்மணபச்சயேன பச்சயோதி அரஹத்தங் பத்வா அஸமாபன்னபுப்³பா³ ஸமாபத்தியோ படிலோமதோ ஸமாபஜ்ஜந்தஸ்ஸ வஸேனேதங் வுத்தங். இமினா உபாயேன ஸப்³ப³விஸ்ஸஜ்ஜனேஸு ஸாது⁴கங் பாளிங் உபபரிக்கி²த்வா அத்தோ² வேதி³தப்³போ³.
92. Pañhāvāre kusalākusale niruddheti etasmiṃ vipassanāvasena pavatte kusale sārajjanādivasena pavatte akusale ca niruddhe. Vipāko tadārammaṇatā uppajjatīti kāmāvacaravipāko tadārammaṇatāya uppajjati. Ye pana ‘‘vipassanājavanānaṃ vicikicchuddhaccānañca pariyosāne tadārammaṇaṃ natthī’’ti vadanti, te imāya tantiyā paṭisedhetabbā. Ākāsānañcāyatanakusalaṃ viññāṇañcāyatanassa kiriyassa ārammaṇapaccayena paccayoti arahattaṃ patvā asamāpannapubbā samāpattiyo paṭilomato samāpajjantassa vasenetaṃ vuttaṃ. Iminā upāyena sabbavissajjanesu sādhukaṃ pāḷiṃ upaparikkhitvā attho veditabbo.
120. ஹேதுயா ஸத்த, ஆரம்மணே நவ, அதி⁴பதியா த³ஸாதிஆதீ³ஸுபி ஸஹஜாதாதி⁴பதிவஸேன ஆரம்மணாதி⁴பதிவஸேன ஸஹஜாதனிஸ்ஸயவஸேன புரேஜாதனிஸ்ஸயவஸேன அனந்தரூபனிஸ்ஸயவஸேன ஆரம்மணூபனிஸ்ஸயவஸேன பகதூபனிஸ்ஸயவஸேன ஸஹஜாதவிப்பயுத்தவஸேன புரேஜாதபச்சா²ஜாதவிப்பயுத்தவஸேனாதி யத்த² யத்த² யதா² யதா² யத்தகானி விஸ்ஸஜ்ஜனானி லப்³ப⁴ந்தி, தத்த² தத்த² ததா² ததா² தானி ஸப்³பா³னி ஸல்லக்கே²தப்³பா³னி. ததா² பச்சனீயாதீ³ஸு அனுலோமவஸேன வாருத்³த⁴ரணங், அனுலோமதோ லத்³த⁴வாரானங் பச்சனீயதோ க³ணனா, பச்சயஸங்ஸந்த³னங், அனுலோமபச்சனீயே பச்சனீயானுலோமே ச ஸுத்³தி⁴கேஸு சேவ ஸங்ஸந்த³னவஸேன ச பவத்தேஸு ஹேதுமூலகாதீ³ஸு லப்³ப⁴மானவாரக³ணனா, அலப்³ப⁴மானானங் அலப்³ப⁴மானதாதி ஸப்³ப³ங் ஹெட்டா² வுத்தனயேனேவ வேதி³தப்³ப³ங்.
120. Hetuyā satta, ārammaṇe nava, adhipatiyā dasātiādīsupi sahajātādhipativasena ārammaṇādhipativasena sahajātanissayavasena purejātanissayavasena anantarūpanissayavasena ārammaṇūpanissayavasena pakatūpanissayavasena sahajātavippayuttavasena purejātapacchājātavippayuttavasenāti yattha yattha yathā yathā yattakāni vissajjanāni labbhanti, tattha tattha tathā tathā tāni sabbāni sallakkhetabbāni. Tathā paccanīyādīsu anulomavasena vāruddharaṇaṃ, anulomato laddhavārānaṃ paccanīyato gaṇanā, paccayasaṃsandanaṃ, anulomapaccanīye paccanīyānulome ca suddhikesu ceva saṃsandanavasena ca pavattesu hetumūlakādīsu labbhamānavāragaṇanā, alabbhamānānaṃ alabbhamānatāti sabbaṃ heṭṭhā vuttanayeneva veditabbaṃ.
யதா² செத்த², ஏவங் இதோ பரேஸுபி திகது³கேஸு. பட்டா²னபகரணஞ்ஹி பாளிதோவ அனந்தங் அபரிமாணங். தஸ்ஸ பத³படிபாடியா அத்த²ங் வண்ணயிஸ்ஸாமீதி படிபன்னஸ்ஸ அதிதீ³கா⁴யுகஸ்ஸாபி ஆயு நப்பஹோதி. ந சஸ்ஸ ஏகதே³ஸங் வண்ணெத்வா ஸேஸம்ஹி நயதோ த³ஸ்ஸியமானே ந ஸக்கா அத்தோ² ஜானிதுங், தஸ்மா இதோ பரங் எத்தகம்பி அவத்வா ஸேஸேஸு திகது³கேஸு ஹெட்டா² அவுத்தப்பகாரத்தா யங் யங் அவஸ்ஸங் வத்தப்³ப³ங், தங் ததே³வ வக்கா²ம. யங் பன அவத்வா க³மிஸ்ஸாம, தங் பாளினயேனேவ வேதி³தப்³ப³ந்தி.
Yathā cettha, evaṃ ito paresupi tikadukesu. Paṭṭhānapakaraṇañhi pāḷitova anantaṃ aparimāṇaṃ. Tassa padapaṭipāṭiyā atthaṃ vaṇṇayissāmīti paṭipannassa atidīghāyukassāpi āyu nappahoti. Na cassa ekadesaṃ vaṇṇetvā sesamhi nayato dassiyamāne na sakkā attho jānituṃ, tasmā ito paraṃ ettakampi avatvā sesesu tikadukesu heṭṭhā avuttappakārattā yaṃ yaṃ avassaṃ vattabbaṃ, taṃ tadeva vakkhāma. Yaṃ pana avatvā gamissāma, taṃ pāḷinayeneva veditabbanti.
விபாகத்திகவண்ணனா.
Vipākattikavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 3. விபாகத்திகங் • 3. Vipākattikaṃ
