| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. விபரீதகதா²வண்ணனா
3. Viparītakathāvaṇṇanā
424. இதா³னி விபரீதகதா² நாம ஹோதி. தத்த² ‘‘ய்வாயங் பத²வீகஸிணே பத²வீஸஞ்ஞீ ஸமாபஜ்ஜதி, தஸ்ஸ தங் ஞாணங் விபரீதஞாண’’ந்தி யேஸங் லத்³தி⁴, ஸெய்யதா²பி அந்த⁴கானங், தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. பத²விங் நிஸ்ஸாய உப்பன்னநிமித்தஞ்ஹி ந பத²வீயேவ, தத்ர சாயங் பத²வீஸஞ்ஞீ. தஸ்மா விபரீதஞாணந்தி அயமேதஸ்ஸ அதி⁴ப்பாயோ. ததோ ஸகவாதீ³ ‘‘லக்க²ணபத²வீபி ஸஸம்பா⁴ரபத²வீபி நிமித்தபத²வீபி பத²வீதே³வதாபி ஸப்³பா³ பத²வீயேவ, தாஸு பத²வீதி ஞாணங் விபரீதங் ந ஹோதி. அனிச்சே நிச்சந்திஆதி³விபரியேஸோ பன விபரீதஞாணங் நாம. கிங் தே இத³ங் ஏதேஸு அஞ்ஞதர’’ந்தி சோதே³துங் அனிச்சே நிச்சந்திஆதி³மாஹ. இதரோ விபல்லாஸலக்க²ணாபா⁴வங் ஸந்தா⁴ய படிக்கி²பதி, பத²வீனிமித்தங் ஸந்தா⁴ய படிஜானாதி.
424. Idāni viparītakathā nāma hoti. Tattha ‘‘yvāyaṃ pathavīkasiṇe pathavīsaññī samāpajjati, tassa taṃ ñāṇaṃ viparītañāṇa’’nti yesaṃ laddhi, seyyathāpi andhakānaṃ, te sandhāya pucchā sakavādissa, paṭiññā itarassa. Pathaviṃ nissāya uppannanimittañhi na pathavīyeva, tatra cāyaṃ pathavīsaññī. Tasmā viparītañāṇanti ayametassa adhippāyo. Tato sakavādī ‘‘lakkhaṇapathavīpi sasambhārapathavīpi nimittapathavīpi pathavīdevatāpi sabbā pathavīyeva, tāsu pathavīti ñāṇaṃ viparītaṃ na hoti. Anicce niccantiādivipariyeso pana viparītañāṇaṃ nāma. Kiṃ te idaṃ etesu aññatara’’nti codetuṃ anicce niccantiādimāha. Itaro vipallāsalakkhaṇābhāvaṃ sandhāya paṭikkhipati, pathavīnimittaṃ sandhāya paṭijānāti.
குஸலந்தி ஸெக்க²புது²ஜ்ஜனானங் ஞாணங் ஸந்தா⁴ய வுத்தங். அத்தி² அரஹதோதி பஞ்ஹேஸுபி விபல்லாஸலக்க²ணாபா⁴வேன படிக்கி²பதி. பத²வீனிமித்தங் ஸந்தா⁴ய படிஜானாதி. ஸப்³பே³வ பத²வீதி ஸப்³ப³ங் தங் பத²வீகஸிணங் லக்க²ணபத²வீயேவ ஹோதீதி புச்ச²தி. ஸகவாதீ³ ததா² அபா⁴வதோ படிக்கி²பதி. நனு பத²வீ அத்தி², அத்தி² ச கோசி பத²விங் பத²விதோ ஸமாபஜ்ஜதீதி புச்சா² ஸகவாதி³ஸ்ஸ . தஸ்ஸத்தோ² – நனு நிமித்தபத²வீ அத்தி², அத்தி² ச கோசி தங் பத²விங் பத²விதோயேவ ஸமாபஜ்ஜதி, ந ஆபதோ வா தேஜதோ வாதி. பத²வீ அத்தீ²திஆதி³ ‘‘யதி³ யங் யதா² அத்தி², தங் ததா² ஸமாபஜ்ஜந்தஸ்ஸ ஞாணங் விபரீதங் ஹோதி, நிப்³பா³னங் அத்தி², தம்பி ஸமாபஜ்ஜந்தஸ்ஸ ஸப்³ப³விபரியேஸஸமுக்³கா⁴தனங் மக்³க³ஞாணம்பி தே விபரீதங் ஹோதூ’’தி த³ஸ்ஸனத்த²ங் வுத்தந்தி.
Kusalanti sekkhaputhujjanānaṃ ñāṇaṃ sandhāya vuttaṃ. Atthi arahatoti pañhesupi vipallāsalakkhaṇābhāvena paṭikkhipati. Pathavīnimittaṃ sandhāya paṭijānāti. Sabbeva pathavīti sabbaṃ taṃ pathavīkasiṇaṃ lakkhaṇapathavīyeva hotīti pucchati. Sakavādī tathā abhāvato paṭikkhipati. Nanu pathavī atthi, atthi ca koci pathaviṃ pathavito samāpajjatīti pucchā sakavādissa . Tassattho – nanu nimittapathavī atthi, atthi ca koci taṃ pathaviṃ pathavitoyeva samāpajjati, na āpato vā tejato vāti. Pathavī atthītiādi ‘‘yadi yaṃ yathā atthi, taṃ tathā samāpajjantassa ñāṇaṃ viparītaṃ hoti, nibbānaṃ atthi, tampi samāpajjantassa sabbavipariyesasamugghātanaṃ maggañāṇampi te viparītaṃ hotū’’ti dassanatthaṃ vuttanti.
விபரீதகதா²வண்ணனா.
Viparītakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (45) 3. விபரீதகதா² • (45) 3. Viparītakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. விபரீதகதா²வண்ணனா • 3. Viparītakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 3. விபரீதகதா²வண்ணனா • 3. Viparītakathāvaṇṇanā
