| Library / Tipiṭaka / તિપિટક • Tipiṭaka / પટિસમ્ભિદામગ્ગપાળિ • Paṭisambhidāmaggapāḷi |
૯. વિપસ્સનાકથા
9. Vipassanākathā
૩૬. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો ભગવા ભિક્ખૂ આમન્તેસિ – ‘‘ભિક્ખવો’’તિ. ‘‘ભદન્તે’’તિ તે ભિક્ખૂ ભગવતો પચ્ચસ્સોસું. ભગવા એતદવોચ –
36. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘સો વત, ભિક્ખવે, ભિક્ખુ કઞ્ચિ 1 સઙ્ખારં નિચ્ચતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – નેતં ઠાનં વિજ્જતિ; અનુલોમિકાય ખન્તિયા અસમન્નાગતો સમ્મત્તનિયામં ઓક્કમિસ્સતીતિ – નેતં ઠાનં વિજ્જતિ; સમ્મત્તનિયામં અનોક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા 2 સચ્છિકરિસ્સતીતિ – નેતં ઠાનં વિજ્જતિ.
‘‘So vata, bhikkhave, bhikkhu kañci 3 saṅkhāraṃ niccato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā 4 sacchikarissatīti – netaṃ ṭhānaṃ vijjati.
‘‘સો વત, ભિક્ખવે, ભિક્ખુ સબ્બસઙ્ખારે અનિચ્ચતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – ઠાનમેતં વિજ્જતિ; અનુલોમિકાય ખન્તિયા સમન્નાગતો સમ્મત્તનિયામં ઓક્કમિસ્સતીતિ – ઠાનમેતં વિજ્જતિ, સમ્મત્તનિયામં ઓક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – ઠાનમેતં વિજ્જતિ.
‘‘So vata, bhikkhave, bhikkhu sabbasaṅkhāre aniccato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati, sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘સો વત, ભિક્ખવે, ભિક્ખુ કઞ્ચિ સઙ્ખારં સુખતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – નેતં ઠાનં વિજ્જતિ; અનુલોમિકાય ખન્તિયા અસમન્નાગતો સમ્મત્તનિયામં ઓક્કમિસ્સતીતિ – નેતં ઠાનં વિજ્જતિ; સમ્મત્તનિયામં અનોક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – નેતં ઠાનં વિજ્જતિ .
‘‘So vata, bhikkhave, bhikkhu kañci saṅkhāraṃ sukhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati .
‘‘સો વત, ભિક્ખવે, ભિક્ખુ સબ્બસઙ્ખારે દુક્ખતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – ઠાનમેતં વિજ્જતિ; અનુલોમિકાય ખન્તિયા સમન્નાગતો સમ્મત્તનિયામં ઓક્કમિસ્સતીતિ – ઠાનમેતં વિજ્જતિ; સમ્મત્તનિયામં ઓક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – ઠાનમેતં વિજ્જતિ.
‘‘So vata, bhikkhave, bhikkhu sabbasaṅkhāre dukkhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘સો વત, ભિક્ખવે, ભિક્ખુ કઞ્ચિ ધમ્મં અત્તતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – નેતં ઠાનં વિજ્જતિ; અનુલોમિકાય ખન્તિયા અસમન્નાગતો સમ્મત્તનિયામં ઓક્કમિસ્સતીતિ – નેતં ઠાનં વિજ્જતિ; સમ્મત્તનિયામં અનોક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – નેતં ઠાનં વિજ્જતિ.
‘‘So vata, bhikkhave, bhikkhu kañci dhammaṃ attato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.
‘‘સો વત, ભિક્ખવે, ભિક્ખુ સબ્બધમ્મે 5 અનત્તતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – ઠાનમેતં વિજ્જતિ; અનુલોમિકાય ખન્તિયા સમન્નાગતો સમ્મત્તનિયામં ઓક્કમિસ્સતીતિ – ઠાનમેતં વિજ્જતિ; સમ્મત્તનિયામં ઓક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – ઠાનમેતં વિજ્જતિ.
‘‘So vata, bhikkhave, bhikkhu sabbadhamme 6 anattato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘સો વત, ભિક્ખવે, ભિક્ખુ નિબ્બાનં દુક્ખતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – નેતં ઠાનં વિજ્જતિ; અનુલોમિકાય ખન્તિયા અસમન્નાગતો સમ્મત્તનિયામં ઓક્કમિસ્સતીતિ – નેતં ઠાનં વિજ્જતિ; સમ્મત્તનિયામં અનોક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – નેતં ઠાનં વિજ્જતિ.
‘‘So vata, bhikkhave, bhikkhu nibbānaṃ dukkhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.
‘‘સો વત, ભિક્ખવે, ભિક્ખુ નિબ્બાનં સુખતો સમનુપસ્સન્તો અનુલોમિકાય ખન્તિયા સમન્નાગતો ભવિસ્સતીતિ – ઠાનમેતં વિજ્જતિ; અનુલોમિકાય ખન્તિયા સમન્નાગતો સમ્મત્તનિયામં ઓક્કમિસ્સતીતિ – ઠાનમેતં વિજ્જતિ; સમ્મત્તનિયામં ઓક્કમમાનો સોતાપત્તિફલં વા સકદાગામિફલં વા અનાગામિફલં વા અરહત્તં વા સચ્છિકરિસ્સતીતિ – ઠાનમેતં વિજ્જતિ’’.
‘‘So vata, bhikkhave, bhikkhu nibbānaṃ sukhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati’’.
૩૭. કતિહાકારેહિ અનુલોમિકં ખન્તિં પટિલભતિ, કતિહાકારેહિ સમ્મત્તનિયામં ઓક્કમતિ? ચત્તારીસાય આકારેહિ અનુલોમિકં ખન્તિં પટિલભતિ, ચત્તારીસાય આકારેહિ સમ્મત્તનિયામં ઓક્કમતિ.
37. Katihākārehi anulomikaṃ khantiṃ paṭilabhati, katihākārehi sammattaniyāmaṃ okkamati? Cattārīsāya ākārehi anulomikaṃ khantiṃ paṭilabhati, cattārīsāya ākārehi sammattaniyāmaṃ okkamati.
કતમેહિ ચત્તારીસાય આકારેહિ અનુલોમિકં ખન્તિં પટિલભતિ, કતમહિ ચત્તારીસાય આકારેહિ સમ્મત્તનિયામં ઓક્કમતિ? પઞ્ચક્ખન્ધે અનિચ્ચતો દુક્ખતો રોગતો ગણ્ડતો સલ્લતો અઘતો આબાધતો પરતો પલોકતો ઈતિતો ઉપદ્દવતો ભયતો ઉપસગ્ગતો ચલતો પભઙ્ગુતો 7 અદ્ધુવતો અતાણતો 8 અલેણતો અસરણતો રિત્તતો તુચ્છતો સુઞ્ઞતો અનત્તતો આદીનવતો વિપરિણામધમ્મતો અસારકતો અઘમૂલતો વધકતો વિભવતો સાસવતો સઙ્ખતતો મારામિસતો જાતિધમ્મતો જરાધમ્મતો બ્યાધિધમ્મતો મરણધમ્મતો સોકધમ્મતો પરિદેવધમ્મતો ઉપાયાસધમ્મતો સંકિલેસિકધમ્મતો.
Katamehi cattārīsāya ākārehi anulomikaṃ khantiṃ paṭilabhati, katamahi cattārīsāya ākārehi sammattaniyāmaṃ okkamati? Pañcakkhandhe aniccato dukkhato rogato gaṇḍato sallato aghato ābādhato parato palokato ītito upaddavato bhayato upasaggato calato pabhaṅguto 9 addhuvato atāṇato 10 aleṇato asaraṇato rittato tucchato suññato anattato ādīnavato vipariṇāmadhammato asārakato aghamūlato vadhakato vibhavato sāsavato saṅkhatato mārāmisato jātidhammato jarādhammato byādhidhammato maraṇadhammato sokadhammato paridevadhammato upāyāsadhammato saṃkilesikadhammato.
૩૮. પઞ્ચક્ખન્ધે અનિચ્ચતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો નિચ્ચં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે દુક્ખતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો સુખં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે રોગતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો આરોગ્યં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ગણ્ડતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અગણ્ડં 11 નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે સલ્લતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો વિસલ્લં 12 નિબ્બાનન્તિ પસ્સન્તો સમ્મત્તનિયામં ઓક્કમતિ.
38. Pañcakkhandhe aniccato passanto anulomikaṃ khantiṃ paṭilabhati. Pañcannaṃ khandhānaṃ nirodho niccaṃ nibbānanti passanto sammattaniyāmaṃ okkamati. Pañcakkhandhe dukkhato passanto anulomikaṃ khantiṃ paṭilabhati. Pañcannaṃ khandhānaṃ nirodho sukhaṃ nibbānanti passanto sammattaniyāmaṃ okkamati. Pañcakkhandhe rogato passanto anulomikaṃ khantiṃ paṭilabhati. Pañcannaṃ khandhānaṃ nirodho ārogyaṃ nibbānanti passanto sammattaniyāmaṃ okkamati. Pañcakkhandhe gaṇḍato passanto anulomikaṃ khantiṃ paṭilabhati. Pañcannaṃ khandhānaṃ nirodho agaṇḍaṃ 13 nibbānanti passanto sammattaniyāmaṃ okkamati. Pañcakkhandhe sallato passanto anulomikaṃ khantiṃ paṭilabhati. Pañcannaṃ khandhānaṃ nirodho visallaṃ 14 nibbānanti passanto sammattaniyāmaṃ okkamati.
પઞ્ચક્ખન્ધે અઘતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનઘો નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે આબાધતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનાબાધો નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે પરતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અપરપ્પચ્ચયં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે પલોકતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અપલોકધમ્મો નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ઈતિતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનીતિકં નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe aghato passanto anulomikaṃ khantiṃ paṭilabhati. Pañcannaṃ khandhānaṃ nirodho anagho nibbānanti passanto sammattaniyāmaṃ okkamati. Pañcakkhandhe ābādhato passanto anulomikaṃ khantiṃ paṭilabhati. Pañcannaṃ khandhānaṃ nirodho anābādho nibbānanti passanto sammattaniyāmaṃ okkamati. Pañcakkhandhe parato passanto anulomikaṃ khantiṃ paṭilabhati. Pañcannaṃ khandhānaṃ nirodho aparappaccayaṃ nibbānanti passanto sammattaniyāmaṃ okkamati. Pañcakkhandhe palokato passanto anulomikaṃ khantiṃ paṭilabhati. Pañcannaṃ khandhānaṃ nirodho apalokadhammo nibbānanti passanto sammattaniyāmaṃ okkamati. Pañcakkhandhe ītito passanto anulomikaṃ khantiṃ paṭilabhati. Pañcannaṃ khandhānaṃ nirodho anītikaṃ nibbānanti passanto sammattaniyāmaṃ okkamati.
પઞ્ચક્ખન્ધે ઉપદ્દવતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનુપદ્દવં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ભયતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અભયં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ઉપસગ્ગતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનુપસગ્ગં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ચલતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અચલં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે પભઙ્ગુતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અપભઙ્ગુ 15 નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe upaddavato passanto anulomikaṃ khantiṃ paṭilabhati. Pañcannaṃ khandhānaṃ nirodho anupaddavaṃ nibbānanti passanto sammattaniyāmaṃ okkamati. Pañcakkhandhe bhayato passanto anulomikaṃ khantiṃ paṭilabhati. Pañcannaṃ khandhānaṃ nirodho abhayaṃ nibbānanti passanto sammattaniyāmaṃ okkamati. Pañcakkhandhe upasaggato passanto anulomikaṃ khantiṃ paṭilabhati. Pañcannaṃ khandhānaṃ nirodho anupasaggaṃ nibbānanti passanto sammattaniyāmaṃ okkamati. Pañcakkhandhe calato passanto anulomikaṃ khantiṃ paṭilabhati. Pañcannaṃ khandhānaṃ nirodho acalaṃ nibbānanti passanto sammattaniyāmaṃ okkamati. Pañcakkhandhe pabhaṅguto passanto anulomikaṃ khantiṃ paṭilabhati. Pañcannaṃ khandhānaṃ nirodho apabhaṅgu 16 nibbānanti passanto sammattaniyāmaṃ okkamati.
પઞ્ચક્ખન્ધે અદ્ધુવતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો ધુવં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે અતાણતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો તાણં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે અલેણતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો લેણં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે અસરણતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો સરણં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે રિત્તતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અરિત્તં નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe addhuvato passanto anulomikaṃ khantiṃ paṭilabhati. Pañcannaṃ khandhānaṃ nirodho dhuvaṃ nibbānanti passanto sammattaniyāmaṃ okkamati. Pañcakkhandhe atāṇato passanto anulomikaṃ khantiṃ paṭilabhati. Pañcannaṃ khandhānaṃ nirodho tāṇaṃ nibbānanti passanto sammattaniyāmaṃ okkamati. Pañcakkhandhe aleṇato passanto anulomikaṃ khantiṃ paṭilabhati. Pañcannaṃ khandhānaṃ nirodho leṇaṃ nibbānanti passanto sammattaniyāmaṃ okkamati. Pañcakkhandhe asaraṇato passanto anulomikaṃ khantiṃ paṭilabhati. Pañcannaṃ khandhānaṃ nirodho saraṇaṃ nibbānanti passanto sammattaniyāmaṃ okkamati. Pañcakkhandhe rittato passanto anulomikaṃ khantiṃ paṭilabhati. Pañcannaṃ khandhānaṃ nirodho arittaṃ nibbānanti passanto sammattaniyāmaṃ okkamati.
પઞ્ચક્ખન્ધે તુચ્છતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અતુચ્છં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે સુઞ્ઞતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો પરમસુઞ્ઞં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે અનત્તતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો પરમત્થં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે આદીનવતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનાદીનવં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે વિપરિણામધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અવિપરિણામધમ્મં નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe tucchato passanto anulomikaṃ khantiṃ paṭilabhati. Pañcannaṃ khandhānaṃ nirodho atucchaṃ nibbānanti passanto sammattaniyāmaṃ okkamati. Pañcakkhandhe suññato passanto anulomikaṃ khantiṃ paṭilabhati. Pañcannaṃ khandhānaṃ nirodho paramasuññaṃ nibbānanti passanto sammattaniyāmaṃ okkamati. Pañcakkhandhe anattato passanto anulomikaṃ khantiṃ paṭilabhati. Pañcannaṃ khandhānaṃ nirodho paramatthaṃ nibbānanti passanto sammattaniyāmaṃ okkamati. Pañcakkhandhe ādīnavato passanto anulomikaṃ khantiṃ paṭilabhati. Pañcannaṃ khandhānaṃ nirodho anādīnavaṃ nibbānanti passanto sammattaniyāmaṃ okkamati. Pañcakkhandhe vipariṇāmadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho avipariṇāmadhammaṃ nibbānanti passanto sammattaniyāmaṃ okkamati.
પઞ્ચક્ખન્ધે અસારકતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો સારં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે અઘમૂલતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનઘમૂલં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે વધકતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અવધકં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે વિભવતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અવિભવં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે સાસવતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનાસવં નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe asārakato passanto anulomikaṃ khantiṃ paṭilabhati. Pañcannaṃ khandhānaṃ nirodho sāraṃ nibbānanti passanto sammattaniyāmaṃ okkamati. Pañcakkhandhe aghamūlato passanto anulomikaṃ khantiṃ paṭilabhati. Pañcannaṃ khandhānaṃ nirodho anaghamūlaṃ nibbānanti passanto sammattaniyāmaṃ okkamati. Pañcakkhandhe vadhakato passanto anulomikaṃ khantiṃ paṭilabhati. Pañcannaṃ khandhānaṃ nirodho avadhakaṃ nibbānanti passanto sammattaniyāmaṃ okkamati. Pañcakkhandhe vibhavato passanto anulomikaṃ khantiṃ paṭilabhati. Pañcannaṃ khandhānaṃ nirodho avibhavaṃ nibbānanti passanto sammattaniyāmaṃ okkamati. Pañcakkhandhe sāsavato passanto anulomikaṃ khantiṃ paṭilabhati. Pañcannaṃ khandhānaṃ nirodho anāsavaṃ nibbānanti passanto sammattaniyāmaṃ okkamati.
પઞ્ચક્ખન્ધે સઙ્ખતતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અસઙ્ખતં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે મારામિસતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો નિરામિસં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે જાતિધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અજાતં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે જરાધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અજરં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે બ્યાધિધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અબ્યાધિ 17 નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe saṅkhatato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṅkhataṃ nibbānanti passanto sammattaniyāmaṃ okkamati. Pañcakkhandhe mārāmisato passanto anulomikaṃ khantiṃ paṭilabhati. Pañcannaṃ khandhānaṃ nirodho nirāmisaṃ nibbānanti passanto sammattaniyāmaṃ okkamati. Pañcakkhandhe jātidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajātaṃ nibbānanti passanto sammattaniyāmaṃ okkamati. Pañcakkhandhe jarādhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajaraṃ nibbānanti passanto sammattaniyāmaṃ okkamati. Pañcakkhandhe byādhidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho abyādhi 18 nibbānanti passanto sammattaniyāmaṃ okkamati.
પઞ્ચક્ખન્ધે મરણધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અમતં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે સોકધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અસોકં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે પરિદેવધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અપરિદેવં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે ઉપાયાસધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અનુપાયાસં નિબ્બાનન્તિ પસ્સન્તો સમ્મત્તનિયામં ઓક્કમતિ. પઞ્ચક્ખન્ધે સંકિલેસિકધમ્મતો પસ્સન્તો અનુલોમિકં ખન્તિં પટિલભતિ. પઞ્ચન્નં ખન્ધાનં નિરોધો અસંકિલિટ્ઠં નિબ્બાનન્તિ પસ્સન્તો સમ્મત્તનિયામં ઓક્કમતિ.
Pañcakkhandhe maraṇadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho amataṃ nibbānanti passanto sammattaniyāmaṃ okkamati. Pañcakkhandhe sokadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asokaṃ nibbānanti passanto sammattaniyāmaṃ okkamati. Pañcakkhandhe paridevadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho aparidevaṃ nibbānanti passanto sammattaniyāmaṃ okkamati. Pañcakkhandhe upāyāsadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho anupāyāsaṃ nibbānanti passanto sammattaniyāmaṃ okkamati. Pañcakkhandhe saṃkilesikadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṃkiliṭṭhaṃ nibbānanti passanto sammattaniyāmaṃ okkamati.
૩૯. અનિચ્ચતોતિ, અનિચ્ચાનુપસ્સના. દુક્ખતોતિ, દુક્ખાનુપસ્સના. રોગતોતિ , દુક્ખાનુપસ્સના. ગણ્ડતોતિ, દુક્ખાનુપસ્સના. સલ્લતોતિ, દુક્ખાનુપસ્સના. અઘતોતિ, દુક્ખાનુપસ્સના. આબાધતોતિ, દુક્ખાનુપસ્સના. પરતોતિ, અનત્તાનુપસ્સના. પલોકતોતિ, અનિચ્ચાનુપસ્સના. ઈતિતોતિ, દુક્ખાનુપસ્સના.
39. Aniccatoti, aniccānupassanā. Dukkhatoti, dukkhānupassanā. Rogatoti , dukkhānupassanā. Gaṇḍatoti, dukkhānupassanā. Sallatoti, dukkhānupassanā. Aghatoti, dukkhānupassanā. Ābādhatoti, dukkhānupassanā. Paratoti, anattānupassanā. Palokatoti, aniccānupassanā. Ītitoti, dukkhānupassanā.
ઉપદ્દવતોતિ, દુક્ખાનુપસ્સના. ભયતોતિ, દુક્ખાનુપસ્સના . ઉપસગ્ગતોતિ, દુક્ખાનુપસ્સના. ચલતોતિ, અનિચ્ચાનુપસ્સના. પભઙ્ગુતોતિ, અનિચ્ચાનુપસ્સના. અદ્ધુવતોતિ, અનિચ્ચાનુપસ્સના. અતાણતોતિ, દુક્ખાનુપસ્સના. અલેણતોતિ, દુક્ખાનુપસ્સના. અસરણતોતિ, દુક્ખાનુપસ્સના. રિત્તતોતિ, અનત્તાનુપસ્સના.
Upaddavatoti, dukkhānupassanā. Bhayatoti, dukkhānupassanā . Upasaggatoti, dukkhānupassanā. Calatoti, aniccānupassanā. Pabhaṅgutoti, aniccānupassanā. Addhuvatoti, aniccānupassanā. Atāṇatoti, dukkhānupassanā. Aleṇatoti, dukkhānupassanā. Asaraṇatoti, dukkhānupassanā. Rittatoti, anattānupassanā.
તુચ્છતોતિ, અનત્તાનુપસ્સના. સુઞ્ઞતોતિ, અનત્તાનુપસ્સના. અનત્તતોતિ , અનત્તાનુપસ્સના. આદીનવતોતિ, દુક્ખાનુપસ્સના. વિપરિણામધમ્મતોતિ, અનિચ્ચાનુપસ્સના. અસારકતોતિ, અનત્તાનુપસ્સના. અઘમૂલતોતિ , દુક્ખાનુપસ્સના. વધકતોતિ, દુક્ખાનુપસ્સના. વિભવતોતિ, અનિચ્ચાનુપસ્સના. સાસવતોતિ, દુક્ખાનુપસ્સના.
Tucchatoti, anattānupassanā. Suññatoti, anattānupassanā. Anattatoti , anattānupassanā. Ādīnavatoti, dukkhānupassanā. Vipariṇāmadhammatoti, aniccānupassanā. Asārakatoti, anattānupassanā. Aghamūlatoti , dukkhānupassanā. Vadhakatoti, dukkhānupassanā. Vibhavatoti, aniccānupassanā. Sāsavatoti, dukkhānupassanā.
સઙ્ખતતોતિ, અનિચ્ચાનુપસ્સના. મારામિસતોતિ, દુક્ખાનુપસ્સના. જાતિધમ્મતોતિ, દુક્ખાનુપસ્સના. જરાધમ્મતોતિ, દુક્ખાનુપસ્સના. બ્યાધિધમ્મતોતિ, દુક્ખાનુપસ્સના. મરણધમ્મતોતિ, અનિચ્ચાનુપસ્સના. સોકધમ્મતોતિ, દુક્ખાનુપસ્સના. પરિદેવધમ્મતોતિ, દુક્ખાનુપસ્સના. ઉપાયાસધમ્મતોતિ, દુક્ખાનુપસ્સના. સંકિલેસિકધમ્મતોતિ, દુક્ખાનુપસ્સના.
Saṅkhatatoti, aniccānupassanā. Mārāmisatoti, dukkhānupassanā. Jātidhammatoti, dukkhānupassanā. Jarādhammatoti, dukkhānupassanā. Byādhidhammatoti, dukkhānupassanā. Maraṇadhammatoti, aniccānupassanā. Sokadhammatoti, dukkhānupassanā. Paridevadhammatoti, dukkhānupassanā. Upāyāsadhammatoti, dukkhānupassanā. Saṃkilesikadhammatoti, dukkhānupassanā.
ઇમેહિ ચત્તાલીસાય આકારેહિ અનુલોમિકં ખન્તિં પટિલભતિ. ઇમેહિ ચત્તાલીસાય આકારેહિ સમ્મત્તનિયામં ઓક્કમતિ.
Imehi cattālīsāya ākārehi anulomikaṃ khantiṃ paṭilabhati. Imehi cattālīsāya ākārehi sammattaniyāmaṃ okkamati.
ઇમેહિ ચત્તાલીસાય આકારેહિ અનુલોમિકં ખન્તિં પટિલભન્તસ્સ, ઇમેહિ ચત્તાલીસાય આકારેહિ સમ્મત્તનિયામં ઓક્કમન્તસ્સ કતિ અનિચ્ચાનુપસ્સના, કતિ દુક્ખાનુપસ્સના, કતિ અનત્તાનુપસ્સના?
Imehi cattālīsāya ākārehi anulomikaṃ khantiṃ paṭilabhantassa, imehi cattālīsāya ākārehi sammattaniyāmaṃ okkamantassa kati aniccānupassanā, kati dukkhānupassanā, kati anattānupassanā?
પઞ્ચવીસતિ અનત્તાનુપસ્સના, પઞ્ઞાસ અનિચ્ચાનુપસ્સના;
Pañcavīsati anattānupassanā, paññāsa aniccānupassanā;
સતં પઞ્ચવીસતિ ચેવ, યાનિ દુક્ખે પવુચ્ચરેતિ.
Sataṃ pañcavīsati ceva, yāni dukkhe pavuccareti.
વિપસ્સનાકથા નિટ્ઠિતા.
Vipassanākathā niṭṭhitā.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā / વિપસ્સનાકથાવણ્ણના • Vipassanākathāvaṇṇanā
