Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi

५. विरागकथा

5. Virāgakathā

२८. विरागो मग्गो, विमुत्ति फलं। कथं विरागो मग्गो? सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया विरज्‍जति, तदनुवत्तककिलेसेहि च खन्धेहि च विरज्‍जति, बहिद्धा च सब्बनिमित्तेहि विरज्‍जति। विरागो विरागारम्मणो विरागगोचरो विरागे समुदागतो ¹ विरागे ठितो विरागे पतिट्ठितो।

28. Virāgo maggo, vimutti phalaṃ. Kathaṃ virāgo maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato ² virāge ṭhito virāge patiṭṭhito.

विरागोति द्वे विरागा – निब्बानञ्‍च विरागो, ये च निब्बानारम्मणताजाता धम्मा सब्बे विरागा होन्तीति – विरागा। सहजातानि सत्तङ्गानि विरागं गच्छन्तीति – विरागो मग्गो। एतेन मग्गेन बुद्धा च सावका च अगतं दिसं निब्बानं गच्छन्तीति – अट्ठङ्गिको मग्गो। यावता पुथुसमणब्राह्मणानं परप्पवादानं मग्गा, अयमेव अरियो अट्ठङ्गिको मग्गो अग्गो च सेट्ठो च पामोक्खो ³ च उत्तमो च पवरो चाति – मग्गानं अट्ठङ्गिको सेट्ठो।

Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā, ayameva ariyo aṭṭhaṅgiko maggo aggo ca seṭṭho ca pāmokkho ⁴ ca uttamo ca pavaro cāti – maggānaṃ aṭṭhaṅgiko seṭṭho.

अभिनिरोपनट्ठेन सम्मासङ्कप्पो मिच्छासङ्कप्पा विरज्‍जति। परिग्गहट्ठेन सम्मावाचा मिच्छावाचाय विरज्‍जति। समुट्ठानट्ठेन सम्माकम्मन्तो मिच्छाकम्मन्ता विरज्‍जति। वोदानट्ठेन सम्माआजीवो मिच्छाआजीवा विरज्‍जति। पग्गहट्ठेन सम्मावायामो मिच्छावायामा विरज्‍जति। उपट्ठानट्ठेन सम्मासति मिच्छासतिया विरज्‍जति। अविक्खेपट्ठेन सम्मासमाधि मिच्छासमाधितो विरज्‍जति। तदनुवत्तककिलेसेहि च खन्धेहि च विरज्‍जति। बहिद्धा च सब्बनिमित्तेहि विरज्‍जति। विरागो विरागारम्मणो विरागगोचरो विरागे समुदागतो विरागे ठितो विरागे पतिट्ठितो।

Abhiniropanaṭṭhena sammāsaṅkappo micchāsaṅkappā virajjati. Pariggahaṭṭhena sammāvācā micchāvācāya virajjati. Samuṭṭhānaṭṭhena sammākammanto micchākammantā virajjati. Vodānaṭṭhena sammāājīvo micchāājīvā virajjati. Paggahaṭṭhena sammāvāyāmo micchāvāyāmā virajjati. Upaṭṭhānaṭṭhena sammāsati micchāsatiyā virajjati. Avikkhepaṭṭhena sammāsamādhi micchāsamādhito virajjati. Tadanuvattakakilesehi ca khandhehi ca virajjati. Bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato virāge ṭhito virāge patiṭṭhito.

विरागोति द्वे विरागा – निब्बानञ्‍च विरागो, ये च निब्बानारम्मणताजाता धम्मा सब्बे विरागा होन्तीति – विरागा। सहजातानि सत्तङ्गानि विरागं गच्छन्तीति – विरागो मग्गो । एतेन मग्गेन बुद्धा च सावका च अगतं दिसं निब्बानं गच्छन्तीति – अट्ठङ्गिको मग्गो। यावता पुथुसमणब्राह्मणानं परप्पवादानं मग्गा, अयमेव अरियो अट्ठङ्गिको मग्गो अग्गो च सेट्ठो च पामोक्खो च उत्तमो च पवरो चाति – मग्गानं अट्ठङ्गिको सेट्ठो।

Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo . Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā, ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.

सकदागामिमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि ओळारिका कामरागसञ्‍ञोजना पटिघसञ्‍ञोजना ओळारिका कामरागानुसया पटिघानुसया विरज्‍जति, तदनुवत्तककिलेसेहि च खन्धेहि च विरज्‍जति, बहिद्धा च सब्बनिमित्तेहि विरज्‍जति। विरागो विरागारम्मणो विरागगोचरो विरागे समुदागतो विरागे ठितो विरागे पतिट्ठितो।

Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato virāge ṭhito virāge patiṭṭhito.

विरागोति द्वे विरागा – निब्बानञ्‍च विरागो, ये च निब्बानारम्मणताजाता धम्मा सब्बे विरागा होन्तीति – विरागा। सहजातानि सत्तङ्गानि विरागं गच्छन्तीति – विरागो मग्गो। एतेन मग्गेन बुद्धा च सावका च अगतं दिसं निब्बानं गच्छन्तीति – अट्ठङ्गिको मग्गो। यावता पुथुसमणब्राह्मणानं परप्पवादानं मग्गा। अयमेव अरियो अट्ठङ्गिको मग्गो अग्गो च सेट्ठो च पामोक्खो च उत्तमो च पवरो चाति – मग्गानं अट्ठङ्गिको सेट्ठो।

Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā. Ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.

अनागामिमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि अनुसहगता कामरागसञ्‍ञोजना पटिघसञ्‍ञोजना अनुसहगता कामरागानुसया पटिघानुसया विरज्‍जति, तदनुवत्तककिलेसेहि च खन्धेहि च विरज्‍जति, बहिद्धा च सब्बनिमित्तेहि विरज्‍जति। विरागो विरागारम्मणो…पे॰… मग्गानं अट्ठङ्गिको सेट्ठो।

Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo…pe… maggānaṃ aṭṭhaṅgiko seṭṭho.

अरहत्तमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि रूपरागा अरूपरागा माना उद्धच्‍चा अविज्‍जाय मानानुसया भवरागानुसया अविज्‍जानुसया विरज्‍जति, तदनुवत्तककिलेसेहि च खन्धेहि च विरज्‍जति, बहिद्धा च सब्बनिमित्तेहि विरज्‍जति विरागो विरागारम्मणो विरागगोचरो विरागे समुदागतो विरागे ठितो विरागे पतिट्ठितो।

Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati virāgo virāgārammaṇo virāgagocaro virāge samudāgato virāge ṭhito virāge patiṭṭhito.

विरागोति द्वे विरागा – निब्बानञ्‍च विरागो, ये च निब्बानारम्मणताजाता धम्मा सब्बे विरागा होन्तीति – विरागा। सहजातानि सत्तङ्गानि विरागं गच्छन्तीति – विरागो मग्गो। एतेन मग्गेन बुद्धा च सावका च अगतं दिसं निब्बानं गच्छन्तीति – अट्ठङ्गिको मग्गो । यावता पुथुसमणब्राह्मणानं परप्पवादानं मग्गा। अयमेव अरियो अट्ठङ्गिको मग्गो अग्गो च सेट्ठो च पामोक्खो च उत्तमो च पवरो चाति – मग्गानं अट्ठङ्गिको सेट्ठो।

Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo . Yāvatā puthusamaṇabrāhmaṇānaṃ parappavādānaṃ maggā. Ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.

दस्सनविरागो सम्मादिट्ठि। अभिनिरोपनविरागो सम्मासङ्कप्पो। परिग्गहविरागो सम्मावाचा। समुट्ठानविरागो सम्माकम्मन्तो। वोदानविरागो सम्माआजीवो । पग्गहविरागो सम्मावायामो। उपट्ठानविरागो सम्मासति। अविक्खेपविरागो सम्मासमाधि। उपट्ठानविरागो सतिसम्बोज्झङ्गो। पविचयविरागो धम्मविचयसम्बोज्झङ्गो। पग्गहविरागो वीरियसम्बोज्झङ्गो। फरणविरागो पीतिसम्बोज्झङ्गो। उपसमविरागो पस्सद्धिसम्बोज्झङ्गो। अविक्खेपविरागो समाधिसम्बोज्झङ्गो। पटिसङ्खानविरागो उपेक्खासम्बोज्झङ्गो। अस्सद्धिये अकम्पियविरागो सद्धाबलं। कोसज्‍जे अकम्पियविरागो वीरियबलं। पमादे अकम्पियविरागो सतिबलं। उद्धच्‍चे अकम्पियविरागो समाधिबलं। अविज्‍जाय अकम्पियविरागो पञ्‍ञाबलं। अधिमोक्खविरागो सद्धिन्द्रियं। पग्गहविरागो वीरियिन्द्रियं। उपट्ठानविरागो सतिन्द्रियं। अविक्खेपविरागो समाधिन्द्रियं। दस्सनविरागो पञ्‍ञिन्द्रियं। आधिपतेय्यट्ठेन इन्द्रियानि विरागो। अकम्पियट्ठेन बलं विरागो। निय्यानट्ठेन बोज्झङ्गा विरागो। हेतुट्ठेन मग्गो विरागो। उपट्ठानट्ठेन सतिपट्ठाना विरागो। पदहनट्ठेन सम्मप्पधाना विरागो। इज्झनट्ठेन इद्धिपादा विरागो। तथट्ठेन सच्‍चा विरागो। अविक्खेपट्ठेन समथो विरागो। अनुपस्सनट्ठेन विपस्सना विरागो। एकरसट्ठेन समथविपस्सना विरागो। अनतिवत्तनट्ठेन युगनद्धं विरागो। संवरट्ठेन सीलविसुद्धि विरागो। अविक्खेपट्ठेन चित्तविसुद्धि विरागो। दस्सनट्ठेन दिट्ठिविसुद्धि विरागो। विमुत्तट्ठेन विमोक्खो विरागो। पटिवेधट्ठेन विज्‍जा विरागो। परिच्‍चागट्ठेन विमुत्ति विरागो। समुच्छेदट्ठेन खये ञाणं विरागो। छन्दो मूलट्ठेन विरागो। मनसिकारो समुट्ठानट्ठेन विरागो। फस्सो समोधानट्ठेन विरागो। वेदना समोसरणट्ठेन विरागो। समाधि पमुखट्ठेन विरागो। सति आधिपतेय्यट्ठेन विरागो। पञ्‍ञा ततुत्तरट्ठेन विरागो। विमुत्ति सारट्ठेन विरागो। अमतोगधं निब्बानं परियोसानट्ठेन मग्गो।

Dassanavirāgo sammādiṭṭhi. Abhiniropanavirāgo sammāsaṅkappo. Pariggahavirāgo sammāvācā. Samuṭṭhānavirāgo sammākammanto. Vodānavirāgo sammāājīvo . Paggahavirāgo sammāvāyāmo. Upaṭṭhānavirāgo sammāsati. Avikkhepavirāgo sammāsamādhi. Upaṭṭhānavirāgo satisambojjhaṅgo. Pavicayavirāgo dhammavicayasambojjhaṅgo. Paggahavirāgo vīriyasambojjhaṅgo. Pharaṇavirāgo pītisambojjhaṅgo. Upasamavirāgo passaddhisambojjhaṅgo. Avikkhepavirāgo samādhisambojjhaṅgo. Paṭisaṅkhānavirāgo upekkhāsambojjhaṅgo. Assaddhiye akampiyavirāgo saddhābalaṃ. Kosajje akampiyavirāgo vīriyabalaṃ. Pamāde akampiyavirāgo satibalaṃ. Uddhacce akampiyavirāgo samādhibalaṃ. Avijjāya akampiyavirāgo paññābalaṃ. Adhimokkhavirāgo saddhindriyaṃ. Paggahavirāgo vīriyindriyaṃ. Upaṭṭhānavirāgo satindriyaṃ. Avikkhepavirāgo samādhindriyaṃ. Dassanavirāgo paññindriyaṃ. Ādhipateyyaṭṭhena indriyāni virāgo. Akampiyaṭṭhena balaṃ virāgo. Niyyānaṭṭhena bojjhaṅgā virāgo. Hetuṭṭhena maggo virāgo. Upaṭṭhānaṭṭhena satipaṭṭhānā virāgo. Padahanaṭṭhena sammappadhānā virāgo. Ijjhanaṭṭhena iddhipādā virāgo. Tathaṭṭhena saccā virāgo. Avikkhepaṭṭhena samatho virāgo. Anupassanaṭṭhena vipassanā virāgo. Ekarasaṭṭhena samathavipassanā virāgo. Anativattanaṭṭhena yuganaddhaṃ virāgo. Saṃvaraṭṭhena sīlavisuddhi virāgo. Avikkhepaṭṭhena cittavisuddhi virāgo. Dassanaṭṭhena diṭṭhivisuddhi virāgo. Vimuttaṭṭhena vimokkho virāgo. Paṭivedhaṭṭhena vijjā virāgo. Pariccāgaṭṭhena vimutti virāgo. Samucchedaṭṭhena khaye ñāṇaṃ virāgo. Chando mūlaṭṭhena virāgo. Manasikāro samuṭṭhānaṭṭhena virāgo. Phasso samodhānaṭṭhena virāgo. Vedanā samosaraṇaṭṭhena virāgo. Samādhi pamukhaṭṭhena virāgo. Sati ādhipateyyaṭṭhena virāgo. Paññā tatuttaraṭṭhena virāgo. Vimutti sāraṭṭhena virāgo. Amatogadhaṃ nibbānaṃ pariyosānaṭṭhena maggo.

दस्सनमग्गो सम्मादिट्ठि, अभिनिरोपनमग्गो सम्मासङ्कप्पो…पे॰… अमतोगधं निब्बानं परियोसानट्ठेन मग्गो। एवं विरागो मग्गो।

Dassanamaggo sammādiṭṭhi, abhiniropanamaggo sammāsaṅkappo…pe… amatogadhaṃ nibbānaṃ pariyosānaṭṭhena maggo. Evaṃ virāgo maggo.

२९. कथं विमुत्ति फलं? सोतापत्तिफलक्खणे दस्सनट्ठेन सम्मादिट्ठि मिच्छादिट्ठिया विमुत्ता होति, तदनुवत्तककिलेसेहि च खन्धेहि च विमुत्ता होति, बहिद्धा च सब्बनिमित्तेहि विमुत्ता होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता। विमुत्तीति द्वे मुत्तियो – निब्बानञ्‍च विमुत्ति, ये च निब्बानारम्मणताजाता धम्मा सब्बे च विमुत्ता होन्तीति – विमुत्ति फलं।

29. Kathaṃ vimutti phalaṃ? Sotāpattiphalakkhaṇe dassanaṭṭhena sammādiṭṭhi micchādiṭṭhiyā vimuttā hoti, tadanuvattakakilesehi ca khandhehi ca vimuttā hoti, bahiddhā ca sabbanimittehi vimuttā hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve muttiyo – nibbānañca vimutti, ye ca nibbānārammaṇatājātā dhammā sabbe ca vimuttā hontīti – vimutti phalaṃ.

अभिनिरोपनट्ठेन सम्मासङ्कप्पो मिच्छासङ्कप्पा विमुत्तो होति, तदनुवत्तककिलेसेहि च खन्धेहि च विमुत्तो होति, बहिद्धा च सब्बनिमित्तेहि विमुत्तो होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता। विमुत्तीति द्वे विमुत्तियो – निब्बानञ्‍च विमुत्ति, ये च निब्बानारम्मणताजाता धम्मा सब्बे विमुत्ता होन्तीति – विमुत्ति फलं।

Abhiniropanaṭṭhena sammāsaṅkappo micchāsaṅkappā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.

परिग्गहट्ठेन सम्मावाचा मिच्छावाचाय विमुत्ता होति, समुट्ठानट्ठेन सम्माकम्मन्तो मिच्छाकम्मन्ता विमुत्तो होति, वोदानट्ठेन सम्माआजीवो मिच्छाआजीवा विमुत्तो होति, पग्गहट्ठेन सम्मावायामो मिच्छावायामा विमुत्तो होति, उपट्ठानट्ठेन सम्मासति मिच्छासतिया विमुत्ता होति, अविक्खेपट्ठेन सम्मासमाधि मिच्छासमाधितो विमुत्तो होति, तदनुवत्तककिलेसेहि च खन्धेहि च विमुत्तो होति, बहिद्धा च सब्बनिमित्तेहि विमुत्तो होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता। विमुत्तीति। द्वे विमुत्तियो – निब्बानञ्‍च विमुत्ति, ये च निब्बानारम्मणताजाता धम्मा सब्बे विमुत्ता होन्तीति – विमुत्ति फलं।

Pariggahaṭṭhena sammāvācā micchāvācāya vimuttā hoti, samuṭṭhānaṭṭhena sammākammanto micchākammantā vimutto hoti, vodānaṭṭhena sammāājīvo micchāājīvā vimutto hoti, paggahaṭṭhena sammāvāyāmo micchāvāyāmā vimutto hoti, upaṭṭhānaṭṭhena sammāsati micchāsatiyā vimuttā hoti, avikkhepaṭṭhena sammāsamādhi micchāsamādhito vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti. Dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.

सकदागामिफलक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि ओळारिका कामरागसञ्‍ञोजना पटिघसञ्‍ञोजना ओळारिका कामरागानुसया पटिघानुसया विमुत्तो होति, तदनुवत्तककिलेसेहि च खन्धेहि च विमुत्तो होति, बहिद्धा च सब्बनिमित्तेहि विमुत्तो होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता। विमुत्तीति द्वे विमुत्तियो – निब्बानञ्‍च विमुत्ति, ये च निब्बानारम्मणताजाता धम्मा सब्बे विमुत्ता होन्तीति – विमुत्ति फलं।

Sakadāgāmiphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.

अनागामिफलक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि अनुसहगता कामरागसञ्‍ञोजना पटिघसञ्‍ञोजना अनुसहगता कामरागानुसया पटिघानुसया विमुत्तो होति, तदनुवत्तककिलेसेहि च खन्धेहि च विमुत्तो होति, बहिद्धा च सब्बनिमित्तेहि विमुत्तो होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता…पे॰…।

Anāgāmiphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā…pe….

अरहत्तफलक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि रूपरागा अरूपरागा माना उद्धच्‍चा अविज्‍जाय मानानुसया भवरागानुसया अविज्‍जानुसया विमुत्तो होति, तदनुवत्तककिलेसेहि च खन्धेहि च विमुत्तो होति, बहिद्धा च सब्बनिमित्तेहि विमुत्तो होति, विमुत्ति विमुत्तारम्मणा विमुत्तिगोचरा विमुत्तिया समुदागता विमुत्तिया ठिता विमुत्तिया पतिट्ठिता। विमुत्तीति द्वे विमुत्तियो – निब्बानञ्‍च विमुत्ति, ये च निब्बानारम्मणता जाता धम्मा सब्बे विमुत्ता होन्तीति – विमुत्ति फलं।

Arahattaphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatā jātā dhammā sabbe vimuttā hontīti – vimutti phalaṃ.

दस्सनविमुत्ति सम्मादिट्ठि…पे॰… अविक्खेपविमुत्ति सम्मासमाधि, उपट्ठानविमुत्ति सतिसम्बोज्झङ्गो, पटिसङ्खानविमुत्ति उपेक्खासम्बोज्झङ्गो। अस्सद्धिये अकम्पियविमुत्ति सद्धाबलं…पे॰… अविज्‍जाय अकम्पियविमुत्ति पञ्‍ञाबलं। अधिमोक्खविमुत्ति सद्धिन्द्रियं…पे॰… दस्सनविमुत्ति पञ्‍ञिन्द्रियं।

Dassanavimutti sammādiṭṭhi…pe… avikkhepavimutti sammāsamādhi, upaṭṭhānavimutti satisambojjhaṅgo, paṭisaṅkhānavimutti upekkhāsambojjhaṅgo. Assaddhiye akampiyavimutti saddhābalaṃ…pe… avijjāya akampiyavimutti paññābalaṃ. Adhimokkhavimutti saddhindriyaṃ…pe… dassanavimutti paññindriyaṃ.

आधिपतेय्यट्ठेन इन्द्रिया विमुत्ति। अकम्पियट्ठेन बला विमुत्ति, निय्यानट्ठेन बोज्झङ्गा विमुत्ति, हेतुट्ठेन मग्गो विमुत्ति, उपट्ठानट्ठेन सतिपट्ठाना विमुत्ति, पदहनट्ठेन सम्मप्पधाना विमुत्ति, इज्झनट्ठेन इद्धिपादा विमुत्ति, तथट्ठेन सच्‍चा विमुत्ति, अविक्खेपट्ठेन समथो विमुत्ति, अनुपस्सनट्ठेन विपस्सना विमुत्ति, एकरसट्ठेन समथविपस्सना विमुत्ति, अनतिवत्तनट्ठेन युगनद्धं विमुत्ति, संवरट्ठेन सीलविसुद्धि विमुत्ति, अविक्खेपट्ठेन चित्तविसुद्धि विमुत्ति, दस्सनट्ठेन दिट्ठिविसुद्धि विमुत्ति, विमुत्तट्ठेन विमोक्खो विमुत्ति, पटिवेधट्ठेन विज्‍जा विमुत्ति, परिच्‍चागट्ठेन विमुत्ति विमुत्ति, पटिप्पस्सद्धियट्ठेन अनुप्पादे ञाणं विमुत्ति, छन्दो मूलट्ठेन विमुत्ति, मनसिकारो समुट्ठानट्ठेन विमुत्ति, फस्सो समोधानट्ठेन विमुत्ति, वेदना समोसरणट्ठेन विमुत्ति, समाधि पमुखट्ठेन विमुत्ति, सति आधिपतेय्यट्ठेन विमुत्ति, पञ्‍ञा ततुत्तरट्ठेन विमुत्ति, विमुत्ति सारट्ठेन विमुत्ति, अमतोगधं निब्बानं परियोसानट्ठेन विमुत्ति। एवं विमुत्ति फलं। एवं विरागो मग्गो , विमुत्ति फलन्ति।

Ādhipateyyaṭṭhena indriyā vimutti. Akampiyaṭṭhena balā vimutti, niyyānaṭṭhena bojjhaṅgā vimutti, hetuṭṭhena maggo vimutti, upaṭṭhānaṭṭhena satipaṭṭhānā vimutti, padahanaṭṭhena sammappadhānā vimutti, ijjhanaṭṭhena iddhipādā vimutti, tathaṭṭhena saccā vimutti, avikkhepaṭṭhena samatho vimutti, anupassanaṭṭhena vipassanā vimutti, ekarasaṭṭhena samathavipassanā vimutti, anativattanaṭṭhena yuganaddhaṃ vimutti, saṃvaraṭṭhena sīlavisuddhi vimutti, avikkhepaṭṭhena cittavisuddhi vimutti, dassanaṭṭhena diṭṭhivisuddhi vimutti, vimuttaṭṭhena vimokkho vimutti, paṭivedhaṭṭhena vijjā vimutti, pariccāgaṭṭhena vimutti vimutti, paṭippassaddhiyaṭṭhena anuppāde ñāṇaṃ vimutti, chando mūlaṭṭhena vimutti, manasikāro samuṭṭhānaṭṭhena vimutti, phasso samodhānaṭṭhena vimutti, vedanā samosaraṇaṭṭhena vimutti, samādhi pamukhaṭṭhena vimutti, sati ādhipateyyaṭṭhena vimutti, paññā tatuttaraṭṭhena vimutti, vimutti sāraṭṭhena vimutti, amatogadhaṃ nibbānaṃ pariyosānaṭṭhena vimutti. Evaṃ vimutti phalaṃ. Evaṃ virāgo maggo , vimutti phalanti.

विरागकथा निट्ठिता।

Virāgakathā niṭṭhitā.

Next: ६. पटिसम्भिदाकथा • 6. Paṭisambhidākathā

Footnotes:

1. समुपागतो (स्या॰)

2. samupāgato (syā.)

3. विमोक्खो (स्या॰), मोक्खो (अट्ठ॰)

4. vimokkho (syā.), mokkho (aṭṭha.)

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / विरागकथावण्णना • Virāgakathāvaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact