| Library / Tipiṭaka / तिपिटक • Tipiṭaka / थेरीगाथा-अट्ठकथा • Therīgāthā-aṭṭhakathā |
१३. विसाखाथेरीगाथावण्णना
13. Visākhātherīgāthāvaṇṇanā
करोथ बुद्धसासनन्ति विसाखाय थेरिया गाथा। तस्सा वत्थु धीराथेरियावत्थुसदिसमेव। सा अरहत्तं पत्वा विमुत्तिसुखेन वीतिनामेन्ती –
Karothabuddhasāsananti visākhāya theriyā gāthā. Tassā vatthu dhīrātheriyāvatthusadisameva. Sā arahattaṃ patvā vimuttisukhena vītināmentī –
१३.
13.
‘‘करोथ बुद्धसासनं, यं कत्वा नानुतप्पति।
‘‘Karotha buddhasāsanaṃ, yaṃ katvā nānutappati;
खिप्पं पादानि धोवित्वा, एकमन्ते निसीदथा’’ति॥ –
Khippaṃ pādāni dhovitvā, ekamante nisīdathā’’ti. –
इमाय गाथाय अञ्ञं ब्याकासि।
Imāya gāthāya aññaṃ byākāsi.
तत्थ करोथ बुद्धसासनन्ति बुद्धसासनं ओवादअनुसिट्ठिं करोथ, यथानुसिट्ठं पटिपज्जथाति अत्थो। यं कत्वा नानुतप्पतीति अनुसिट्ठिं कत्वा करणहेतु न अनुतप्पति तक्करस्स सम्मदेव अधिप्पायानं समिज्झनतो। खिप्पं पादानि धोवित्वा, एकमन्ते निसीदथाति इदं यस्मा सयं पच्छाभत्तं पिण्डपातपटिक्कन्ता आचरियुपज्झायानं वत्तं दस्सेत्वा अत्तनो दिवाट्ठाने पादे धोवित्वा रहो निसिन्ना सदत्थं मत्थकं पापेसि, तस्मा तत्थ अञ्ञेपि नियोजेन्ती अवोच।
Tattha karotha buddhasāsananti buddhasāsanaṃ ovādaanusiṭṭhiṃ karotha, yathānusiṭṭhaṃ paṭipajjathāti attho. Yaṃ katvā nānutappatīti anusiṭṭhiṃ katvā karaṇahetu na anutappati takkarassa sammadeva adhippāyānaṃ samijjhanato. Khippaṃ pādāni dhovitvā, ekamante nisīdathāti idaṃ yasmā sayaṃ pacchābhattaṃ piṇḍapātapaṭikkantā ācariyupajjhāyānaṃ vattaṃ dassetvā attano divāṭṭhāne pāde dhovitvā raho nisinnā sadatthaṃ matthakaṃ pāpesi, tasmā tattha aññepi niyojentī avoca.
विसाखाथेरीगाथावण्णना निट्ठिता।
Visākhātherīgāthāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / थेरीगाथापाळि • Therīgāthāpāḷi / १३.विसाखाथेरीगाथा • 13.Visākhātherīgāthā
