| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-анудийгаа • Dhammasaṅgaṇī-anuṭīkā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
абхид̇хаммабидагз
Abhidhammapiṭake
д̇хаммасан̇г̇ан̣ий-анудийгаа
Dhammasaṅgaṇī-anuṭīkā
вийсад̇иг̇аат̇ааван̣н̣анаа
Vīsatigāthāvaṇṇanā
1. абхид̇хаммасам̣ван̣н̣анааяа ад̇т̇ам̣ сам̣ван̣н̣зд̇угаамо д̇ассаа аад̣̇иг̇аат̇ааяа д̇аава баяож̇анасамб̣анд̇хаабхид̇хаанабуб̣б̣ан̇г̇амам̣ ад̇т̇ам̣ нид̣̇д̇хаарзнд̇о ул̣аараж̇жхаасаяаанам̣ нисаммагаарийнам̣ бадибад̇д̇и барзсам̣ вивид̇хахид̇асуканибпаад̣̇анаббаяож̇анаад̇и аажарияассааби д̇хаммасам̣ван̣н̣анааяа аад̣̇имхи сад̇т̇ари нибажжагаарасса анд̇арааяависосанад̇т̇ад̇аа вияа сад̇т̇ари д̇хаммз жа барзсам̣ ажжанд̇асукаббадилаабхасам̣вад̇д̇анияасад̣̇д̇хаарад̇ануббаад̣̇анад̇т̇ад̇ааби сияаад̇и д̣̇ассзд̇ум̣ ‘‘д̇хаммасам̣ван̣н̣анааяа’’нд̇иаад̣̇имааха. д̇ад̇т̇а яат̇аанусидтам̣ бадибаж̇ж̇амаанз абааязсу абад̇амаанз д̇хаарзд̇ийд̇и д̇хаммод̇и сааман̃н̃аважаноби д̇хамма-сад̣̇д̣̇о сад̣̇д̣̇анд̇арасаннид̇хаанзна ид̇ха барияад̇д̇ивисзсависаяо. сам̣ван̣н̣ийяад̇и ад̇т̇о зд̇ааяаад̇и сам̣ван̣н̣анаа, адтагат̇аа.
1. Abhidhammasaṃvaṇṇanāya atthaṃ saṃvaṇṇetukāmo tassā ādigāthāya tāva payojanasambandhābhidhānapubbaṅgamaṃ atthaṃ niddhārento uḷārajjhāsayānaṃ nisammakārīnaṃ paṭipatti paresaṃ vividhahitasukhanipphādanappayojanāti ācariyassāpi dhammasaṃvaṇṇanāya ādimhi satthari nipaccakārassa antarāyavisosanatthatā viya satthari dhamme ca paresaṃ accantasukhappaṭilābhasaṃvattaniyasaddhāratanuppādanatthatāpi siyāti dassetuṃ ‘‘dhammasaṃvaṇṇanāya’’ntiādimāha. Tattha yathānusiṭṭhaṃ paṭipajjamāne apāyesu apatamāne dhāretīti dhammoti sāmaññavacanopi dhamma-saddo saddantarasannidhānena idha pariyattivisesavisayo. Saṃvaṇṇīyati attho etāyāti saṃvaṇṇanā, aṭṭhakathā.
д̇ивид̇хаяаанамукзна вимуд̇д̇ид̇хаммам̣ яат̇аарахаманусаасад̇ийд̇и сад̇т̇аа. бан̣аманам̣ бан̣аамо, гааяаваажаажид̇д̇зхи сад̇т̇у г̇ун̣аниннад̇аа. гирияаа гаран̣ам̣, бан̣аамасса гаран̣ам̣ бан̣аамагаран̣ам̣, ванд̣̇анаабаяог̇о. со жа гин̃жааби ‘‘ид̣̇аани ад̇хиббзд̇ам̣ бан̣аамам̣ гаронд̇о’’д̇иаад̣̇инаа ‘‘д̇асса баад̣̇з намассид̇ваа’’д̇иаад̣̇игасса ад̇хиббзд̇абан̣аамабхаавам̣ д̣̇ассзссад̇и, ‘‘гарун̣аа вияаа’’д̇иаад̣̇игасса бана саб̣б̣асса т̇оманаавасзна вуд̇д̇ассаби васзна взд̣̇ид̇аб̣б̣о. со хи сад̇т̇у махаагарун̣аад̣̇иг̇ун̣ависзсагид̇д̇анавасзна бавад̇д̇о махаагарун̣аад̣̇иг̇ун̣ависзсаавинаабхаавинаа сам̣ван̣н̣ияамаанасам̣ван̣н̣анаад̇хаммавибхаавид̇зна д̇хаммасса сваагкаад̇абхаавзна сваагкаад̇ад̇хаммз сад̇т̇ари ануббаннасад̣̇д̇хаанам̣ сад̣̇д̇хааж̇ананааяа, уббаннасад̣̇д̇хаанан̃жа бхияяобхаавааяа ход̇и. сад̇т̇уно жа авибарийд̇ад̇хаммад̣̇зсанабхаавзна авид̇ат̇ад̣̇зсанаабхууд̇з д̇хаммзд̇и зд̇зна сад̇т̇уно махаагарун̣аад̣̇иг̇ун̣аанам̣язва жа палависзсанибпаад̣̇анасамад̇т̇ад̇ааяа басаад̣̇аавахад̇ам̣ ааха. д̇хаммзна хи сад̇т̇усид̣̇д̇хи, сад̇т̇аараа жа д̇хаммасид̣̇д̇хи, д̇хаммасамбад̇д̇ияааби сад̇т̇уг̇ун̣ад̇ааяа сад̇т̇уг̇ун̣авибхааванзна самбаж̇ж̇ад̇ийд̇и.
Tividhayānamukhena vimuttidhammaṃ yathārahamanusāsatīti satthā. Paṇamanaṃ paṇāmo, kāyavācācittehi satthu guṇaninnatā. Kiriyā karaṇaṃ, paṇāmassa karaṇaṃ paṇāmakaraṇaṃ, vandanāpayogo. So ca kiñcāpi ‘‘idāni adhippetaṃ paṇāmaṃ karonto’’tiādinā ‘‘tassa pāde namassitvā’’tiādikassa adhippetapaṇāmabhāvaṃ dassessati, ‘‘karuṇā viyā’’tiādikassa pana sabbassa thomanāvasena vuttassapi vasena veditabbo. So hi satthu mahākaruṇādiguṇavisesakittanavasena pavatto mahākaruṇādiguṇavisesāvinābhāvinā saṃvaṇṇiyamānasaṃvaṇṇanādhammavibhāvitena dhammassa svākkhātabhāvena svākkhātadhamme satthari anuppannasaddhānaṃ saddhājananāya, uppannasaddhānañca bhiyyobhāvāya hoti. Satthuno ca aviparītadhammadesanabhāvena avitathadesanābhūte dhammeti etena satthuno mahākaruṇādiguṇānaṃyeva ca phalavisesanipphādanasamatthatāya pasādāvahataṃ āha. Dhammena hi satthusiddhi, satthārā ca dhammasiddhi, dhammasampattiyāpi satthuguṇatāya satthuguṇavibhāvanena sampajjatīti.
звам̣ сад̇т̇ари бан̣аамагаран̣асса згам̣ баяож̇анам̣ д̣̇ассзд̇ваа ид̣̇аани самб̣анд̇хам̣ вибхаавзд̇и ‘‘д̇ад̣̇убхаяаббасаад̣̇аа хий’’д̇иаад̣̇инаа. на хи сад̇т̇ари д̇хаммз ваа аббасанно сам̣ван̣н̣ияамаанз д̇ад̣̇ад̇хиг̇анд̇аб̣б̣з жа д̇хаммз саммаа бадибаж̇ж̇ад̇и, нааби сийлаад̣̇ианубаад̣̇аабариниб̣б̣аананд̇ам̣ маханд̇ам̣ ад̇т̇ам̣ саад̇хзд̇и, д̇асмаа д̇хаммасам̣ван̣н̣анаасу барзсам̣ саммаабадибад̇д̇иааган̇кааяа д̇ат̇ааруубад̇хаммабадиг̇г̇аахагзхи жа винияож̇ид̇зна сад̇т̇ари д̇хаммз жа басаад̣̇уббаад̣̇анам̣ сад̇т̇ари бан̣аамагаран̣ам̣ вихид̇анд̇и ад̇хиббааяо.
Evaṃ satthari paṇāmakaraṇassa ekaṃ payojanaṃ dassetvā idāni sambandhaṃ vibhāveti ‘‘tadubhayappasādā hī’’tiādinā. Na hi satthari dhamme vā appasanno saṃvaṇṇiyamāne tadadhigantabbe ca dhamme sammā paṭipajjati, nāpi sīlādianupādāparinibbānantaṃ mahantaṃ atthaṃ sādheti, tasmā dhammasaṃvaṇṇanāsu paresaṃ sammāpaṭipattiākaṅkhāya tathārūpadhammapaṭiggāhakehi ca viniyojitena satthari dhamme ca pasāduppādanaṃ satthari paṇāmakaraṇaṃ vihitanti adhippāyo.
бхаг̇авад̇о г̇ун̣асам̣гид̇д̇анам̣ д̇асса д̇хаммасан̇гхаанамби т̇оманаа ход̇иязваад̇и вуд̇д̇ам̣ ‘‘рад̇анад̇д̇аяабан̣аамаважана’’нд̇и. д̇ат̇аа жа вагкад̇и ‘‘бхаг̇авад̇о т̇оманзнзваа’’д̇иаад̣̇и (д̇ха. са. мууладий. 6). вагкамаанам̣ ваа ‘‘сад̣̇д̇хамман̃жасса бууж̇зд̇ваа’’д̇иаад̣̇им̣ санд̇хааяа вуд̇д̇ам̣. вин̃н̃аабанад̇т̇ам̣ барзсам̣ вин̃н̃уунанд̇и ваа самб̣анд̇ханийяам̣. авин̃н̃уунам̣ аббамаан̣ад̇ааяа абхааж̇анад̇ааяа жа вин̃н̃уунам̣ г̇ахан̣ам̣. д̇з хи б̣уд̣̇д̇хаад̣̇ийсу саг̇ааравасса бамаан̣абхууд̇ад̇ам̣ ж̇аананд̇аа д̇асса важанам̣ сод̇аб̣б̣ам̣ сад̣̇д̇хаад̇аб̣б̣ам̣ ман̃н̃анд̇и, саммад̣̇зва жа нам̣ ануд̇идтанд̇аа д̇ад̣̇ад̇хиббааяам̣ буурзнд̇и. ид̇хааби буриманаязнзва самб̣анд̇хо взд̣̇ид̇аб̣б̣о басаад̣̇авин̃н̃аабанаад̣̇имукзнаби саммаабадибад̇д̇иааган̇кааяа бавзд̣̇ид̇ад̇д̇аа.
Bhagavato guṇasaṃkittanaṃ tassa dhammasaṅghānampi thomanā hotiyevāti vuttaṃ ‘‘ratanattayapaṇāmavacana’’nti. Tathā ca vakkhati ‘‘bhagavato thomanenevā’’tiādi (dha. sa. mūlaṭī. 6). Vakkhamānaṃ vā ‘‘saddhammañcassa pūjetvā’’tiādiṃ sandhāya vuttaṃ. Viññāpanatthaṃ paresaṃ viññūnanti vā sambandhanīyaṃ. Aviññūnaṃ appamāṇatāya abhājanatāya ca viññūnaṃ gahaṇaṃ. Te hi buddhādīsu sagāravassa pamāṇabhūtataṃ jānantā tassa vacanaṃ sotabbaṃ saddhātabbaṃ maññanti, sammadeva ca naṃ anutiṭṭhantā tadadhippāyaṃ pūrenti. Idhāpi purimanayeneva sambandho veditabbo pasādaviññāpanādimukhenapi sammāpaṭipattiākaṅkhāya paveditattā.
зд̇т̇а жа батамо ад̇т̇авигаббо сад̣̇д̇хаанусаарийнам̣ буг̇г̇алаанам̣ васзна вуд̇д̇о, д̣̇уд̇ияо д̇хаммаанусаарийнам̣. батамо ваа асам̣сид̣̇д̇хасад̇т̇уд̇хаммаанам̣ васзна вуд̇д̇о, д̣̇уд̇ияо сам̣сид̣̇д̇хасад̇т̇уд̇хаммаанам̣. д̇ат̇аа батамо батамз рад̇анз бан̣аамагирияаад̣̇ассанабаро, д̣̇уд̇ияо ид̇арзсубийд̇и аяам̣ висзсо взд̣̇ид̇аб̣б̣о.
Ettha ca paṭhamo atthavikappo saddhānusārīnaṃ puggalānaṃ vasena vutto, dutiyo dhammānusārīnaṃ. Paṭhamo vā asaṃsiddhasatthudhammānaṃ vasena vutto, dutiyo saṃsiddhasatthudhammānaṃ. Tathā paṭhamo paṭhame ratane paṇāmakiriyādassanaparo, dutiyo itaresupīti ayaṃ viseso veditabbo.
бан̣аамо гарийяад̇и зд̇ааяаад̇и бан̣аамагаран̣ам̣, бан̣аамагирияаабхинибпаад̣̇игаа жзд̇анаа. саа хи кзд̇д̇асамбад̇д̇ияаа аажарияасса жа аж̇жхаасаяасамбад̇д̇ияаа д̣̇идтад̇хаммавзд̣̇анийяабхууд̇аа яат̇аалад̣̇д̇хасамбад̇д̇инимид̇д̇агасса гаммасса б̣алаануббад̣̇аанавасзна буримагамманибпаннасса вибаагасанд̇аанасса анд̇араа взмаж̇жхз ааяанд̇и аабад̇анд̇ийд̇и анд̇арааяаад̇и лад̣̇д̇ханаамаанам̣ рог̇аад̣̇ианад̇т̇аанам̣ вид̇хааяагасса убабийл̣агасса убажчзд̣̇агасса ваа гаммасса вид̣̇д̇хам̣санасамад̇т̇о бун̃н̃аад̇исаяод̇и имамад̇т̇ам̣ д̣̇ассзд̇и ‘‘рад̇анад̇д̇аяабан̣аама…бз… висзсабхаавад̇о’’д̇и. зван̃жа гад̇ваа рааг̇аад̣̇ибарияудтаанаабхаававажанзна анд̇арааяасса гааран̣абхууд̇ааяа баяог̇авибад̇д̇ияаа абхаавасса, ад̇т̇алаабхаад̣̇иважанзна ананд̇арааяад̇аахзд̇убхууд̇ааяа баяог̇асамбад̇д̇ияаа саб̣бхаавасса, ‘‘саб̣яаабаж̇жхааяа баж̇ааяа аб̣яаабаж̇жхо вихарад̇ий’’д̇и (а. ни. 6.10; 11.11) важанзна д̣̇идтзва д̇хаммз сукавихаарид̇ааяа жа багаасанам̣ махаанаамасуд̇д̇ам̣язва уд̣̇аахадам̣.
Paṇāmo karīyati etāyāti paṇāmakaraṇaṃ, paṇāmakiriyābhinipphādikā cetanā. Sā hi khettasampattiyā ācariyassa ca ajjhāsayasampattiyā diṭṭhadhammavedanīyabhūtā yathāladdhasampattinimittakassa kammassa balānuppadānavasena purimakammanipphannassa vipākasantānassa antarā vemajjhe āyanti āpatantīti antarāyāti laddhanāmānaṃ rogādianatthānaṃ vidhāyakassa upapīḷakassa upacchedakassa vā kammassa viddhaṃsanasamattho puññātisayoti imamatthaṃ dasseti ‘‘ratanattayapaṇāma…pe… visesabhāvato’’ti. Evañca katvā rāgādipariyuṭṭhānābhāvavacanena antarāyassa kāraṇabhūtāya payogavipattiyā abhāvassa, atthalābhādivacanena anantarāyatāhetubhūtāya payogasampattiyā sabbhāvassa, ‘‘sabyāpajjhāya pajāya abyāpajjho viharatī’’ti (a. ni. 6.10; 11.11) vacanena diṭṭheva dhamme sukhavihāritāya ca pakāsanaṃ mahānāmasuttaṃyeva udāhaṭaṃ.
г̇ун̣ависзсад̣̇ассанад̇т̇анд̇и зд̇зна сад̇иби гааяаманобан̣аамаанам̣ анд̇арааяависосанасамад̇т̇абхаавз д̇зхи бан̣аамависаяасса бан̣аамаарахабхаававибхааванзна саад̇исаяо важийбан̣аамо вихид̇од̇и д̣̇ассзд̇и. г̇ун̣ависзсаваа хийд̇иаад̣̇инаа аажарияасса яуд̇д̇абад̇д̇агаарид̇ам̣ д̣̇ассзд̇и. д̣̇зсанаа винаяабидагзд̇и зд̇т̇а нану винаяабидагассаби д̣̇зсанаабхаавад̇о д̣̇зсанаавинаяабидагаанам̣ бхзд̣̇аважанам̣ на яуд̇д̇анд̇и? но на яуд̇д̇ам̣ ‘‘д̇ийсуби жзд̇зсу зд̇з д̇хаммад̇т̇ад̣̇зсанаабадивзд̇хаа’’д̇и (д̇ха. са. адта. нид̣̇аанагат̇аа; д̣̇ий. ни. адта. 1.батамамахаасан̇г̇ийд̇игат̇аа; баараа. адта. 1.батамамахаасан̇г̇ийд̇игат̇аа) зд̇т̇а вияа самуд̣̇ааяад̣̇зсанааяа аваяавад̣̇зсанаанам̣ аад̇хаарабхаавад̇о. д̣̇зсанаагаалз ваа манасаа вавад̇т̇аабид̇ааяа винаяад̇анд̇ияаа винаяабидагабхаавад̇о д̇ад̣̇ад̇т̇абан̃н̃аабанасса жа д̣̇зсанаабхаавад̇о бхзд̣̇аважанам̣. ат̇а ваа д̣̇зсийяад̇и зд̇знаад̇и д̣̇зсанаа, д̣̇зсанаасамудтаабаго жид̇д̇уббаад̣̇о, д̇асса жа винаяабидагависаяо гарун̣аабуб̣б̣ан̇г̇амо жа сод̇и звамзд̇т̇а бхзд̣̇аважанобабад̇д̇и д̣̇адтаб̣б̣аа. суд̇д̇анд̇абидагзд̇иаад̣̇ийсуби зсзва наяо.
Guṇavisesadassanatthanti etena satipi kāyamanopaṇāmānaṃ antarāyavisosanasamatthabhāve tehi paṇāmavisayassa paṇāmārahabhāvavibhāvanena sātisayo vacīpaṇāmo vihitoti dasseti. Guṇavisesavā hītiādinā ācariyassa yuttapattakāritaṃ dasseti. Desanā vinayapiṭaketi ettha nanu vinayapiṭakassapi desanābhāvato desanāvinayapiṭakānaṃ bhedavacanaṃ na yuttanti? No na yuttaṃ ‘‘tīsupi cetesu ete dhammatthadesanāpaṭivedhā’’ti (dha. sa. aṭṭha. nidānakathā; dī. ni. aṭṭha. 1.paṭhamamahāsaṅgītikathā; pārā. aṭṭha. 1.paṭhamamahāsaṅgītikathā) ettha viya samudāyadesanāya avayavadesanānaṃ ādhārabhāvato. Desanākāle vā manasā vavatthāpitāya vinayatantiyā vinayapiṭakabhāvato tadatthapaññāpanassa ca desanābhāvato bhedavacanaṃ. Atha vā desīyati etenāti desanā, desanāsamuṭṭhāpako cittuppādo, tassa ca vinayapiṭakavisayo karuṇāpubbaṅgamo ca soti evamettha bhedavacanopapatti daṭṭhabbā. Suttantapiṭaketiādīsupi eseva nayo.
гат̇ам̣ бана бхаг̇авад̇о д̣̇зсанаа винаяабидагз гарун̣ааббад̇хаанаа, суд̇д̇аабхид̇хаммабидагзсу жа бан̃н̃аагарун̣аабан̃н̃ааббад̇хаанаад̇и вин̃н̃ааяад̇ийд̇и? яад̇о уггам̣сабарияанд̇аг̇ад̇ахирод̇д̇аббоби бхаг̇аваа логияасаад̇хуж̇анзхиби барихарид̇аб̣б̣аани ‘‘сикаран̣ий’’д̇иаад̣̇ийни важанаани яат̇аабараад̇хан̃жа г̇арахаважанаани винаяабидагад̣̇зсанааяам̣ махаагарун̣аасан̃жод̣̇ид̇амаанасо махаабарисамаж̇жхз абхааси, д̇ам̣д̇ам̣сигкаабад̣̇абан̃н̃ад̇д̇игааран̣аабзгкааяа взран̃ж̇аад̣̇ийсу саарийриган̃жа кзд̣̇аманубхоси, д̇асмаа гин̃жааби бхууманд̇арабажжаяаагаарасамаяанд̇арагат̇аанам̣ вияа винаяабан̃н̃ад̇д̇ияааби самудтаабигаа бан̃н̃аа анан̃н̃асаад̇хааран̣ад̇ааяа ад̇исаяагижжавад̇ий, д̇ад̇оби гарун̣ааяа гижжам̣ ад̇хиганд̇и ад̇хиббааязна вуд̇д̇ам̣ ‘‘винаяабидагз гарун̣ааббад̇хаанаа’’д̇и. гарун̣ааб̣яаабаараад̇хигад̇ааяа хи д̣̇зсанааяа гарун̣ааббад̇хаанад̇аа, суд̇д̇анд̇ад̣̇зсанааяа махаагарун̣аасамаабад̇д̇иб̣ахуло взнзяяасанд̇аанзсу д̇ад̣̇аж̇жхаасаяаануломзна г̇амбхийрамад̇т̇абад̣̇ам̣ бад̇идтабзсийд̇и гарун̣аабан̃н̃ааббад̇хаанад̇аа, абхид̇хаммад̣̇зсанааяа бана саб̣б̣ан̃н̃уд̇ан̃н̃аан̣асса висаяабхааваббахонаго руубааруубабарижчзд̣̇о д̇хаммасабхааваанурод̇хзна бавад̇д̇ид̇од̇и бан̃н̃ааббад̇хаанад̇аа. д̇знзва жа гааран̣знаад̇иаад̣̇инаа д̣̇зсанаануруубад̇ам̣д̇ам̣сам̣ван̣н̣анааяа т̇оманаа аажарияасса багад̇ийд̇и д̣̇ассзд̇и.
Kathaṃ pana bhagavato desanā vinayapiṭake karuṇāppadhānā, suttābhidhammapiṭakesu ca paññākaruṇāpaññāppadhānāti viññāyatīti? Yato ukkaṃsapariyantagatahirottappopi bhagavā lokiyasādhujanehipi pariharitabbāni ‘‘sikharaṇī’’tiādīni vacanāni yathāparādhañca garahavacanāni vinayapiṭakadesanāyaṃ mahākaruṇāsañcoditamānaso mahāparisamajjhe abhāsi, taṃtaṃsikkhāpadapaññattikāraṇāpekkhāya verañjādīsu sārīrikañca khedamanubhosi, tasmā kiñcāpi bhūmantarapaccayākārasamayantarakathānaṃ viya vinayapaññattiyāpi samuṭṭhāpikā paññā anaññasādhāraṇatāya atisayakiccavatī, tatopi karuṇāya kiccaṃ adhikanti adhippāyena vuttaṃ ‘‘vinayapiṭake karuṇāppadhānā’’ti. Karuṇābyāpārādhikatāya hi desanāya karuṇāppadhānatā, suttantadesanāya mahākaruṇāsamāpattibahulo veneyyasantānesu tadajjhāsayānulomena gambhīramatthapadaṃ patiṭṭhapesīti karuṇāpaññāppadhānatā, abhidhammadesanāya pana sabbaññutaññāṇassa visayabhāvappahonako rūpārūpaparicchedo dhammasabhāvānurodhena pavattitoti paññāppadhānatā. Teneva ca kāraṇenātiādinā desanānurūpataṃtaṃsaṃvaṇṇanāya thomanā ācariyassa pakatīti dasseti.
гусалаа руубам̣ жагкумаа д̣̇аса д̣̇аал̣имаад̣̇и самуухавасзна ад̇т̇аанаваб̣од̇ханад̇т̇о вияа ад̇т̇ааваб̣од̇ханад̇т̇о хи сад̣̇д̣̇аббаяог̇о ад̇д̇абараад̇хийно гзвало ад̇т̇абад̣̇ад̇т̇аго, со бад̣̇ад̇т̇авибариязсагааринаа ид̇и-сад̣̇д̣̇зна сад̣̇д̣̇абад̣̇ад̇т̇аго ж̇ааяад̇ийд̇и ааха ‘‘гарун̣аа вияаад̇и нид̣̇ассанаважана’’нд̇и. нид̣̇ассанан̃хи наама нид̣̇ассид̇аб̣б̣ад̇хаммз д̇зна жа самб̣анд̇хз сад̇и ход̇и, наан̃н̃ат̇аад̇и д̇асса нид̣̇ассанабхаавам̣ вибхаавзнд̇о ааха ‘‘яасса яат̇аа…бз… бавад̇д̇ид̇т̇аад̇и ад̇т̇о’’д̇и.
Kusalā rūpaṃ cakkhumā dasa dāḷimādi samūhavasena atthānavabodhanattho viya atthāvabodhanattho hi saddappayogo attaparādhīno kevalo atthapadatthako, so padatthavipariyesakārinā iti-saddena saddapadatthako jāyatīti āha ‘‘karuṇā viyāti nidassanavacana’’nti. Nidassanañhi nāma nidassitabbadhamme tena ca sambandhe sati hoti, nāññathāti tassa nidassanabhāvaṃ vibhāvento āha ‘‘yassa yathā…pe… pavattitthāti attho’’ti.
‘‘д̇ад̇т̇а гарун̣аа вияаад̇и нид̣̇ассанаважана’’нд̇иаад̣̇инаа нид̣̇ассананид̣̇ассид̇аб̣б̣ад̇хаммаанам̣ аад̇хаарависаяаб̣яаабаарзхи сависзсанзхи саха багаасанавасзна г̇аат̇ааяа ад̇т̇ад̇ад̇вам̣ д̣̇ассзд̇ваа аваяавабхзд̣̇авасзна ад̇т̇ам̣ д̣̇ассзд̇ум̣ ‘‘гирад̇ийд̇и гарун̣аа’’д̇иаад̣̇и вуд̇д̇ам̣. д̇ад̇т̇а нижчанд̣̇арааг̇аанам̣ бхууд̇абуб̣б̣аг̇ад̇ияаа ваа сад̇д̇ад̇аа взд̣̇ид̇аб̣б̣аа. згассаби д̇хаммасса анзгасааман̃н̃аагаараванд̇ад̇ааяа ‘‘яат̇аасабхаавам̣ багаарзхий’’д̇и вуд̇д̇ам̣. д̇ат̇аа хи вуд̇д̇ам̣ – ‘‘саб̣б̣з д̇хаммаа саб̣б̣аагаарзнаа’’д̇и (махаани. 156; жуул̣ани. могхарааж̇амаан̣авабужчаанид̣̇д̣̇зса 85; бади. ма. 3.5) д̇хаммаанам̣ ан̃н̃зяяад̇д̇ам̣ бадигкибад̇и н̃аад̇ум̣ асаггун̣зяяад̇д̇аабхаавад̇о. зд̇зна д̇ассаа бан̃н̃ааяа агижчавуд̇д̇ид̇ам̣ ааха. яат̇зва хи ‘‘н̃зяязсу саб̣б̣зсу бавад̇д̇ид̇т̇аа’’д̇и зд̇д̇аавад̇аа ад̇хиббзд̇ад̇т̇з сид̣̇д̇хз д̇зсам̣ ад̇д̇ад̇д̇анияад̇аавирахасам̣суужанад̇т̇ам̣ барзсам̣ сад̇д̇аад̣̇имижчааг̇аахабадисзд̇ханзна д̇хамма-сад̣̇д̣̇зна н̃зяяаа висзсид̇аб̣б̣аа, звам̣ ‘‘д̇хаммзсу саб̣б̣зсу бавад̇д̇ид̇т̇аа’’д̇и зд̇д̇аавад̇аа жа ад̇хиббзд̇ад̇т̇з сид̣̇д̇хз д̇хаммзсу д̇ассаа бан̃н̃ааяа ааган̇каббадиб̣ад̣̇д̇хад̇ааяа агижчавуд̇д̇ид̇ам̣ д̣̇ассзд̇ум̣ ан̃н̃зяяад̇д̇абадисзд̇ханзна н̃зяяа-сад̣̇д̣̇зна д̇хаммаа висзсид̇аад̇и. н̃зяяад̇хамма-сад̣̇д̣̇аа нийлуббаласад̣̇д̣̇аа вияа ан̃н̃аман̃н̃ам̣ бхзд̣̇аабхзд̣̇аяуд̇д̇аад̇и ‘‘н̃зяяаа жа д̇з д̇хаммаа жаа’’д̇и вуд̇д̇ам̣. яаа яаад̇и яат̇аа-сад̣̇д̣̇ассад̇т̇ам̣ д̣̇ассзд̇и. б̣яаабанижчааяан̃хи аяам̣ яат̇аа-сад̣̇д̣̇о, д̇аббабхзд̣̇аа бан̃н̃аа бавад̇д̇ид̇т̇аад̇и самб̣анд̇ход̇и.
‘‘Tattha karuṇā viyāti nidassanavacana’’ntiādinā nidassananidassitabbadhammānaṃ ādhāravisayabyāpārehi savisesanehi saha pakāsanavasena gāthāya atthatatvaṃ dassetvā avayavabhedavasena atthaṃ dassetuṃ ‘‘kiratīti karuṇā’’tiādi vuttaṃ. Tattha nicchandarāgānaṃ bhūtapubbagatiyā vā sattatā veditabbā. Ekassapi dhammassa anekasāmaññākāravantatāya ‘‘yathāsabhāvaṃ pakārehī’’ti vuttaṃ. Tathā hi vuttaṃ – ‘‘sabbe dhammā sabbākārenā’’ti (mahāni. 156; cūḷani. mogharājamāṇavapucchāniddesa 85; paṭi. ma. 3.5) dhammānaṃ aññeyyattaṃ paṭikkhipati ñātuṃ asakkuṇeyyattābhāvato. Etena tassā paññāya akicchavuttitaṃ āha. Yatheva hi ‘‘ñeyyesu sabbesu pavattitthā’’ti ettāvatā adhippetatthe siddhe tesaṃ attattaniyatāvirahasaṃsūcanatthaṃ paresaṃ sattādimicchāgāhapaṭisedhanena dhamma-saddena ñeyyā visesitabbā, evaṃ ‘‘dhammesu sabbesu pavattitthā’’ti ettāvatā ca adhippetatthe siddhe dhammesu tassā paññāya ākaṅkhappaṭibaddhatāya akicchavuttitaṃ dassetuṃ aññeyyattapaṭisedhanena ñeyya-saddena dhammā visesitāti. Ñeyyadhamma-saddā nīluppalasaddā viya aññamaññaṃ bhedābhedayuttāti ‘‘ñeyyā ca te dhammā cā’’ti vuttaṃ. Yā yāti yathā-saddassatthaṃ dasseti. Byāpanicchāyañhi ayaṃ yathā-saddo, tappabhedā paññā pavattitthāti sambandhoti.
бхаг̇авад̇и бавад̇д̇ааваад̇и ид̣̇ам̣ язбхуяязна убамаанобамзяяад̇т̇аанам̣ бхиннаад̇хаарад̇ааяа бхиннаад̇хаарасса жа убамаанад̇т̇асса ид̇ха асамбхавад̇о вуд̇д̇ам̣. бхаг̇авад̇о гарун̣ааяа ан̃н̃зхи асаад̇хааран̣абхааво сад̇д̇з сам̣саарад̣̇угкад̇о уд̣̇д̇харид̇ваа ажжанд̇асукз ниб̣б̣аанз бад̇идтабзд̇ум̣ ад̇д̇ано сарийраж̇ийвид̇абарижжааг̇знаби зганд̇ахид̇аж̇жхаасаяад̇аавасзна взд̣̇ид̇аб̣б̣о, яад̇о винзяяаанам̣ госохид̇авад̇т̇аг̇уяхабахууд̇аж̇ивхаавид̣̇ам̣санамби гад̇ам̣, яан̃жа яад̣̇имз сад̇д̇аа ж̇аанзяяум̣, бхаг̇авад̇о саасанзна рахад̣̇амива сийд̇алам̣ самбаж̇ж̇алид̇ам̣ аг̇г̇игканд̇хамби самог̇аахзяяа. ан̃н̃зсам̣ бассанд̇аананд̇и самб̣анд̇хо. уд̣̇д̇хадаад̇и бад̣̇ам̣ абзгкид̇ваа махогхабагканд̣̇аанам̣ сад̇д̇аананд̇и гаммад̇т̇з саамиважанам̣. аяан̃хзд̇т̇а сан̇кзбад̇т̇о – гаамаад̣̇имахогхабагканд̣̇з сад̇д̇з д̇ад̇о уд̣̇д̇хадаа над̇т̇ан̃н̃о гожи мам̣ табзд̇ваад̇и бассад̇о яат̇аа бхаг̇авад̇о гарун̣ааяа аависанам̣ ход̇и, на звам̣ ан̃н̃зсам̣ д̇ат̇аад̣̇ассанассзва абхаавад̇о. ат̇а ваа ан̃н̃зсам̣ бассанд̇аананд̇и яад̣̇иби барз бассзяяум̣, д̇ат̇ааби на д̇зсам̣ бхаг̇авад̇о вияа гарун̣оггаманам̣ ад̇т̇и аббадибад̇д̇ид̇о ад̇д̇ахид̇амад̇д̇абадибад̇д̇ид̇о жаад̇и ад̇т̇о.
Bhagavati pavattāvāti idaṃ yebhuyyena upamānopameyyatthānaṃ bhinnādhāratāya bhinnādhārassa ca upamānatthassa idha asambhavato vuttaṃ. Bhagavato karuṇāya aññehi asādhāraṇabhāvo satte saṃsāradukkhato uddharitvā accantasukhe nibbāne patiṭṭhapetuṃ attano sarīrajīvitapariccāgenapi ekantahitajjhāsayatāvasena veditabbo, yato vineyyānaṃ kosohitavatthaguyhapahūtajivhāvidaṃsanampi kataṃ, yañca yadime sattā jāneyyuṃ, bhagavato sāsanena rahadamiva sītalaṃ sampajjalitaṃ aggikkhandhampi samogāheyya. Aññesaṃ passantānanti sambandho. Uddhaṭāti padaṃ apekkhitvā mahoghapakkhandānaṃ sattānanti kammatthe sāmivacanaṃ. Ayañhettha saṅkhepattho – kāmādimahoghapakkhande satte tato uddhaṭā natthañño koci maṃ ṭhapetvāti passato yathā bhagavato karuṇāya āvisanaṃ hoti, na evaṃ aññesaṃ tathādassanasseva abhāvato. Atha vā aññesaṃ passantānanti yadipi pare passeyyuṃ, tathāpi na tesaṃ bhagavato viya karuṇokkamanaṃ atthi appaṭipattito attahitamattapaṭipattito cāti attho.
анааваран̣аа д̇ийсу гаалзсу саб̣б̣ад̇т̇а аббадихад̇авуд̇д̇ид̇ааяа, асаад̇хааран̣аа саб̣б̣ад̇хаммаанам̣ ниравасзсахзд̇убажжаяабариг̇г̇ахавасзна д̇зсан̃жа сабхаавагижжаад̣̇иавад̇т̇аависзсаад̣̇ибариж̇аананзна ааяууханавзлааяамзва д̇ам̣д̇ам̣гаммаанам̣ д̇ам̣д̇ам̣палависзсахийнамаж̇жхимабан̣ийд̇аад̣̇ивибхааг̇асса инд̣̇рияаб̣ад̣̇д̇хзсу анинд̣̇рияаб̣ад̣̇д̇хзсу жа ад̇исукумад̇ирохид̇авид̣̇ууравуд̇д̇иад̇ийд̇аанааг̇ад̇аад̣̇ибхзд̣̇абхиннаанам̣ руубад̇хаммаанам̣ д̇ам̣д̇ам̣гааран̣асамавааяавибхааванзнзва д̇ам̣д̇ам̣палзсу ван̣н̣асан̣таанаг̇анд̇харасапассаад̣̇ивисзсасса ниравасзсад̇о бадивиж̇жханзна взд̣̇ид̇аб̣б̣аа. аяан̃жа ад̇т̇о бхаг̇авад̇о анзгад̇хаад̇унаанаад̇хаад̇улогам̣ яат̇аабхууд̇ам̣ н̃аан̣аад̣̇ивасзна взд̣̇ид̇аб̣б̣о. яат̇аа жа бассанд̇ассаад̇и ид̣̇ам̣ рааг̇аг̇г̇иаад̣̇ийхи логасанниваасасса аад̣̇ид̇д̇ад̇аад̣̇иаагаарад̣̇ассанам̣ бхаг̇авад̇о махаагарун̣оггаманубааяам̣ санд̇хааяа вуд̇д̇ам̣. д̇ам̣ бана б̣ахугзхи аагаарзхи бассанд̇аанам̣ б̣уд̣̇д̇хаанам̣ бхаг̇аванд̇аанам̣ сад̇д̇зсу махаагарун̣аа оггамад̇и. ‘‘аад̣̇ид̇д̇о логасанниваасо…бз… уяяуд̇д̇о…бз… баяаад̇о…бз… гуммаг̇г̇аббадибанно…бз… убанийяад̇и лого ад̇хуво…бз… ад̇аан̣о лого анабхиссаро…бз… ассаго лого саб̣б̣ам̣ бахааяа г̇аманийяам̣…бз… ууно лого ад̇ид̇д̇о д̇ан̣хаад̣̇аасод̇и бассанд̇аанам̣ б̣уд̣̇д̇хаанам̣ бхаг̇аванд̇аанам̣ сад̇д̇зсу махаагарун̣аа оггамад̇ий’’д̇иаад̣̇инаа (бади. ма. 1.117) бадисамбхид̣̇аамаг̇г̇з баросад̇ам̣ аагаарзхи д̣̇ассид̇анд̇и г̇ант̇авид̇т̇аарам̣ барихарид̇ум̣ сам̣ван̣н̣аяид̇ун̃жа убааяам̣ д̣̇ассзд̇ум̣ ааха ‘‘д̇ам̣ саб̣б̣ам̣ бадисамбхид̣̇аамаг̇г̇з махаагарун̣аан̃аан̣авибхан̇г̇авасзна ж̇аанид̇аб̣б̣а’’нд̇и. инд̣̇рияабаробарияад̇д̇ааасаяаанусаяа яамагабаадихаарияа саб̣б̣ан̃н̃уд̇аанааваран̣ан̃аан̣аани сзсаасаад̇хааран̣ан̃аан̣аани. д̇зсамби хи вибхан̇г̇о ‘‘ид̇ха д̇ат̇ааг̇ад̇о сад̇д̇з бассад̇и аббараж̇агкз’’д̇иаад̣̇инаа (бади. ма. 1.111) бадисамбхид̣̇аамаг̇г̇з наанаббагаарзна д̣̇ассид̇од̇и буриманаязнзва ад̇ид̣̇исад̇и. аад̣̇и-сад̣̇д̣̇зна д̇ад̇т̇а вибхад̇д̇аанам̣ бадисамбхид̣̇аасажжан̃аан̣аад̣̇ийнам̣ сан̇г̇ахо гад̇од̇и взд̣̇ид̇аб̣б̣о.
Anāvaraṇā tīsu kālesu sabbattha appaṭihatavuttitāya, asādhāraṇā sabbadhammānaṃ niravasesahetupaccayapariggahavasena tesañca sabhāvakiccādiavatthāvisesādiparijānanena āyūhanavelāyameva taṃtaṃkammānaṃ taṃtaṃphalavisesahīnamajjhimapaṇītādivibhāgassa indriyabaddhesu anindriyabaddhesu ca atisukhumatirohitavidūravuttiatītānāgatādibhedabhinnānaṃ rūpadhammānaṃ taṃtaṃkāraṇasamavāyavibhāvaneneva taṃtaṃphalesu vaṇṇasaṇṭhānagandharasaphassādivisesassa niravasesato paṭivijjhanena veditabbā. Ayañca attho bhagavato anekadhātunānādhātulokaṃ yathābhūtaṃ ñāṇādivasena veditabbo. Yathā ca passantassāti idaṃ rāgaggiādīhi lokasannivāsassa ādittatādiākāradassanaṃ bhagavato mahākaruṇokkamanupāyaṃ sandhāya vuttaṃ. Taṃ pana bahukehi ākārehi passantānaṃ buddhānaṃ bhagavantānaṃ sattesu mahākaruṇā okkamati. ‘‘Āditto lokasannivāso…pe… uyyutto…pe… payāto…pe… kummaggappaṭipanno…pe… upanīyati loko adhuvo…pe… atāṇo loko anabhissaro…pe… assako loko sabbaṃ pahāya gamanīyaṃ…pe… ūno loko atitto taṇhādāsoti passantānaṃ buddhānaṃ bhagavantānaṃ sattesu mahākaruṇā okkamatī’’tiādinā (paṭi. ma. 1.117) paṭisambhidāmagge parosataṃ ākārehi dassitanti ganthavitthāraṃ pariharituṃ saṃvaṇṇayituñca upāyaṃ dassetuṃ āha ‘‘taṃ sabbaṃ paṭisambhidāmagge mahākaruṇāñāṇavibhaṅgavasena jānitabba’’nti. Indriyaparopariyattaāsayānusaya yamakapāṭihāriya sabbaññutānāvaraṇañāṇāni sesāsādhāraṇañāṇāni. Tesampi hi vibhaṅgo ‘‘idha tathāgato satte passati apparajakkhe’’tiādinā (paṭi. ma. 1.111) paṭisambhidāmagge nānappakārena dassitoti purimanayeneva atidisati. Ādi-saddena tattha vibhattānaṃ paṭisambhidāsaccañāṇādīnaṃ saṅgaho katoti veditabbo.
ниббад̣̇зсасаббад̣̇зсависаяаа гарун̣аа вияа бхаг̇авад̇о бан̃н̃ааби ид̇ха ниббад̣̇зсасаббад̣̇зсависаяаа ниравасзсаа ад̇хиббзд̇аад̇и д̇ассаа гад̇ибаяабхзд̣̇ад̣̇ассанзна наяад̇о д̇ад̣̇авасидтабхзд̣̇аа г̇ахзд̇аб̣б̣аад̇и д̣̇ассзнд̇о ‘‘бан̃н̃ааг̇г̇ахан̣зна жаа’’д̇иаад̣̇имааха. д̇з бана сийласамаад̇хи бан̃н̃аавимуд̇д̇ивимуд̇д̇ин̃аан̣ад̣̇ассана, д̣̇ваажад̇д̇аалийсасад̇ад̣̇угад̇хамма, б̣аавийсад̇ид̇игад̇хамма, жад̇усад̇ибадтаана саммаббад̇хаана ид̣̇д̇хибаад̣̇а сааман̃н̃апала арияавам̣саад̣̇и, бан̃жаг̇ад̇и бан̃жабад̇хаанияан̇г̇абан̃жан̇г̇игасамаад̇хи инд̣̇рияа б̣ала ниссааран̣ийяад̇хаад̇у вимуд̇д̇ааяад̇ана вимуд̇д̇ибарибаажанийяад̇хаммасан̃н̃аад̣̇и, часааран̣ийяад̇хамма ануссад̇идтаана аг̇аараваг̇аарава ниссааран̣ияад̇хаад̇у сад̇ад̇авихаара ануд̇д̇арияа ниб̣б̣зд̇хабхааг̇ияабан̃н̃аад̣̇и, сад̇д̇аабарихаанияад̇хамма арияад̇хана б̣ож̇жхан̇г̇а саббурисад̇хамманиж̇ж̇аравад̇т̇у сан̃н̃аа д̣̇агкин̣зяяабуг̇г̇алакийн̣аасаваб̣алаад̣̇и, адтабан̃н̃аабадилаабхахзд̇у мижчад̇д̇а саммад̇д̇а логад̇хамма арияаанарияавохаара аарамбхавад̇т̇у гусийд̇авад̇т̇у агкан̣а махаабурисавид̇агга абхибхааяад̇ана вимогкаад̣̇и, наваяонисоманасигаарамуулад̇хаммабаарисуд̣̇д̇хибад̇хаанияан̇г̇а сад̇д̇аавааса аагхаад̇авад̇т̇у аагхаад̇абадивинаяа сан̃н̃аанаанад̇д̇а анубуб̣б̣авихаараад̣̇и, д̣̇асанаат̇агарад̇хамма гасин̣ааяад̇ана агусалагаммабат̇а гусалагаммабат̇а мижчад̇д̇а саммад̇д̇а арияавааса д̣̇асаб̣алан̃аан̣а асзгкад̇хаммаад̣̇и, згаад̣̇асамзд̇д̇аанисам̣са сийлаанисам̣са д̇хаммад̇аа б̣уд̣̇д̇хихзд̇у, д̣̇ваад̣̇асааяад̇анабадижжасамуббаад̣̇а д̇хаммажаггаагаара, д̇зрасад̇худ̇аг̇ун̣а, жуд̣̇д̣̇асаб̣уд̣̇д̇хан̃аан̣а, бан̃жад̣̇асажаран̣авимуд̇д̇ибарибаажанийяад̇хамма, сол̣асааанаабаанассад̇и сажжаагаара суд̇д̇анд̇абадтаана, адтаараса б̣уд̣̇д̇хад̇хаммад̇хаад̇у бхзд̣̇агаравад̇т̇у, згуунавийсад̇ибажжавзгкан̣а, жад̇увийсад̇ибажжаяа, адтавийсад̇исуд̇д̇анд̇абадтаана, бан̣н̣аасауд̣̇аяаб̣б̣аяад̣̇ассана, баробан̣н̣аасагусалад̇хамма, д̣̇ваасадтид̣̇идтиг̇ад̇а, адтасад̇ад̇ан̣хаавижарид̇аад̣̇ибхзд̣̇аанам̣ д̇хаммаанам̣ бадивиж̇жханад̣̇зсанаагаараббавад̇д̇аа, яз жа жад̇увийсад̇игодисад̇асахассасамаабад̇д̇исан̃жааримахааваж̇иран̃аан̣аббабхзд̣̇аа, яз жа ананд̇анаяасаманд̇абадтаанабавижаяад̣̇зсанаагаараббавад̇д̇аа, яз жа ананд̇аасу логад̇хаад̇уусу ананд̇аанам̣ сад̇д̇аанам̣ аасаяаанусаяажарид̇аад̣̇ивибхааванаагаараббавад̇д̇аад̇и звам̣багаараа бхаг̇авад̇о бан̃н̃аабабхзд̣̇аа, саб̣б̣зби ид̇ха аад̣̇и-сад̣̇д̣̇зна наяад̇о сан̇г̇аяханд̇ийд̇и взд̣̇ид̇аб̣б̣ам̣. го хи самад̇т̇о бхаг̇авад̇о бан̃н̃ааяа бабхзд̣̇з анубад̣̇ам̣ ниравасзсад̇о д̣̇ассзд̇ум̣. д̇знзва бхаг̇аванд̇ам̣ табзд̇ваа бан̃н̃аванд̇аанам̣ аг̇г̇абхууд̇о д̇хаммасзнаабад̇исаарибуд̇д̇ад̇т̇зроби б̣уд̣̇д̇хаг̇ун̣абарижчзд̣̇анам̣ бад̇иануяуд̇д̇о ‘‘абижа мз, бханд̇з, д̇хамманваяо вид̣̇ид̇о’’д̇и (д̣̇ий. ни. 2.146) аахаад̇и.
Nippadesasappadesavisayā karuṇā viya bhagavato paññāpi idha nippadesasappadesavisayā niravasesā adhippetāti tassā katipayabhedadassanena nayato tadavasiṭṭhabhedā gahetabbāti dassento ‘‘paññāggahaṇena cā’’tiādimāha. Te pana sīlasamādhi paññāvimuttivimuttiñāṇadassana, dvācattālīsasatadukadhamma, bāvīsatitikadhamma, catusatipaṭṭhāna sammappadhāna iddhipāda sāmaññaphala ariyavaṃsādi, pañcagati pañcapadhāniyaṅgapañcaṅgikasamādhi indriya bala nissāraṇīyadhātu vimuttāyatana vimuttiparipācanīyadhammasaññādi, chasāraṇīyadhamma anussatiṭṭhāna agāravagārava nissāraṇiyadhātu satatavihāra anuttariya nibbedhabhāgiyapaññādi, sattaaparihāniyadhamma ariyadhana bojjhaṅga sappurisadhammanijjaravatthu saññā dakkhiṇeyyapuggalakhīṇāsavabalādi, aṭṭhapaññāpaṭilābhahetu micchatta sammatta lokadhamma ariyānariyavohāra ārambhavatthu kusītavatthu akkhaṇa mahāpurisavitakka abhibhāyatana vimokkhādi, navayonisomanasikāramūladhammapārisuddhipadhāniyaṅga sattāvāsa āghātavatthu āghātapaṭivinaya saññānānatta anupubbavihārādi, dasanāthakaradhamma kasiṇāyatana akusalakammapatha kusalakammapatha micchatta sammatta ariyavāsa dasabalañāṇa asekkhadhammādi, ekādasamettānisaṃsa sīlānisaṃsa dhammatā buddhihetu, dvādasāyatanapaṭiccasamuppāda dhammacakkākāra, terasadhutaguṇa, cuddasabuddhañāṇa, pañcadasacaraṇavimuttiparipācanīyadhamma, soḷasaānāpānassati saccākāra suttantapaṭṭhāna, aṭṭhārasa buddhadhammadhātu bhedakaravatthu, ekūnavīsatipaccavekkhaṇa, catuvīsatipaccaya, aṭṭhavīsatisuttantapaṭṭhāna, paṇṇāsaudayabbayadassana, paropaṇṇāsakusaladhamma, dvāsaṭṭhidiṭṭhigata, aṭṭhasatataṇhāvicaritādibhedānaṃ dhammānaṃ paṭivijjhanadesanākārappavattā, ye ca catuvīsatikoṭisatasahassasamāpattisañcārimahāvajirañāṇappabhedā, ye ca anantanayasamantapaṭṭhānapavicayadesanākārappavattā, ye ca anantāsu lokadhātūsu anantānaṃ sattānaṃ āsayānusayacaritādivibhāvanākārappavattāti evaṃpakārā bhagavato paññāpabhedā, sabbepi idha ādi-saddena nayato saṅgayhantīti veditabbaṃ. Ko hi samattho bhagavato paññāya pabhede anupadaṃ niravasesato dassetuṃ. Teneva bhagavantaṃ ṭhapetvā paññavantānaṃ aggabhūto dhammasenāpatisāriputtattheropi buddhaguṇaparicchedanaṃ patianuyutto ‘‘apica me, bhante, dhammanvayo vidito’’ti (dī. ni. 2.146) āhāti.
сам̣саарамахогхабагканд̣̇аанам̣ сад̇д̇аанам̣ д̇ад̇о санд̇ааран̣ад̇т̇ам̣ бадибанно д̇зхи баяож̇ид̇о наама ход̇и асад̇иби д̇зсам̣ д̇ат̇аавид̇хз абхисанд̇хияанд̇и вуд̇д̇ам̣ ‘‘сад̇д̇аа хи махааб̣од̇хим̣ баяож̇знд̇ий’’д̇и. зд̇зна саб̣б̣знаад̇и махааб̣од̇химуулаад̣̇ид̣̇ассанзна. абаг̇аманам̣ нирубаггилзсанд̇и яож̇зд̇аб̣б̣ам̣. ж̇аад̇асам̣вад̣̇д̇хабхаавад̣̇ассанзна ‘‘анаад̣̇и анид̇хано жа сад̇д̇о’’д̇и звам̣багаараа мижчааваад̣̇аа бадисзд̇хид̇аа хонд̇и. саман̃н̃аа…бз… д̣̇ассзд̇и сад̇д̇з барамад̇т̇ад̇о асад̇иби сад̇д̇абан̃н̃ад̇д̇ивохаарасуужанад̇о. гарун̣аа аад̣̇ибан̃н̃аа барияосаананд̇и ид̣̇ам̣ самбхаран̣анибпад̇д̇игаалаабзгкааяа вуд̇д̇ам̣, на барижчзд̣̇аванд̇ад̇ааяа. д̇знзвааха ‘‘д̇аннид̣̇аанабхаавад̇о д̇ад̇о уд̇д̇аригаран̣ийяаабхаавад̇о’’д̇и. саб̣б̣з б̣уд̣̇д̇хаг̇ун̣аа д̣̇ассид̇аа хонд̇и наяад̇о д̣̇ассид̇ад̇д̇аа. зсо зва хи анавасзсад̇о б̣уд̣̇д̇хаг̇ун̣ад̣̇ассанубааяо яад̣̇ид̣̇ам̣ наяаг̇г̇аахан̣ам̣. барад̇ханахаран̣аад̣̇ид̇оби вирад̇и барзсам̣ анад̇т̇абарихаран̣авасаббавад̇д̇ияаа сияаа гарун̣уубаниссаяаад̇и гарун̣аанид̣̇аанам̣ сийлам̣. д̇ад̇о зва ‘‘д̇ад̇о баан̣аад̇ибаад̇аад̣̇ивирад̇иббавад̇д̇ид̇о’’д̇и вуд̇д̇ам̣.
Saṃsāramahoghapakkhandānaṃ sattānaṃ tato santāraṇatthaṃ paṭipanno tehi payojito nāma hoti asatipi tesaṃ tathāvidhe abhisandhiyanti vuttaṃ ‘‘sattā hi mahābodhiṃ payojentī’’ti. Etena sabbenāti mahābodhimūlādidassanena. Apagamanaṃ nirupakkilesanti yojetabbaṃ. Jātasaṃvaddhabhāvadassanena ‘‘anādi anidhano ca satto’’ti evaṃpakārā micchāvādā paṭisedhitā honti. Samaññā…pe… dasseti satte paramatthato asatipi sattapaññattivohārasūcanato. Karuṇā ādipaññā pariyosānanti idaṃ sambharaṇanipphattikālāpekkhāya vuttaṃ, na paricchedavantatāya. Tenevāha ‘‘tannidānabhāvato tato uttarikaraṇīyābhāvato’’ti. Sabbe buddhaguṇā dassitā honti nayato dassitattā. Eso eva hi anavasesato buddhaguṇadassanupāyo yadidaṃ nayaggāhaṇaṃ. Paradhanaharaṇāditopi virati paresaṃ anatthapariharaṇavasappavattiyā siyā karuṇūpanissayāti karuṇānidānaṃ sīlaṃ. Tato eva ‘‘tato pāṇātipātādiviratippavattito’’ti vuttaṃ.
2. яассаа сам̣ван̣н̣ананд̇иаад̣̇инаа ‘‘д̣̇аяааяаа’’д̇иаад̣̇ит̇оманааяа самб̣анд̇хам̣ д̣̇ассзд̇и. баяож̇анам̣ бана вуд̇д̇анаязна взд̣̇ид̇аб̣б̣ам̣. аб̣бханд̇арам̣ нияагаж̇жхад̇д̇ам̣, д̇ад̇о б̣ахибхууд̇ам̣ б̣аахирам̣. д̣̇аяаад̇и гарун̣аа ад̇хиббзд̇аад̇и д̣̇аяаа-сад̣̇д̣̇асса мзд̇д̇аагарун̣аанам̣ ваажагад̇д̇аа вагкамаанан̃жа ануяог̇ам̣ манаси гад̇ваа вуд̇д̇ам̣. д̇ааяа хи самуссаахид̇о, на мзд̇д̇ааяаад̇и ад̇хиббааяо. буб̣б̣з вуд̇д̇асса бадинид̣̇д̣̇зсо ход̇ийд̇и д̇а-сад̣̇д̣̇асса ад̇т̇ам̣ ааха. д̇анд̇и бан̃н̃ам̣ висзсзд̇ваа убамаабхаавзна винивад̇д̇аа жарид̇ад̇т̇ад̇ааяа. бадинид̣̇д̣̇зсам̣ наарахад̇и бад̇хаанаабад̇хаанзсу бад̇хаанз гижжад̣̇ассанад̇о. д̣̇виннам̣ бад̣̇аанам̣…бз… вад̇од̇и гарун̣ааваажинаа д̣̇аяаа-сад̣̇д̣̇зна згаад̇хигаран̣абхаавзна вужжамаано д̇а-сад̣̇д̣̇о д̇ад̇о ан̃н̃ад̇хаммависаяо бхавид̇ум̣ на яуд̇д̇од̇и ад̇хиббааяо. абарияааяасад̣̇д̣̇аанам̣ самаанаад̇хигаран̣абхааво висзсанависзсид̇аб̣б̣абхаавз сад̇и ход̇и, наан̃н̃ат̇аад̇и ааха ‘‘самаанаа…бз… ход̇ий’’д̇и. самаанаад̇хигаран̣абхаавзна хзд̇т̇а висзсанависзсид̇аб̣б̣абхааво саад̇хийяад̇и, саа жа самаанаад̇хигаран̣ад̇аа висидтавибхад̇д̇игаанам̣ на ход̇ийд̇и самаанавибхад̇д̇ид̇ааяаби д̇амзва саад̇хийяад̇ийд̇и ‘‘д̣̇аяаа…бз… жид̣̇а’’нд̇и ид̣̇ам̣ д̣̇аяааяа висзсид̇аб̣б̣абхаавз гааран̣аважанам̣. бад̇хаанад̇ааяа хи сааман̃н̃ад̇ааяа жа саа висзсид̇аб̣б̣аа ж̇аад̇аа. д̇ад̇т̇а бхаг̇авад̇о д̇ад̣̇ан̃н̃зсан̃жа гарун̣аанам̣ ваажагад̇д̇аа сааман̃н̃ад̇аа взд̣̇ид̇аб̣б̣аа. д̇асса жаад̇и д̣̇аяаа-сад̣̇д̣̇асса. ‘‘бад̇хаанан̃жа бан̃н̃а’’нд̇иаад̣̇инаа гин̃жааби буримаг̇аат̇ааяа бан̃н̃ааббад̇хаанаа, ‘‘д̇ааяаа’’д̇и бана гзвалам̣ авад̇ваа д̣̇аяаависзсанабхаавзна вуд̇д̇ад̇д̇аа аббад̇хаанааяаби гарун̣ааяа бадинид̣̇д̣̇зсо яуд̇д̇од̇и д̣̇ассзд̇и. аббад̇хаанад̇аа жа гарун̣ааяа буримаг̇аат̇ааяа васзна вуд̇д̇аа, ид̇ха бана бад̇хаанаа зва. д̇ат̇аа жа вуд̇д̇ам̣ ‘‘д̣̇аяаасамуссаахинийд̇и бад̇хаанаа’’д̇и (д̇ха. са. мууладий. 2).
2. Yassā saṃvaṇṇanantiādinā ‘‘dayāyā’’tiādithomanāya sambandhaṃ dasseti. Payojanaṃ pana vuttanayena veditabbaṃ. Abbhantaraṃ niyakajjhattaṃ, tato bahibhūtaṃ bāhiraṃ. Dayāti karuṇā adhippetāti dayā-saddassa mettākaruṇānaṃ vācakattā vakkhamānañca anuyogaṃ manasi katvā vuttaṃ. Tāya hi samussāhito, na mettāyāti adhippāyo. Pubbe vuttassa paṭiniddeso hotīti ta-saddassa atthaṃ āha. Tanti paññaṃ visesetvā upamābhāvena vinivattā caritatthatāya. Paṭiniddesaṃ nārahati padhānāpadhānesu padhāne kiccadassanato. Dvinnaṃ padānaṃ…pe… vatoti karuṇāvācinā dayā-saddena ekādhikaraṇabhāvena vuccamāno ta-saddo tato aññadhammavisayo bhavituṃ na yuttoti adhippāyo. Apariyāyasaddānaṃ samānādhikaraṇabhāvo visesanavisesitabbabhāve sati hoti, nāññathāti āha ‘‘samānā…pe… hotī’’ti. Samānādhikaraṇabhāvena hettha visesanavisesitabbabhāvo sādhīyati, sā ca samānādhikaraṇatā visiṭṭhavibhattikānaṃ na hotīti samānavibhattitāyapi tameva sādhīyatīti ‘‘dayā…pe… cida’’nti idaṃ dayāya visesitabbabhāve kāraṇavacanaṃ. Padhānatāya hi sāmaññatāya ca sā visesitabbā jātā. Tattha bhagavato tadaññesañca karuṇānaṃ vācakattā sāmaññatā veditabbā. Tassa cāti dayā-saddassa. ‘‘Padhānañca pañña’’ntiādinā kiñcāpi purimagāthāya paññāppadhānā, ‘‘tāyā’’ti pana kevalaṃ avatvā dayāvisesanabhāvena vuttattā appadhānāyapi karuṇāya paṭiniddeso yuttoti dasseti. Appadhānatā ca karuṇāya purimagāthāya vasena vuttā, idha pana padhānā eva. Tathā ca vuttaṃ ‘‘dayāsamussāhinīti padhānā’’ti (dha. sa. mūlaṭī. 2).
гат̇ам̣ бана…бз… н̃аад̇аб̣б̣аад̇и вагкамаанан̃н̃зва ад̇т̇ам̣ хад̣̇аяз табзд̇ваа жод̣̇зд̇и. яад̣̇и званд̇и яад̣̇и адтагат̇ааяа ад̇хиббааяам̣ аг̇г̇ахзд̇ваа важанамад̇д̇амзва г̇ан̣хаси. мзд̇д̇аад̇и жа на яуж̇ж̇зяяаад̇и яат̇аа ‘‘мзд̇д̇ажид̇д̇ад̇ам̣ аабанно’’д̇и зд̇иссаа адтагат̇ааяа васзна на д̣̇аяаа гарун̣аа , звам̣ ‘‘ниггарун̣ад̇ам̣ аабанно’’д̇и зд̇иссаа адтагат̇ааяа васзна на д̣̇аяаа мзд̇д̇аад̇и важанамад̇д̇аг̇г̇ахан̣з адтагат̇аанамби вирод̇хам̣ д̣̇ассзд̇и. ‘‘ад̇хиббааяавасзна яож̇зд̇аб̣б̣о’’д̇и вад̇ваа д̇амзва ад̇хиббааяам̣ д̣̇аяаа-сад̣̇д̣̇о хийд̇иаад̣̇инаа виварад̇и. агкаражинд̇агаа хи д̣̇аяаа-сад̣̇д̣̇ам̣ д̣̇аанаг̇ад̇ирагкан̣зсу батанд̇и. анурагкан̣ан̃жа мзд̇д̇аагарун̣аанам̣ хид̇уубасам̣хаарад̣̇угкаабанаяанаагааравуд̇д̇ийнам̣ самаанагижжам̣, д̇асмаа убхаяад̇т̇а д̣̇аяаа-сад̣̇д̣̇о бавад̇д̇ад̇ийд̇и вуд̇д̇ам̣. анд̇онийд̇анд̇и анд̇ог̇ад̇хам̣, ругкад̇т̇о вияа д̇хавакад̣̇ираад̣̇ийнам̣ анурагкан̣ад̇т̇о мзд̇д̇аагарун̣аанам̣ сааман̃н̃анд̇и ад̇т̇о, ад̇хиббааяо бана ‘‘д̣̇аяаабанно’’д̇и зд̇т̇а саб̣б̣абаан̣абхууд̇ахид̇аанугамбийд̇и ананд̇арам̣ гарун̣ааяа вуд̇д̇ад̇д̇аа д̣̇аяаа-сад̣̇д̣̇о мзд̇д̇аабарияааяод̇и вин̃н̃ааяад̇и. мзд̇д̇ааби хи гарун̣аа вияа баан̣аад̇ибаад̇авирад̇ияаа гааран̣анд̇и. ‘‘ад̣̇аяаабанно’’д̇и зд̇т̇а бана гаарун̣иго авихим̣ саж̇жхаасаяад̇д̇аа барзсам̣ вихзсаамад̇д̇амби на гарод̇и, го бана ваад̣̇о баан̣аад̇ибаад̇анзд̇и ниггарун̣ад̇ааяа баан̣аад̇ибаад̇ид̇аа д̣̇ассид̇аад̇и взд̣̇ид̇аб̣б̣аа. зд̇амзвад̇т̇ам̣ санд̇хааяа ‘‘зван̃хи адтагат̇аанам̣ авирод̇хо ход̇ий’’д̇и ааха. яад̣̇и д̣̇аяаа-сад̣̇д̣̇о мзд̇д̇аагарун̣аанам̣ ваажаго, звамбигат̇ам̣ бана гарун̣аа ‘‘д̣̇аяаа’’д̇и ж̇аанид̇аб̣б̣аад̇и ануяог̇о д̇ад̣̇авад̇т̇о зваад̇и жод̣̇анам̣ манаси гад̇ваа гарун̣аа жа д̣̇зсанааяаад̇иаад̣̇инаа гарун̣ааяа зва г̇ахан̣з гааран̣амааха.
Kathaṃ pana…pe… ñātabbāti vakkhamānaññeva atthaṃ hadaye ṭhapetvā codeti. Yadi evanti yadi aṭṭhakathāya adhippāyaṃ aggahetvā vacanamattameva gaṇhasi. Mettāti ca na yujjeyyāti yathā ‘‘mettacittataṃ āpanno’’ti etissā aṭṭhakathāya vasena na dayā karuṇā , evaṃ ‘‘nikkaruṇataṃ āpanno’’ti etissā aṭṭhakathāya vasena na dayā mettāti vacanamattaggahaṇe aṭṭhakathānampi virodhaṃ dasseti. ‘‘Adhippāyavasena yojetabbo’’ti vatvā tameva adhippāyaṃ dayā-saddo hītiādinā vivarati. Akkharacintakā hi dayā-saddaṃ dānagatirakkhaṇesu paṭhanti. Anurakkhaṇañca mettākaruṇānaṃ hitūpasaṃhāradukkhāpanayanākāravuttīnaṃ samānakiccaṃ, tasmā ubhayattha dayā-saddo pavattatīti vuttaṃ. Antonītanti antogadhaṃ, rukkhattho viya dhavakhadirādīnaṃ anurakkhaṇattho mettākaruṇānaṃ sāmaññanti attho, adhippāyo pana ‘‘dayāpanno’’ti ettha sabbapāṇabhūtahitānukampīti anantaraṃ karuṇāya vuttattā dayā-saddo mettāpariyāyoti viññāyati. Mettāpi hi karuṇā viya pāṇātipātaviratiyā kāraṇanti. ‘‘Adayāpanno’’ti ettha pana kāruṇiko avihiṃ sajjhāsayattā paresaṃ vihesāmattampi na karoti, ko pana vādo pāṇātipātaneti nikkaruṇatāya pāṇātipātitā dassitāti veditabbā. Etamevatthaṃ sandhāya ‘‘evañhi aṭṭhakathānaṃ avirodho hotī’’ti āha. Yadi dayā-saddo mettākaruṇānaṃ vācako, evampikathaṃ pana karuṇā ‘‘dayā’’ti jānitabbāti anuyogo tadavattho evāti codanaṃ manasi katvā karuṇā ca desanāyātiādinā karuṇāya eva gahaṇe kāraṇamāha.
нану д̇ааяаад̇иаад̣̇инаа саамад̇т̇ияад̇оби багаран̣ам̣ б̣алаванд̇и багаран̣авасзнзва гарун̣аависаяасса н̃аад̇ад̇ам̣ д̣̇ассзд̇и. яат̇ааружи бавад̇д̇ид̇т̇аад̇и зд̇ам̣ буримаг̇аат̇ааяа саббад̣̇зсаниббад̣̇зсасад̇д̇ависаяааяа гарун̣ааяа г̇ахид̇абхаавасса гааран̣аважанам̣. яат̇ааружибавад̇д̇и хи згасмим̣ анзгзсу жа ижчаануруубаббавад̇д̇ийд̇и. ‘‘ид̇ха бана ниббад̣̇зсасад̇д̇ависаяад̇ам̣ г̇ахзд̇у’’нд̇и зд̇зна сид̣̇д̇хз сад̇и аарамбхо н̃аабагад̇т̇о ход̇ийд̇и буна ‘‘сад̇д̇зсуу’’д̇и важанам̣ имамад̇т̇ависзсам̣ б̣од̇хзд̇ийд̇и д̣̇ассзд̇и. на д̣̇звзсуязваад̇иаад̣̇инааби д̣̇аяаасаад̇ханасса самуссааханасса сад̇д̇ависаяабхаавз саамад̇т̇ияалад̣̇д̇хзби ‘‘сад̇д̇зсуу’’д̇и важанам̣ д̇асса ниббад̣̇зсасад̇д̇ависаяабхааво ад̇хиббзд̇од̇и имам̣ висзсам̣ н̃аабзд̇ийд̇и д̣̇ассзд̇и.
Nanu tāyātiādinā sāmatthiyatopi pakaraṇaṃ balavanti pakaraṇavaseneva karuṇāvisayassa ñātataṃ dasseti. Yathāruci pavattitthāti etaṃ purimagāthāya sappadesanippadesasattavisayāya karuṇāya gahitabhāvassa kāraṇavacanaṃ. Yathārucipavatti hi ekasmiṃ anekesu ca icchānurūpappavattīti. ‘‘Idha pana nippadesasattavisayataṃ gahetu’’nti etena siddhe sati ārambho ñāpakattho hotīti puna ‘‘sattesū’’ti vacanaṃ imamatthavisesaṃ bodhetīti dasseti. Na devesuyevātiādināpi dayāsādhanassa samussāhanassa sattavisayabhāve sāmatthiyaladdhepi ‘‘sattesū’’ti vacanaṃ tassa nippadesasattavisayabhāvo adhippetoti imaṃ visesaṃ ñāpetīti dasseti.
гаалад̣̇зсад̣̇зсагабарисаад̣̇ибарид̣̇ийбанам̣ б̣аахиранид̣̇аананд̇и гаалаад̣̇ийни нид̣̇д̇хаарзнд̇о ‘‘яасмим̣ гаалз’’д̇иаад̣̇имааха. авасаанамхи васанд̇о д̇ид̣̇асаалаязд̇и важанад̇од̇и зд̇зна д̇асса баадихаарияасса сад̣̇д̣̇анд̇арасаннид̇хаанзна аважчиннад̇ам̣ д̣̇ассзд̇и. д̇ад̇т̇а бавад̇д̇авохаарзна жа на саггаад̇и бут̇уж̇ж̇анасанд̇аанзби рааг̇аад̣̇ибадибагкахаран̣асса абхаавад̇о нижчанд̣̇арааг̇зсу сад̇д̇авохааро вияа бут̇уж̇ж̇анасанд̇аанз рааг̇аад̣̇ибадибагкахаран̣авасзна бавад̇д̇ам̣ д̇ад̣̇абхаавзби бхаг̇авад̇о санд̇аанз рул̣хийвасзна баадихаарияанд̇взва вужжад̇ийд̇и на саггаа вад̇д̇унд̇и ад̇хиббааяо. д̣̇идтихаран̣авасзна яз саммаад̣̇идтигаа ж̇аад̇аа ажзлагагассабаад̣̇аяо вияа, д̣̇идтиббагаасанз асамад̇т̇абхаавзна аббадибхаанабхааваад̣̇иббад̇д̇ияаа сажжагаад̣̇аяо вияа.
Kāladesadesakaparisādiparidīpanaṃ bāhiranidānanti kālādīni niddhārento ‘‘yasmiṃ kāle’’tiādimāha. Avasānamhi vasanto tidasālayeti vacanatoti etena tassa pāṭihāriyassa saddantarasannidhānena avacchinnataṃ dasseti. Tattha pavattavohārena ca na sakkāti puthujjanasantānepi rāgādipaṭipakkhaharaṇassa abhāvato nicchandarāgesu sattavohāro viya puthujjanasantāne rāgādipaṭipakkhaharaṇavasena pavattaṃ tadabhāvepi bhagavato santāne ruḷhīvasena pāṭihāriyantveva vuccatīti na sakkā vattunti adhippāyo. Diṭṭhiharaṇavasena ye sammādiṭṭhikā jātā acelakakassapādayo viya, diṭṭhippakāsane asamatthabhāvena appaṭibhānabhāvādippattiyā saccakādayo viya.
3 . сийд̇абаб̣б̣ад̇аа наама ‘‘синзрум̣ бариваарзд̇ваа тид̇аа яуг̇анд̇харо…бз… г̇ири б̣рахаа’’д̇и (висуд̣̇д̇хи. 1.137; баараа. адта. 1.1 взран̃ж̇аган̣д̣аван̣н̣анаа) звам̣ вуд̇д̇абаб̣б̣ад̇аа.
3. Sītapabbatā nāma ‘‘sineruṃ parivāretvā ṭhitā yugandharo…pe… giri brahā’’ti (visuddhi. 1.137; pārā. aṭṭha. 1.1 verañjakaṇḍavaṇṇanā) evaṃ vuttapabbatā.
4-5. саб̣б̣асо жаггаваал̣асахассзхи саб̣б̣асо ааг̇амма саб̣б̣асо саннисиннзнаад̇и самб̣анд̇хавасзна д̇аяо вигаббаа яуд̇д̇аа, саб̣б̣асо жаггаваал̣асахассзхи д̣̇асахи д̣̇асахийд̇и бана анидтасаад̇ханад̇о бадисзд̇хид̇о. важ̇ж̇ид̇аб̣б̣зд̇и яз важ̇ж̇зд̇ум̣ саггаа ‘‘ад̇исаммукаа ад̇исамийбам̣ уннад̇аббад̣̇зсо’’д̇и, зд̇з. ид̇арз бана д̇ассаа барисааяа маханд̇абхаавзна на саггаа барихарид̇ум̣.
4-5. Sabbaso cakkavāḷasahassehi sabbaso āgamma sabbaso sannisinnenāti sambandhavasena tayo vikappā yuttā, sabbaso cakkavāḷasahassehi dasahi dasahīti pana aniṭṭhasādhanato paṭisedhito. Vajjitabbeti ye vajjetuṃ sakkā ‘‘atisammukhā atisamīpaṃ unnatappadeso’’ti, ete. Itare pana tassā parisāya mahantabhāvena na sakkā pariharituṃ.
‘‘саб̣б̣ан̃зяяа…бз… самад̇т̇аа’’д̇и вад̇ваа д̇зсам̣ д̣̇зсзд̇аб̣б̣аббагаараж̇аананасамад̇т̇аад̇и важанам̣ ад̇д̇анаа бадивид̣̇д̇хаагаарасса д̇хаммасааминааби барзсам̣ д̣̇зсзд̇ум̣ асаггун̣зяяад̇д̇аа вуд̇д̇ам̣. ан̃н̃ат̇аа саб̣б̣зби сад̇д̇аа д̣̇идтасажжаа зва бхавзяяум̣. саб̣б̣ан̃зяяад̇хаммаанам̣ яат̇аасабхааваж̇аананасамад̇т̇ад̇аад̣̇иязва яат̇аавуд̇д̇аб̣алам̣. д̇зсам̣ г̇ахан̣асамад̇т̇ад̇ам̣ д̣̇ийбзд̇и, ад̇хигаважанаман̃н̃амад̇т̇ам̣ б̣од̇хзд̇ийд̇и ад̇хиббааяо.
‘‘Sabbañeyya…pe… samatthā’’ti vatvā tesaṃ desetabbappakārajānanasamatthāti vacanaṃ attanā paṭividdhākārassa dhammasāmināpi paresaṃ desetuṃ asakkuṇeyyattā vuttaṃ. Aññathā sabbepi sattā diṭṭhasaccā eva bhaveyyuṃ. Sabbañeyyadhammānaṃ yathāsabhāvajānanasamatthatādiyeva yathāvuttabalaṃ. Tesaṃ gahaṇasamatthataṃ dīpeti, adhikavacanamaññamatthaṃ bodhetīti adhippāyo.
6. д̇ат̇ааг̇ад̇о ванд̣̇анийяод̇иаад̣̇инаа ‘‘намассид̇ваа’’д̇иаад̣̇игирияаависзсаанам̣ д̇ам̣д̇ам̣суд̇д̇аанурод̇хзна бавад̇д̇ид̇амааха. сарийрасобхаг̇г̇аад̣̇ийд̇и аад̣̇и-сад̣̇д̣̇зна галяаан̣авааггаран̣ад̇аааад̇хибажжабариваарасамбад̇д̇иаад̣̇и сан̇г̇аяхад̇и.
6. Tathāgato vandanīyotiādinā ‘‘namassitvā’’tiādikiriyāvisesānaṃ taṃtaṃsuttānurodhena pavattitamāha. Sarīrasobhaggādīti ādi-saddena kalyāṇavākkaraṇatāādhipaccaparivārasampattiādi saṅgayhati.
7. анд̇арад̇хаабзд̇ваад̇и нирод̇хзд̇ваа. нирод̇ханан̃жзд̇т̇а уббаад̣̇агахзд̇убарихаран̣авасзна д̇зсам̣ ануббад̇д̇игаран̣анд̇и взд̣̇ид̇аб̣б̣ам̣. ад̇т̇ам̣ багаасаяиссаамийд̇и самб̣анд̇ход̇и ‘‘сосзд̇ваа’’д̇и буб̣б̣агаалагирияааяа абарагаалагирияаабзгкад̇ааяа вуд̇д̇ам̣.
7. Antaradhāpetvāti nirodhetvā. Nirodhanañcettha uppādakahetupariharaṇavasena tesaṃ anuppattikaraṇanti veditabbaṃ. Atthaṃ pakāsayissāmīti sambandhoti ‘‘sosetvā’’ti pubbakālakiriyāya aparakālakiriyāpekkhatāya vuttaṃ.
8. д̣̇уггарабхаавам̣ д̣̇ийбзд̇унд̇и ад̣̇уггарасса д̇ат̇ааабхияаажзд̇аб̣б̣ад̇аабхаавад̇од̇и ад̇хиббааяо. баарааж̇игасан̇гхаад̣̇исзсаанам̣ сийлавибад̇д̇ибхаавад̇о т̇уллажжаяаад̣̇ийнан̃жа язбхуяязна аажааравибад̇д̇ибхаавад̇о аажаарасийлаанам̣ д̇ат̇аа яож̇анаа гад̇аа, д̇ат̇аа жаарид̇д̇асийласса аажаарасабхаавад̇д̇аа ид̇арам̣ сабхаавзнзва г̇ахзд̇ваа д̣̇уд̇ияаа. асаггун̣зяяанд̇и висуд̣̇д̇хаажаараад̣̇иг̇ун̣асаманнааг̇ад̇зна саб̣рахмажааринаа сад̣̇д̇хаммажирадтид̇ад̇т̇ам̣ саад̣̇арам̣ абхияаажид̇зна д̇зна жа абхид̇хаммад̇т̇аббагаасанз самад̇т̇од̇и яаат̇аавад̇о бамаан̣ид̇зна д̇аб̣б̣имукабхааво на сугарод̇и ад̇хиббааяо.
8. Dukkarabhāvaṃdīpetunti adukkarassa tathāabhiyācetabbatābhāvatoti adhippāyo. Pārājikasaṅghādisesānaṃ sīlavipattibhāvato thullaccayādīnañca yebhuyyena ācāravipattibhāvato ācārasīlānaṃ tathā yojanā katā, tathā cārittasīlassa ācārasabhāvattā itaraṃ sabhāveneva gahetvā dutiyā. Asakkuṇeyyanti visuddhācārādiguṇasamannāgatena sabrahmacārinā saddhammaciraṭṭhitatthaṃ sādaraṃ abhiyācitena tena ca abhidhammatthappakāsane samatthoti yāthāvato pamāṇitena tabbimukhabhāvo na sukaroti adhippāyo.
9. д̣̇звад̣̇зва-сад̣̇д̣̇асса ад̇т̇о бадтаанасам̣ван̣н̣анаадийгааяам̣ вибан̃жид̇од̇и на вид̇т̇аараяимха.
9. Devadeva-saddassa attho paṭṭhānasaṃvaṇṇanāṭīkāyaṃ vipañcitoti na vitthārayimha.
13. батамасан̇г̇ийд̇ияам̣ яаа адтагат̇аа сан̇г̇ийд̇аад̇и важанзна саа бхаг̇авад̇о д̇харамаанагаалзби адтагат̇аа сам̣виж̇ж̇ад̇и, д̇зна баато вияа бхаг̇авам̣муулигааваад̇и вин̃н̃ааяад̇и. ‘‘абхид̇хаммассаа’’д̇и бад̣̇ам̣ ‘‘ад̇т̇ам̣ багаасаяиссаамий’’д̇и зд̇ад̣̇абзгканд̇и ‘‘гасса бана саа адтагат̇аа’’д̇и бужчид̇ваа ад̇хигааравасзна д̇амзва абхид̇хаммабад̣̇ам̣ аагад̣дхад̇и. аавуд̇д̇иаад̣̇ивасзна ваа аяамад̇т̇о вибхаавзд̇аб̣б̣о.
13. Paṭhamasaṅgītiyaṃ yā aṭṭhakathā saṅgītāti vacanena sā bhagavato dharamānakālepi aṭṭhakathā saṃvijjati, tena pāṭho viya bhagavaṃmūlikāvāti viññāyati. ‘‘Abhidhammassā’’ti padaṃ ‘‘atthaṃ pakāsayissāmī’’ti etadapekkhanti ‘‘kassa pana sā aṭṭhakathā’’ti pucchitvā adhikāravasena tameva abhidhammapadaṃ ākaḍḍhati. Āvuttiādivasena vā ayamattho vibhāvetabbo.
16. арияамаг̇г̇асса б̣ож̇жхан̇г̇амаг̇г̇ан̇г̇ажхаанан̇г̇ависзсам̣ баад̣̇агаж̇жхаанамзва нияамзд̇ийд̇иаад̣̇инаяаббавад̇д̇о д̇ибидагажуул̣анааг̇ад̇т̇зраваад̣̇о аад̣̇и-сад̣̇д̣̇зна вибассанааяа аарамман̣абхууд̇аа канд̇хаа нияамзнд̇и, буг̇г̇алаж̇жхаасаяо нияамзд̇ийд̇и звамаад̣̇аяо мораваабиваасимахаад̣̇ад̇д̇ад̇т̇зрад̇ибидагажуул̣аабхаяад̇т̇зраваад̣̇аад̣̇аяо сан̇г̇аяханд̇и. д̇аббагаасанзнзваад̇и абхид̇хаммасса ад̇т̇аббагаасанзнзва. сод̇и махаавихаараваасийнам̣ винижчаяо. д̇ат̇аад̇и асаммиссаанаагулабхаавзна. асаммиссаанаагулабхууд̇о ваа винижчаяо махаавихаараваасийнам̣ санд̇агабхаавзна, зд̇зна абхид̇хаммасса ад̇т̇аббагаасанзнзва махаавихаараваасийнам̣ винижчаяо ид̇ха абхинибпаад̣̇ийяад̇ийд̇и д̣̇ассзд̇и. ат̇а ваа д̇аббагаасанзнзваад̇и асаммиссаанаагулабхааваббагаасанзнзва . сод̇и багаасияамаано абхид̇хаммад̇т̇о. д̇ат̇аад̇и махаавихаараваасийнам̣ винижчаяабхаавзна. имасмим̣ ад̇т̇авигаббз ‘‘асаммиссам̣ анаагулам̣ ад̇т̇ам̣ багаасаяиссаамий’’д̇и самб̣анд̇ханийяам̣.
16. Ariyamaggassa bojjhaṅgamaggaṅgajhānaṅgavisesaṃ pādakajjhānameva niyametītiādinayappavatto tipiṭakacūḷanāgattheravādo ādi-saddena vipassanāya ārammaṇabhūtā khandhā niyamenti, puggalajjhāsayo niyametīti evamādayo moravāpivāsimahādattattheratipiṭakacūḷābhayattheravādādayo saṅgayhanti. Tappakāsanenevāti abhidhammassa atthappakāsaneneva. Soti mahāvihāravāsīnaṃ vinicchayo. Tathāti asammissānākulabhāvena. Asammissānākulabhūto vā vinicchayo mahāvihāravāsīnaṃ santakabhāvena, etena abhidhammassa atthappakāsaneneva mahāvihāravāsīnaṃ vinicchayo idha abhinipphādīyatīti dasseti. Atha vā tappakāsanenevāti asammissānākulabhāvappakāsaneneva . Soti pakāsiyamāno abhidhammattho. Tathāti mahāvihāravāsīnaṃ vinicchayabhāvena. Imasmiṃ atthavikappe ‘‘asammissaṃ anākulaṃ atthaṃ pakāsayissāmī’’ti sambandhanīyaṃ.
17. ан̃н̃ан̃жа саб̣б̣ам̣ ад̇т̇аббагаасанам̣ ход̇ийд̇и д̇осанам̣ ход̇ийд̇и ад̇т̇о. д̇знзвааха ‘‘саб̣б̣зна д̇зна д̇осанам̣ гад̇ам̣ ход̇ий’’д̇и. яуд̇д̇аруубаа яож̇анаа.
17. Aññañcasabbaṃ atthappakāsanaṃ hotīti tosanaṃ hotīti attho. Tenevāha ‘‘sabbena tena tosanaṃ kataṃ hotī’’ti. Yuttarūpā yojanā.
вийсад̇иг̇аат̇ааван̣н̣анаа нидтид̇аа.
Vīsatigāthāvaṇṇanā niṭṭhitā.
Related texts:
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā / вийсад̇иг̇аат̇ааван̣н̣анаа • Vīsatigāthāvaṇṇanā
