| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဝိတက္ကသုတ္တံ
7. Vitakkasuttaṃ
၁၀၇၇. ‘‘မာ, ဘိက္ခဝေ, ပာပကေ အကုသလေ ဝိတက္ကေ ဝိတက္ကေယ္ယာထ 1, သေယ္ယထိဒံ – ကာမဝိတက္ကံ, ဗ္ယာပာဒဝိတက္ကံ, ဝိဟိံသာဝိတက္ကံ။ တံ ကိသ္သ ဟေတု? နေတေ, ဘိက္ခဝေ, ဝိတက္ကာ အတ္ထသံဟိတာ နာဒိဗ္ရဟ္မစရိယကာ န နိဗ္ဗိဒာယ န ဝိရာဂာယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တန္တိ။
1077. ‘‘Mā, bhikkhave, pāpake akusale vitakke vitakkeyyātha 2, seyyathidaṃ – kāmavitakkaṃ, byāpādavitakkaṃ, vihiṃsāvitakkaṃ. Taṃ kissa hetu? Nete, bhikkhave, vitakkā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti.
‘‘ဝိတက္ကေန္တာ စ ခော တုမ္ဟေ, ဘိက္ခဝေ, ‘ဣဒံ ဒုက္ခ’န္တိ ဝိတက္ကေယ္ယာထ, ‘အယံ ဒုက္ခသမုဒယော’တိ ဝိတက္ကေယ္ယာထ, ‘အယံ ဒုက္ခနိရောဓော’တိ ဝိတက္ကေယ္ယာထ, ‘အယံ ဒုက္ခနိရောဓဂာမိနီ ပဋိပဒာ’တိ ဝိတက္ကေယ္ယာထ။ တံ ကိသ္သ ဟေတု? ဧတေ, ဘိက္ခဝေ, ဝိတက္ကာ အတ္ထသံဟိတာ ဧတေ အာဒိဗ္ရဟ္မစရိယကာ ဧတေ နိဗ္ဗိဒာယ ဝိရာဂာယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တန္တိ။
‘‘Vitakkentā ca kho tumhe, bhikkhave, ‘idaṃ dukkha’nti vitakkeyyātha, ‘ayaṃ dukkhasamudayo’ti vitakkeyyātha, ‘ayaṃ dukkhanirodho’ti vitakkeyyātha, ‘ayaṃ dukkhanirodhagāminī paṭipadā’ti vitakkeyyātha. Taṃ kissa hetu? Ete, bhikkhave, vitakkā atthasaṃhitā ete ādibrahmacariyakā ete nibbidāya virāgāya nirodhāya upasamāya abhiññāya sambodhāya nibbānāya saṃvattanti.
‘‘တသ္မာတိဟ, ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ သတ္တမံ။
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
