| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. வித்தா²ரஸுத்தவண்ணனா
2. Vitthārasuttavaṇṇanā
162. து³தியே அபி⁴க்க²ணந்தி அபி⁴ண்ஹங். ஆனந்தரியந்தி அனந்தரவிபாகதா³யகங் மக்³க³ஸமாதி⁴ங். ஆஸவானங் க²யாயாதி அரஹத்தப²லத்தா²ய. பஞ்சிந்த்³ரியானீதி விபஸ்ஸனாபஞ்சமகானி பஞ்சிந்த்³ரியானி. பஞ்ஞிந்த்³ரியந்தி ஹி எத்த² விபஸ்ஸனாபஞ்ஞாவ பஞ்ஞிந்த்³ரியந்தி அதி⁴ப்பேதங். ஸேஸமெத்த² பாளிவஸேன உத்தானமேவ.
162. Dutiye abhikkhaṇanti abhiṇhaṃ. Ānantariyanti anantaravipākadāyakaṃ maggasamādhiṃ. Āsavānaṃ khayāyāti arahattaphalatthāya. Pañcindriyānīti vipassanāpañcamakāni pañcindriyāni. Paññindriyanti hi ettha vipassanāpaññāva paññindriyanti adhippetaṃ. Sesamettha pāḷivasena uttānameva.
இமாஸங் பன படிபதா³னங் அயங் ஆவிபா⁴வகதா² – இத⁴ பி⁴க்கு² புப்³பே³ அகதாபி⁴னிவேஸோ புப்³ப³பா⁴கே³ ரூபபரிக்³க³ஹே கிலமதி, அரூபபரிக்³க³ஹே கிலமதி, பச்சயபரிக்³க³ஹே கிலமதி, தீஸு அத்³தா⁴ஸு கிலமதி, மக்³கா³மக்³கே³ கிலமதி. ஏவங் பஞ்சஸு டா²னேஸு கிலமந்தோ விபஸ்ஸனங் பாபுணாதி. விபஸ்ஸனங் பத்வாபி உத³யப்³ப³யானுபஸ்ஸனே, ப⁴ங்கா³னுபஸ்ஸனே, ப⁴யதுபட்டா²னே, ஆதீ³னவானுபஸ்ஸனே, நிப்³பி³தா³னுபஸ்ஸனே, முச்சிதுகம்யதாஞாணே, ஸங்கா²ருபெக்கா²ஞாணே, அனுலோமஞாணே, கொ³த்ரபு⁴ஞாணேதி இமேஸு நவஸு விபஸ்ஸனாஞாணேஸுபி கிலமித்வாவ லோகுத்தரமக்³க³ங் பாபுணாதி. தஸ்ஸ ஸோ லோகுத்தரமக்³கோ³ ஏவங் து³க்கே²ன க³ருபா⁴வேன ஸச்சி²கதத்தா து³க்க²படிபதோ³ த³ந்தா⁴பி⁴ஞ்ஞோ நாம ஜாதோ. யோ பன புப்³ப³பா⁴கே³ பஞ்சஸு ஞாணேஸு கிலமந்தோ அபரபா⁴கே³ நவஸு விபஸ்ஸனாஞாணேஸு அகிலமித்வாவ மக்³க³ங் ஸச்சி²கரோதி, தஸ்ஸ ஸோ மக்³கோ³ ஏவங் து³க்கே²ன அக³ருபா⁴வேன ஸச்சி²கதத்தா து³க்க²படிபதோ³ கி²ப்பாபி⁴ஞ்ஞோ நாம ஜாதோ. இமினா உபாயேன இதராபி த்³வே வேதி³தப்³பா³.
Imāsaṃ pana paṭipadānaṃ ayaṃ āvibhāvakathā – idha bhikkhu pubbe akatābhiniveso pubbabhāge rūpapariggahe kilamati, arūpapariggahe kilamati, paccayapariggahe kilamati, tīsu addhāsu kilamati, maggāmagge kilamati. Evaṃ pañcasu ṭhānesu kilamanto vipassanaṃ pāpuṇāti. Vipassanaṃ patvāpi udayabbayānupassane, bhaṅgānupassane, bhayatupaṭṭhāne, ādīnavānupassane, nibbidānupassane, muccitukamyatāñāṇe, saṅkhārupekkhāñāṇe, anulomañāṇe, gotrabhuñāṇeti imesu navasu vipassanāñāṇesupi kilamitvāva lokuttaramaggaṃ pāpuṇāti. Tassa so lokuttaramaggo evaṃ dukkhena garubhāvena sacchikatattā dukkhapaṭipado dandhābhiñño nāma jāto. Yo pana pubbabhāge pañcasu ñāṇesu kilamanto aparabhāge navasu vipassanāñāṇesu akilamitvāva maggaṃ sacchikaroti, tassa so maggo evaṃ dukkhena agarubhāvena sacchikatattā dukkhapaṭipado khippābhiñño nāma jāto. Iminā upāyena itarāpi dve veditabbā.
கோ³ணபரியேஸகஉபமாஹி சேதா விபா⁴வேதப்³பா³ – ஏகஸ்ஸ ஹி புரிஸஸ்ஸ சத்தாரோ கோ³ணா பலாயித்வா அடவிங் பவிட்டா². ஸோ ஸகண்டகே ஸக³ஹனே வனே தே பரியேஸந்தோ க³ஹனமக்³கே³னேவ கிச்சே²ன கஸிரேன க³ந்த்வா க³ஹனட்டா²னேயேவ நிலீனே கோ³ணேபி கிச்சே²ன கஸிரேன அத்³த³ஸ. ஏகோ கிச்சே²ன க³ந்த்வா அப்³போ⁴காஸே டி²தே கி²ப்பமேவ அத்³த³ஸ. அபரோ அப்³போ⁴காஸமக்³கே³ன ஸுகே²ன க³ந்த்வா க³ஹனட்டா²னே நிலீனே கிச்சே²ன கஸிரேன அத்³த³ஸ. அபரோ அப்³போ⁴காஸமக்³கே³னேவ ஸுகே²ன க³ந்த்வா அப்³போ⁴காஸே டி²தேயேவ கி²ப்பங் அத்³த³ஸ. தத்த² சத்தாரோ கோ³ணா விய சத்தாரோ அரியமக்³கா³ த³ட்ட²ப்³பா³, கோ³ணபரியேஸகோ புரிஸோ விய யோகா³வசரோ, க³ஹனமக்³கே³ன கிச்சே²ன கஸிரேன க³மனங் விய புப்³ப³பா⁴கே³ பஞ்சஸு ஞாணேஸு கிலமதோ து³க்கா²படிபதா³. க³ஹனட்டா²னே நிலீனானங் கிச்சே²னேவ த³ஸ்ஸனங் விய அபரபா⁴கே³ நவஸு ஞாணேஸு கிலமந்தஸ்ஸ அரியமக்³கா³னங் த³ஸ்ஸனங். இமினா உபாயேன ஸேஸஉபமாபி யோஜேதப்³பா³.
Goṇapariyesakaupamāhi cetā vibhāvetabbā – ekassa hi purisassa cattāro goṇā palāyitvā aṭaviṃ paviṭṭhā. So sakaṇṭake sagahane vane te pariyesanto gahanamaggeneva kicchena kasirena gantvā gahanaṭṭhāneyeva nilīne goṇepi kicchena kasirena addasa. Eko kicchena gantvā abbhokāse ṭhite khippameva addasa. Aparo abbhokāsamaggena sukhena gantvā gahanaṭṭhāne nilīne kicchena kasirena addasa. Aparo abbhokāsamaggeneva sukhena gantvā abbhokāse ṭhiteyeva khippaṃ addasa. Tattha cattāro goṇā viya cattāro ariyamaggā daṭṭhabbā, goṇapariyesako puriso viya yogāvacaro, gahanamaggena kicchena kasirena gamanaṃ viya pubbabhāge pañcasu ñāṇesu kilamato dukkhāpaṭipadā. Gahanaṭṭhāne nilīnānaṃ kiccheneva dassanaṃ viya aparabhāge navasu ñāṇesu kilamantassa ariyamaggānaṃ dassanaṃ. Iminā upāyena sesaupamāpi yojetabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. வித்தா²ரஸுத்தங் • 2. Vitthārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. வித்தா²ரஸுத்தவண்ணனா • 2. Vitthārasuttavaṇṇanā
