| Library / Tipiṭaka / తిపిటక • Tipiṭaka / సంయుత్తనికాయ (అట్ఠకథా) • Saṃyuttanikāya (aṭṭhakathā) |
౯. వనసంయుత్తం
9. Vanasaṃyuttaṃ
౧. వివేకసుత్తవణ్ణనా
1. Vivekasuttavaṇṇanā
౨౨౧. వనసంయుత్తస్స పఠమే కోసలేసు విహరతీతి సత్థు సన్తికే కమ్మట్ఠానం గహేత్వా తస్స జనపదస్స సులభభిక్ఖతాయ తత్థ గన్త్వా విహరతి. సంవేజేతుకామాతి వివేకం పటిపజ్జాపేతుకామా. వివేకకామోతి తయో వివేకే పత్థయన్తో. నిచ్ఛరతీ బహిద్ధాతి బాహిరేసు పుథుత్తారమ్మణేసు చరతి. జనో జనస్మిన్తి త్వం జనో అఞ్ఞస్మిం జనే ఛన్దరాగం వినయస్సు. పజహాసీతి పజహ. భవాసీతి భవ. సతం తం సారయామసేతి సతిమన్తం పణ్డితం తం మయమ్పి సారయామ, సతం వా ధమ్మం మయం తం సారయామాతి అత్థో. పాతాలరజోతి అప్పతిట్ఠట్ఠేన పాతాలసఙ్ఖాతో కిలేసరజో. మా తం కామరజోతి అయం కామరాగరజో తం మా అవహరి, అపాయమేవ మా నేతూతి అత్థో. పంసుకున్థితోతి పంసుమక్ఖితో. విధునన్తి విధునన్తో. సితం రజన్తి సరీరలగ్గం రజం. సంవేగమాపాదీతి దేవతాపి నామ మం ఏవం సారేతీతి వివేకమాపన్నో, ఉత్తమవీరియం వా పగ్గయ్హ పరమవివేకం మగ్గమేవ పటిపన్నోతి. పఠమం.
221. Vanasaṃyuttassa paṭhame kosalesu viharatīti satthu santike kammaṭṭhānaṃ gahetvā tassa janapadassa sulabhabhikkhatāya tattha gantvā viharati. Saṃvejetukāmāti vivekaṃ paṭipajjāpetukāmā. Vivekakāmoti tayo viveke patthayanto. Niccharatī bahiddhāti bāhiresu puthuttārammaṇesu carati. Jano janasminti tvaṃ jano aññasmiṃ jane chandarāgaṃ vinayassu. Pajahāsīti pajaha. Bhavāsīti bhava. Sataṃ taṃ sārayāmaseti satimantaṃ paṇḍitaṃ taṃ mayampi sārayāma, sataṃ vā dhammaṃ mayaṃ taṃ sārayāmāti attho. Pātālarajoti appatiṭṭhaṭṭhena pātālasaṅkhāto kilesarajo. Mā taṃ kāmarajoti ayaṃ kāmarāgarajo taṃ mā avahari, apāyameva mā netūti attho. Paṃsukunthitoti paṃsumakkhito. Vidhunanti vidhunanto. Sitaṃ rajanti sarīralaggaṃ rajaṃ. Saṃvegamāpādīti devatāpi nāma maṃ evaṃ sāretīti vivekamāpanno, uttamavīriyaṃ vā paggayha paramavivekaṃ maggameva paṭipannoti. Paṭhamaṃ.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / సంయుత్తనికాయ • Saṃyuttanikāya / ౧. వివేకసుత్తం • 1. Vivekasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧. వివేకసుత్తవణ్ణనా • 1. Vivekasuttavaṇṇanā
