| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
4. вод̣̇аанан̃аан̣анид̣̇д̣̇зсаван̣н̣анаа
4. Vodānañāṇaniddesavaṇṇanā
158. вод̣̇аанз н̃аан̣аанийд̇и висуд̣̇д̇хан̃аан̣аани. д̇ам̣ виваж̇ж̇аяид̇ваад̇и яам̣ буб̣б̣з вуд̇д̇ам̣ ад̇ийд̇аануд̇хааванам̣ жид̇д̇ам̣ вигкзбаанубад̇ид̇ам̣, д̇ам̣ виваж̇ж̇аяид̇ваад̇и самб̣анд̇хид̇аб̣б̣ам̣. згадтаанз самаад̣̇ахад̇ийд̇и ассаасабассаасаанам̣ пусанадтаанз самам̣ аад̣̇ахад̇и бад̇идтаабзд̇и. д̇ад̇т̇зва ад̇химожзд̇ийд̇и згадтаанзд̇и вуд̇д̇з ассаасабассаасаанам̣ пусанадтаанзязва саннидтабзд̇и саннидтаанам̣ гарод̇и. баг̇г̇ан̣хид̇ваад̇и д̇хаммавижаяабийд̇исамб̣ож̇жхан̇г̇абхааванааяа баг̇г̇ахзд̇ваа. виниг̇г̇ан̣хид̇ваад̇и бассад̣̇д̇хисамаад̇хиубзгкаасамб̣ож̇жхан̇г̇абхааванааяа виниг̇г̇ан̣хид̇ваа. ‘‘сад̇инд̣̇рияавийрияинд̣̇риязхи баг̇г̇ахзд̇ваа, сад̇инд̣̇рияасамаад̇хинд̣̇риязхи виниг̇г̇ахзд̇ваа’’д̇иби вад̣̇анд̇и. самбаж̇аано худ̇ваад̇и асубхабхааванаад̣̇ийхи. буна самбаж̇аано худ̇ваад̇и мзд̇д̇аабхааванаад̣̇ийхи. язна рааг̇зна анубад̇ид̇ам̣, язна б̣яаабаад̣̇зна анубад̇ид̇ам̣, д̇ам̣ баж̇ахад̇ийд̇и самб̣анд̇хо. д̇ам̣ жид̇д̇ам̣ ийд̣̇исанд̇и самбаж̇аананд̇о д̇аббадибагкзна рааг̇ам̣ баж̇ахад̇и, б̣яаабаад̣̇ам̣ баж̇ахад̇ийд̇и ваа ад̇т̇о. барисуд̣̇д̇ханд̇и нирубаггилзсам̣. барияод̣̇аад̇анд̇и бабхассарам̣. згад̇д̇аг̇ад̇ам̣ ход̇ийд̇и д̇ам̣ д̇ам̣ висзсам̣ бад̇д̇асса д̇ам̣ д̇ам̣ згад̇д̇ам̣ г̇ад̇ам̣ ход̇и.
158.Vodāne ñāṇānīti visuddhañāṇāni. Taṃ vivajjayitvāti yaṃ pubbe vuttaṃ atītānudhāvanaṃ cittaṃ vikkhepānupatitaṃ, taṃ vivajjayitvāti sambandhitabbaṃ. Ekaṭṭhāne samādahatīti assāsapassāsānaṃ phusanaṭṭhāne samaṃ ādahati patiṭṭhāpeti. Tattheva adhimocetīti ekaṭṭhāneti vutte assāsapassāsānaṃ phusanaṭṭhāneyeva sanniṭṭhapeti sanniṭṭhānaṃ karoti. Paggaṇhitvāti dhammavicayapītisambojjhaṅgabhāvanāya paggahetvā. Viniggaṇhitvāti passaddhisamādhiupekkhāsambojjhaṅgabhāvanāya viniggaṇhitvā. ‘‘Satindriyavīriyindriyehi paggahetvā, satindriyasamādhindriyehi viniggahetvā’’tipi vadanti. Sampajāno hutvāti asubhabhāvanādīhi. Puna sampajāno hutvāti mettābhāvanādīhi. Yena rāgena anupatitaṃ, yena byāpādena anupatitaṃ, taṃ pajahatīti sambandho. Taṃ cittaṃ īdisanti sampajānanto tappaṭipakkhena rāgaṃ pajahati, byāpādaṃ pajahatīti vā attho. Parisuddhanti nirupakkilesaṃ. Pariyodātanti pabhassaraṃ. Ekattagataṃ hotīti taṃ taṃ visesaṃ pattassa taṃ taṃ ekattaṃ gataṃ hoti.
гад̇амз д̇з згад̇д̇аад̇и ид̇ха яуж̇ж̇амаанааяуж̇ж̇амаанзби згад̇д̇з згад̇о гад̇ваа бужчад̇и. д̣̇аануубасаг̇г̇убадтаанзгад̇д̇анд̇и д̣̇аанавад̇т̇усан̇каад̇асса д̣̇аанасса убасаг̇г̇о восаж̇ж̇анам̣ д̣̇аануубасаг̇г̇о, д̣̇аанавад̇т̇убарижжааг̇ажзд̇анаа. д̇асса убадтаанам̣ аарамман̣агаран̣авасзна убаг̇анд̇ваа таанам̣ д̣̇аануубасаг̇г̇убадтаанам̣, д̇ад̣̇зва згад̇д̇ам̣, д̇зна ваа згад̇д̇ам̣ згаг̇г̇абхааво д̣̇аануубасаг̇г̇убадтаанзгад̇д̇ам̣. д̣̇аанавосаг̇г̇убадтаанзгад̇д̇анд̇и баато сунд̣̇арад̇аро, со звад̇т̇о. зд̇зна бад̣̇уд̣̇д̇хааравасзна жааг̇аануссад̇исамаад̇хи вуд̇д̇о. бад̣̇уд̣̇д̇хааравасзна вуд̇д̇оби жзса ид̇арзсам̣ д̇ин̣н̣амби згад̇д̇аанам̣ убаниссаяабажжаяо ход̇и, д̇асмаа ид̇ха нид̣̇д̣̇идтанд̇и вад̣̇анд̇и. висаакааби хи махааубаасигаа ааха – ‘‘ид̇ха, бханд̇з, д̣̇исаасу вассам̣вудтаа бхигкуу саавад̇т̇им̣ ааг̇ажчиссанд̇и бхаг̇аванд̇ам̣ д̣̇ассанааяа, д̇з бхаг̇аванд̇ам̣ убасан̇гамид̇ваа бужчиссанд̇и ‘ид̇т̇аннаамо, бханд̇з, бхигку гаалан̇гад̇о, д̇асса гаа г̇ад̇и, го абхисамбарааяо’д̇и? д̇ам̣ бхаг̇аваа б̣яаагариссад̇и сод̇аабад̇д̇ипалз ваа сагад̣̇ааг̇аамипалз ваа анааг̇аамипалз ваа арахад̇д̇з ваа. д̇яаахам̣ убасан̇гамид̇ваа бужчиссаами ‘ааг̇ад̇абуб̣б̣аа ну ко, бханд̇з, д̇зна аяязна саавад̇т̇ий’д̇и? сажз мз вагканд̇и ‘ааг̇ад̇абуб̣б̣аа д̇зна бхигкунаа саавад̇т̇ий’д̇и. нидтамзд̇т̇а г̇ажчиссаами ниссам̣саяам̣ барибхуд̇д̇ам̣ д̇зна аяязна вассигасаадигаа ваа ааг̇анд̇угабхад̇д̇ам̣ ваа г̇амигабхад̇д̇ам̣ ваа г̇илаанабхад̇д̇ам̣ ваа г̇илаанубадтаагабхад̇д̇ам̣ ваа г̇илаанабхзсаж̇ж̇ам̣ ваа д̇хуваяааг̇у ваад̇и. д̇ассаа мз д̇ад̣̇ануссаранд̇ияаа баамож̇ж̇ам̣ ж̇ааяиссад̇и, бамуд̣̇ид̇ааяа бийд̇и ж̇ааяиссад̇и, бийд̇иманааяа гааяо бассамбхиссад̇и, бассад̣̇д̇хагааяаа сукам̣ взд̣̇аяиссаами, сукинияаа жид̇д̇ам̣ самаад̇хияиссад̇и, саа мз бхависсад̇и инд̣̇рияабхааванаа б̣алабхааванаа б̣ож̇жхан̇г̇абхааванаа’’д̇и (махаава. 351). ат̇а ваа згад̇д̇зсу батамам̣ убажаарасамаад̇хивасзна вуд̇д̇ам̣, д̣̇уд̇ияам̣ аббанаасамаад̇хивасзна, д̇ад̇ияам̣ вибассанаавасзна, жад̇уд̇т̇ам̣ маг̇г̇апалавасзнаад̇и взд̣̇ид̇аб̣б̣ам̣. самат̇асса нимид̇д̇ам̣ самат̇анимид̇д̇ам̣. ваяо бхан̇г̇о зва лагкан̣ам̣ ваяалагкан̣ам̣. нирод̇хо ниб̣б̣аанам̣. сзсамзд̇зсу д̇ийсу вуд̇д̇анаязнзва яож̇зд̇аб̣б̣ам̣.
Katame te ekattāti idha yujjamānāyujjamānepi ekatte ekato katvā pucchati. Dānūpasaggupaṭṭhānekattanti dānavatthusaṅkhātassa dānassa upasaggo vosajjanaṃ dānūpasaggo, dānavatthupariccāgacetanā. Tassa upaṭṭhānaṃ ārammaṇakaraṇavasena upagantvā ṭhānaṃ dānūpasaggupaṭṭhānaṃ, tadeva ekattaṃ, tena vā ekattaṃ ekaggabhāvo dānūpasaggupaṭṭhānekattaṃ. Dānavosaggupaṭṭhānekattanti pāṭho sundarataro, so evattho. Etena paduddhāravasena cāgānussatisamādhi vutto. Paduddhāravasena vuttopi cesa itaresaṃ tiṇṇampi ekattānaṃ upanissayapaccayo hoti, tasmā idha niddiṭṭhanti vadanti. Visākhāpi hi mahāupāsikā āha – ‘‘idha, bhante, disāsu vassaṃvuṭṭhā bhikkhū sāvatthiṃ āgacchissanti bhagavantaṃ dassanāya, te bhagavantaṃ upasaṅkamitvā pucchissanti ‘itthannāmo, bhante, bhikkhu kālaṅkato, tassa kā gati, ko abhisamparāyo’ti? Taṃ bhagavā byākarissati sotāpattiphale vā sakadāgāmiphale vā anāgāmiphale vā arahatte vā. Tyāhaṃ upasaṅkamitvā pucchissāmi ‘āgatapubbā nu kho, bhante, tena ayyena sāvatthī’ti? Sace me vakkhanti ‘āgatapubbā tena bhikkhunā sāvatthī’ti. Niṭṭhamettha gacchissāmi nissaṃsayaṃ paribhuttaṃ tena ayyena vassikasāṭikā vā āgantukabhattaṃ vā gamikabhattaṃ vā gilānabhattaṃ vā gilānupaṭṭhākabhattaṃ vā gilānabhesajjaṃ vā dhuvayāgu vāti. Tassā me tadanussarantiyā pāmojjaṃ jāyissati, pamuditāya pīti jāyissati, pītimanāya kāyo passambhissati, passaddhakāyā sukhaṃ vedayissāmi, sukhiniyā cittaṃ samādhiyissati, sā me bhavissati indriyabhāvanā balabhāvanā bojjhaṅgabhāvanā’’ti (mahāva. 351). Atha vā ekattesu paṭhamaṃ upacārasamādhivasena vuttaṃ, dutiyaṃ appanāsamādhivasena, tatiyaṃ vipassanāvasena, catutthaṃ maggaphalavasenāti veditabbaṃ. Samathassa nimittaṃ samathanimittaṃ. Vayo bhaṅgo eva lakkhaṇaṃ vayalakkhaṇaṃ. Nirodho nibbānaṃ. Sesametesu tīsu vuttanayeneva yojetabbaṃ.
жааг̇аад̇химуд̇д̇аананд̇и д̣̇аанз ад̇химуд̇д̇аанам̣. ад̇хижид̇д̇анд̇и вибассанаабаад̣̇агасамаад̇хи. вибассагаананд̇и бхан̇г̇аанубассанад̇о бадтааяа д̇ийхи анубассанаахи сан̇каарз вибассанд̇аанам̣. арияабуг̇г̇алаананд̇и адтаннам̣. д̣̇уд̇ияаад̣̇ийни д̇ийн̣и згад̇д̇аани аанаабаанассад̇ивасзна сзсагаммадтаанавасзна жа яуж̇ж̇анд̇и. жад̇уухи таанзхийд̇и жад̇уухи гааран̣зхи. самаад̇хивибассанаамаг̇г̇апалаанам̣ васзна ‘‘згад̇д̇аг̇ад̇ам̣ жид̇д̇ам̣ бадибад̣̇аависуд̣̇д̇хибагканд̣̇ан̃жзва ход̇и убзгкаануб̣руухид̇ан̃жа н̃аан̣зна жа самбахам̣сид̇а’’нд̇и уд̣̇д̣̇зсабад̣̇аани. ‘‘батамасса жхаанасса го аад̣̇ий’’д̇иаад̣̇ийни д̇зсам̣ уд̣̇д̣̇зсабад̣̇аанам̣ вид̇т̇аарзд̇угамяад̇аабужчаабуб̣б̣ан̇г̇амаани нид̣̇д̣̇зсабад̣̇аани. д̇ад̇т̇а бадибад̣̇аависуд̣̇д̇хибагканд̣̇анд̇и бадибад̣̇аа зва нийваран̣амалависод̇ханад̇о висуд̣̇д̇хи, д̇ам̣ бадибад̣̇аависуд̣̇д̇хим̣ багканд̣̇ам̣ бавидтам̣. убзгкаануб̣руухид̇анд̇и д̇ад̇рамаж̇жхад̇д̇убзгкааяа б̣руухид̇ам̣ вад̣дхид̇ам̣. н̃аан̣зна жа самбахам̣сид̇анд̇и барияод̣̇аабагзна н̃аан̣зна самбахам̣сид̇ам̣ барияод̣̇аабид̇ам̣ висод̇хид̇ам̣. бадибад̣̇аависуд̣̇д̇хи наама сасамбхаариго убажааро, убзгкаануб̣рууханаа наама аббанаа, самбахам̣санаа наама бажжавзгкан̣аад̇и звамзгз ван̣н̣аяанд̇и. яасмаа бана ‘‘згад̇д̇аг̇ад̇ам̣ жид̇д̇ам̣ бадибад̣̇аависуд̣̇д̇хибагканд̣̇ан̃жзва ход̇ий’’д̇иаад̣̇и вуд̇д̇ам̣, д̇асмаа анд̇оаббанааяамзва ааг̇аманавасзна бадибад̣̇аависуд̣̇д̇хи, д̇ад̇рамаж̇жхад̇д̇убзгкааяа гижжавасзна убзгкаануб̣рууханаа, д̇хаммаанам̣ анад̇ивад̇д̇анаад̣̇ибхаавасаад̇ханзна барияод̣̇аабагасса н̃аан̣асса гижжанибпад̇д̇ивасзна самбахам̣санаа взд̣̇ид̇аб̣б̣аа. гат̇ам̣? яасмин̃хи ваарз аббанаа уббаж̇ж̇ад̇и, д̇асмим̣ яо нийваран̣асан̇каад̇о гилзсаг̇ан̣о д̇асса жхаанасса барибант̇о, д̇ад̇о жид̇д̇ам̣ висуж̇жхад̇и, висуд̣̇д̇хад̇д̇аа ааваран̣авирахид̇ам̣ худ̇ваа маж̇жхимам̣ самат̇анимид̇д̇ам̣ бадибаж̇ж̇ад̇и. маж̇жхимам̣ самат̇анимид̇д̇ам̣ наама самаббавад̇д̇о аббанаасамаад̇хиязва. д̇ад̣̇ананд̇арам̣ бана буримажид̇д̇ам̣ згасанд̇ад̇ибарин̣ааманаязна д̇ат̇ад̇д̇ам̣ убаг̇ажчамаанам̣ маж̇жхимам̣ самат̇анимид̇д̇ам̣ бадибаж̇ж̇ад̇и наама. звам̣ бадибаннад̇д̇аа д̇ат̇ад̇д̇убаг̇аманзна д̇ад̇т̇а багканд̣̇ад̇и наама. звам̣ д̇аава буримажид̇д̇з виж̇ж̇амаанаагааранибпаад̣̇игаа батамасса жхаанасса уббаад̣̇агкан̣зязва ааг̇аманавасзна бадибад̣̇аависуд̣̇д̇хи взд̣̇ид̇аб̣б̣аа. звам̣ висуд̣̇д̇хасса бана д̇асса буна висод̇хзд̇аб̣б̣аабхаавад̇о висод̇ханз б̣яаабаарам̣ агаронд̇о висуд̣̇д̇хам̣ жид̇д̇ам̣ аж̇жхубзгкад̇и наама. самат̇абхаавуубаг̇аманзна самат̇абадибаннасса буна самаад̣̇аанз б̣яаабаарам̣ агаронд̇о самат̇абадибаннам̣ аж̇жхубзгкад̇и наама. самат̇абадибаннабхаавад̇о зва жасса гилзсасам̣саг̇г̇ам̣ бахааяа згад̇д̇зна убадтид̇асса буна згад̇д̇убадтаанз б̣яаабаарам̣ агаронд̇о згад̇д̇убадтаанам̣ аж̇жхубзгкад̇и наама. звам̣ д̇ад̇рамаж̇жхад̇д̇убзгкааяа гижжавасзна убзгкаануб̣рууханаа взд̣̇ид̇аб̣б̣аа.
Cāgādhimuttānanti dāne adhimuttānaṃ. Adhicittanti vipassanāpādakasamādhi. Vipassakānanti bhaṅgānupassanato paṭṭhāya tīhi anupassanāhi saṅkhāre vipassantānaṃ. Ariyapuggalānanti aṭṭhannaṃ. Dutiyādīni tīṇi ekattāni ānāpānassativasena sesakammaṭṭhānavasena ca yujjanti. Catūhi ṭhānehīti catūhi kāraṇehi. Samādhivipassanāmaggaphalānaṃ vasena ‘‘ekattagataṃ cittaṃ paṭipadāvisuddhipakkhandañceva hoti upekkhānubrūhitañca ñāṇena ca sampahaṃsita’’nti uddesapadāni. ‘‘Paṭhamassa jhānassa ko ādī’’tiādīni tesaṃ uddesapadānaṃ vitthāretukamyatāpucchāpubbaṅgamāni niddesapadāni. Tattha paṭipadāvisuddhipakkhandanti paṭipadā eva nīvaraṇamalavisodhanato visuddhi, taṃ paṭipadāvisuddhiṃ pakkhandaṃ paviṭṭhaṃ. Upekkhānubrūhitanti tatramajjhattupekkhāya brūhitaṃ vaḍḍhitaṃ. Ñāṇena ca sampahaṃsitanti pariyodāpakena ñāṇena sampahaṃsitaṃ pariyodāpitaṃ visodhitaṃ. Paṭipadāvisuddhi nāma sasambhāriko upacāro, upekkhānubrūhanā nāma appanā, sampahaṃsanā nāma paccavekkhaṇāti evameke vaṇṇayanti. Yasmā pana ‘‘ekattagataṃ cittaṃ paṭipadāvisuddhipakkhandañceva hotī’’tiādi vuttaṃ, tasmā antoappanāyameva āgamanavasena paṭipadāvisuddhi, tatramajjhattupekkhāya kiccavasena upekkhānubrūhanā, dhammānaṃ anativattanādibhāvasādhanena pariyodāpakassa ñāṇassa kiccanipphattivasena sampahaṃsanā veditabbā. Kathaṃ? Yasmiñhi vāre appanā uppajjati, tasmiṃ yo nīvaraṇasaṅkhāto kilesagaṇo tassa jhānassa paripantho, tato cittaṃ visujjhati, visuddhattā āvaraṇavirahitaṃ hutvā majjhimaṃ samathanimittaṃ paṭipajjati. Majjhimaṃ samathanimittaṃ nāma samappavatto appanāsamādhiyeva. Tadanantaraṃ pana purimacittaṃ ekasantatipariṇāmanayena tathattaṃ upagacchamānaṃ majjhimaṃ samathanimittaṃ paṭipajjati nāma. Evaṃ paṭipannattā tathattupagamanena tattha pakkhandati nāma. Evaṃ tāva purimacitte vijjamānākāranipphādikā paṭhamassa jhānassa uppādakkhaṇeyeva āgamanavasena paṭipadāvisuddhi veditabbā. Evaṃ visuddhassa pana tassa puna visodhetabbābhāvato visodhane byāpāraṃ akaronto visuddhaṃ cittaṃ ajjhupekkhati nāma. Samathabhāvūpagamanena samathapaṭipannassa puna samādāne byāpāraṃ akaronto samathapaṭipannaṃ ajjhupekkhati nāma. Samathapaṭipannabhāvato eva cassa kilesasaṃsaggaṃ pahāya ekattena upaṭṭhitassa puna ekattupaṭṭhāne byāpāraṃ akaronto ekattupaṭṭhānaṃ ajjhupekkhati nāma. Evaṃ tatramajjhattupekkhāya kiccavasena upekkhānubrūhanā veditabbā.
яз банзд̇з звам̣ убзгкаануб̣руухид̇з д̇ад̇т̇а ж̇аад̇аа самаад̇хибан̃н̃аасан̇каад̇аа яуг̇анад̣̇д̇хад̇хаммаа ан̃н̃аман̃н̃ам̣ анад̇ивад̇д̇амаанаа худ̇ваа бавад̇д̇аа, яаани жа сад̣̇д̇хаад̣̇ийни инд̣̇рияаани наанаагилзсзхи вимуд̇д̇ад̇д̇аа вимуд̇д̇ирасзна згарасаани худ̇ваа бавад̇д̇аани, яам̣ жзса д̇ад̣̇убаг̇ам̣ д̇зсам̣ анад̇ивад̇д̇аназгарасабхааваанам̣ анужчавигам̣ вийрияам̣ ваахаяад̇и, яаа жасса д̇асмим̣ кан̣з бавад̇д̇аа аасзванаа, саб̣б̣зби д̇з аагаараа яасмаа н̃аан̣зна сам̣гилзсавод̣̇аанзсу д̇ам̣ д̇ам̣ аад̣̇ийнаван̃жа аанисам̣сан̃жа д̣̇исваа д̇ат̇аа д̇ат̇аа самбахам̣сид̇ад̇д̇аа висод̇хид̇ад̇д̇аа барияод̣̇аабид̇ад̇д̇аа нибпаннаа, д̇асмаа д̇хаммаанам̣ анад̇ивад̇д̇анаад̣̇ибхаавасаад̇ханзна барияод̣̇аабагасса н̃аан̣асса гижжанибпад̇д̇ивасзна самбахам̣санаа взд̣̇ид̇аб̣б̣аад̇и вуд̇д̇ам̣. д̇ад̇т̇а яасмаа убзгкаавасзна н̃аан̣ам̣ баагадам̣ ход̇и, яат̇ааха – ‘‘д̇ат̇аабаг̇г̇ахид̇ам̣ жид̇д̇ам̣ саад̇хугам̣ аж̇жхубзгкад̇и, убзгкаавасзна бан̃н̃аавасзна бан̃н̃инд̣̇рияам̣ ад̇химад̇д̇ам̣ ход̇и. убзгкаавасзна наанад̇д̇агилзсзхи жид̇д̇ам̣ вимужжад̇и, вимогкавасзна бан̃н̃аавасзна бан̃н̃инд̣̇рияам̣ ад̇химад̇д̇ам̣ ход̇и. вимуд̇д̇ад̇д̇аа д̇з д̇хаммаа згарасаа хонд̇и, згарасадтзна бхааванаа’’д̇и (бади. ма. 1.201). д̇асмаа н̃аан̣агижжабхууд̇аа самбахам̣санаа барияосаананд̇и вуд̇д̇аа.
Ye panete evaṃ upekkhānubrūhite tattha jātā samādhipaññāsaṅkhātā yuganaddhadhammā aññamaññaṃ anativattamānā hutvā pavattā, yāni ca saddhādīni indriyāni nānākilesehi vimuttattā vimuttirasena ekarasāni hutvā pavattāni, yaṃ cesa tadupagaṃ tesaṃ anativattanaekarasabhāvānaṃ anucchavikaṃ vīriyaṃ vāhayati, yā cassa tasmiṃ khaṇe pavattā āsevanā, sabbepi te ākārā yasmā ñāṇena saṃkilesavodānesu taṃ taṃ ādīnavañca ānisaṃsañca disvā tathā tathā sampahaṃsitattā visodhitattā pariyodāpitattā nipphannā, tasmā dhammānaṃ anativattanādibhāvasādhanena pariyodāpakassa ñāṇassa kiccanipphattivasena sampahaṃsanā veditabbāti vuttaṃ. Tattha yasmā upekkhāvasena ñāṇaṃ pākaṭaṃ hoti, yathāha – ‘‘tathāpaggahitaṃ cittaṃ sādhukaṃ ajjhupekkhati, upekkhāvasena paññāvasena paññindriyaṃ adhimattaṃ hoti. Upekkhāvasena nānattakilesehi cittaṃ vimuccati, vimokkhavasena paññāvasena paññindriyaṃ adhimattaṃ hoti. Vimuttattā te dhammā ekarasā honti, ekarasaṭṭhena bhāvanā’’ti (paṭi. ma. 1.201). Tasmā ñāṇakiccabhūtā sampahaṃsanā pariyosānanti vuttā.
звам̣ д̇ивад̇д̇аг̇ад̇анд̇иаад̣̇ийни д̇ассзва жид̇д̇асса т̇оманаважанаани. д̇ад̇т̇а звам̣ д̇ивад̇д̇аг̇ад̇анд̇и звам̣ яат̇аавуд̇д̇зна вид̇хинаа бадибад̣̇аависуд̣̇д̇хибагканд̣̇анаубзгкаануб̣рууханаан̃аан̣асамбахам̣санаавасзна д̇ивид̇хабхаавам̣ г̇ад̇ам̣. вид̇аггасамбаннанд̇и гилзсагкобхавирахид̇ад̇д̇аа вид̇аггзна сунд̣̇арабхаавам̣ баннам̣ г̇ад̇ам̣. жид̇д̇асса ад̇хидтаанасамбаннанд̇и д̇асмим̣язва аарамман̣з жид̇д̇асса ниранд̇араббавад̇д̇исан̇каад̇зна ад̇хидтаанзна самбаннам̣ ануунам̣. яат̇аа ад̇хидтаанавасияам̣ ад̇хидтаананд̇и жхаанаббавад̇д̇и, д̇ат̇аа ид̇хааби жид̇д̇асса ад̇хидтаананд̇и жид̇д̇згаг̇г̇ад̇ааби яуж̇ж̇ад̇и. д̇зна хи згасмим̣язва аарамман̣з жид̇д̇ам̣ ад̇хидтаад̇и, на зд̇т̇а вигкибад̇ийд̇и. ‘‘самаад̇хисамбанна’’нд̇и висум̣ вуд̇д̇ад̇д̇аа бана вуд̇д̇анаязнзва г̇ахзд̇аб̣б̣ам̣. ат̇а ваа самаад̇хиссзва жхаанасан̇г̇ахид̇ад̇д̇аа жид̇д̇асса ад̇хидтаанасамбаннанд̇и жхаанан̇г̇абан̃жагавасзна вуд̇д̇ам̣. самаад̇хисамбаннанд̇и инд̣̇рияасан̇г̇ахид̇ад̇д̇аа инд̣̇рияабан̃жагавасзна, д̣̇уд̇ияаж̇жхаанаад̣̇ийсу бана алаб̣бхамаанаани бад̣̇аани бахааяа лаб̣бхамаанагавасзна бийд̇исамбаннанд̇иаад̣̇и вуд̇д̇ам̣.
Evaṃ tivattagatantiādīni tasseva cittassa thomanavacanāni. Tattha evaṃ tivattagatanti evaṃ yathāvuttena vidhinā paṭipadāvisuddhipakkhandanaupekkhānubrūhanāñāṇasampahaṃsanāvasena tividhabhāvaṃ gataṃ. Vitakkasampannanti kilesakkhobhavirahitattā vitakkena sundarabhāvaṃ pannaṃ gataṃ. Cittassa adhiṭṭhānasampannanti tasmiṃyeva ārammaṇe cittassa nirantarappavattisaṅkhātena adhiṭṭhānena sampannaṃ anūnaṃ. Yathā adhiṭṭhānavasiyaṃ adhiṭṭhānanti jhānappavatti, tathā idhāpi cittassa adhiṭṭhānanti cittekaggatāpi yujjati. Tena hi ekasmiṃyeva ārammaṇe cittaṃ adhiṭṭhāti, na ettha vikkhipatīti. ‘‘Samādhisampanna’’nti visuṃ vuttattā pana vuttanayeneva gahetabbaṃ. Atha vā samādhisseva jhānasaṅgahitattā cittassa adhiṭṭhānasampannanti jhānaṅgapañcakavasena vuttaṃ. Samādhisampannanti indriyasaṅgahitattā indriyapañcakavasena, dutiyajjhānādīsu pana alabbhamānāni padāni pahāya labbhamānakavasena pītisampannantiādi vuttaṃ.
анижжаанубассанаад̣̇ийсу адтаарасасу махаавибассанаасу вид̇аггаад̣̇аяо барибун̣н̣ааязва д̇аасам̣ гаамааважарад̇д̇аа. зд̇аасу жа аббанааяа абхаавад̇о бадибад̣̇аависуд̣̇д̇хиаад̣̇аяо кан̣игасамаад̇хивасзна яож̇зд̇аб̣б̣аа. жад̇уусу маг̇г̇зсу батамаж̇жхаанигавасзна вид̇аггаад̣̇ийнам̣ лаб̣бханад̇о лаб̣бхамаанагавасзнзва вид̇аггаад̣̇аяо барибун̣н̣аа вуд̇д̇аа. д̣̇уд̇ияаж̇жхаанигаад̣̇ийсу хи маг̇г̇зсу вид̇аггаад̣̇аяо жхаанзсу вияа барихааяанд̇ийд̇и. зд̇д̇аавад̇аа д̇зраса вод̣̇аанан̃аан̣аани вид̇т̇аарад̇о нид̣̇д̣̇идтаани хонд̇и. гат̇ам̣? згадтаанз самаад̣̇аханзна д̇ад̇т̇зва ад̇химужжанзна госаж̇ж̇аббаж̇аханзна уд̣̇д̇хажжаббаж̇аханзна рааг̇аббаж̇аханзна б̣яаабаад̣̇аббаж̇аханзна самбаяуд̇д̇аани ча н̃аан̣аани, жад̇уухи згад̇д̇зхи самбаяуд̇д̇аани жад̇д̇аари н̃аан̣аани, бадибад̣̇аависуд̣̇д̇хиубзгкаануб̣рууханаасамбахам̣санаахи самбаяуд̇д̇аани д̇ийн̣и н̃аан̣аанийд̇и звам̣ д̇зраса н̃аан̣аани нид̣̇д̣̇идтаани.
Aniccānupassanādīsu aṭṭhārasasu mahāvipassanāsu vitakkādayo paripuṇṇāyeva tāsaṃ kāmāvacarattā. Etāsu ca appanāya abhāvato paṭipadāvisuddhiādayo khaṇikasamādhivasena yojetabbā. Catūsu maggesu paṭhamajjhānikavasena vitakkādīnaṃ labbhanato labbhamānakavaseneva vitakkādayo paripuṇṇā vuttā. Dutiyajjhānikādīsu hi maggesu vitakkādayo jhānesu viya parihāyantīti. Ettāvatā terasa vodānañāṇāni vitthārato niddiṭṭhāni honti. Kathaṃ? Ekaṭṭhāne samādahanena tattheva adhimuccanena kosajjappajahanena uddhaccappajahanena rāgappajahanena byāpādappajahanena sampayuttāni cha ñāṇāni, catūhi ekattehi sampayuttāni cattāri ñāṇāni, paṭipadāvisuddhiupekkhānubrūhanāsampahaṃsanāhi sampayuttāni tīṇi ñāṇānīti evaṃ terasa ñāṇāni niddiṭṭhāni.
159. звам̣ санд̇зби аанаабаанассад̇исамаад̇хибхааванаавасзна д̇зсам̣ нибпад̇д̇им̣ д̣̇ассзд̇угаамо д̇аани н̃аан̣аани аниг̇амзд̇ваава нимид̇д̇ам̣ ассаасабассаасаад̇иаад̣̇инаа наязна жод̣̇анаабуб̣б̣ан̇г̇амам̣ аанаабаанассад̇исамаад̇хибхааванаавид̇хим̣ д̣̇ассзд̇ваа анд̇з д̇аани н̃аан̣аани ниг̇амзд̇ваа д̣̇ассзси. д̇ад̇т̇а нимид̇д̇ам̣ вуд̇д̇амзва. анаарамман̣аамзгажид̇д̇ассаад̇и анаарамман̣аа згажид̇д̇асса. ма-гааро банзд̇т̇а бад̣̇асанд̇хигаро. анаарамман̣амзгажид̇д̇ассаад̇иби баато, згасса жид̇д̇асса аарамман̣ам̣ на бхаванд̇ийд̇и ад̇т̇о. д̇аяо д̇хаммзд̇и нимид̇д̇аад̣̇аяо д̇аяо д̇хаммз. бхааванаад̇и аанаабаанассад̇исамаад̇хибхааванаа. гат̇анд̇и батамам̣ вуд̇д̇ааяа жод̣̇анааг̇аат̇ааяа ананд̇арам̣ вуд̇д̇ааяа барихаараг̇аат̇ааяа ад̇т̇ам̣ гат̇зд̇угамяад̇аабужчаа. на жимзд̇и на жа имз. на жамзд̇иби баато, соязва бад̣̇ажчзд̣̇о. гат̇ам̣ на жа авид̣̇ид̇аа хонд̇и, гат̇ам̣ на жа жид̇д̇ам̣ вигкзбам̣ г̇ажчад̇ийд̇и звам̣ гат̇ам̣ сад̣̇д̣̇о сзсзхи бан̃жахи яож̇зд̇аб̣б̣о. бад̇хаанан̃жа бан̃н̃ааяад̇ийд̇и аанаабаанассад̇исамаад̇хибхааванаарамбхагам̣ вийрияам̣ санд̣̇иссад̇и. вийрияан̃хи бад̣̇аханд̇и д̇знаад̇и бад̇хаананд̇и вужжад̇и. баяог̇ан̃жа саад̇хзд̇ийд̇и нийваран̣авигкамбхагам̣ жхаанан̃жа яог̇ий нибпаад̣̇зд̇и. жхаанан̃хи нийваран̣авигкамбханааяа баяун̃ж̇ийяад̇ийд̇и баяог̇од̇и вуд̇д̇ам̣. висзсамад̇хиг̇ажчад̇ийд̇и сам̣яож̇анаббахаанагарам̣ маг̇г̇ан̃жа бадилабхад̇и. маг̇г̇о хи самат̇авибассанаанам̣ аанисам̣сад̇д̇аа висзсод̇и вуд̇д̇о. висзсасса жа бамукабхууд̇ад̇д̇аа жа-гаарзна самужжаяо на гад̇о.
159. Evaṃ santepi ānāpānassatisamādhibhāvanāvasena tesaṃ nipphattiṃ dassetukāmo tāni ñāṇāni anigametvāva nimittaṃ assāsapassāsātiādinā nayena codanāpubbaṅgamaṃ ānāpānassatisamādhibhāvanāvidhiṃ dassetvā ante tāni ñāṇāni nigametvā dassesi. Tattha nimittaṃ vuttameva. Anārammaṇāmekacittassāti anārammaṇā ekacittassa. Ma-kāro panettha padasandhikaro. Anārammaṇamekacittassātipi pāṭho, ekassa cittassa ārammaṇaṃ na bhavantīti attho. Tayo dhammeti nimittādayo tayo dhamme. Bhāvanāti ānāpānassatisamādhibhāvanā. Kathanti paṭhamaṃ vuttāya codanāgāthāya anantaraṃ vuttāya parihāragāthāya atthaṃ kathetukamyatāpucchā. Na cimeti na ca ime. Na cametipi pāṭho, soyeva padacchedo. Kathaṃ na ca aviditā honti, kathaṃ na ca cittaṃ vikkhepaṃ gacchatīti evaṃ kathaṃ saddo sesehi pañcahi yojetabbo. Padhānañca paññāyatīti ānāpānassatisamādhibhāvanārambhakaṃ vīriyaṃ sandissati. Vīriyañhi padahanti tenāti padhānanti vuccati. Payogañca sādhetīti nīvaraṇavikkhambhakaṃ jhānañca yogī nipphādeti. Jhānañhi nīvaraṇavikkhambhanāya payuñjīyatīti payogoti vuttaṃ. Visesamadhigacchatīti saṃyojanappahānakaraṃ maggañca paṭilabhati. Maggo hi samathavipassanānaṃ ānisaṃsattā visesoti vutto. Visesassa ca pamukhabhūtattā ca-kārena samuccayo na kato.
ид̣̇аани д̇ам̣ бужчид̇амад̇т̇ам̣ убамааяа саад̇хзнд̇о сзяяат̇ааби ругкод̇иаад̣̇имааха. д̇ассад̇т̇о – яат̇аа наама гагажзна пааланад̇т̇ам̣ ваасияаа д̇ажчид̇ваа ругко пааланагаалз нижжалабхаавад̇т̇ам̣ самз бхуумибад̣̇зсз баяог̇агкамам̣ гад̇ваа табид̇о. гагажзнаад̇и хад̇т̇агагажзна. ааг̇ад̇зд̇и ругкам̣ пусид̇ваа ад̇д̇ано самийбабхааг̇ам̣ ааг̇ад̇з. г̇ад̇зд̇и ругкам̣ пусид̇ваа барабхааг̇ам̣ г̇ад̇з. ваа-сад̣̇д̣̇о самужжаяад̇т̇о. на авид̣̇ид̇аа хонд̇ийд̇и ругкз гагажад̣̇анд̇зхи пудтам̣ бурисзна бзгкамаанам̣ таанам̣ аббад̇ваа д̇зсам̣ ааг̇аманаг̇аманаабхаавад̇о саб̣б̣зби гагажад̣̇анд̇аа вид̣̇ид̇аава хонд̇и. бад̇хаананд̇и ругкажчзд̣̇анавийрияам̣. баяог̇анд̇и ругкажчзд̣̇анагирияам̣. ‘‘висзсамад̇хиг̇ажчад̇ий’’д̇и важанам̣ убамааяа над̇т̇и. убаниб̣анд̇ханаа нимид̇д̇анд̇и убаниб̣анд̇ханааяа сад̇ияаа нимид̇д̇абхууд̇ам̣ гааран̣абхууд̇ам̣ наасигаг̇г̇ам̣ ваа муканимид̇д̇ам̣ ваа. убаниб̣анд̇хад̇и зд̇ааяа аарамман̣з жид̇д̇анд̇и убаниб̣анд̇ханаа наама сад̇и. наасигаг̇г̇з ваад̇и д̣̇ийгханаасиго наасигаг̇г̇з. муканимид̇д̇з ваад̇и рассанаасиго уд̇д̇ародтз. уд̇д̇ародто хи мукз сад̇ияаа нимид̇д̇анд̇и муканимид̇д̇анд̇и вуд̇д̇о. ааг̇ад̇зд̇и пудтадтаанад̇о аб̣бханд̇арам̣ ааг̇ад̇з. г̇ад̇зд̇и пудтадтаанад̇о б̣ахид̣̇д̇хаа г̇ад̇з. на авид̣̇ид̇аа хонд̇ийд̇и пусанадтаанам̣ аббад̇ваа ассаасабассаасаанам̣ ааг̇аманаг̇аманаабхаавад̇о саб̣б̣зби д̇з вид̣̇ид̇аа зва хонд̇и. гамманияам̣ ход̇ийд̇и язна вийриязна гааяоби жид̇д̇амби гамманияам̣ бхааванаагаммагкамам̣ бхааванаагаммаяог̇г̇ам̣ ход̇и. ид̣̇ам̣ вийрияам̣ бад̇хаанам̣ наамаад̇и палзна гааран̣ам̣ вуд̇д̇ам̣ ход̇и. убаггилзсаа бахийяанд̇ийд̇и вигкамбханавасзна нийваран̣аани бахийяанд̇и. вид̇аггаа вуубасамманд̇ийд̇и наанаарамман̣ажаарино анавадтид̇аа вид̇аггаа убасамам̣ г̇ажчанд̇и. язна жхаанзна убаггилзсаа бахийяанд̇и, вид̇аггаа вуубасамманд̇и. аяам̣ баяог̇од̇и баяог̇амабзгкид̇ваа буллин̇г̇анид̣̇д̣̇зсо гад̇о. сан̃н̃ож̇анаа бахийяанд̇ийд̇и д̇ам̣д̇ам̣маг̇г̇аваж̇жхаа сан̃н̃ож̇анаа самужчзд̣̇аббахаанзна бахийяанд̇и. анусаяаа б̣яанд̇ийхонд̇ийд̇и бахийнаанам̣ буна ануббад̇д̇ид̇хаммагад̇д̇аа виг̇ад̇о уббаад̣̇анд̇о ваа ваяанд̇о ваа зд̇зсанд̇и б̣яанд̇аа, буб̣б̣з аб̣яанд̇аа б̣яанд̇аа хонд̇ийд̇и б̣яанд̇ийхонд̇и, винассанд̇ийд̇и ад̇т̇о. сан̃н̃ож̇анаббахаанам̣ анусаяаббахаанзна ход̇и, на ан̃н̃ат̇аад̇и д̣̇ассанад̇т̇ам̣ анусаяаббахаанамааха. язна маг̇г̇зна сан̃н̃ож̇анаа бахийяанд̇и анусаяаа б̣яанд̇ийхонд̇и, аяам̣ висзсод̇и ад̇т̇о. жад̇уд̇т̇ажад̇уггз арияамаг̇г̇ассааби нид̣̇д̣̇идтад̇д̇аа ид̇ха арияамаг̇г̇о вуд̇д̇о. згажид̇д̇асса аарамман̣ад̣̇ваяаабхаавасса авуд̇д̇зби сид̣̇д̇хад̇д̇аа д̇ам̣ ависсаж̇ж̇зд̇ваава звам̣ имз д̇аяо д̇хаммаа згажид̇д̇асса аарамман̣аа на хонд̇ийд̇и ниг̇аманам̣ гад̇ам̣.
Idāni taṃ pucchitamatthaṃ upamāya sādhento seyyathāpi rukkhotiādimāha. Tassattho – yathā nāma kakacena phālanatthaṃ vāsiyā tacchitvā rukkho phālanakāle niccalabhāvatthaṃ same bhūmipadese payogakkhamaṃ katvā ṭhapito. Kakacenāti hatthakakacena. Āgateti rukkhaṃ phusitvā attano samīpabhāgaṃ āgate. Gateti rukkhaṃ phusitvā parabhāgaṃ gate. Vā-saddo samuccayattho. Na aviditā hontīti rukkhe kakacadantehi phuṭṭhaṃ purisena pekkhamānaṃ ṭhānaṃ appatvā tesaṃ āgamanagamanābhāvato sabbepi kakacadantā viditāva honti. Padhānanti rukkhacchedanavīriyaṃ. Payoganti rukkhacchedanakiriyaṃ. ‘‘Visesamadhigacchatī’’ti vacanaṃ upamāya natthi. Upanibandhanā nimittanti upanibandhanāya satiyā nimittabhūtaṃ kāraṇabhūtaṃ nāsikaggaṃ vā mukhanimittaṃ vā. Upanibandhati etāya ārammaṇe cittanti upanibandhanā nāma sati. Nāsikagge vāti dīghanāsiko nāsikagge. Mukhanimitte vāti rassanāsiko uttaroṭṭhe. Uttaroṭṭho hi mukhe satiyā nimittanti mukhanimittanti vutto. Āgateti phuṭṭhaṭṭhānato abbhantaraṃ āgate. Gateti phuṭṭhaṭṭhānato bahiddhā gate. Na aviditā hontīti phusanaṭṭhānaṃ appatvā assāsapassāsānaṃ āgamanagamanābhāvato sabbepi te viditā eva honti. Kammaniyaṃ hotīti yena vīriyena kāyopi cittampi kammaniyaṃ bhāvanākammakkhamaṃ bhāvanākammayoggaṃ hoti. Idaṃ vīriyaṃ padhānaṃ nāmāti phalena kāraṇaṃ vuttaṃ hoti. Upakkilesā pahīyantīti vikkhambhanavasena nīvaraṇāni pahīyanti. Vitakkā vūpasammantīti nānārammaṇacārino anavaṭṭhitā vitakkā upasamaṃ gacchanti. Yena jhānena upakkilesā pahīyanti, vitakkā vūpasammanti. Ayaṃ payogoti payogamapekkhitvā pulliṅganiddeso kato. Saññojanā pahīyantīti taṃtaṃmaggavajjhā saññojanā samucchedappahānena pahīyanti. Anusayā byantīhontīti pahīnānaṃ puna anuppattidhammakattā vigato uppādanto vā vayanto vā etesanti byantā, pubbe abyantā byantā hontīti byantīhonti, vinassantīti attho. Saññojanappahānaṃ anusayappahānena hoti, na aññathāti dassanatthaṃ anusayappahānamāha. Yena maggena saññojanā pahīyanti anusayā byantīhonti, ayaṃ visesoti attho. Catutthacatukke ariyamaggassāpi niddiṭṭhattā idha ariyamaggo vutto. Ekacittassa ārammaṇadvayābhāvassa avuttepi siddhattā taṃ avissajjetvāva evaṃ ime tayo dhammā ekacittassa ārammaṇā na hontīti nigamanaṃ kataṃ.
160. ид̣̇аани д̇ам̣ бхааванаасид̣̇д̇хисаад̇хагам̣ яог̇ааважарам̣ т̇унанд̇о аанаабаанассад̇и яассаад̇и г̇аат̇ам̣ вад̇ваа д̇ассаа нид̣̇д̣̇зсамааха. д̇ад̇т̇а аанаабаанассад̇ияо яат̇аа б̣уд̣̇д̇хзна д̣̇зсид̇аа, д̇ат̇аа барибун̣н̣аа субхаавид̇аа анубуб̣б̣ам̣ барижид̇аа яасса ад̇т̇и сам̣виж̇ж̇анд̇и. со имам̣ логам̣ бабхаасзд̇и. гим̣ вияа? аб̣бхаа муд̇д̇ова жанд̣̇имаа яат̇аа аб̣бхаад̣̇ийхи муд̇д̇о жанд̣̇имаа имам̣ огаасалогам̣ бабхаасзд̇и, д̇ат̇аа со яог̇ааважаро имам̣ канд̇хаад̣̇илогам̣ бабхаасзд̇ийд̇и г̇аат̇ааяа самб̣анд̇хо. ‘‘аб̣бхаа муд̇д̇ова жанд̣̇имаа’’д̇и жа бад̣̇асса нид̣̇д̣̇зсз махигаад̣̇ийнамби вуд̇д̇ад̇д̇аа зд̇т̇а аад̣̇исад̣̇д̣̇алобо гад̇од̇и взд̣̇ид̇аб̣б̣о. г̇аат̇аанид̣̇д̣̇зсз но бассаасо но ассаасод̇и со соязва ад̇т̇о бадисзд̇хзна висзсзд̇ваа вуд̇д̇о. убадтаанам̣ сад̇ийд̇и асаммуссанад̇ааяа д̇амзва ассаасам̣ убаг̇анд̇ваа таанам̣ сад̇и наамаад̇и ад̇т̇о. д̇ат̇аа бассаасам̣. зд̇д̇аавад̇аа аанаабаанзсу сад̇и аанаабаанассад̇ийд̇и ад̇т̇о вуд̇д̇о ход̇и.
160. Idāni taṃ bhāvanāsiddhisādhakaṃ yogāvacaraṃ thunanto ānāpānassati yassāti gāthaṃ vatvā tassā niddesamāha. Tattha ānāpānassatiyo yathā buddhena desitā, tathā paripuṇṇā subhāvitā anupubbaṃ paricitā yassa atthi saṃvijjanti. So imaṃ lokaṃ pabhāseti. Kiṃ viya? Abbhā muttova candimā yathā abbhādīhi mutto candimā imaṃ okāsalokaṃ pabhāseti, tathā so yogāvacaro imaṃ khandhādilokaṃ pabhāsetīti gāthāya sambandho. ‘‘Abbhā muttova candimā’’ti ca padassa niddese mahikādīnampi vuttattā ettha ādisaddalopo katoti veditabbo. Gāthāniddese no passāso no assāsoti so soyeva attho paṭisedhena visesetvā vutto. Upaṭṭhānaṃ satīti asammussanatāya tameva assāsaṃ upagantvā ṭhānaṃ sati nāmāti attho. Tathā passāsaṃ. Ettāvatā ānāpānesu sati ānāpānassatīti attho vutto hoti.
ид̣̇аани сад̇ивасзнзва ‘‘яассаа’’д̇и вуд̇д̇ам̣ буг̇г̇алам̣ нид̣̇д̣̇исид̇угаамо яо ассасад̇и, д̇ассубадтаад̇и. яо бассасад̇и, д̇ассубадтаад̇ийд̇и вуд̇д̇ам̣. яо ассасад̇и, д̇асса сад̇и ассаасам̣ убаг̇анд̇ваа д̇идтад̇и. яо бассасад̇и, д̇асса сад̇и бассаасам̣ убаг̇анд̇ваа д̇идтад̇ийд̇и ад̇т̇о. барибун̣н̣аад̇и жхаанавибассанаамаг̇г̇абарамбарааяа арахад̇д̇амаг̇г̇аббад̇д̇ияаа барибун̣н̣аа. д̇зязва хи жхаанавибассанаамаг̇г̇ад̇хаммз санд̇хааяа бариг̇г̇ахадтзнаад̇иаад̣̇имааха. д̇з хи д̇хаммаа иминаа яог̇инаа бариг̇г̇аяхамаанад̇д̇аа бариг̇г̇ахаа, д̇зна бариг̇г̇ахадтзна барибун̣н̣аа. д̇ад̇т̇а саб̣б̣зсам̣ жид̇д̇ажзд̇асигаанам̣ ан̃н̃аман̃н̃абариваарад̇д̇аа бариваарадтзна барибун̣н̣аа. бхааванаабаарибууривасзна барибуурадтзна барибун̣н̣аа. жад̇ассо бхааванаад̇иаад̣̇ийни субхаавид̇аад̇и вуд̇д̇абад̣̇асса ад̇т̇авасзна вуд̇д̇аани. жад̇ассо бхааванаа хздтаа вуд̇д̇ааязва. яаанийгад̇аад̇и яуд̇д̇аяаанасад̣̇исаа гад̇аа. вад̇т̇угад̇аад̇и бад̇идтадтзна вад̇т̇усад̣̇исаа гад̇аа. анудтид̇аад̇и бажжубадтид̇аа. барижид̇аад̇и саманд̇ад̇о жид̇аа убажид̇аа. сусамаарад̣̇д̇хаад̇и судту самаарад̣̇д̇хаа сугад̇аа. яад̇т̇а яад̇т̇а ааган̇кад̇ийд̇и язсу язсу жхаанзсу яаасу яаасу вибассанаасу сажз ижчад̇и. д̇ад̇т̇а д̇ад̇т̇аад̇и д̇зсу д̇зсу жхаанзсу д̇аасу д̇аасу вибассанаасу. васиббад̇д̇од̇и васийбхаавам̣ б̣ахубхаавам̣ бад̇д̇о. б̣алаббад̇д̇од̇и самат̇авибассанааб̣алаббад̇д̇о. взсаараж̇ж̇аббад̇д̇од̇и висаарад̣̇абхаавам̣ бадубхаавам̣ бад̇д̇о. д̇з д̇хаммаад̇и самат̇авибассанаа д̇хаммаа. ааваж̇ж̇анабадиб̣ад̣̇д̇хаад̇и ааваж̇ж̇анааяад̇д̇аа, ааваж̇ж̇ид̇амад̇д̇зязва д̇асса санд̇аанзна, н̃аан̣зна ваа самбаяог̇ам̣ г̇ажчанд̇ийд̇и ад̇т̇о. ааган̇кабадиб̣ад̣̇д̇хаад̇и ружиааяад̇д̇аа, рожид̇амад̇д̇зязва вуд̇д̇анаязна самбаяог̇ам̣ г̇ажчанд̇ийд̇и ад̇т̇о. манасигааро банзд̇т̇а ааваж̇ж̇анааяа жид̇д̇уббаад̣̇о. ааган̇канааяа взважанавасзна ад̇т̇авиваран̣ад̇т̇ам̣ вуд̇д̇о. д̇зна вужжад̇и яаанийгад̇аад̇и звам̣ гад̇ад̇д̇ааязва д̇з яуд̇д̇аяаанасад̣̇исаа гад̇аа хонд̇ийд̇и вуд̇д̇ам̣ ход̇и.
Idāni sativaseneva ‘‘yassā’’ti vuttaṃ puggalaṃ niddisitukāmo yo assasati, tassupaṭṭhāti. Yo passasati, tassupaṭṭhātīti vuttaṃ. Yo assasati, tassa sati assāsaṃ upagantvā tiṭṭhati. Yo passasati, tassa sati passāsaṃ upagantvā tiṭṭhatīti attho. Paripuṇṇāti jhānavipassanāmaggaparamparāya arahattamaggappattiyā paripuṇṇā. Teyeva hi jhānavipassanāmaggadhamme sandhāya pariggahaṭṭhenātiādimāha. Te hi dhammā iminā yoginā pariggayhamānattā pariggahā, tena pariggahaṭṭhena paripuṇṇā. Tattha sabbesaṃ cittacetasikānaṃ aññamaññaparivārattā parivāraṭṭhena paripuṇṇā. Bhāvanāpāripūrivasena paripūraṭṭhena paripuṇṇā. Catasso bhāvanātiādīni subhāvitāti vuttapadassa atthavasena vuttāni. Catasso bhāvanā heṭṭhā vuttāyeva. Yānīkatāti yuttayānasadisā katā. Vatthukatāti patiṭṭhaṭṭhena vatthusadisā katā. Anuṭṭhitāti paccupaṭṭhitā. Paricitāti samantato citā upacitā. Susamāraddhāti suṭṭhu samāraddhā sukatā. Yattha yattha ākaṅkhatīti yesu yesu jhānesu yāsu yāsu vipassanāsu sace icchati. Tattha tatthāti tesu tesu jhānesu tāsu tāsu vipassanāsu. Vasippattoti vasībhāvaṃ bahubhāvaṃ patto. Balappattoti samathavipassanābalappatto. Vesārajjappattoti visāradabhāvaṃ paṭubhāvaṃ patto. Te dhammāti samathavipassanā dhammā. Āvajjanapaṭibaddhāti āvajjanāyattā, āvajjitamatteyeva tassa santānena, ñāṇena vā sampayogaṃ gacchantīti attho. Ākaṅkhapaṭibaddhāti ruciāyattā, rocitamatteyeva vuttanayena sampayogaṃ gacchantīti attho. Manasikāro panettha āvajjanāya cittuppādo. Ākaṅkhanāya vevacanavasena atthavivaraṇatthaṃ vutto. Tena vuccati yānīkatāti evaṃ katattāyeva te yuttayānasadisā katā hontīti vuttaṃ hoti.
яасмим̣ яасмим̣ вад̇т̇усминд̇и сол̣асасу вад̇т̇уусу згзгасмим̣. сваад̇хидтид̇анд̇и суббад̇идтид̇ам̣. суубадтид̇аад̇и судту убадтид̇аа. самбаяуд̇д̇ажид̇д̇асад̇ийнам̣ сахзва сагасагагижжагаран̣ад̇о ануломабадиломавасзна яож̇зд̇ваа д̇з д̣̇вз д̇хаммаа д̣̇ассид̇аа. д̇зна вужжад̇и вад̇т̇угад̇аад̇и звам̣ бхууд̇ад̇д̇ааязва гад̇абад̇идтаа хонд̇ийд̇и вуд̇д̇ам̣ ход̇и. язна язна жид̇д̇ам̣ абхинийхарад̇ийд̇и буб̣б̣аббавад̇д̇ид̇о абанзд̇ваа яад̇т̇а яад̇т̇а бхааванаависзсз жид̇д̇ам̣ убанзд̇и. д̇зна д̇зна сад̇и анубаривад̇д̇ад̇ийд̇и д̇асмим̣ д̇асмим̣язва бхааванаависзсз сад̇и анугуулаа худ̇ваа буб̣б̣аббавад̇д̇ид̇о нивад̇д̇ид̇ваа бавад̇д̇ад̇и. ‘‘язна, д̇знаа’’д̇и жзд̇т̇а ‘‘язна бхаг̇аваа д̇знубасан̇гамий’’д̇иаад̣̇ийсу (ку. баа. 5.1; су. ни. ман̇г̇аласуд̇д̇а) вияа бхуммад̇т̇о взд̣̇ид̇аб̣б̣о. д̇зна вужжад̇и анудтид̇аад̇и звам̣ гаран̣ад̇оязва д̇ам̣ д̇ам̣ бхааванам̣ ануг̇анд̇ваа тид̇аа хонд̇ийд̇и вуд̇д̇ам̣ ход̇и. аанаабаанассад̇ияаа сад̇ибад̇хаанад̇д̇аа вад̇т̇угад̇аанудтид̇абад̣̇зсу сад̇ияаа саха яож̇анаа гад̇аад̇и взд̣̇ид̇аб̣б̣аа.
Yasmiṃ yasmiṃ vatthusminti soḷasasu vatthūsu ekekasmiṃ. Svādhiṭṭhitanti suppatiṭṭhitaṃ. Sūpaṭṭhitāti suṭṭhu upaṭṭhitā. Sampayuttacittasatīnaṃ saheva sakasakakiccakaraṇato anulomapaṭilomavasena yojetvā te dve dhammā dassitā. Tena vuccati vatthukatāti evaṃ bhūtattāyeva katapatiṭṭhā hontīti vuttaṃ hoti. Yena yena cittaṃ abhinīharatīti pubbappavattito apanetvā yattha yattha bhāvanāvisese cittaṃ upaneti. Tena tena sati anuparivattatīti tasmiṃ tasmiṃyeva bhāvanāvisese sati anukūlā hutvā pubbappavattito nivattitvā pavattati. ‘‘Yena, tenā’’ti cettha ‘‘yena bhagavā tenupasaṅkamī’’tiādīsu (khu. pā. 5.1; su. ni. maṅgalasutta) viya bhummattho veditabbo. Tena vuccati anuṭṭhitāti evaṃ karaṇatoyeva taṃ taṃ bhāvanaṃ anugantvā ṭhitā hontīti vuttaṃ hoti. Ānāpānassatiyā satipadhānattā vatthukatānuṭṭhitapadesu satiyā saha yojanā katāti veditabbā.
яасмаа бана барибун̣н̣ааязва барижид̇аа хонд̇и вад̣дхид̇аа лад̣̇д̇хаасзванаа, д̇асмаа ‘‘барибун̣н̣аа’’д̇ибад̣̇з вуд̇д̇аа д̇аяо ад̇т̇аа ‘‘барижид̇аа’’д̇ибад̣̇зби вуд̇д̇аа, жад̇уд̇т̇о висзсад̇т̇оби вуд̇д̇о. д̇ад̇т̇а сад̇ияаа бариг̇г̇ан̣ханд̇од̇и самбаяуд̇д̇ааяа, буб̣б̣абхааг̇ааяа ваа сад̇ияаа бариг̇г̇ахзд̇аб̣б̣з бариг̇г̇ан̣ханд̇о яог̇ий. ж̇инаад̇и баабагз агусалз д̇хаммзд̇и самужчзд̣̇авасзна лаамагз гилзсз ж̇инаад̇и абхибхавад̇и. аяан̃жа буг̇г̇алаад̇хидтаанаа д̇хаммад̣̇зсанаа. д̇хаммзсу хи ж̇инанд̇зсу д̇ам̣д̇хаммасаман̇г̇ийбуг̇г̇алоби ж̇инаад̇и наама. д̇з жа д̇хаммаа сад̇им̣ авихааяа ад̇д̇ано бавад̇д̇игкан̣з ж̇инид̇умаарад̣̇д̇хаа ж̇ид̇аад̇и вужжанд̇и яат̇аа ‘‘бхун̃ж̇ид̇умаарад̣̇д̇хо бхуд̇д̇о’’д̇и вужжад̇и. лагкан̣ам̣ банзд̇т̇а сад̣̇д̣̇асад̇т̇ад̇о взд̣̇ид̇аб̣б̣ам̣. звам̣ санд̇зби ‘‘бариж̇ид̇аа’’д̇и вад̇д̇аб̣б̣з ж̇а-гаарасса жа-гаарам̣ гад̇ваа ‘‘барижид̇аа’’д̇и вуд̇д̇ам̣, яат̇аа саммаа г̇ад̣̇о ассаад̇и суг̇ад̇од̇и ад̇т̇авигаббз д̣̇а-гаарасса д̇а-гааро нируд̇д̇илагкан̣зна гад̇о, звамид̇хааби взд̣̇ид̇аб̣б̣о. имасмим̣ ад̇т̇авигаббз барижид̇аад̇и бад̣̇ам̣ гад̇д̇усаад̇ханам̣, буримаани д̇ийн̣и гаммасаад̇ханаани.
Yasmā pana paripuṇṇāyeva paricitā honti vaḍḍhitā laddhāsevanā, tasmā ‘‘paripuṇṇā’’tipade vuttā tayo atthā ‘‘paricitā’’tipadepi vuttā, catuttho visesatthopi vutto. Tattha satiyā pariggaṇhantoti sampayuttāya, pubbabhāgāya vā satiyā pariggahetabbe pariggaṇhanto yogī. Jināti pāpake akusale dhammeti samucchedavasena lāmake kilese jināti abhibhavati. Ayañca puggalādhiṭṭhānā dhammadesanā. Dhammesu hi jinantesu taṃdhammasamaṅgīpuggalopi jināti nāma. Te ca dhammā satiṃ avihāya attano pavattikkhaṇe jinitumāraddhā jitāti vuccanti yathā ‘‘bhuñjitumāraddho bhutto’’ti vuccati. Lakkhaṇaṃ panettha saddasatthato veditabbaṃ. Evaṃ santepi ‘‘parijitā’’ti vattabbe ja-kārassa ca-kāraṃ katvā ‘‘paricitā’’ti vuttaṃ, yathā sammā gado assāti sugatoti atthavikappe da-kārassa ta-kāro niruttilakkhaṇena kato, evamidhāpi veditabbo. Imasmiṃ atthavikappe paricitāti padaṃ kattusādhanaṃ, purimāni tīṇi kammasādhanāni.
жад̇д̇ааро сусамаарад̣̇д̇хаад̇и жад̇д̇ааро сусамаарад̣̇д̇хад̇т̇аад̇и вуд̇д̇ам̣ ход̇и, ад̇т̇асад̣̇д̣̇асса лобо д̣̇адтаб̣б̣о. сусамаарад̣̇д̇хаад̇и бад̣̇асса ад̇т̇ааби хи ид̇ха сусамаарад̣̇д̇хаад̇и вуд̇д̇аад̇и взд̣̇ид̇аб̣б̣аа, сусамаарад̣̇д̇хад̇хаммаа ваа. жад̇урад̇т̇абхзд̣̇ад̇о жад̇д̇аарод̇и вуд̇д̇аад̇и взд̣̇ид̇аб̣б̣аа, на д̇хаммабхзд̣̇ад̇о. яасмаа бана субхаавид̇ааязва сусамаарад̣̇д̇хаа хонд̇и, на ан̃н̃з, д̇асмаа д̇аяо бхааванад̇т̇аа ид̇хааби вуд̇д̇аа. аасзванад̇т̇оби д̇ийсу вуд̇д̇зсу вуд̇д̇оязва ход̇и, д̇асмаа д̇ам̣ авад̇ваа д̇аббажжанийгаанам̣ сусамуухад̇ад̇т̇о вуд̇д̇о. бажжанийгасамуг̇гхаад̇зна хи аарад̣̇д̇хабарияосаанам̣ бан̃н̃ааяад̇и, д̇зна сусамаарад̣̇д̇хасса сикааббад̇д̇о ад̇т̇о вуд̇д̇о ход̇и. д̇ад̇т̇а д̇аббажжанийгаананд̇и д̇зсам̣ жхаанавибассанаамаг̇г̇аанам̣ бадибагкабхууд̇аанам̣. гилзсаананд̇и гаамажчанд̣̇аад̣̇ийнам̣ нижжасан̃н̃аад̣̇исамбаяуд̇д̇аанам̣ саггааяад̣̇идтаад̣̇ийнан̃жа. сусамуухад̇ад̇д̇аад̇и вигкамбханад̇ад̣̇ан̇г̇асамужчзд̣̇авасзна судту самуухад̇ад̇д̇аа наасид̇ад̇д̇аа. бод̇т̇агзсу бана ‘‘сусамуг̇гхаад̇ад̇д̇аа’’д̇и ликанд̇и, д̇ам̣ на сунд̣̇арам̣.
Cattāro susamāraddhāti cattāro susamāraddhatthāti vuttaṃ hoti, atthasaddassa lopo daṭṭhabbo. Susamāraddhāti padassa atthāpi hi idha susamāraddhāti vuttāti veditabbā, susamāraddhadhammā vā. Caturatthabhedato cattāroti vuttāti veditabbā, na dhammabhedato. Yasmā pana subhāvitāyeva susamāraddhā honti, na aññe, tasmā tayo bhāvanatthā idhāpi vuttā. Āsevanatthopi tīsu vuttesu vuttoyeva hoti, tasmā taṃ avatvā tappaccanīkānaṃ susamūhatattho vutto. Paccanīkasamugghātena hi āraddhapariyosānaṃ paññāyati, tena susamāraddhassa sikhāppatto attho vutto hoti. Tattha tappaccanīkānanti tesaṃ jhānavipassanāmaggānaṃ paṭipakkhabhūtānaṃ. Kilesānanti kāmacchandādīnaṃ niccasaññādisampayuttānaṃ sakkāyadiṭṭhādīnañca. Susamūhatattāti vikkhambhanatadaṅgasamucchedavasena suṭṭhu samūhatattā nāsitattā. Potthakesu pana ‘‘susamugghātattā’’ti likhanti, taṃ na sundaraṃ.
161. буна д̇ассзва бад̣̇асса ан̃н̃амби ад̇т̇авигаббам̣ д̣̇ассзнд̇о сусаманд̇иаад̣̇имааха. д̇ад̇т̇а д̇ад̇т̇а ж̇аад̇аад̇и д̇асмим̣ сикааббад̇д̇абхааванаависзсз ж̇аад̇аа. анаваж̇ж̇аад̇и гилзсаанам̣ аарамман̣абхааваанубаг̇аманзна гилзсад̣̇осавирахид̇аа. гусалаад̇и ж̇аад̇ивасзна гусалаа. б̣од̇хибагкияаад̇и б̣уж̇жханадтзна б̣од̇хийд̇и лад̣̇д̇ханаамасса арияасса багкз бхавад̇д̇аа б̣од̇хибагкияаа. багкз бхавад̇д̇аад̇и хи убагаарабхаавз тид̇ад̇д̇аа. д̇з жа ‘‘жад̇д̇ааро сад̇ибадтаанаа, жад̇д̇ааро саммаббад̇хаанаа, жад̇д̇ааро ид̣̇д̇хибаад̣̇аа, бан̃жинд̣̇рияаани, бан̃жа б̣алаани, сад̇д̇а б̣ож̇жхан̇г̇аа, арияо адтан̇г̇иго маг̇г̇о’’д̇и (ма. ни. 3.35; жуул̣ани. мзд̇д̇аг̇уумаан̣авабужчаанид̣̇д̣̇зса 22; ми. ба. 5.4.1) сад̇д̇ад̇им̣са д̇хаммаа. ид̣̇ам̣ саманд̇и ид̣̇ам̣ маг̇г̇агкан̣з д̇хаммаж̇аад̇ам̣ самужчзд̣̇авасзна гилзсз самзд̇и винаасзд̇ийд̇и самам̣ наама. нирод̇хо ниб̣б̣аананд̇и д̣̇угканирод̇хад̇д̇аа нирод̇хо, ваанасан̇каад̇ааяа д̇ан̣хааяа абхааваа ниб̣б̣аанам̣. ид̣̇ам̣ сусаманд̇и ид̣̇ам̣ ниб̣б̣аанам̣ саб̣б̣асан̇кад̇ависамаабаг̇ад̇ад̇д̇аа судту саманд̇и сусамам̣ наама. н̃аад̇анд̇и б̣од̇хибагкияасан̇каад̇ам̣ самам̣ асаммохад̇о н̃аан̣зна н̃аад̇ам̣, ниб̣б̣аанасан̇каад̇ам̣ сусамам̣ аарамман̣ад̇о н̃аан̣зна н̃аад̇ам̣. д̇ад̣̇зва д̣̇ваяам̣ д̇знзва жагкунаа вияа д̣̇идтам̣. вид̣̇ид̇анд̇и д̇ад̣̇зва д̣̇ваяам̣ санд̇аанз уббаад̣̇анзна аарамман̣агаран̣зна жа бадилад̣̇д̇хам̣. н̃аад̇ам̣ вияа бан̃н̃ааяа сажчигад̇ам̣ пассид̇ан̃жа. ‘‘асаллийнам̣ асаммудтаа асаарад̣̇д̇хо згаг̇г̇а’’нд̇и буримасса буримасса бад̣̇асса ад̇т̇аббагаасанам̣. д̇ад̇т̇а аарад̣̇д̇ханд̇и бадтабид̇ам̣. асаллийнанд̇и асан̇гужид̇ам̣. убадтид̇аад̇и убаг̇анд̇ваа тид̇аа. асаммудтаад̇и авинадтаа. бассад̣̇д̇ход̇и ниб̣б̣уд̇о. асаарад̣̇д̇ход̇и нид̣̇д̣̇арат̇о. самаахид̇анд̇и самам̣ табид̇ам̣. згаг̇г̇анд̇и авигкид̇д̇ам̣.
161. Puna tasseva padassa aññampi atthavikappaṃ dassento susamantiādimāha. Tattha tattha jātāti tasmiṃ sikhāppattabhāvanāvisese jātā. Anavajjāti kilesānaṃ ārammaṇabhāvānupagamanena kilesadosavirahitā. Kusalāti jātivasena kusalā. Bodhipakkhiyāti bujjhanaṭṭhena bodhīti laddhanāmassa ariyassa pakkhe bhavattā bodhipakkhiyā. Pakkhe bhavattāti hi upakārabhāve ṭhitattā. Te ca ‘‘cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo’’ti (ma. ni. 3.35; cūḷani. mettagūmāṇavapucchāniddesa 22; mi. pa. 5.4.1) sattatiṃsa dhammā. Idaṃ samanti idaṃ maggakkhaṇe dhammajātaṃ samucchedavasena kilese sameti vināsetīti samaṃ nāma. Nirodhonibbānanti dukkhanirodhattā nirodho, vānasaṅkhātāya taṇhāya abhāvā nibbānaṃ. Idaṃ susamanti idaṃ nibbānaṃ sabbasaṅkhatavisamāpagatattā suṭṭhu samanti susamaṃ nāma. Ñātanti bodhipakkhiyasaṅkhātaṃ samaṃ asammohato ñāṇena ñātaṃ, nibbānasaṅkhātaṃ susamaṃ ārammaṇato ñāṇena ñātaṃ. Tadeva dvayaṃ teneva cakkhunā viya diṭṭhaṃ. Viditanti tadeva dvayaṃ santāne uppādanena ārammaṇakaraṇena ca paṭiladdhaṃ. Ñātaṃ viya paññāya sacchikataṃ phassitañca. ‘‘Asallīnaṃ asammuṭṭhā asāraddho ekagga’’nti purimassa purimassa padassa atthappakāsanaṃ. Tattha āraddhanti paṭṭhapitaṃ. Asallīnanti asaṅkucitaṃ. Upaṭṭhitāti upagantvā ṭhitā. Asammuṭṭhāti avinaṭṭhā. Passaddhoti nibbuto. Asāraddhoti niddaratho. Samāhitanti samaṃ ṭhapitaṃ. Ekagganti avikkhittaṃ.
‘‘жад̇д̇ааро сусамаарад̣̇д̇хаа’’д̇иаад̣̇и сагаласса сусамаарад̣̇д̇хаважанасса муулад̇т̇о. ‘‘ад̇т̇и сама’’нд̇иаад̣̇и бана сусамаважанасса, ‘‘н̃аад̇а’’нд̇иаад̣̇и аарад̣̇д̇хаважанасса вигаббад̇т̇аа. д̇ад̇т̇ааяам̣ бад̣̇ад̇т̇асам̣санд̣̇анаа – ‘‘самаа жа сусамаа жа самасусамаа’’д̇и вад̇д̇аб̣б̣з згад̣̇зсасаруубзгасзсам̣ гад̇ваа ‘‘сусамаа’’ ижжзва вуд̇д̇аа яат̇аа нааман̃жа руубан̃жа наамаруубан̃жа наамаруубанд̇и. ‘‘ид̣̇ам̣ самам̣, ид̣̇ам̣ сусама’’нд̇и бана анан̃н̃аабзгкам̣ гад̇ваа набум̣сагаважанам̣ гад̇ам̣. яасмаа бана н̃аад̇амби д̣̇идтанд̇и вужжад̇и, д̣̇идтан̃жа аарад̣̇д̇хан̃жа ад̇т̇ад̇о згам̣. вид̣̇ид̇асажчигад̇апассид̇аани бана н̃аад̇авзважанаани, д̇асмаа н̃аад̇анд̇и аарад̣̇д̇хад̇т̇оязва вуд̇д̇о ход̇и.
‘‘Cattāro susamāraddhā’’tiādi sakalassa susamāraddhavacanassa mūlattho. ‘‘Atthi sama’’ntiādi pana susamavacanassa, ‘‘ñāta’’ntiādi āraddhavacanassa vikappatthā. Tatthāyaṃ padatthasaṃsandanā – ‘‘samā ca susamā ca samasusamā’’ti vattabbe ekadesasarūpekasesaṃ katvā ‘‘susamā’’ icceva vuttā yathā nāmañca rūpañca nāmarūpañca nāmarūpanti. ‘‘Idaṃ samaṃ, idaṃ susama’’nti pana anaññāpekkhaṃ katvā napuṃsakavacanaṃ kataṃ. Yasmā pana ñātampi diṭṭhanti vuccati, diṭṭhañca āraddhañca atthato ekaṃ. Viditasacchikataphassitāni pana ñātavevacanāni, tasmā ñātanti āraddhatthoyeva vutto hoti.
аарад̣̇д̇хам̣ ход̇и вийрияам̣ асаллийнанд̇и аяам̣ бана аарад̣̇д̇хаважанасса уж̇угад̇т̇оязва. убадтид̇аа сад̇ийд̇иаад̣̇ийни бана самбаяуд̇д̇авийрияасса убагаарагад̇хаммад̣̇ассанад̇т̇ам̣ вуд̇д̇аани, на аарад̣̇д̇хаважанасса ад̇т̇ад̣̇ассанад̇т̇ам̣. буримзна ад̇т̇зна судту самаарад̣̇д̇хаад̇и сусамаарад̣̇д̇хаа жа, иминаа ад̇т̇зна сусамаа аарад̣̇д̇хаад̇и сусамаарад̣̇д̇хаа жа згасзсз гад̇з ‘‘сусамаарад̣̇д̇хаа’’д̇и вужжанд̇и. имамад̇т̇ам̣ бариг̇г̇ахзд̇ваа ‘‘д̇зна вужжад̇и сусамаарад̣̇д̇хаа’’д̇и вуд̇д̇ам̣.
Āraddhaṃ hoti vīriyaṃ asallīnanti ayaṃ pana āraddhavacanassa ujukatthoyeva. Upaṭṭhitā satītiādīni pana sampayuttavīriyassa upakārakadhammadassanatthaṃ vuttāni, na āraddhavacanassa atthadassanatthaṃ. Purimena atthena suṭṭhu samāraddhāti susamāraddhā ca, iminā atthena susamā āraddhāti susamāraddhā ca ekasese kate ‘‘susamāraddhā’’ti vuccanti. Imamatthaṃ pariggahetvā ‘‘tena vuccati susamāraddhā’’ti vuttaṃ.
анубуб̣б̣анд̇и яат̇аануггамзнаад̇и ад̇т̇о, буб̣б̣ам̣ буб̣б̣ам̣ анууд̇и вуд̇д̇ам̣ ход̇и. д̣̇ийгхам̣ ассаасавасзнаад̇и д̣̇ийгханд̇и вуд̇д̇аассаасавасзна. буримаа буримаад̇и буримаа буримаа сад̇и. зд̇зна буб̣б̣анд̇ибад̣̇асса ад̇т̇о вуд̇д̇о ход̇и. бажчимаа бажчимаад̇и сад̇иязва. зд̇зна анууд̇ибад̣̇асса ад̇т̇о вуд̇д̇о ход̇и. убхаязна буб̣б̣ан̃жа ану жа барижид̇аад̇и ад̇т̇о вуд̇д̇о ход̇и. убари сол̣аса вад̇т̇ууни вид̇т̇аарзд̇ваа важанад̇о ид̇ха сан̇кибид̇ваа ‘‘бадиниссаг̇г̇аанубассий’’д̇и анд̇имамзва д̣̇ассид̇ам̣. яасмаа сикааббад̇д̇абхааванасса саб̣б̣ааби аанаабаанассад̇ияо бунаббунам̣ яат̇ааружи бавад̇д̇анад̇о анубарижид̇ааби хонд̇и. д̇зна вуд̇д̇ам̣ – ‘‘ан̃н̃аман̃н̃ам̣ барижид̇аа жзва хонд̇и анубарижид̇аа жаа’’д̇и.
Anupubbanti yathānukkamenāti attho, pubbaṃ pubbaṃ anūti vuttaṃ hoti. Dīghaṃ assāsavasenāti dīghanti vuttaassāsavasena. Purimā purimāti purimā purimā sati. Etena pubbantipadassa attho vutto hoti. Pacchimā pacchimāti satiyeva. Etena anūtipadassa attho vutto hoti. Ubhayena pubbañca anu ca paricitāti attho vutto hoti. Upari soḷasa vatthūni vitthāretvā vacanato idha saṅkhipitvā ‘‘paṭinissaggānupassī’’ti antimameva dassitaṃ. Yasmā sikhāppattabhāvanassa sabbāpi ānāpānassatiyo punappunaṃ yathāruci pavattanato anuparicitāpi honti. Tena vuttaṃ – ‘‘aññamaññaṃ paricitā ceva honti anuparicitā cā’’ti.
яат̇ад̇т̇аад̇и яат̇аасабхаавад̇т̇аа. ад̇д̇ад̣̇амат̇ад̇т̇од̇и арахад̇д̇амаг̇г̇агкан̣з ад̇д̇ано ниб̣б̣исзванад̇т̇о. самат̇ад̇т̇од̇и сийд̇ибхаавад̇т̇о. бариниб̣б̣аабанад̇т̇од̇и гилзсабариниб̣б̣аанзна. абхин̃н̃ад̇т̇од̇и саб̣б̣ад̇хаммавасзна. барин̃н̃ад̇т̇аад̣̇аяо маг̇г̇ан̃аан̣агижжавасзна. сажжаабхисамаяад̇т̇о жад̇уннам̣ сажжаанам̣ згабадивзд̇хад̣̇ассанавасзна. нирод̇хз бад̇идтаабагад̇т̇о аарамман̣агаран̣авасзна.
Yathatthāti yathāsabhāvatthā. Attadamathatthoti arahattamaggakkhaṇe attano nibbisevanattho. Samathatthoti sītibhāvattho. Parinibbāpanatthoti kilesaparinibbānena. Abhiññatthoti sabbadhammavasena. Pariññatthādayo maggañāṇakiccavasena. Saccābhisamayattho catunnaṃ saccānaṃ ekapaṭivedhadassanavasena. Nirodhe patiṭṭhāpakattho ārammaṇakaraṇavasena.
б̣уд̣̇д̇ход̇ибад̣̇асса абхаавзби б̣уд̣̇д̇хзнаад̇ибад̣̇з яо со б̣уд̣̇д̇хо, д̇ам̣ нид̣̇д̣̇исид̇угаамзна б̣уд̣̇д̇ход̇и вуд̇д̇ам̣. саяамбхууд̇и убад̣̇зсам̣ винаа саяамзва бхууд̇о. анаажарияагод̇и саяамбхуубад̣̇асса ад̇т̇авиваран̣ам̣. яо хи аажарияам̣ винаа сажжаани бадивиж̇жхад̇и, со саяамбхуу наама ход̇и. буб̣б̣з анануссуд̇зсууд̇иаад̣̇и анаажарияагабхаавасса ад̇т̇аббагаасанам̣. анануссуд̇зсууд̇и аажарияам̣ анануссуд̇зсу. сааманд̇и саяамзва. абхисамб̣уж̇жхийд̇и бхусам̣ саммаа бадивиж̇жхи. д̇ад̇т̇а жа саб̣б̣ан̃н̃уд̇ам̣ баабун̣ийд̇и д̇зсу жа сажжзсу саб̣б̣ан̃н̃убхаавам̣ баабун̣и. яат̇аа сажжаани бадивиж̇жханд̇аа саб̣б̣ан̃н̃уно хонд̇и, д̇ат̇аа сажжаанам̣ бадивид̣̇д̇хад̇д̇аа звам̣ вуд̇д̇ам̣. саб̣б̣ан̃н̃уд̇ам̣ бад̇д̇од̇иби баато. б̣алзсу жа васийбхааванд̇и д̣̇асасу жа д̇ат̇ааг̇ад̇аб̣алзсу иссарабхаавам̣ баабун̣и. яо со звам̣ бхууд̇о, со б̣уд̣̇д̇ход̇и вуд̇д̇ам̣ ход̇и. д̇ад̇т̇а саб̣б̣зсу д̇хаммзсу аббадихад̇ан̃аан̣анимид̇д̇аануд̇д̇аравимогкаад̇хиг̇амабарибхаавид̇ам̣ канд̇хасанд̇аанам̣ убаад̣̇ааяа бан̣н̣ад̇д̇иго, саб̣б̣ан̃н̃уд̇абад̣̇адтаанам̣ ваа сажжаабхисамб̣од̇химубаад̣̇ааяа бан̣н̣ад̇д̇иго сад̇д̇ависзсо б̣уд̣̇д̇хо. зд̇д̇аавад̇аа ад̇т̇ад̇о б̣уд̣̇д̇хавибхааванаа гад̇аа ход̇и.
Buddhotipadassa abhāvepi buddhenātipade yo so buddho, taṃ niddisitukāmena buddhoti vuttaṃ. Sayambhūti upadesaṃ vinā sayameva bhūto. Anācariyakoti sayambhūpadassa atthavivaraṇaṃ. Yo hi ācariyaṃ vinā saccāni paṭivijjhati, so sayambhū nāma hoti. Pubbe ananussutesūtiādi anācariyakabhāvassa atthappakāsanaṃ. Ananussutesūti ācariyaṃ ananussutesu. Sāmanti sayameva. Abhisambujjhīti bhusaṃ sammā paṭivijjhi. Tattha ca sabbaññutaṃ pāpuṇīti tesu ca saccesu sabbaññubhāvaṃ pāpuṇi. Yathā saccāni paṭivijjhantā sabbaññuno honti, tathā saccānaṃ paṭividdhattā evaṃ vuttaṃ. Sabbaññutaṃ pattotipi pāṭho. Balesu ca vasībhāvanti dasasu ca tathāgatabalesu issarabhāvaṃ pāpuṇi. Yo so evaṃ bhūto, so buddhoti vuttaṃ hoti. Tattha sabbesu dhammesu appaṭihatañāṇanimittānuttaravimokkhādhigamaparibhāvitaṃ khandhasantānaṃ upādāya paṇṇattiko, sabbaññutapadaṭṭhānaṃ vā saccābhisambodhimupādāya paṇṇattiko sattaviseso buddho. Ettāvatā atthato buddhavibhāvanā katā hoti.
162. ид̣̇аани б̣яан̃ж̇анад̇о вибхаавзнд̇о б̣уд̣̇д̇ход̇и гзнадтзна б̣уд̣̇д̇ход̇иаад̣̇имааха. д̇ад̇т̇а яат̇аа логз аваг̇анд̇аа аваг̇ад̇од̇и вужжад̇и, звам̣ б̣уж̇жхид̇аа сажжаанийд̇и б̣уд̣̇д̇хо. яат̇аа бан̣н̣асосаа ваад̇аа бан̣н̣асусаад̇и вужжанд̇и, звам̣ б̣од̇хзд̇аа баж̇ааяаад̇и б̣уд̣̇д̇хо. саб̣б̣ан̃н̃уд̇ааяа б̣уд̣̇д̇ход̇и саб̣б̣ад̇хаммаб̣уж̇жханасамад̇т̇ааяа б̣уд̣̇д̇хияаа б̣уд̣̇д̇ход̇и вуд̇д̇ам̣ ход̇и. саб̣б̣ад̣̇ассаавид̇ааяа б̣уд̣̇д̇ход̇и саб̣б̣ад̇хаммаанам̣ н̃аан̣ажагкунаа д̣̇идтад̇д̇аа б̣уд̣̇д̇ход̇и вуд̇д̇ам̣ ход̇и. анан̃н̃анзяяад̇ааяа б̣уд̣̇д̇ход̇и ан̃н̃зна аб̣од̇ханийяад̇о саяамзва б̣уд̣̇д̇хад̇д̇аа б̣уд̣̇д̇ход̇и вуд̇д̇ам̣ ход̇и. висавид̇ааяа б̣уд̣̇д̇ход̇и наанааг̇ун̣ависаванад̇о бад̣̇умамива вигасанадтзна б̣уд̣̇д̇ход̇и вуд̇д̇ам̣ ход̇и. кийн̣аасавасан̇каад̇зна б̣уд̣̇д̇ход̇иаад̣̇ийхи чахи барияааязхи жид̇д̇асан̇гожагарад̇хаммаббахаанзна нид̣̇д̣̇агкаяавиб̣уд̣̇д̇хо бурисо вияа саб̣б̣агилзсанид̣̇д̣̇агкаяавиб̣уд̣̇д̇хад̇д̇аа б̣уд̣̇д̇ход̇и вуд̇д̇ам̣ ход̇и. сан̇каа сан̇каад̇анд̇и ад̇т̇ад̇о згад̇д̇аа сан̇каад̇знаад̇и важанасса годтаасзнаад̇и ад̇т̇о. д̇ан̣хаалзбад̣̇идтилзбаабхаавзна нирубалзбасан̇каад̇зна. саваасанаанам̣ саб̣б̣агилзсаанам̣ бахийнад̇д̇аа зганд̇аважанзна висзсзд̇ваа зганд̇авийд̇арааг̇од̇иаад̣̇и вуд̇д̇ам̣. зганд̇аниггилзсод̇и рааг̇ад̣̇осамохаавасзсзхи саб̣б̣агилзсзхи ниггилзсо. згааяанамаг̇г̇ам̣ г̇ад̇од̇и б̣уд̣̇д̇ход̇и г̇аманад̇т̇аанам̣ д̇хаад̇уунам̣ б̣уж̇жханад̇т̇ад̇д̇аа б̣уж̇жханад̇т̇ааби д̇хаад̇уяо г̇аманад̇т̇аа хонд̇и, д̇асмаа згааяанамаг̇г̇ам̣ г̇ад̇ад̇д̇аа б̣уд̣̇д̇ход̇и вуд̇д̇ам̣ ход̇и. згааяанамаг̇г̇од̇и жзд̇т̇а –
162. Idāni byañjanato vibhāvento buddhoti kenaṭṭhena buddhotiādimāha. Tattha yathā loke avagantā avagatoti vuccati, evaṃ bujjhitā saccānīti buddho. Yathā paṇṇasosā vātā paṇṇasusāti vuccanti, evaṃ bodhetā pajāyāti buddho. Sabbaññutāya buddhoti sabbadhammabujjhanasamatthāya buddhiyā buddhoti vuttaṃ hoti. Sabbadassāvitāya buddhoti sabbadhammānaṃ ñāṇacakkhunā diṭṭhattā buddhoti vuttaṃ hoti. Anaññaneyyatāyabuddhoti aññena abodhanīyato sayameva buddhattā buddhoti vuttaṃ hoti. Visavitāya buddhoti nānāguṇavisavanato padumamiva vikasanaṭṭhena buddhoti vuttaṃ hoti. Khīṇāsavasaṅkhātena buddhotiādīhi chahi pariyāyehi cittasaṅkocakaradhammappahānena niddakkhayavibuddho puriso viya sabbakilesaniddakkhayavibuddhattā buddhoti vuttaṃ hoti. Saṅkhā saṅkhātanti atthato ekattā saṅkhātenāti vacanassa koṭṭhāsenāti attho. Taṇhālepadiṭṭhilepābhāvena nirupalepasaṅkhātena. Savāsanānaṃ sabbakilesānaṃ pahīnattā ekantavacanena visesetvā ekantavītarāgotiādi vuttaṃ. Ekantanikkilesoti rāgadosamohāvasesehi sabbakilesehi nikkileso. Ekāyanamaggaṃ gatoti buddhoti gamanatthānaṃ dhātūnaṃ bujjhanatthattā bujjhanatthāpi dhātuyo gamanatthā honti, tasmā ekāyanamaggaṃ gatattā buddhoti vuttaṃ hoti. Ekāyanamaggoti cettha –
‘‘маг̇г̇о бант̇о бат̇о баж̇ж̇о, ан̃ж̇асам̣ вадумааяанам̣;
‘‘Maggo pantho patho pajjo, añjasaṃ vaṭumāyanaṃ;
нааваа уд̇д̇арасзд̇у жа, гулло жа бхиси сан̇гамо’’д̇и . (жуул̣ани. баарааяанад̇т̇уд̇иг̇аат̇аанид̣̇д̣̇зса 101) –
Nāvā uttarasetu ca, kullo ca bhisi saṅkamo’’ti . (cūḷani. pārāyanatthutigāthāniddesa 101) –
маг̇г̇асса б̣ахуусу наамзсу аяананаамзна вуд̇д̇о. д̇асмаа згамаг̇г̇абхууд̇о маг̇г̇о, на д̣̇взд̇хаабат̇абхууд̇од̇и ад̇т̇о. ат̇а ваа згзна аяид̇аб̣б̣о маг̇г̇од̇и згааяанамаг̇г̇о. згзнаад̇и г̇ан̣асан̇г̇ан̣игам̣ бахааяа бавивзгзна жид̇д̇зна. аяид̇аб̣б̣од̇и бадибаж̇ж̇ид̇аб̣б̣о. аяанд̇и ваа зд̇знаад̇и аяано, сам̣саарад̇о ниб̣б̣аанам̣ г̇ажчанд̇ийд̇и ад̇т̇о. згзсам̣ аяано згааяано. згзд̇и сздтаа, саб̣б̣асад̇д̇асздтаа жа саммаасамб̣уд̣̇д̇хаа, д̇асмаа згааяанамаг̇г̇од̇и саммаасамб̣уд̣̇д̇хаанам̣ аяанабхууд̇о маг̇г̇од̇и вуд̇д̇ам̣ ход̇и. аяад̇ийд̇и ваа аяано, г̇ажчад̇и бавад̇д̇ад̇ийд̇и ад̇т̇о. згасмим̣ аяано маг̇г̇од̇и згааяанамаг̇г̇о, згасмим̣язва б̣уд̣̇д̇хасаасанз бавад̇д̇амаано маг̇г̇о, на ан̃н̃ад̇т̇аад̇и вуд̇д̇ам̣ ход̇и. аби жа згам̣ аяад̇ийд̇и згааяано, буб̣б̣абхааг̇з наанаамукабхааванаанаяаббавад̇д̇оби абарабхааг̇з згам̣ ниб̣б̣аанамзва г̇ажчад̇ийд̇и вуд̇д̇ам̣ ход̇и, д̇асмаа згааяанамаг̇г̇од̇и зганиб̣б̣аанаг̇аманамаг̇г̇од̇и ад̇т̇о. зго ануд̇д̇арам̣ саммаасамб̣од̇хим̣ абхисамб̣уд̣̇д̇ход̇и б̣уд̣̇д̇ход̇и на барзхи б̣уд̣̇д̇хад̇д̇аа б̣уд̣̇д̇хо, гим̣ бана саяамзва ануд̇д̇арам̣ саммаасамб̣од̇хим̣ абхисамб̣уд̣̇д̇хад̇д̇аа б̣уд̣̇д̇ход̇и вуд̇д̇ам̣ ход̇и. аб̣уд̣̇д̇хивихад̇ад̇д̇аа б̣уд̣̇д̇хибадилаабхаа б̣уд̣̇д̇ход̇и б̣уд̣̇д̇хи б̣уд̣̇д̇хам̣ б̣од̇ход̇и барияааяаважанамзд̇ам̣. д̇ад̇т̇а яат̇аа нийларад̇д̇аг̇ун̣аяог̇аа нийло бадо рад̇д̇о бадод̇и вужжад̇и, звам̣ б̣уд̣̇д̇хаг̇ун̣аяог̇аа б̣уд̣̇д̇ход̇и н̃аабзд̇ум̣ вуд̇д̇ам̣.
Maggassa bahūsu nāmesu ayananāmena vutto. Tasmā ekamaggabhūto maggo, na dvedhāpathabhūtoti attho. Atha vā ekena ayitabbo maggoti ekāyanamaggo. Ekenāti gaṇasaṅgaṇikaṃ pahāya pavivekena cittena. Ayitabboti paṭipajjitabbo. Ayanti vā etenāti ayano, saṃsārato nibbānaṃ gacchantīti attho. Ekesaṃ ayano ekāyano. Eketi seṭṭhā, sabbasattaseṭṭhā ca sammāsambuddhā, tasmā ekāyanamaggoti sammāsambuddhānaṃ ayanabhūto maggoti vuttaṃ hoti. Ayatīti vā ayano, gacchati pavattatīti attho. Ekasmiṃ ayano maggoti ekāyanamaggo, ekasmiṃyeva buddhasāsane pavattamāno maggo, na aññatthāti vuttaṃ hoti. Api ca ekaṃ ayatīti ekāyano, pubbabhāge nānāmukhabhāvanānayappavattopi aparabhāge ekaṃ nibbānameva gacchatīti vuttaṃ hoti, tasmā ekāyanamaggoti ekanibbānagamanamaggoti attho. Eko anuttaraṃ sammāsambodhiṃ abhisambuddhoti buddhoti na parehi buddhattā buddho, kiṃ pana sayameva anuttaraṃ sammāsambodhiṃ abhisambuddhattā buddhoti vuttaṃ hoti. Abuddhivihatattā buddhipaṭilābhā buddhoti buddhi buddhaṃ bodhoti pariyāyavacanametaṃ. Tattha yathā nīlarattaguṇayogā nīlo paṭo ratto paṭoti vuccati, evaṃ buddhaguṇayogā buddhoti ñāpetuṃ vuttaṃ.
д̇ад̇о барам̣ б̣уд̣̇д̇ход̇и нзд̇ам̣ нааманд̇иаад̣̇и ‘‘ад̇т̇амануг̇ад̇аа аяам̣ бан̃н̃ад̇д̇ий’’д̇и н̃аабанад̇т̇ам̣ вуд̇д̇ам̣. д̇ад̇т̇а мид̇д̇аа сахааяаа. амажжаа бхажжаа. н̃аад̇ий бид̇убагкигаа. саалохид̇аа маад̇убагкигаа. саман̣аа баб̣б̣аж̇ж̇уубаг̇ад̇аа. б̣раахман̣аа бховаад̣̇ино, самид̇абаабаб̣аахид̇абаабаа ваа. д̣̇звад̇аа саггаад̣̇аяо б̣рахмаано жа. вимогканд̇иганд̇и вимогко арахад̇д̇амаг̇г̇о, вимогкасса анд̇о арахад̇д̇апалам̣, д̇асмим̣ вимогканд̇з бхавам̣ вимогканд̇игам̣ наама. саб̣б̣ан̃н̃убхааво хи арахад̇д̇амаг̇г̇зна сиж̇жхад̇и, арахад̇д̇апалод̣̇аяз сид̣̇д̇хо ход̇и, д̇асмаа саб̣б̣ан̃н̃убхааво вимогканд̇з бхаво ход̇и. д̇ам̣ нзмид̇д̇игамби наамам̣ вимогканд̇з бхавам̣ наама ход̇и. д̇зна вуд̇д̇ам̣ – ‘‘вимогканд̇игамзд̇ам̣ б̣уд̣̇д̇хаанам̣ бхаг̇аванд̇аана’’нд̇и. б̣од̇хияаа муулз саха саб̣б̣ан̃н̃уд̇ан̃н̃аан̣асса бадилаабхаад̇и махааб̣од̇хиругкамуулз яат̇аавуд̇д̇агкан̣з саб̣б̣ан̃н̃уд̇ан̃н̃аан̣асса бадилаабхзна саха. сажчигаа бан̃н̃ад̇д̇ийд̇и арахад̇д̇апаласажчигирияааяа, саб̣б̣ад̇хаммасажчигирияааяа ваа ж̇аад̇аа бан̃н̃ад̇д̇и. яад̣̇ид̣̇ам̣ б̣уд̣̇д̇ход̇и яаа аяам̣ б̣уд̣̇д̇ход̇и бан̃н̃ад̇д̇и, аяам̣ б̣яан̃ж̇анад̇о б̣уд̣̇д̇хавибхааванаа.
Tato paraṃ buddhoti netaṃ nāmantiādi ‘‘atthamanugatā ayaṃ paññattī’’ti ñāpanatthaṃ vuttaṃ. Tattha mittā sahāyā. Amaccā bhaccā. Ñātī pitupakkhikā. Sālohitā mātupakkhikā. Samaṇā pabbajjūpagatā. Brāhmaṇā bhovādino, samitapāpabāhitapāpā vā. Devatā sakkādayo brahmāno ca. Vimokkhantikanti vimokkho arahattamaggo, vimokkhassa anto arahattaphalaṃ, tasmiṃ vimokkhante bhavaṃ vimokkhantikaṃ nāma. Sabbaññubhāvo hi arahattamaggena sijjhati, arahattaphalodaye siddho hoti, tasmā sabbaññubhāvo vimokkhante bhavo hoti. Taṃ nemittikampi nāmaṃ vimokkhante bhavaṃ nāma hoti. Tena vuttaṃ – ‘‘vimokkhantikametaṃ buddhānaṃ bhagavantāna’’nti. Bodhiyā mūle saha sabbaññutaññāṇassa paṭilābhāti mahābodhirukkhamūle yathāvuttakkhaṇe sabbaññutaññāṇassa paṭilābhena saha. Sacchikā paññattīti arahattaphalasacchikiriyāya, sabbadhammasacchikiriyāya vā jātā paññatti. Yadidaṃ buddhoti yā ayaṃ buddhoti paññatti, ayaṃ byañjanato buddhavibhāvanā.
‘‘яат̇аа б̣уд̣̇д̇хзна д̣̇зсид̇аа’’д̇иг̇аат̇аабаад̣̇асса бана иминаа бад̣̇абхааж̇анийяз вуд̇д̇ад̇т̇зна аяам̣ сам̣санд̣̇анаа – аанаабаанассад̇ияо жа яат̇аа б̣уд̣̇д̇хзна д̣̇зсид̇аа, язна багаарзна д̣̇зсид̇аа. яат̇аасад̣̇д̣̇зна сан̇г̇ахид̇аа д̣̇аса яат̇ад̇т̇аа жа яат̇аа б̣уд̣̇д̇хзна д̣̇зсид̇аа, язна багаарзна д̣̇зсид̇аад̇и багаарад̇т̇асса жа яат̇аасад̣̇д̣̇асса, сабхаавад̇т̇асса жа яат̇аасад̣̇д̣̇асса саруубзгасзсавасзна згасзсам̣ гад̇ваа ‘‘яат̇аа’’д̇и вуд̇д̇анд̇и взд̣̇ид̇аб̣б̣ам̣. бад̣̇абхааж̇анийяз банасса яат̇ад̇т̇зсу згзгасса яож̇анаавасзна ‘‘д̣̇зсид̇о’’д̇и згаважанам̣ гад̇ам̣.
‘‘Yathā buddhena desitā’’tigāthāpādassa pana iminā padabhājanīye vuttatthena ayaṃ saṃsandanā – ānāpānassatiyo ca yathā buddhena desitā, yena pakārena desitā. Yathāsaddena saṅgahitā dasa yathatthā ca yathā buddhena desitā, yena pakārena desitāti pakāratthassa ca yathāsaddassa, sabhāvatthassa ca yathāsaddassa sarūpekasesavasena ekasesaṃ katvā ‘‘yathā’’ti vuttanti veditabbaṃ. Padabhājanīye panassa yathatthesu ekekassa yojanāvasena ‘‘desito’’ti ekavacanaṃ kataṃ.
‘‘сод̇и г̇ахадто ваа ход̇и баб̣б̣аж̇ид̇о ваа’’д̇и вуд̇д̇ад̇д̇аа аад̣̇ибад̣̇зби яасса г̇ахадтасса ваа баб̣б̣аж̇ид̇асса ваад̇и вуд̇д̇амзва ход̇и. логад̇т̇о вуд̇д̇оязва. бабхаасзд̇ийд̇и ад̇д̇ано н̃аан̣асса баагадам̣ гарод̇ийд̇и ад̇т̇о . абхисамб̣уд̣̇д̇хад̇д̇аад̇и саавагабаарамин̃аан̣знаби бадивид̣̇д̇хабхаавзна. обхаасзд̇ийд̇и гаамааважарабхууд̇ам̣ логам̣. бхаасзд̇ийд̇и руубааважарабхууд̇ам̣ логам̣. бабхаасзд̇ийд̇и аруубааважарабхууд̇ам̣ логам̣.
‘‘Soti gahaṭṭho vā hoti pabbajito vā’’ti vuttattā ādipadepi yassa gahaṭṭhassa vā pabbajitassa vāti vuttameva hoti. Lokattho vuttoyeva. Pabhāsetīti attano ñāṇassa pākaṭaṃ karotīti attho . Abhisambuddhattāti sāvakapāramiñāṇenapi paṭividdhabhāvena. Obhāsetīti kāmāvacarabhūtaṃ lokaṃ. Bhāsetīti rūpāvacarabhūtaṃ lokaṃ. Pabhāsetīti arūpāvacarabhūtaṃ lokaṃ.
арияан̃аан̣анд̇и арахад̇д̇амаг̇г̇ан̃аан̣ам̣. махигаа муд̇д̇од̇и махигааяа муд̇д̇о. махигаад̇и нийхааро вужжад̇и. махияаа муд̇д̇од̇иби баато. д̇хуумараж̇аа муд̇д̇од̇и д̇хуумад̇о жа раж̇ад̇о жа муд̇д̇о. раахуг̇ахан̣аа виббамуд̇д̇од̇и раахуно жанд̣̇асса аасаннубаггилзсад̇д̇аа д̣̇вийхи убасаг̇г̇зхи висзсзд̇ваа вуд̇д̇ам̣. бхаасад̇з ид̇и саобхаасадтзна. д̇абад̇з ид̇и сад̇зж̇адтзна. вирожад̇з ид̇и ружирадтзна. звамзванд̇и звам̣ звам̣. яасмаа бана жанд̣̇оби саяам̣ бхаасанд̇о д̇абанд̇о вирожанд̇о имам̣ огаасалогам̣ обхаасзд̇и, бхигку жа бан̃н̃ааяа бхаасанд̇о д̇абанд̇о вирожанд̇о имам̣ канд̇хаад̣̇илогам̣ бан̃н̃ааяа обхаасзд̇и, д̇асмаа убхаяад̇рааби ‘‘бхаасзд̇ий’’д̇и авад̇ваа ‘‘бхаасад̇з’’ ижжзва вуд̇д̇ам̣. зван̃хи вуд̇д̇з хзд̇уад̇т̇оби вуд̇д̇о ход̇и. ад̇ивисад̣̇ад̇араабхасуурияобамам̣ аг̇г̇ахзд̇ваа гасмаа жанд̣̇обамаа г̇ахид̇аад̇и жз? саб̣б̣агилзсабарил̣аахавуубасамзна санд̇асса бхигкуно санд̇аг̇ун̣аяуд̇д̇ажанд̣̇обамаа анужчавигаад̇и г̇ахид̇аад̇и взд̣̇ид̇аб̣б̣ам̣. звам̣ аанаабаанассад̇ибхааванаасид̣̇д̇хисаад̇хагам̣ яог̇ааважарам̣ т̇унид̇ваа имаани д̇зраса вод̣̇аанз н̃аан̣аанийд̇и д̇аани н̃аан̣аани ниг̇амзд̇ваа д̣̇ассзд̇ийд̇и.
Ariyañāṇanti arahattamaggañāṇaṃ. Mahikā muttoti mahikāya mutto. Mahikāti nīhāro vuccati. Mahiyā muttotipi pāṭho. Dhūmarajā muttoti dhūmato ca rajato ca mutto. Rāhugahaṇā vippamuttoti rāhuno candassa āsannupakkilesattā dvīhi upasaggehi visesetvā vuttaṃ. Bhāsate iti saobhāsaṭṭhena. Tapate iti satejaṭṭhena. Virocate iti ruciraṭṭhena. Evamevanti evaṃ evaṃ. Yasmā pana candopi sayaṃ bhāsanto tapanto virocanto imaṃ okāsalokaṃ obhāseti, bhikkhu ca paññāya bhāsanto tapanto virocanto imaṃ khandhādilokaṃ paññāya obhāseti, tasmā ubhayatrāpi ‘‘bhāsetī’’ti avatvā ‘‘bhāsate’’ icceva vuttaṃ. Evañhi vutte hetuatthopi vutto hoti. Ativisadatarābhasūriyopamaṃ aggahetvā kasmā candopamā gahitāti ce? Sabbakilesapariḷāhavūpasamena santassa bhikkhuno santaguṇayuttacandopamā anucchavikāti gahitāti veditabbaṃ. Evaṃ ānāpānassatibhāvanāsiddhisādhakaṃ yogāvacaraṃ thunitvā imāni terasa vodāne ñāṇānīti tāni ñāṇāni nigametvā dassetīti.
вод̣̇аанан̃аан̣анид̣̇д̣̇зсаван̣н̣анаа нидтид̇аа.
Vodānañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 4. вод̣̇аанан̃аан̣анид̣̇д̣̇зсо • 4. Vodānañāṇaniddeso
