| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൨. ദുതിയവഗ്ഗോ
2. Dutiyavaggo
(൧൯) ൧൦. വോഹാരകഥാ
(19) 10. Vohārakathā
൩൪൭. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. ലോകുത്തരേ സോതേ പടിഹഞ്ഞതി നോ ലോകിയേ, ലോകുത്തരേന വിഞ്ഞാണേന പടിവിജാനന്തി നോ ലോകിയേന, സാവകാ പടിവിജാനന്തി നോ പുഥുജ്ജനാതി? ന ഹേവം വത്തബ്ബേ…പേ॰….
347. Buddhassa bhagavato vohāro lokuttaroti? Āmantā. Lokuttare sote paṭihaññati no lokiye, lokuttarena viññāṇena paṭivijānanti no lokiyena, sāvakā paṭivijānanti no puthujjanāti? Na hevaṃ vattabbe…pe….
നനു ബുദ്ധസ്സ ഭഗവതോ വോഹാരോ ലോകിയേ സോതേ പടിഹഞ്ഞതീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരോ ലോകിയേ സോതേ പടിഹഞ്ഞതി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu buddhassa bhagavato vohāro lokiye sote paṭihaññatīti? Āmantā. Hañci buddhassa bhagavato vohāro lokiye sote paṭihaññati, no ca vata re vattabbe – ‘‘buddhassa bhagavato vohāro lokuttaro’’ti.
നനു ബുദ്ധസ്സ ഭഗവതോ വോഹാരം ലോകിയേന വിഞ്ഞാണേന പടിവിജാനന്തീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരം ലോകിയേന വിഞ്ഞാണേന പടിവിജാനന്തി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu buddhassa bhagavato vohāraṃ lokiyena viññāṇena paṭivijānantīti? Āmantā. Hañci buddhassa bhagavato vohāraṃ lokiyena viññāṇena paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
നനു ബുദ്ധസ്സ ഭഗവതോ വോഹാരം പുഥുജ്ജനാ പടിവിജാനന്തീതി? ആമന്താ. ഹഞ്ചി ബുദ്ധസ്സ ഭഗവതോ വോഹാരം പുഥുജ്ജനാ പടിവിജാനന്തി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu buddhassa bhagavato vohāraṃ puthujjanā paṭivijānantīti? Āmantā. Hañci buddhassa bhagavato vohāraṃ puthujjanā paṭivijānanti, no ca vata re vattabbe – ‘‘buddhassa bhagavato vohāro lokuttaro’’ti.
൩൪൮. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. മഗ്ഗോ ഫലം നിബ്ബാനം, സോതാപത്തിമഗ്ഗോ സോതാപത്തിഫലം, സകദാഗാമിമഗ്ഗോ സകദാഗാമിഫലം, അനാഗാമിമഗ്ഗോ അനാഗാമിഫലം, അരഹത്തമഗ്ഗോ അരഹത്തഫലം, സതിപട്ഠാനം സമ്മപ്പധാനം ഇദ്ധിപാദോ ഇന്ദ്രിയം ബലം ബോജ്ഝങ്ഗോതി? ന ഹേവം വത്തബ്ബേ…പേ॰….
348. Buddhassa bhagavato vohāro lokuttaroti? Āmantā. Maggo phalaṃ nibbānaṃ, sotāpattimaggo sotāpattiphalaṃ, sakadāgāmimaggo sakadāgāmiphalaṃ, anāgāmimaggo anāgāmiphalaṃ, arahattamaggo arahattaphalaṃ, satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti? Na hevaṃ vattabbe…pe….
ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരം സുണന്തീതി? ആമന്താ. ലോകുത്തരോ ധമ്മോ സോതവിഞ്ഞേയ്യോ, സോതസ്മിം പടിഹഞ്ഞതി, സോതസ്സ ആപാഥം ആഗച്ഛതീതി? ന ഹേവം വത്തബ്ബേ…പേ॰….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāraṃ suṇantīti? Āmantā. Lokuttaro dhammo sotaviññeyyo, sotasmiṃ paṭihaññati, sotassa āpāthaṃ āgacchatīti? Na hevaṃ vattabbe…pe….
നനു ലോകുത്തരോ ധമ്മോ ന സോതവിഞ്ഞേയ്യോ, ന സോതസ്മിം പടിഹഞ്ഞതി, ന സോതസ്സ ആപാഥം ആഗച്ഛതീതി? ആമന്താ. ഹഞ്ചി ലോകുത്തരോ ധമ്മോ ന സോതവിഞ്ഞേയ്യോ, ന സോതസ്മിം പടിഹഞ്ഞതി, ന സോതസ്സ ആപാഥം ആഗച്ഛതി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchatīti? Āmantā. Hañci lokuttaro dhammo na sotaviññeyyo, na sotasmiṃ paṭihaññati, na sotassa āpāthaṃ āgacchati, no ca vata re vattabbe – ‘‘buddhassa bhagavato vohāro lokuttaro’’ti.
൩൪൯. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ രജ്ജേയ്യുന്തി? ആമന്താ. ലോകുത്തരോ ധമ്മോ രാഗട്ഠാനിയോ രജനീയോ കമനീയോ മദനീയോ ബന്ധനീയോ മുച്ഛനീയോതി? ന ഹേവം വത്തബ്ബേ…പേ॰….
349. Buddhassa bhagavato vohāro lokuttaroti? Āmantā. Atthi keci buddhassa bhagavato vohāre rajjeyyunti? Āmantā. Lokuttaro dhammo rāgaṭṭhāniyo rajanīyo kamanīyo madanīyo bandhanīyo mucchanīyoti? Na hevaṃ vattabbe…pe….
നനു ലോകുത്തരോ ധമ്മോ ന രാഗട്ഠാനിയോ ന രജനീയോ ന കമനീയോ ന മദനീയോ ന ബന്ധനീയോ ന മുച്ഛനീയോതി? ആമന്താ. ഹഞ്ചി ലോകുത്തരോ ധമ്മോ ന രാഗട്ഠാനിയോ ന രജനീയോ ന കമനീയോ ന മദനീയോ ന ബന്ധനീയോ ന മുച്ഛനീയോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyoti? Āmantā. Hañci lokuttaro dhammo na rāgaṭṭhāniyo na rajanīyo na kamanīyo na madanīyo na bandhanīyo na mucchanīyo, no ca vata re vattabbe – ‘‘buddhassa bhagavato vohāro lokuttaro’’ti.
ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ ദുസ്സേയ്യുന്തി? ആമന്താ. ലോകുത്തരോ ധമ്മോ ദോസട്ഠാനിയോ കോപട്ഠാനിയോ പടിഘട്ഠാനിയോതി? ന ഹേവം വത്തബ്ബേ…പേ॰….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre dusseyyunti? Āmantā. Lokuttaro dhammo dosaṭṭhāniyo kopaṭṭhāniyo paṭighaṭṭhāniyoti? Na hevaṃ vattabbe…pe….
നനു ലോകുത്തരോ ധമ്മോ ന ദോസട്ഠാനിയോ ന കോപട്ഠാനിയോ ന പടിഘട്ഠാനിയോതി? ആമന്താ. ഹഞ്ചി ലോകുത്തരോ ധമ്മോ ന ദോസട്ഠാനിയോ ന കോപട്ഠാനിയോ ന പടിഘട്ഠാനിയോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyoti? Āmantā. Hañci lokuttaro dhammo na dosaṭṭhāniyo na kopaṭṭhāniyo na paṭighaṭṭhāniyo, no ca vata re vattabbe – ‘‘buddhassa bhagavato vohāro lokuttaro’’ti.
ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. അത്ഥി കേചി ബുദ്ധസ്സ ഭഗവതോ വോഹാരേ മുയ്ഹേയ്യുന്തി? ആമന്താ. ലോകുത്തരോ ധമ്മോ മോഹട്ഠാനിയോ അഞ്ഞാണകരണോ അചക്ഖുകരണോ പഞ്ഞാനിരോധികോ വിഘാതപക്ഖികോ അനിബ്ബാനസംവത്തനികോതി? ന ഹേവം വത്തബ്ബേ…പേ॰….
Buddhassa bhagavato vohāro lokuttaroti? Āmantā. Atthi keci buddhassa bhagavato vohāre muyheyyunti? Āmantā. Lokuttaro dhammo mohaṭṭhāniyo aññāṇakaraṇo acakkhukaraṇo paññānirodhiko vighātapakkhiko anibbānasaṃvattanikoti? Na hevaṃ vattabbe…pe….
നനു ലോകുത്തരോ ധമ്മോ ന മോഹട്ഠാനിയോ ന അഞ്ഞാണകരണോ ന അചക്ഖുകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോതി? ആമന്താ. ഹഞ്ചി ലോകുത്തരോ ധമ്മോ ന മോഹട്ഠാനിയോ ന അഞ്ഞാണകരണോ ന അചക്ഖുകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോ, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകുത്തരോ’’തി.
Nanu lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattanikoti? Āmantā. Hañci lokuttaro dhammo na mohaṭṭhāniyo na aññāṇakaraṇo na acakkhukaraṇo paññāvuddhiko avighātapakkhiko nibbānasaṃvattaniko, no ca vata re vattabbe – ‘‘buddhassa bhagavato vohāro lokuttaro’’ti.
൩൫൦. ബുദ്ധസ്സ ഭഗവതോ വോഹാരോ ലോകുത്തരോതി? ആമന്താ. യേ കേചി ബുദ്ധസ്സ ഭഗവതോ വോഹാരം സുണന്തി, സബ്ബേ തേ മഗ്ഗം ഭാവേന്തീതി? ന ഹേവം വത്തബ്ബേ…പേ॰….
350. Buddhassa bhagavato vohāro lokuttaroti? Āmantā. Ye keci buddhassa bhagavato vohāraṃ suṇanti, sabbe te maggaṃ bhāventīti? Na hevaṃ vattabbe…pe….
യേ കേചി ബുദ്ധസ്സ ഭഗവതോ വോഹാരം സുണന്തി, സബ്ബേ തേ മഗ്ഗം ഭാവേന്തീതി? ആമന്താ. ബാലപുഥുജ്ജനാ ബുദ്ധസ്സ ഭഗവതോ വോഹാരം സുണന്തി, ബാലപുഥുജ്ജനാ മഗ്ഗം ഭാവേന്തീതി? ന ഹേവം വത്തബ്ബേ…പേ॰… മാതുഘാതകോ മഗ്ഗം ഭാവേതി…പേ॰… പിതുഘാതകോ… അരഹന്തഘാതകോ… രുഹിരുപ്പാദകോ… സങ്ഘഭേദകോ ബുദ്ധസ്സ ഭഗവതോ വോഹാരം സുണാതി, സങ്ഘഭേദകോ മഗ്ഗം ഭാവേതീതി? ന ഹേവം വത്തബ്ബേ…പേ॰….
Ye keci buddhassa bhagavato vohāraṃ suṇanti, sabbe te maggaṃ bhāventīti? Āmantā. Bālaputhujjanā buddhassa bhagavato vohāraṃ suṇanti, bālaputhujjanā maggaṃ bhāventīti? Na hevaṃ vattabbe…pe… mātughātako maggaṃ bhāveti…pe… pitughātako… arahantaghātako… ruhiruppādako… saṅghabhedako buddhassa bhagavato vohāraṃ suṇāti, saṅghabhedako maggaṃ bhāvetīti? Na hevaṃ vattabbe…pe….
൩൫൧. ലബ്ഭാ സോവണ്ണമയായ ലട്ഠിയാ ധഞ്ഞപുഞ്ജോപി സുവണ്ണപുഞ്ജോപി ആചിക്ഖിതുന്തി? ആമന്താ. ഏവമേവം ഭഗവാ ലോകുത്തരേന വോഹാരേന ലോകിയമ്പി ലോകുത്തരമ്പി ധമ്മം വോഹരതീതി.
351. Labbhā sovaṇṇamayāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokuttarena vohārena lokiyampi lokuttarampi dhammaṃ voharatīti.
ലബ്ഭാ ഏലണ്ഡിയായ ലട്ഠിയാ ധഞ്ഞപുഞ്ജോപി സുവണ്ണപുഞ്ജോപി ആചിക്ഖിതുന്തി? ആമന്താ. ഏവമേവം ഭഗവാ ലോകിയേന വോഹാരേന ലോകിയമ്പി ലോകുത്തരമ്പി ധമ്മം വോഹരതീതി.
Labbhā elaṇḍiyāya laṭṭhiyā dhaññapuñjopi suvaṇṇapuñjopi ācikkhitunti? Āmantā. Evamevaṃ bhagavā lokiyena vohārena lokiyampi lokuttarampi dhammaṃ voharatīti.
൩൫൨. ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. ലോകിയം വോഹരന്തസ്സ ലോകിയേ സോതേ പടിഹഞ്ഞതി, ലോകുത്തരം വോഹരന്തസ്സ ലോകുത്തരേ സോതേ പടിഹഞ്ഞതി; ലോകിയം വോഹരന്തസ്സ ലോകിയേന വിഞ്ഞാണേന പടിവിജാനന്തി, ലോകുത്തരം വോഹരന്തസ്സ ലോകുത്തരേന വിഞ്ഞാണേന പടിവിജാനന്തി; ലോകിയം വോഹരന്തസ്സ പുഥുജ്ജനാ പടിവിജാനന്തി , ലോകുത്തരം വോഹരന്തസ്സ സാവകാ പടിവിജാനന്തീതി? ന ഹേവം വത്തബ്ബേ…പേ॰….
352. Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Lokiyaṃ voharantassa lokiye sote paṭihaññati, lokuttaraṃ voharantassa lokuttare sote paṭihaññati; lokiyaṃ voharantassa lokiyena viññāṇena paṭivijānanti, lokuttaraṃ voharantassa lokuttarena viññāṇena paṭivijānanti; lokiyaṃ voharantassa puthujjanā paṭivijānanti , lokuttaraṃ voharantassa sāvakā paṭivijānantīti? Na hevaṃ vattabbe…pe….
ന വത്തബ്ബം – ‘‘ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. നനു ഭഗവാ ലോകിയമ്പി ലോകുത്തരമ്പി ധമ്മം വോഹരതീതി? ആമന്താ. ഹഞ്ചി ഭഗവാ ലോകിയമ്പി ലോകുത്തരമ്പി ധമ്മം വോഹരതി, തേന വത രേ വത്തബ്ബേ – ‘‘ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീ’’തി.
Na vattabbaṃ – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Nanu bhagavā lokiyampi lokuttarampi dhammaṃ voharatīti? Āmantā. Hañci bhagavā lokiyampi lokuttarampi dhammaṃ voharati, tena vata re vattabbe – ‘‘buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotī’’ti.
ബുദ്ധസ്സ ഭഗവതോ വോഹാരോ ലോകിയം വോഹരന്തസ്സ ലോകിയോ ഹോതി, ലോകുത്തരം വോഹരന്തസ്സ ലോകുത്തരോ ഹോതീതി? ആമന്താ. മഗ്ഗം വോഹരന്തസ്സ മഗ്ഗോ ഹോതി, അമഗ്ഗം വോഹരന്തസ്സ അമഗ്ഗോ ഹോതി, ഫലം വോഹരന്തസ്സ ഫലം ഹോതി, അഫലം വോഹരന്തസ്സ അഫലം ഹോതി, നിബ്ബാനം വോഹരന്തസ്സ നിബ്ബാനം ഹോതി, അനിബ്ബാനം വോഹരന്തസ്സ അനിബ്ബാനം ഹോതി, സങ്ഖതം വോഹരന്തസ്സ സങ്ഖതം ഹോതി, അസങ്ഖതം വോഹരന്തസ്സ അസങ്ഖതം ഹോതി, രൂപം വോഹരന്തസ്സ രൂപം ഹോതി, അരൂപം വോഹരന്തസ്സ അരൂപം ഹോതി, വേദനം വോഹരന്തസ്സ വേദനാ ഹോതി, അവേദനം വോഹരന്തസ്സ അവേദനാ ഹോതി, സഞ്ഞം വോഹരന്തസ്സ സഞ്ഞാ ഹോതി, അസഞ്ഞം വോഹരന്തസ്സ അസഞ്ഞാ ഹോതി, സങ്ഖാരേ വോഹരന്തസ്സ സങ്ഖാരാ ഹോന്തി, അസങ്ഖാരേ വോഹരന്തസ്സ അസങ്ഖാരാ ഹോന്തി, വിഞ്ഞാണം വോഹരന്തസ്സ വിഞ്ഞാണം ഹോതി, അവിഞ്ഞാണം വോഹരന്തസ്സ അവിഞ്ഞാണം ഹോതീതി ? ന ഹേവം വത്തബ്ബേ…പേ॰….
Buddhassa bhagavato vohāro lokiyaṃ voharantassa lokiyo hoti, lokuttaraṃ voharantassa lokuttaro hotīti? Āmantā. Maggaṃ voharantassa maggo hoti, amaggaṃ voharantassa amaggo hoti, phalaṃ voharantassa phalaṃ hoti, aphalaṃ voharantassa aphalaṃ hoti, nibbānaṃ voharantassa nibbānaṃ hoti, anibbānaṃ voharantassa anibbānaṃ hoti, saṅkhataṃ voharantassa saṅkhataṃ hoti, asaṅkhataṃ voharantassa asaṅkhataṃ hoti, rūpaṃ voharantassa rūpaṃ hoti, arūpaṃ voharantassa arūpaṃ hoti, vedanaṃ voharantassa vedanā hoti, avedanaṃ voharantassa avedanā hoti, saññaṃ voharantassa saññā hoti, asaññaṃ voharantassa asaññā hoti, saṅkhāre voharantassa saṅkhārā honti, asaṅkhāre voharantassa asaṅkhārā honti, viññāṇaṃ voharantassa viññāṇaṃ hoti, aviññāṇaṃ voharantassa aviññāṇaṃ hotīti ? Na hevaṃ vattabbe…pe….
വോഹാരകഥാ നിട്ഠിതാ.
Vohārakathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧൦. വോഹാരകഥാവണ്ണനാ • 10. Vohārakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൧൦. വോഹാരകഥാവണ്ണനാ • 10. Vohārakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൧൦. വോഹാരകഥാവണ്ണനാ • 10. Vohārakathāvaṇṇanā
