| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
महासङ्गामो
Mahāsaṅgāmo
वोहरन्तेन जानितब्बादिवण्णना
Voharantena jānitabbādivaṇṇanā
३६८-३७४. महासङ्गामे – वत्थुतो वा वत्थुं सङ्कमतीति ‘‘पठमपाराजिकवत्थु मया दिट्ठं वा सुतं वा’’ति वत्वा पुन पुच्छियमानो निघंसियमानो ‘‘न मया पठमपाराजिकस्स वत्थु दिट्ठं, न सुतं; दुतियपाराजिकस्स वत्थु दिट्ठं वा सुतं वा’’ति वदति। एतेनेव नयेन सेसवत्थुसङ्कमनं, विपत्तितो विपत्तिसङ्कमनं आपत्तितो आपत्तिसङ्कमनञ्च वेदितब्बं। यो पन ‘‘नेव मया दिट्ठं, न सुत’’न्ति वत्वा पच्छा ‘‘मयापेतं दिट्ठं वा सुतं वा’’ति वदति, ‘‘दिट्ठं वा सुतं वा’’ति वत्वा पच्छा ‘‘न दिट्ठं वा न सुतं वा’’ति वदति, अयं अवजानित्वा पटिजानाति, पटिजानित्वा अवजानातीति वेदितब्बो। एसेव अञ्ञेनञ्ञं पटिचरति नाम।
368-374. Mahāsaṅgāme – vatthuto vā vatthuṃ saṅkamatīti ‘‘paṭhamapārājikavatthu mayā diṭṭhaṃ vā sutaṃ vā’’ti vatvā puna pucchiyamāno nighaṃsiyamāno ‘‘na mayā paṭhamapārājikassa vatthu diṭṭhaṃ, na sutaṃ; dutiyapārājikassa vatthu diṭṭhaṃ vā sutaṃ vā’’ti vadati. Eteneva nayena sesavatthusaṅkamanaṃ, vipattito vipattisaṅkamanaṃ āpattito āpattisaṅkamanañca veditabbaṃ. Yo pana ‘‘neva mayā diṭṭhaṃ, na suta’’nti vatvā pacchā ‘‘mayāpetaṃ diṭṭhaṃ vā sutaṃ vā’’ti vadati, ‘‘diṭṭhaṃ vā sutaṃ vā’’ti vatvā pacchā ‘‘na diṭṭhaṃ vā na sutaṃ vā’’ti vadati, ayaṃ avajānitvā paṭijānāti, paṭijānitvā avajānātīti veditabbo. Eseva aññenaññaṃ paṭicarati nāma.
३७५. वण्णावण्णोति नीलादिवण्णावण्णवसेन सुक्कविस्सट्ठिसिक्खापदं वुत्तं। वचनमनुप्पदानन्ति सञ्चरित्तं वुत्तं। कायसंसग्गादित्तयं सरूपेनेव वुत्तं। इति इमानि पञ्च मेथुनधम्मस्स पुब्बभागो पुब्बपयोगोति वेदितब्बानि।
375.Vaṇṇāvaṇṇoti nīlādivaṇṇāvaṇṇavasena sukkavissaṭṭhisikkhāpadaṃ vuttaṃ. Vacanamanuppadānanti sañcarittaṃ vuttaṃ. Kāyasaṃsaggādittayaṃ sarūpeneva vuttaṃ. Iti imāni pañca methunadhammassa pubbabhāgo pubbapayogoti veditabbāni.
३७६. चत्तारि अपलोकनकम्मानीति अधम्मेनवग्गादीनि। सेसेसुपि एसेव नयो। इति चत्तारि चतुक्कानि सोळस होन्ति।
376.Cattāri apalokanakammānīti adhammenavaggādīni. Sesesupi eseva nayo. Iti cattāri catukkāni soḷasa honti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. वोहरन्तेन जानितब्बादि • 1. Voharantena jānitabbādi
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / सङ्गामद्वयवण्णना • Saṅgāmadvayavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / वोहरन्तेनजानितब्बादिवण्णना • Voharantenajānitabbādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / वोहरन्तेन जानितब्बादिवण्णना • Voharantena jānitabbādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / वोहरन्तेन जानितब्बादिवण्णना • Voharantena jānitabbādivaṇṇanā
