| Library / Tipiṭaka / તિપિટક • Tipiṭaka / પાચિત્યાદિયોજનાપાળિ • Pācityādiyojanāpāḷi |
વોહારવગ્ગવણ્ણના
Vohāravaggavaṇṇanā
૪૨૪. ‘‘નેવ દેસનાય ન વુટ્ઠાનેના’’તિ ઇદં પારાજિકાપત્તિં સન્ધાય વુત્તં. દોસાનુરૂપન્તિ વત્થુસઙ્ખાતસ્સ દોસસ્સ અનુરૂપં.
424. ‘‘Neva desanāya na vuṭṭhānenā’’ti idaṃ pārājikāpattiṃ sandhāya vuttaṃ. Dosānurūpanti vatthusaṅkhātassa dosassa anurūpaṃ.
પયોગં ન જાનાતીતિ એત્થ સચે પયોગો મૂલેન વિસદિસો હુત્વા ભિન્નો હોતિ, એવં સતિ મૂલપયોગન્તિ ન વત્તબ્બન્તિ આહ ‘‘અધિકરણાનં હી’’તિઆદિ. હીતિ સચ્ચં, યસ્મા વા. મૂલમેવ પયોગા નામ હોન્તિ, ન અઞ્ઞન્તિ અધિપ્પાયો.
Payogaṃ na jānātīti ettha sace payogo mūlena visadiso hutvā bhinno hoti, evaṃ sati mūlapayoganti na vattabbanti āha ‘‘adhikaraṇānaṃ hī’’tiādi. Hīti saccaṃ, yasmā vā. Mūlameva payogā nāma honti, na aññanti adhippāyo.
કાતબ્બન્તિ ન જાનાતીતિ કાતબ્બં ઇતિ કમ્મસ્સ કરણં ન જાનાતીતિ યોજના. વત્થૂતિ ભણ્ડનકલહાદિવત્થુ, નિયસ્સાદીનં વત્થૂતિ સમ્બન્ધો . ચતુન્નન્તિ તજ્જનીયનિયસ્સપબ્બાજનીયપટિસારણીયવસેન ચતુન્નં. યાચતીતિ સઙ્ઘં કમ્મસ્સ વૂપસમં યાચતિ.
Kātabbanti na jānātīti kātabbaṃ iti kammassa karaṇaṃ na jānātīti yojanā. Vatthūti bhaṇḍanakalahādivatthu, niyassādīnaṃ vatthūti sambandho . Catunnanti tajjanīyaniyassapabbājanīyapaṭisāraṇīyavasena catunnaṃ. Yācatīti saṅghaṃ kammassa vūpasamaṃ yācati.
વત્થુન્તિ એત્થ આપત્તિક્ખન્ધાનમેવ વત્થુન્તિ આહ ‘‘સત્તન્નં આપત્તિક્ખન્ધાન’’ન્તિ. પદેસપઞ્ઞત્તિસબ્બત્થપઞ્ઞત્તિસાધારણપઞ્ઞત્તિઅસાધારણપઞ્ઞત્તિએકતોપઞ્ઞ- ત્તિઉભતોપઞ્ઞત્તિવસેન છન્નં પઞ્ઞત્તીનં પઞ્ઞત્તિયં પવિટ્ઠત્તા વુત્તં ‘‘તિવિધં પઞ્ઞત્તિ’’ન્તિ. ‘‘હેટ્ઠુપરિયં કત્વા પદં યોજેતી’’તિ ઇમિના પદપચ્ચાભટ્ઠન્તિ એત્થ પદાનં હેટ્ઠુપરિયવસેન પટિનિવત્તિત્વા આભસ્સનં ગળનં ચુતં પદપચ્ચાભટ્ઠન્તિ અત્થં દસ્સેતિ.
Vatthunti ettha āpattikkhandhānameva vatthunti āha ‘‘sattannaṃ āpattikkhandhāna’’nti. Padesapaññattisabbatthapaññattisādhāraṇapaññattiasādhāraṇapaññattiekatopañña- ttiubhatopaññattivasena channaṃ paññattīnaṃ paññattiyaṃ paviṭṭhattā vuttaṃ ‘‘tividhaṃ paññatti’’nti. ‘‘Heṭṭhupariyaṃ katvā padaṃ yojetī’’ti iminā padapaccābhaṭṭhanti ettha padānaṃ heṭṭhupariyavasena paṭinivattitvā ābhassanaṃ gaḷanaṃ cutaṃ padapaccābhaṭṭhanti atthaṃ dasseti.
વિનયેતિ એત્થ ન કેવલં પાળિયંયેવ, અથ ખો અટ્ઠકથાયમ્પીતિ આહ ‘‘વિનયપાળિયઞ્ચેવ અટ્ઠકથાયઞ્ચા’’તિ.
Vinayeti ettha na kevalaṃ pāḷiyaṃyeva, atha kho aṭṭhakathāyampīti āha ‘‘vinayapāḷiyañceva aṭṭhakathāyañcā’’ti.
ઞત્તિં ન જાનાતીતિ એત્થ ઞત્તિભેદં દસ્સેન્તો આહ ‘‘સઙ્ખેપતો’’તિઆદિ. તત્થાતિ દુવિધાસુ ઞત્તીસુ. કમ્મઞત્તીતિ અનુસ્સાવનકમ્મસ્સ ઠાને ઠિતા ઞત્તિ. અનુસ્સાવનકમ્મં નત્થિ, સયમેવ અનુસ્સાવનકમ્મટ્ઠાને ઠિતાતિ અત્થો. કમ્મપાદઞત્તીતિ અનુસ્સાવનકમ્મસ્સ પાદભૂતા મૂલભૂતા ઞત્તિ. નવસુ ઠાનેસૂતિ ઓસારણાદીસુ નવસુ ઠાનેસૂ. દ્વીસુ ઠાનેસૂતિ ઞત્તિદુતિયઞત્તિચતુત્થવસેન દ્વીસુ ઠાનેસુ, કમ્મપાદઞત્તિયા કરણં ન જાનાતીતિ સમ્બન્ધો. ય્વાયં ચતુબ્બિધો સમથોતિ યોજના. તન્તિ ચતુબ્બિધં સમથં. ઞત્તિયાતિ સામ્યત્થે સામિવચનં. યં અધિકરણં વૂપસમતીતિ સમ્બન્ધો. તસ્સાતિ અધિકરણસ્સ. તં વૂપસમં ન જાનાતીતિ સમ્બન્ધો.
Ñattiṃna jānātīti ettha ñattibhedaṃ dassento āha ‘‘saṅkhepato’’tiādi. Tatthāti duvidhāsu ñattīsu. Kammañattīti anussāvanakammassa ṭhāne ṭhitā ñatti. Anussāvanakammaṃ natthi, sayameva anussāvanakammaṭṭhāne ṭhitāti attho. Kammapādañattīti anussāvanakammassa pādabhūtā mūlabhūtā ñatti. Navasu ṭhānesūti osāraṇādīsu navasu ṭhānesū. Dvīsu ṭhānesūti ñattidutiyañatticatutthavasena dvīsu ṭhānesu, kammapādañattiyā karaṇaṃ na jānātīti sambandho. Yvāyaṃ catubbidho samathoti yojanā. Tanti catubbidhaṃ samathaṃ. Ñattiyāti sāmyatthe sāmivacanaṃ. Yaṃ adhikaraṇaṃ vūpasamatīti sambandho. Tassāti adhikaraṇassa. Taṃ vūpasamaṃ na jānātīti sambandho.
સુત્તં ન જાનાતીતિ એત્થ સુત્તસદ્દસ્સ કદાચિ કત્થચિ માતિકાયઞ્ચ સુત્તન્તપિટકે ચ પવત્તનતો ઇધ ઉભતોવિભઙ્ગેતિ આહ ‘‘ઉભતોવિભઙ્ગ’’ન્તિ. વિનયં ન જાનાતીતિ એત્થ વિનયસદ્દસ્સ સકલે વિનયપિટકે વત્તમાનસ્સાપિ સુત્તન્તિ એત્થ ઉભતોવિભઙ્ગસ્સ ગહિતત્તા ઇધ ખન્ધકપરિવારાવ ગહેતબ્બાતિ આહ ‘‘ખન્ધકપરિવારં ન જાનાતી’’તિ.
Suttaṃ na jānātīti ettha suttasaddassa kadāci katthaci mātikāyañca suttantapiṭake ca pavattanato idha ubhatovibhaṅgeti āha ‘‘ubhatovibhaṅga’’nti. Vinayaṃ na jānātīti ettha vinayasaddassa sakale vinayapiṭake vattamānassāpi suttanti ettha ubhatovibhaṅgassa gahitattā idha khandhakaparivārāva gahetabbāti āha ‘‘khandhakaparivāraṃ na jānātī’’ti.
વિનયં ન જાનાતીતિ એત્થ વિનયપિટકસ્સ ગહેતબ્બત્તા વુત્તં ‘‘ઠપેત્વા વિનયપિટક’’ન્તિ. સુત્તન્તિકે ચત્તારો મહાપદેસેતિ (દી॰ નિ॰ ૨.૧૮૭ આદયો; અ॰ નિ॰ ૪.૧૮૦) બુદ્ધાપદેસસઙ્ઘાપદેસસમ્બહુલત્થેરાપદેસએકત્થેરા પદેસવસેન ચત્તારો મહાપદેસે. એત્થાતિ પઞ્ચકે. યન્તિ વચનં. સબ્બત્થાતિ સબ્બેસુ પઞ્ચકેસુ.
Vinayaṃ na jānātīti ettha vinayapiṭakassa gahetabbattā vuttaṃ ‘‘ṭhapetvā vinayapiṭaka’’nti. Suttantike cattāro mahāpadeseti (dī. ni. 2.187 ādayo; a. ni. 4.180) buddhāpadesasaṅghāpadesasambahulattherāpadesaekattherā padesavasena cattāro mahāpadese. Etthāti pañcake. Yanti vacanaṃ. Sabbatthāti sabbesu pañcakesu.
ઇતિ
Iti
અનિસ્સિતવગ્ગ-નપ્પટિપ્પસ્સમ્ભનવગ્ગ-વોહારવગ્ગવણ્ણનાય
Anissitavagga-nappaṭippassambhanavagga-vohāravaggavaṇṇanāya
યોજના સમત્તા.
Yojanā samattā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૩. વોહારવગ્ગો • 3. Vohāravaggo
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / વોહારવગ્ગવણ્ણના • Vohāravaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / વોહારવગ્ગવણ્ણના • Vohāravaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / વોહારવગ્ગવણ્ણના • Vohāravaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / વોહારવગ્ગાદિવણ્ણના • Vohāravaggādivaṇṇanā
