| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༤. ཝུཊྛིསུཏྟཝཎྞནཱ
4. Vuṭṭhisuttavaṇṇanā
༧༤. ཨུཔྤཏནྟཱནནྟི པཐཝིཾ བྷིནྡིཏྭཱ ཨུཊྛཧནྟཱནཾ། ‘‘སེཊྛ’’ནྟི ཝུཙྩམཱནཏྟཱ ‘‘སཏྟཝིདྷ’’ནྟི ཝུཏྟཾ, ཨིཏརེསཾ ཝཱ ཏདནུལོམཏོ། ཁེམོ ཧོཏི དུབྦྷིཀྑུཔདྡཝཱབྷཱཝཏོ། ཏེནཱཧ ‘‘སུབྷིཀྑོ’’ཏི། ནིཔཏནྟཱནནྟི ཨདྷོམུཁཾ པཝཏྟནྟཱནཾ། པཝཛམཱནཱནནྟི ཝཛནསཱིལཱནཾ། ཏེ པན ཡསྨཱ ཛངྒམཱ ནཱམ ཧོནྟི, ན རུཀྑཱདཡོ ཝིཡ ཐཱཝརཱ, ཏསྨཱ ཨཱཧ ‘‘ཛངྒམཱན’’ནྟི། གཱཝོཏི དྷེནུཡོ། ཏེན མཧིཾསཱདིཀཱནམྤི སངྒཧོ དཊྛབྦོ། ཝདནྟཱནནྟི ཨུཔྤནྣཾ ཨཏྠཾ ཝདནྟཱནཾ།
74.Uppatantānanti pathaviṃ bhinditvā uṭṭhahantānaṃ. ‘‘Seṭṭha’’nti vuccamānattā ‘‘sattavidha’’nti vuttaṃ, itaresaṃ vā tadanulomato. Khemo hoti dubbhikkhupaddavābhāvato. Tenāha ‘‘subhikkho’’ti. Nipatantānanti adhomukhaṃ pavattantānaṃ. Pavajamānānanti vajanasīlānaṃ. Te pana yasmā jaṅgamā nāma honti, na rukkhādayo viya thāvarā, tasmā āha ‘‘jaṅgamāna’’nti. Gāvoti dhenuyo. Tena mahiṃsādikānampi saṅgaho daṭṭhabbo. Vadantānanti uppannaṃ atthaṃ vadantānaṃ.
ཨཏྟནོ ཁནྟིཡཱཏི ཨཏྟནོ ཁནྟིཡཱ རུཙིཡཱ གཧིཏབྷཱཝེན། ཨིཏརཱ དེཝཏཱ ཏསྶཱ ཝིསྶཛྫནེ ཨཔརིཏུསྶམཱནཱ ཨཱཧ། ཡཱཝ པདྷཾསཱིཏི གུཎདྷཾསཱི སཏྠུདེསནཱཡ ལདྡྷབྦགུཎནཱསནཏོ། པགབྦཱཏི པཱགབྦིཡེན སམནྣཱགཏཱ, ཡཐཱ ཝཙཱིཔཱགབྦིཡེན ཨཁརཱ, ཏཐཱ ཝཱཙཱཡ བྷཝིཏབྦཾ། མུཁརཱཏི མུཁཁརཱ། དསབལཾ པུཙྪི སཎྷཾ སུཁུམཾ རཏནཏྟཡསཾཧིཏཾ ཨཏྠཾ སོཏུཀཱམཱ། ཨསྶཱ དེཝཏཱཡ ཝིསྶཛྫེནྟོ ཨཛ྄ཛྷཱསཡཱནུརཱུཔཾ། ཨུཔྤཏམཱནཱཏི ཨུཔྤཏནྟཱི སམུགྒྷཱཊེཏི ཨོདྷིསོ། ཝཊྚམཱུལཀམཧཱཨཝིཛྫཱཏི ཏསྶཱ ཨཱདཱིནཝདསྶནཏྠཾ བྷཱུཏཀཐནཝིསེསནཾ། ཨོསཱིདནྟཱནནྟི པཊིཔཀྑཝསེན ཨདྷོ སཱིདནྟཱནཾ, ཨུསྶཱདཡམཱནཱནནྟི ཨཏྠོ། པུཉྙཀྑེཏྟབྷཱུཏོཏི ཨིདཾ ‘‘པདསཱ ཙརམཱནཱན’’ནྟི པདསྶ ཨཏྠཝིཝརཎཝསེན བྷཱུཏཀཐནཝིསེསནཾ། ཡཱདིསོ པུཏྟོ ཝཱ ཧོཏཱུཏི ཨིདཾ པུརིམཔདེ དེཝཏཱཡ པུཏྟགཧཎསྶ ཀཏཏྟཱ ཝུཏྟཾ།
Attanokhantiyāti attano khantiyā ruciyā gahitabhāvena. Itarā devatā tassā vissajjane aparitussamānā āha. Yāva padhaṃsīti guṇadhaṃsī satthudesanāya laddhabbaguṇanāsanato. Pagabbāti pāgabbiyena samannāgatā, yathā vacīpāgabbiyena akharā, tathā vācāya bhavitabbaṃ. Mukharāti mukhakharā. Dasabalaṃ pucchi saṇhaṃ sukhumaṃ ratanattayasaṃhitaṃ atthaṃ sotukāmā. Assā devatāya vissajjento ajjhāsayānurūpaṃ. Uppatamānāti uppatantī samugghāṭeti odhiso. Vaṭṭamūlakamahāavijjāti tassā ādīnavadassanatthaṃ bhūtakathanavisesanaṃ. Osīdantānanti paṭipakkhavasena adho sīdantānaṃ, ussādayamānānanti attho. Puññakkhettabhūtoti idaṃ ‘‘padasā caramānāna’’nti padassa atthavivaraṇavasena bhūtakathanavisesanaṃ. Yādiso putto vā hotūti idaṃ purimapade devatāya puttagahaṇassa katattā vuttaṃ.
ཝུཊྛིསུཏྟཝཎྞནཱ ནིཊྛིཏཱ།
Vuṭṭhisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༤. ཝུཊྛིསུཏྟཾ • 4. Vuṭṭhisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. ཝུཊྛིསུཏྟཝཎྞནཱ • 4. Vuṭṭhisuttavaṇṇanā
