| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ಯಮಕಸುತ್ತವಣ್ಣನಾ
3. Yamakasuttavaṇṇanā
೮೫. ದಿಟ್ಠಿ ಏವ ದಿಟ್ಠಿಗತಂ ‘‘ಗೂಥಗತಂ ಮುತ್ತಗತ’’ನ್ತಿ (ಮ॰ ನಿ॰ ೨.೧೧೯; ಅ॰ ನಿ॰ ೯.೧೧) ಯಥಾ। ದಿಟ್ಠಿಗತಂ ನಾಮ ಜಾತಂ ಖನ್ಧವಿನಿಮುತ್ತಸ್ಸ ಸತ್ತಸ್ಸ ಗಹಿತತ್ತಾ।
85. Diṭṭhi eva diṭṭhigataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Diṭṭhigataṃ nāma jātaṃ khandhavinimuttassa sattassa gahitattā.
ಕುಪಿತೇತಿ ದಿಟ್ಠಿಸಙ್ಖಾತರೋಗೇನ ಕುಪಿತೇ। ಪಗ್ಗಯ್ಹಾತಿ ತೇಸಂ ಭಿಕ್ಖೂನಂ ಸನ್ತಿಕೇ ವಿಯ ಥೇರಸ್ಸ ಸಾರಿಪುತ್ತಸ್ಸ ಸಮ್ಮುಖಾ ಅತ್ತನೋ ಲದ್ಧಿಂ ಪಗ್ಗಯ್ಹ ‘‘ಏವಂ ಖ್ವಾಹ’’ನ್ತಿ ಏವಂ ನಿಚ್ಛಯೇನ ವತ್ತುಂ ಅಸಕ್ಕೋನ್ತೋ।
Kupiteti diṭṭhisaṅkhātarogena kupite. Paggayhāti tesaṃ bhikkhūnaṃ santike viya therassa sāriputtassa sammukhā attano laddhiṃ paggayha ‘‘evaṃ khvāha’’nti evaṃ nicchayena vattuṃ asakkonto.
ಅನುಯೋಗವತ್ತಂ ನಾಮ ಯೇನ ಯುತ್ತೋ, ತಸ್ಸ ಅತ್ತನೋ ಗಾಹಂ ನಿಜ್ಝಾನಕ್ಖನ್ತಿಯಾವ ಯಾಥಾವತೋ ಪವೇದನಂ। ಥೇರಸ್ಸ ಅನುಯೋಗೇ ಭುಮ್ಮನ್ತಿ ‘‘ತಂ ಕಿಂ ಮಞ್ಞಸಿ, ಆವುಸೋ ಯಮಕಾ’’ತಿಆದಿನಾ ಥೇರೇನ ಕಥಿತಪುಚ್ಛಾಯ ಭುಮ್ಮನಿದ್ದೇಸೋ। ಸಚೇ ತಂ ಆವುಸೋತಿ ಇದನ್ತಿ ‘‘ಸಚೇ ತಂ, ಆವುಸೋ’’ತಿ ಏವಮಾದಿಕಂ ಇದಂ ವಚನಂ। ಏತನ್ತಿ ಯಮಕತ್ಥೇರಂ। ಅಞ್ಞನ್ತಿ ಅರಹತ್ತಂ। ವತ್ತಬ್ಬಾಕಾರೇನ ವದನ್ತೋ ಅತ್ಥತೋ ಅರಹತ್ತಂ ಬ್ಯಾಕರೋನ್ತೋ ನಾಮ ಹೋತೀತಿ ಅಧಿಪ್ಪಾಯೇನ ವದತಿ।
Anuyogavattaṃ nāma yena yutto, tassa attano gāhaṃ nijjhānakkhantiyāva yāthāvato pavedanaṃ. Therassa anuyoge bhummanti ‘‘taṃ kiṃ maññasi, āvuso yamakā’’tiādinā therena kathitapucchāya bhummaniddeso. Sace taṃ āvusoti idanti ‘‘sace taṃ, āvuso’’ti evamādikaṃ idaṃ vacanaṃ. Etanti yamakattheraṃ. Aññanti arahattaṃ. Vattabbākārena vadanto atthato arahattaṃ byākaronto nāma hotīti adhippāyena vadati.
ಏತಸ್ಸ ಪಠಮಮಗ್ಗಸ್ಸಾತಿ ಏತಸ್ಸ ಇದಾನಿಯೇವ ತಿಪರಿವಟ್ಟದೇಸನಾವಸಾನೇ ತಯಾ ಅಧಿಗತಸ್ಸ ಪಠಮಮಗ್ಗಸ್ಸ । ಚತೂಹಿ ಯೋಗೇಹೀತಿ ಅತ್ತತೋ ಪಿಯತೋ ಉದಾಸಿನತೋ ವೇರಿತೋತಿ ಚತೂಹಿಪಿ ಉಪ್ಪಜ್ಜನಅನತ್ಥಯೋಗೇಹಿ।
Etassa paṭhamamaggassāti etassa idāniyeva tiparivaṭṭadesanāvasāne tayā adhigatassa paṭhamamaggassa . Catūhi yogehīti attato piyato udāsinato veritoti catūhipi uppajjanaanatthayogehi.
ಉಪೇತೀತಿ ತಣ್ಹುಪಯದಿಟ್ಠುಪಯೇಹಿ ಉಪಾದಿಯತಿ ತಣ್ಹಾದಿಟ್ಠಿವತ್ಥುಂ ಪಪ್ಪೋತಿ। ಉಪಾದಿಯತೀತಿ ದಳ್ಹಗ್ಗಾಹಂ ಗಣ್ಹಾತಿ। ಅಧಿತಿಟ್ಠತೀತಿ ಅಭಿನಿವಿಸ್ಸ ತಿಟ್ಠತಿ। ಕಿನ್ತಿ? ‘‘ಅತ್ತಾ ಮೇ’’ತಿ। ಪಚ್ಚತ್ಥಿಕಾ ಮೇ ಏತೇತಿ ಏತೇ ರೂಪವೇದನಾದಯೋ ಪಞ್ಚುಪಾದಾನಕ್ಖನ್ಧಾ ಮಯ್ಹಂ ಪಚ್ಚತ್ಥಿಕಾ ಅನತ್ಥಾವಹತ್ತಾತಿ ವಿಪಸ್ಸನಾಞಾಣೇನ ಞತ್ವಾ। ವಿಪಸ್ಸನಾಯ ಯೋಜೇತ್ವಾತಿ ವಿಪಸ್ಸನಾಯ ಖನ್ಧೇ ಯೋಜೇತ್ವಾ।
Upetīti taṇhupayadiṭṭhupayehi upādiyati taṇhādiṭṭhivatthuṃ pappoti. Upādiyatīti daḷhaggāhaṃ gaṇhāti. Adhitiṭṭhatīti abhinivissa tiṭṭhati. Kinti? ‘‘Attā me’’ti. Paccatthikā me eteti ete rūpavedanādayo pañcupādānakkhandhā mayhaṃ paccatthikā anatthāvahattāti vipassanāñāṇena ñatvā. Vipassanāya yojetvāti vipassanāya khandhe yojetvā.
ಯಮಕಸುತ್ತವಣ್ಣನಾ ನಿಟ್ಠಿತಾ।
Yamakasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಯಮಕಸುತ್ತಂ • 3. Yamakasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಯಮಕಸುತ್ತವಣ್ಣನಾ • 3. Yamakasuttavaṇṇanā
