| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४. खत्तियावग्गो
4. Khattiyāvaggo
१. यसवतीपमुखअट्ठारसभिक्खुनीसहस्सअपदानं
1. Yasavatīpamukhaaṭṭhārasabhikkhunīsahassaapadānaṃ
१.
1.
‘‘भवा सब्बे परिक्खीणा, भवा सन्ति विमोचिता।
‘‘Bhavā sabbe parikkhīṇā, bhavā santi vimocitā;
सब्बासवा च नो नत्थि, आरोचेम महामुने॥
Sabbāsavā ca no natthi, ārocema mahāmune.
२.
2.
‘‘पुरिमं कुसलं कम्मं 1, यं किञ्चि साधुपत्थितं।
‘‘Purimaṃ kusalaṃ kammaṃ 2, yaṃ kiñci sādhupatthitaṃ;
परिभोगमयं दिन्नं, तुय्हत्थाय महामुने॥
Paribhogamayaṃ dinnaṃ, tuyhatthāya mahāmune.
३.
3.
परिभोगमयं दिन्नं, तुय्हत्थाय महामुने॥
Paribhogamayaṃ dinnaṃ, tuyhatthāya mahāmune.
४.
4.
‘‘उच्चनीचमयं कम्मं, भिक्खूनं साधुपत्थितं।
‘‘Uccanīcamayaṃ kammaṃ, bhikkhūnaṃ sādhupatthitaṃ;
५.
5.
‘‘तेनेव सुक्कमूलेन, चोदिता कम्मसम्पदा।
‘‘Teneva sukkamūlena, coditā kammasampadā;
मानुसिकमतिक्कन्ता, जायिंसु खत्तिये कुले॥
Mānusikamatikkantā, jāyiṃsu khattiye kule.
६.
6.
‘‘उप्पत्ते च कते कम्मे, जातिया वापि एकतो।
‘‘Uppatte ca kate kamme, jātiyā vāpi ekato;
पच्छिमे एकतो जाता, खत्तिया कुलसम्भवा॥
Pacchime ekato jātā, khattiyā kulasambhavā.
७.
7.
‘‘रूपवती भोगवती, लाभसक्कारपूजिता।
‘‘Rūpavatī bhogavatī, lābhasakkārapūjitā;
अन्तेपुरे महावीर, देवानं विय नन्दने॥
Antepure mahāvīra, devānaṃ viya nandane.
८.
8.
‘‘निब्बिन्दित्वा अगारम्हा, पब्बजिम्हनगारियं।
‘‘Nibbinditvā agāramhā, pabbajimhanagāriyaṃ;
कतिपाहं उपादाय, सब्बा पत्ताम्ह निब्बुतिं॥
Katipāhaṃ upādāya, sabbā pattāmha nibbutiṃ.
९.
9.
‘‘चीवरं पिण्डपातञ्च, पच्चयं सयनासनं।
‘‘Cīvaraṃ piṇḍapātañca, paccayaṃ sayanāsanaṃ;
उपनेन्ति बहू अम्हे, सदा सक्कतपूजिता॥
Upanenti bahū amhe, sadā sakkatapūjitā.
१०.
10.
‘‘किलेसा झापिता अम्हं, भवा सब्बे समूहता।
‘‘Kilesā jhāpitā amhaṃ, bhavā sabbe samūhatā;
नागीव बन्धनं छेत्वा, विहराम अनासवा॥
Nāgīva bandhanaṃ chetvā, viharāma anāsavā.
११.
11.
‘‘स्वागतं वत नो आसि, मम बुद्धस्स सन्तिके।
‘‘Svāgataṃ vata no āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
१२.
12.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं यसवतीपमुखानि खत्तियकञ्ञाभिक्खुनियो अट्ठारससहस्सानि भगवतो सम्मुखा इमा गाथायो अभासित्थाति।
Itthaṃ sudaṃ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
यसवतीपमुखअट्ठारसभिक्खुनीसहस्सापदानं पठमं।
Yasavatīpamukhaaṭṭhārasabhikkhunīsahassāpadānaṃ paṭhamaṃ.
Footnotes:
