| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. யோக³ஸுத்தவண்ணனா
10. Yogasuttavaṇṇanā
10. த³ஸமே வட்டஸ்மிங் யோஜெந்தீதி யோகா³. காமயோகோ³திஆதீ³ஸு பஞ்சகாமகு³ணிகோ ராகோ³ காமயோகோ³. ரூபாரூபப⁴வேஸு ச²ந்த³ராகோ³ ப⁴வயோகோ³, ததா² ஜா²னநிகந்தி. ஸஸ்ஸததி³ட்டி²ஸஹக³தோ ச ராகோ³ த்³வாஸட்டி² தி³ட்டி²யோ ச தி³ட்டி²யோகோ³. சதூஸு ஸச்சேஸு அஞ்ஞாணங் அவிஜ்ஜாயோகோ³. காமேஸு வா யோஜேதீதி காமயோகோ³. ப⁴வேஸு யோஜேதீதி ப⁴வயோகோ³. தி³ட்டீ²ஸு யோஜேதீதி தி³ட்டி²யோகோ³. அவிஜ்ஜாய யோஜேதீதி அவிஜ்ஜாயோகோ³தி ஹெட்டா² வுத்தத⁴ம்மானங்யேவேதங் அதி⁴வசனங்.
10. Dasame vaṭṭasmiṃ yojentīti yogā. Kāmayogotiādīsu pañcakāmaguṇiko rāgo kāmayogo. Rūpārūpabhavesu chandarāgo bhavayogo, tathā jhānanikanti. Sassatadiṭṭhisahagato ca rāgo dvāsaṭṭhi diṭṭhiyo ca diṭṭhiyogo. Catūsu saccesu aññāṇaṃ avijjāyogo. Kāmesu vā yojetīti kāmayogo. Bhavesu yojetīti bhavayogo. Diṭṭhīsu yojetīti diṭṭhiyogo. Avijjāya yojetīti avijjāyogoti heṭṭhā vuttadhammānaṃyevetaṃ adhivacanaṃ.
இதா³னி தே வித்தா²ரெத்வா த³ஸ்ஸெந்தோ கதமோ ச, பி⁴க்க²வேதிஆதி³மாஹ. தத்த² ஸமுத³யந்தி உப்பத்திங். அத்த²ங்க³மந்தி பே⁴த³ங். அஸ்ஸாத³ந்தி மது⁴ரபா⁴வங். ஆதீ³னவந்தி அமது⁴ரபா⁴வங் தோ³ஸங். நிஸ்ஸரணந்தி நிஸ்ஸடபா⁴வங். காமேஸூதி வத்து²காமேஸு. காமராகோ³தி காமே ஆரப்³ப⁴ உப்பன்னராகோ³. ஸேஸபதே³ஸுபி ஏஸேவ நயோ. அனுஸேதீதி நிப்³ப³த்ததி. அயங் வுச்சதி, பி⁴க்க²வே, காமயோகோ³தி, பி⁴க்க²வே, இத³ங் காமேஸு யோஜனகாரணங் ப³ந்த⁴னகாரணங் வுச்சதீதி ஏவங் ஸப்³ப³த்த² அத்தோ² வேதி³தப்³போ³.
Idāni te vitthāretvā dassento katamo ca, bhikkhavetiādimāha. Tattha samudayanti uppattiṃ. Atthaṅgamanti bhedaṃ. Assādanti madhurabhāvaṃ. Ādīnavanti amadhurabhāvaṃ dosaṃ. Nissaraṇanti nissaṭabhāvaṃ. Kāmesūti vatthukāmesu. Kāmarāgoti kāme ārabbha uppannarāgo. Sesapadesupi eseva nayo. Anusetīti nibbattati. Ayaṃ vuccati, bhikkhave, kāmayogoti, bhikkhave, idaṃ kāmesu yojanakāraṇaṃ bandhanakāraṇaṃ vuccatīti evaṃ sabbattha attho veditabbo.
ப²ஸ்ஸாயதனானந்தி சக்கா²தீ³னங் சக்கு²ஸம்ப²ஸ்ஸாதி³காரணானங். அவிஜ்ஜா அஞ்ஞாணந்தி ஞாணபடிபக்க²பா⁴வேன அஞ்ஞாணஸங்கா²தா அவிஜ்ஜா. இதி காமயோகோ³தி எத்த² இதி ஸத்³தோ³ சதூஹிபி யோகே³ஹி ஸத்³தி⁴ங் யோஜேதப்³போ³ ‘‘ஏவங் காமயோகோ³, ஏவங் ப⁴வயோகோ³’’தி. ஸங்யுத்தோதி பரிவாரிதோ. பாபகேஹீதி லாமகேஹி. அகுஸலேஹீதி அகோஸல்லஸம்பூ⁴தேஹி. ஸங்கிலேஸிகேஹீதி ஸங்கிலேஸனகேஹி, பஸன்னஸ்ஸ சித்தஸ்ஸ பஸன்னபா⁴வதூ³ஸகேஹீதி அத்தோ². போனொப்³ப⁴விகேஹீதி புனப்³ப⁴வனிப்³ப³த்தகேஹி. ஸத³ரேஹீதி ஸத³ரதே²ஹி. து³க்க²விபாகேஹீதி விபாககாலே து³க்கு²ப்பாத³கேஹி. ஆயதிங் ஜாதிஜராமரணிகேஹீதி அனாக³தே புனப்புனங் ஜாதிஜராமரணனிப்³ப³த்தகேஹி. தஸ்மா அயோக³க்கே²மீதி வுச்சதீதி யஸ்மா அப்பஹீனயோகோ³ புக்³க³லோ ஏதேஹி த⁴ம்மேஹி ஸம்பயுத்தோ ஹோதி, தஸ்மா சதூஹி யோகே³ஹி கே²மங் நிப்³பா³னங் அனதி⁴க³தத்தா ந யோக³க்கே²மீதி வுச்சதி.
Phassāyatanānanti cakkhādīnaṃ cakkhusamphassādikāraṇānaṃ. Avijjā aññāṇanti ñāṇapaṭipakkhabhāvena aññāṇasaṅkhātā avijjā. Iti kāmayogoti ettha iti saddo catūhipi yogehi saddhiṃ yojetabbo ‘‘evaṃ kāmayogo, evaṃ bhavayogo’’ti. Saṃyuttoti parivārito. Pāpakehīti lāmakehi. Akusalehīti akosallasambhūtehi. Saṃkilesikehīti saṃkilesanakehi, pasannassa cittassa pasannabhāvadūsakehīti attho. Ponobbhavikehīti punabbhavanibbattakehi. Sadarehīti sadarathehi. Dukkhavipākehīti vipākakāle dukkhuppādakehi. Āyatiṃ jātijarāmaraṇikehīti anāgate punappunaṃ jātijarāmaraṇanibbattakehi. Tasmāayogakkhemīti vuccatīti yasmā appahīnayogo puggalo etehi dhammehi sampayutto hoti, tasmā catūhi yogehi khemaṃ nibbānaṃ anadhigatattā na yogakkhemīti vuccati.
விஸங்யோகோ³தி விஸங்யோஜனகாரணானி. காமயோக³விஸங்யோகோ³தி காமயோக³தோ விஸங்யோஜனகாரணங். ஸேஸபதே³ஸுபி ஏஸேவ நயோ. தத்த² அஸுப⁴ஜ்ஜா²னங் காமயோக³விஸங்யோகோ³, தங் பாத³கங் கத்வா அதி⁴க³தோ அனாகா³மிமக்³கோ³ ஏகந்தேனேவ காமயோக³விஸங்யோகோ³ நாம. அரஹத்தமக்³கோ³ ப⁴வயோக³விஸங்யோகோ³ நாம, ஸோதாபத்திமக்³கோ³ தி³ட்டி²யோக³விஸங்யோகோ³ நாம, அரஹத்தமக்³கோ³ அவிஜ்ஜாயோக³விஸங்யோகோ³ நாம. இதா³னி தே வித்தா²ரவஸேன த³ஸ்ஸெந்தோ கதமோ ச, பி⁴க்க²வேதிஆதி³மாஹ. தஸ்ஸத்தோ² வுத்தனயேனேவ வேதி³தப்³போ³.
Visaṃyogoti visaṃyojanakāraṇāni. Kāmayogavisaṃyogoti kāmayogato visaṃyojanakāraṇaṃ. Sesapadesupi eseva nayo. Tattha asubhajjhānaṃ kāmayogavisaṃyogo, taṃ pādakaṃ katvā adhigato anāgāmimaggo ekanteneva kāmayogavisaṃyogo nāma. Arahattamaggo bhavayogavisaṃyogo nāma, sotāpattimaggo diṭṭhiyogavisaṃyogo nāma, arahattamaggo avijjāyogavisaṃyogo nāma. Idāni te vitthāravasena dassento katamo ca, bhikkhavetiādimāha. Tassattho vuttanayeneva veditabbo.
ப⁴வயோகே³ன சூப⁴யந்தி ப⁴வயோகே³ன ச ஸங்யுத்தா, கிஞ்சி பி⁴ய்யோ உப⁴யேனாபி ஸம்பயுத்தா, யேன கேனசி யோகே³ன ஸமன்னாக³தாதி அத்தோ². புரக்க²தாதி புரதோ கதா, பரிவாரிதா வா. காமே பரிஞ்ஞாயாதி து³விதே⁴பி காமே பரிஜானித்வா. ப⁴வயோக³ஞ்ச ஸப்³ப³ஸோதி ப⁴வயோக³ஞ்ச ஸப்³ப³மேவ பரிஜானித்வா. ஸமூஹச்சாதி ஸமூஹனித்வா. விராஜயந்தி விராஜெந்தோ, விராஜெத்வா வா. ‘‘விராஜெந்தோ’’தி ஹி வுத்தே மக்³கோ³ கதி²தோ ஹோதி, ‘‘விராஜெத்வா’’தி வுத்தே ப²லங். முனீதி கீ²ணாஸவமுனி. இதி இமஸ்மிங் ஸுத்தேபி கா³தா²ஸுபி வட்டவிவட்டமேவ கதி²தந்தி.
Bhavayogena cūbhayanti bhavayogena ca saṃyuttā, kiñci bhiyyo ubhayenāpi sampayuttā, yena kenaci yogena samannāgatāti attho. Purakkhatāti purato katā, parivāritā vā. Kāme pariññāyāti duvidhepi kāme parijānitvā. Bhavayogañca sabbasoti bhavayogañca sabbameva parijānitvā. Samūhaccāti samūhanitvā. Virājayanti virājento, virājetvā vā. ‘‘Virājento’’ti hi vutte maggo kathito hoti, ‘‘virājetvā’’ti vutte phalaṃ. Munīti khīṇāsavamuni. Iti imasmiṃ suttepi gāthāsupi vaṭṭavivaṭṭameva kathitanti.
ப⁴ண்ட³கா³மவக்³கோ³ பட²மோ.
Bhaṇḍagāmavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. யோக³ஸுத்தங் • 10. Yogasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. யோக³ஸுத்தவண்ணனா • 10. Yogasuttavaṇṇanā
