| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
3. யுத்திஹாரஸம்பாதவண்ணனா
3. Yuttihārasampātavaṇṇanā
65. ஏவங் நானானயேஹி விசயஹாரஸம்பாதங் வித்தா²ரெத்வா இதா³னி யுத்திஹாரஸம்பாதாதீ³னி த³ஸ்ஸேதுங் ‘‘தத்த² கதமோ யுத்திஹாரஸம்பாதோ’’திஆதி³ ஆரத்³த⁴ங். தத்த² ‘‘தஸ்மா ரக்கி²தசித்தஸ்ஸா’’தி கா³தா²ய பத³த்தோ² வித்தா²ரிதோயேவ. ரக்கி²தசித்தஸ்ஸ ஸம்மாஸங்கப்பகோ³சரோ ப⁴விஸ்ஸதீதி யுஜ்ஜதீதி மனச்ச²ட்டா²னி த்³வாரானி ஸதிகவாடேன பித³ஹித்வா விஹரந்தஸ்ஸ காமவிதக்காதீ³னங் மிச்சா²ஸங்கப்பானங் அவஸரோ ஏவ நத்தீ²தி நெக்க²ம்மவிதக்காதி³கோ ஸம்மாஸங்கப்போ ஏவ தஸ்ஸ கோ³சரோ பவத்திட்டா²னங் ப⁴விஸ்ஸதீதி அயமத்தோ² யுஜ்ஜதி. யுத்தியா க⁴டேதி ஸங்ஸந்த³தி ஸமேதீதி அத்தோ². ஸம்மாஸங்கப்பகோ³சரோ ஸம்மாதி³ட்டி² ப⁴விஸ்ஸதீதி வுத்தனயேன ஸம்மாஸங்கப்பகோ³சரோ புக்³க³லோ அவிபரீதமேவ விதக்கதோ ஸம்மாதி³ட்டி² ப⁴விஸ்ஸதி. ஸம்மாதி³ட்டி²ஸங்கா²தங் விபஸ்ஸனாஞாணங் புரக்க²த்வா விஹரந்தோ மக்³க³ஞாணேன பஞ்சன்னங் க²ந்தா⁴னங் உத³யப்³ப³யங் அஸம்மோஹதோ படிவிஜ்ஜி²ஸ்ஸதி. ததா² படிவிஜ்ஜ²ந்தோ ச து³க்க²ஸபா⁴வத்தா து³க்³க³திஸங்கா²தா ஸப்³பா³ ப⁴வக³தியோ ஜஹிஸ்ஸதி, ததோ ஏவ ஸப்³ப³ங் வினிபாதப⁴யங் ஸங்ஸாரப⁴யஞ்ச ஸமதிக்கமிஸ்ஸதீதி ஸப்³போ³பி சாயமத்தோ² யுத்தோ ஏவாதி.
65. Evaṃ nānānayehi vicayahārasampātaṃ vitthāretvā idāni yuttihārasampātādīni dassetuṃ ‘‘tattha katamo yuttihārasampāto’’tiādi āraddhaṃ. Tattha ‘‘tasmā rakkhitacittassā’’ti gāthāya padattho vitthāritoyeva. Rakkhitacittassa sammāsaṅkappagocaro bhavissatīti yujjatīti manacchaṭṭhāni dvārāni satikavāṭena pidahitvā viharantassa kāmavitakkādīnaṃ micchāsaṅkappānaṃ avasaro eva natthīti nekkhammavitakkādiko sammāsaṅkappo eva tassa gocaro pavattiṭṭhānaṃ bhavissatīti ayamattho yujjati. Yuttiyā ghaṭeti saṃsandati sametīti attho. Sammāsaṅkappagocaro sammādiṭṭhi bhavissatīti vuttanayena sammāsaṅkappagocaro puggalo aviparītameva vitakkato sammādiṭṭhi bhavissati. Sammādiṭṭhisaṅkhātaṃ vipassanāñāṇaṃ purakkhatvā viharanto maggañāṇena pañcannaṃ khandhānaṃ udayabbayaṃ asammohato paṭivijjhissati. Tathā paṭivijjhanto ca dukkhasabhāvattā duggatisaṅkhātā sabbā bhavagatiyo jahissati, tato eva sabbaṃ vinipātabhayaṃ saṃsārabhayañca samatikkamissatīti sabbopi cāyamattho yutto evāti.
யுத்திஹாரஸம்பாதவண்ணனா நிட்டி²தா.
Yuttihārasampātavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 3. யுத்திஹாரஸம்பாதோ • 3. Yuttihārasampāto
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 3. யுத்திஹாரஸம்பாதவண்ணனா • 3. Yuttihārasampātavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 3. யுத்திஹாரஸம்பாதவிபா⁴வனா • 3. Yuttihārasampātavibhāvanā
