| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. અન્ધકવિન્દસુત્તવણ્ણના
3. Andhakavindasuttavaṇṇanā
૧૮૪. જનતન્તિ જનાનં સમૂહં, જનસઞ્ચરણટ્ઠાનન્તિ અત્થો. મનુસ્સાનં અનુપચારેતિ યત્તકે કસનાદિકિચ્ચં કરોન્તાનં સઞ્ચારો હોતિ, એત્તકં અતિક્કમિત્વા અનુપચારે. સંયોજનવિપ્પમોક્ખાતિ સંયોજનવિમોક્ખહેતુ. વિવેકરતિં પવિવેકસુખજ્ઝાનં અલભન્તો. ચિત્તાનુરક્ખણત્થન્તિ પુબ્બે મં મનુસ્સા ‘‘અરઞ્ઞવાસેન પવિવિત્તો અસંસટ્ઠો આરદ્ધવીરિયો’’તિ મઞ્ઞિંસુ, ઇદાનિ ગામન્તે વસન્તં દિસ્વા ગણસઙ્ગણિકાય નિવુટ્ઠોતિ અપ્પસાદં આપજ્જિસ્સન્તિ. યદિપિ મે ઇધ અભિરતિ નત્થિ, એવં સન્તેપિ ઇધેવ વસિસ્સામીતિ વિક્ખિત્તચિત્તેન હુત્વા ન વસિતબ્બં, કો અત્થો ચિત્તવસં ગન્ત્વાતિ અધિપ્પાયો. સતિપટ્ઠાનપરાયણોતિ સતિપટ્ઠાનભાવનારતો. એવં હિસ્સ ગણવાસોપિ પાસંસો વિવેકવાસેન વિના સમણકિચ્ચસ્સ અસિજ્ઝનતો.
184.Janatanti janānaṃ samūhaṃ, janasañcaraṇaṭṭhānanti attho. Manussānaṃ anupacāreti yattake kasanādikiccaṃ karontānaṃ sañcāro hoti, ettakaṃ atikkamitvā anupacāre. Saṃyojanavippamokkhāti saṃyojanavimokkhahetu. Vivekaratiṃ pavivekasukhajjhānaṃ alabhanto. Cittānurakkhaṇatthanti pubbe maṃ manussā ‘‘araññavāsena pavivitto asaṃsaṭṭho āraddhavīriyo’’ti maññiṃsu, idāni gāmante vasantaṃ disvā gaṇasaṅgaṇikāya nivuṭṭhoti appasādaṃ āpajjissanti. Yadipi me idha abhirati natthi, evaṃ santepi idheva vasissāmīti vikkhittacittena hutvā na vasitabbaṃ, ko attho cittavasaṃ gantvāti adhippāyo. Satipaṭṭhānaparāyaṇoti satipaṭṭhānabhāvanārato. Evaṃ hissa gaṇavāsopi pāsaṃso vivekavāsena vinā samaṇakiccassa asijjhanato.
વટ્ટભયતો પમુત્તો અજ્ઝાસયવસેનાતિ અધિપ્પાયો.
Vaṭṭabhayato pamutto ajjhāsayavasenāti adhippāyo.
નિસીદિ તત્થ ભિક્ખૂતિ ઇમિના સત્તૂપલદ્ધિયા અનિસ્સિતત્તા યથારુચિયા તેસં નિસજ્જં દસ્સેતિ. તેનાહ ‘‘ઇમિના’’તિઆદિ.
Nisīdi tattha bhikkhūti iminā sattūpaladdhiyā anissitattā yathāruciyā tesaṃ nisajjaṃ dasseti. Tenāha ‘‘iminā’’tiādi.
ઇમિના ચ ઇમિના ચ આકારેન જાતન્તિ ન અનુસ્સવદસ્સનમેતં, ન અનુસ્સવગ્ગહણં. તક્કહેતુ નયહેતુ વા ન વદામીતિ યોજના. પિટકં ગન્થો સમ્પદીયતિ એતસ્સાતિ પિટકસમ્પદાનં, ગન્થસ્સ ઉગ્ગણ્હનતો તેન પિટકસ્સ ઉગ્ગણ્હનકભાવેન, કેનચિ ગન્થાનુસારેન એવં ન વદામીતિ અત્થો. બ્રહ્મસ્સ સેટ્ઠસ્સ ધમ્મસ્સ ચરિયં વાચસિકં પવત્તતીતિ બ્રહ્મચરિયં, ધમ્મદેસના. ભાવિતેન મરણસ્સ સબ્બસો ભાગેન વિપ્પહાનેન મરણપરિચ્ચાગીનં. તે ચ ખીણજાતિકાતિ આહ ‘‘ખીણાસવાન’’ન્તિ.
Iminā ca iminā ca ākārena jātanti na anussavadassanametaṃ, na anussavaggahaṇaṃ. Takkahetu nayahetu vā na vadāmīti yojanā. Piṭakaṃ gantho sampadīyati etassāti piṭakasampadānaṃ, ganthassa uggaṇhanato tena piṭakassa uggaṇhanakabhāvena, kenaci ganthānusārena evaṃ na vadāmīti attho. Brahmassa seṭṭhassa dhammassa cariyaṃ vācasikaṃ pavattatīti brahmacariyaṃ, dhammadesanā. Bhāvitena maraṇassa sabbaso bhāgena vippahānena maraṇapariccāgīnaṃ. Te ca khīṇajātikāti āha ‘‘khīṇāsavāna’’nti.
દસધા દસાતિ દસક્ખત્તું દસ. અઞ્ઞન્તિ પઞ્ચસતાધિકસહસ્સતો અઞ્ઞં. પુઞ્ઞભાગિનોતિ વિવટ્ટનિસ્સિતપુઞ્ઞસ્સ ભાગિનો તસ્સા દેસનાય એત્તકા સત્તા જાતાતિ ગણેતું અહં ન સક્કોમીતિ દસ્સેતિ. બ્રહ્મધમ્મદેસનન્તિ બ્રહ્મુના વુત્તં આહ.
Dasadhādasāti dasakkhattuṃ dasa. Aññanti pañcasatādhikasahassato aññaṃ. Puññabhāginoti vivaṭṭanissitapuññassa bhāgino tassā desanāya ettakā sattā jātāti gaṇetuṃ ahaṃ na sakkomīti dasseti. Brahmadhammadesananti brahmunā vuttaṃ āha.
અન્ધકવિન્દસુત્તવણ્ણના નિટ્ઠિતા.
Andhakavindasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. અન્ધકવિન્દસુત્તં • 3. Andhakavindasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. અન્ધકવિન્દસુત્તવણ્ણના • 3. Andhakavindasuttavaṇṇanā
