Library / Tipiṭaka / તિપિટક • Tipiṭaka / પરિવાર-અટ્ઠકથા • Parivāra-aṭṭhakathā |
સેદમોચનગાથા
Sedamocanagāthā
(૧) અવિપ્પવાસપઞ્હાવણ્ણના
(1) Avippavāsapañhāvaṇṇanā
૪૭૯. સેદમોચનગાથાસુ અસંવાસોતિ ઉપોસથપવારણાદિના સંવાસેન અસંવાસો. સમ્ભોગો એકચ્ચો તહિં ન લબ્ભતીતિ અકપ્પિયસમ્ભોગો ન લબ્ભતિ, નહાપનભોજનાદિપટિજગ્ગનં પન માતરાયેવ કાતું લબ્ભતિ. અવિપ્પવાસેન અનાપત્તીતિ સહગારસેય્યાય અનાપત્તિ. પઞ્હા મેસા કુસલેહિ ચિન્તિતાતિ એસા પઞ્હા કુસલેહિ પણ્ડિતેહિ ચિન્તિતા. અસ્સા વિસ્સજ્જનં દારકમાતુયા ભિક્ખુનિયા વેદિતબ્બં, તસ્સા હિ પુત્તં સન્ધાયેતં વુત્તન્તિ.
479. Sedamocanagāthāsu asaṃvāsoti uposathapavāraṇādinā saṃvāsena asaṃvāso. Sambhogo ekacco tahiṃ na labbhatīti akappiyasambhogo na labbhati, nahāpanabhojanādipaṭijagganaṃ pana mātarāyeva kātuṃ labbhati. Avippavāsena anāpattīti sahagāraseyyāya anāpatti. Pañhā mesā kusalehi cintitāti esā pañhā kusalehi paṇḍitehi cintitā. Assā vissajjanaṃ dārakamātuyā bhikkhuniyā veditabbaṃ, tassā hi puttaṃ sandhāyetaṃ vuttanti.
અવિસ્સજ્જિતગાથા ગરુભણ્ડં સન્ધાય વુત્તા, અત્થો પનસ્સા ગરુભણ્ડવિનિચ્છયે વુત્તોયેવ.
Avissajjitagāthā garubhaṇḍaṃ sandhāya vuttā, attho panassā garubhaṇḍavinicchaye vuttoyeva.
દસ પુગ્ગલે ન વદામીતિ સેનાસનક્ખન્ધકે વુત્તે દસ પુગ્ગલે ન વદામિ. એકાદસ વિવજ્જિયાતિ યે મહાખન્ધકે એકાદસ વિવજ્જનીયપુગ્ગલા વુત્તા, તેપિ ન વદામિ. અયં પઞ્હા નગ્ગં ભિક્ખું સન્ધાય વુત્તા.
Dasa puggale na vadāmīti senāsanakkhandhake vutte dasa puggale na vadāmi. Ekādasa vivajjiyāti ye mahākhandhake ekādasa vivajjanīyapuggalā vuttā, tepi na vadāmi. Ayaṃ pañhā naggaṃ bhikkhuṃ sandhāya vuttā.
કથં નુ સિક્ખાય અસાધારણોતિ પઞ્હા નહાપિતપુબ્બકં ભિક્ખું સન્ધાય વુત્તા. અયઞ્હિ ખુરભણ્ડં પરિહરિતું ન લભતિ, અઞ્ઞે લભન્તિ; તસ્મા સિક્ખાય અસાધારણો.
Kathaṃ nu sikkhāya asādhāraṇoti pañhā nahāpitapubbakaṃ bhikkhuṃ sandhāya vuttā. Ayañhi khurabhaṇḍaṃ pariharituṃ na labhati, aññe labhanti; tasmā sikkhāya asādhāraṇo.
તં પુગ્ગલં કતમં વદન્તિ બુદ્ધાતિ અયં પઞ્હા નિમ્મિતબુદ્ધં સન્ધાય વુત્તા.
Taṃ puggalaṃ katamaṃ vadanti buddhāti ayaṃ pañhā nimmitabuddhaṃ sandhāya vuttā.
અધોનાભિં વિવજ્જિયાતિ અધોનાભિં વિવજ્જેત્વા. અયં પઞ્હા યં તં અસીસકં કબન્ધં, યસ્સ ઉરે અક્ખીનિ ચેવ મુખઞ્ચ હોતિ, તં સન્ધાય વુત્તા.
Adhonābhiṃvivajjiyāti adhonābhiṃ vivajjetvā. Ayaṃ pañhā yaṃ taṃ asīsakaṃ kabandhaṃ, yassa ure akkhīni ceva mukhañca hoti, taṃ sandhāya vuttā.
ભિક્ખુ સઞ્ઞાચિકાય કુટિન્તિ અયં પઞ્હા તિણચ્છાદનં કુટિં સન્ધાય વુત્તા. દુતિયપઞ્હા સબ્બમત્તિકામયં કુટિં સન્ધાય વુત્તા.
Bhikkhu saññācikāya kuṭinti ayaṃ pañhā tiṇacchādanaṃ kuṭiṃ sandhāya vuttā. Dutiyapañhā sabbamattikāmayaṃ kuṭiṃ sandhāya vuttā.
આપજ્જેય્ય ગરુકં છેજ્જવત્થુન્તિ અયં પઞ્હા વજ્જપટિચ્છાદિકં ભિક્ખુનિં સન્ધાય વુત્તા. દુતિયપઞ્હા પણ્ડકાદયો અભબ્બપુગ્ગલે સન્ધાય વુત્તા. એકાદસપિ હિ તે ગિહિભાવેયેવ પારાજિકં પત્તા.
Āpajjeyya garukaṃ chejjavatthunti ayaṃ pañhā vajjapaṭicchādikaṃ bhikkhuniṃ sandhāya vuttā. Dutiyapañhā paṇḍakādayo abhabbapuggale sandhāya vuttā. Ekādasapi hi te gihibhāveyeva pārājikaṃ pattā.
વાચાતિ વાચાય અનાલપન્તો. ગિરં નો ચ પરે ભણેય્યાતિ ‘‘ઇતિ ઇમે સોસ્સન્તી’’તિ પરપુગ્ગલે સન્ધાય સદ્દમ્પિ ન નિચ્છારેય્ય. અયં પઞ્હા ‘‘સન્તિં આપત્તિં નાવિકરેય્ય, સમ્પજાનમુસાવાદસ્સ હોતી’’તિ ઇમં મુસાવાદં સન્ધાય વુત્તા. તસ્સ હિ ભિક્ખુનો અધમ્મિકાય પટિઞ્ઞાય તુણ્હીભૂતસ્સ નિસિન્નસ્સ મનોદ્વારે આપત્તિ નામ નત્થિ. યસ્મા પન આવિકાતબ્બં ન આવિકરોતિ, તેનસ્સ વચીદ્વારે અકિરિયતો અયં આપત્તિ સમુટ્ઠાતીતિ વેદિતબ્બા.
Vācāti vācāya anālapanto. Giraṃ no ca pare bhaṇeyyāti ‘‘iti ime sossantī’’ti parapuggale sandhāya saddampi na nicchāreyya. Ayaṃ pañhā ‘‘santiṃ āpattiṃ nāvikareyya, sampajānamusāvādassa hotī’’ti imaṃ musāvādaṃ sandhāya vuttā. Tassa hi bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi. Yasmā pana āvikātabbaṃ na āvikaroti, tenassa vacīdvāre akiriyato ayaṃ āpatti samuṭṭhātīti veditabbā.
સઙ્ઘાદિસેસા ચતુરોતિ અયં પઞ્હા અરુણુગ્ગે ગામન્તરપરિયાપન્નં નદિપારં ઓક્કન્તભિક્ખુનિં સન્ધાય વુત્તા, સા હિ સકગામતો પચ્ચૂસસમયે નિક્ખમિત્વા અરુણુગ્ગમનકાલે વુત્તપ્પકારં નદિપારં ઓક્કન્તમત્તાવ રત્તિવિપ્પવાસગામન્તરનદિપારગણમ્હાઓહીયનલક્ખણેન એકપ્પહારેનેવ ચતુરો સઙ્ઘાદિસેસે આપજ્જતિ.
Saṅghādisesā caturoti ayaṃ pañhā aruṇugge gāmantarapariyāpannaṃ nadipāraṃ okkantabhikkhuniṃ sandhāya vuttā, sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragaṇamhāohīyanalakkhaṇena ekappahāreneva caturo saṅghādisese āpajjati.
સિયા આપત્તિયો નાનાતિ અયં પઞ્હા એકતોઉપસમ્પન્ના દ્વે ભિક્ખુનિયો સન્ધાય વુત્તા. તાસુ હિ ભિક્ખૂનં સન્તિકે એકતોઉપસમ્પન્નાય હત્થતો ગણ્હન્તસ્સ પાચિત્તિયં, ભિક્ખુનીનં સન્તિકે એકતોઉપસમ્પન્નાય હત્થતો ગણ્હન્તસ્સ દુક્કટં.
Siyā āpattiyo nānāti ayaṃ pañhā ekatoupasampannā dve bhikkhuniyo sandhāya vuttā. Tāsu hi bhikkhūnaṃ santike ekatoupasampannāya hatthato gaṇhantassa pācittiyaṃ, bhikkhunīnaṃ santike ekatoupasampannāya hatthato gaṇhantassa dukkaṭaṃ.
ચતુરો જના સંવિધાયાતિ આચરિયો ચ તયો ચ અન્તેવાસિકા છમાસકં ભણ્ડં અવહરિંસુ, આચરિયસ્સ સાહત્થિકા તયો માસકા, આણત્તિયાપિ તયોવ તસ્મા થુલ્લચ્ચયં આપજ્જતિ , ઇતરેસં સાહત્થિકો એકેકો, આણત્તિકા પઞ્ચાતિ તસ્મા પારાજિકં આપજ્જિંસુ. અયમેત્થ સઙ્ખેપો. વિત્થારો પન અદિન્નાદાનપારાજિકે સંવિદાવહારવણ્ણનાયં વુત્તો.
Caturo janā saṃvidhāyāti ācariyo ca tayo ca antevāsikā chamāsakaṃ bhaṇḍaṃ avahariṃsu, ācariyassa sāhatthikā tayo māsakā, āṇattiyāpi tayova tasmā thullaccayaṃ āpajjati , itaresaṃ sāhatthiko ekeko, āṇattikā pañcāti tasmā pārājikaṃ āpajjiṃsu. Ayamettha saṅkhepo. Vitthāro pana adinnādānapārājike saṃvidāvahāravaṇṇanāyaṃ vutto.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૧. અવિપ્પવાસપઞ્હા • 1. Avippavāsapañhā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / અવિપ્પવાસાદિપઞ્હવણ્ણના • Avippavāsādipañhavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / અવિપ્પવાસપઞ્હાવણ્ણના • Avippavāsapañhāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / અવિપ્પવાસપઞ્હાવણ્ણના • Avippavāsapañhāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / (૧) અવિપ્પવાસપઞ્હાવણ્ણના • (1) Avippavāsapañhāvaṇṇanā