สํยุตฺต นิกาย ๓๕ฯ๑๒

๑ฯ อนิจฺจวคฺค

พาหิรานตฺตาตีตานาคตสุตฺต

“รูปา, ภิกฺขเว, อนตฺตา อตีตานาคตา; โก ปน วาโท ปจฺจุปฺปนฺนานํฯ

เอวํ ปสฺสํ, ภิกฺขเว, สุตวา อริยสาวโก อตีเตสุ รูเปสุ อนเปกฺโข โหติ; อนาคเต รูเป นาภินนฺทติ; ปจฺจุปฺปนฺนานํ รูปานํ นิพฺพิทาย วิราคาย นิโรธาย ปฏิปนฺโน โหติฯ สทฺทา … คนฺธา … รสา … โผฏฺฐพฺพา … ธมฺมา อนตฺตา อตีตานาคตา; โก ปน วาโท ปจฺจุปฺปนฺนานํฯ

เอวํ ปสฺสํ, ภิกฺขเว, สุตวา อริยสาวโก อตีเตสุ ธมฺเมสุ อนเปกฺโข โหติ; อนาคเต ธมฺเม นาภินนฺทติ; ปจฺจุปฺปนฺนานํ ธมฺมานํ นิพฺพิทาย วิราคาย นิโรธาย ปฏิปนฺโน โหตี”ติฯ

ทฺวาทสมํฯ

อนิจฺจวคฺโค ปฐโมฯ

ตสฺสุทฺทานํ

อนิจฺจํ ทุกฺขํ อนตฺตา จ, ตโย อชฺฌตฺตพาหิรา; ยทนิจฺเจน ตโย วุตฺตา, เต เต อชฺฌตฺตพาหิราติฯ