| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. பா⁴ரவக்³கோ³
3. Bhāravaggo
1. பா⁴ரஸுத்தவண்ணனா
1. Bhārasuttavaṇṇanā
22. உபாதா³னானங் ஆரம்மணபூ⁴தா க²ந்தா⁴ உபாதா³னக்க²ந்தா⁴. பரிஹாரபா⁴ரியட்டே²னாதி பரிஹாரஸ்ஸ பா⁴ரியபா⁴வேன க³ருதரபா⁴வேன. வுத்தமேவ அத்த²ங் பாகடங் காதுங் ‘‘ஏதேஸஞ்ஹீ’’திஆதி³மாஹ. தத்த² யஸ்மா ஏதானி டா²னக³மனாதீ³னி ரூபாரூபத⁴ம்மானங் பங்கு³லஜச்சந்தா⁴னங் விய அஞ்ஞமஞ்ஞூபஸ்ஸயவஸேன இஜ்ஜ²ந்தி, ந பச்சேகங், தஸ்மா ‘‘ஏதேஸ’’ந்தி அவிஸேஸவசனங் கதங். புக்³க³லந்தி க²ந்த⁴ஸந்தானங் வத³தி. க²ந்த⁴ஸந்தானோ ஹி அவிச்சே²தே³ன பவத்தமானோ யாவ பரினிப்³பா³னா க²ந்த⁴பா⁴ரங் வஹந்தோ விய லோகே கா²யதி தப்³பி³னிமுத்தஸ்ஸ ஸத்தஸ்ஸ அபா⁴வதோ. தேனாஹ ‘‘புக்³க³லோ’’திஆதி³. பா⁴ரஹாரோதி ஜாதோதி பா⁴ரஹாரோ நாம ஜாதோ.
22. Upādānānaṃ ārammaṇabhūtā khandhā upādānakkhandhā. Parihārabhāriyaṭṭhenāti parihārassa bhāriyabhāvena garutarabhāvena. Vuttameva atthaṃ pākaṭaṃ kātuṃ ‘‘etesañhī’’tiādimāha. Tattha yasmā etāni ṭhānagamanādīni rūpārūpadhammānaṃ paṅgulajaccandhānaṃ viya aññamaññūpassayavasena ijjhanti, na paccekaṃ, tasmā ‘‘etesa’’nti avisesavacanaṃ kataṃ. Puggalanti khandhasantānaṃ vadati. Khandhasantāno hi avicchedena pavattamāno yāva parinibbānā khandhabhāraṃ vahanto viya loke khāyati tabbinimuttassa sattassa abhāvato. Tenāha ‘‘puggalo’’tiādi. Bhārahāroti jātoti bhārahāro nāma jāto.
புனப்³ப⁴வகரணங் புனப்³ப⁴வோ, தங் ப²லங் அரஹதி, தத்த² நியுத்தாதி வா போனோப⁴விகா. தப்³பா⁴வஸஹக³தங் யதா² ‘‘ஸனித³ஸ்ஸனா த⁴ம்மா’’தி, ந ஸங்ஸட்ட²ஸஹக³தங், நாபி ஆரம்மணஸஹக³தங். ‘‘தத்ர தத்ரா’’தி யங் யங் உப்பத்திட்டா²னங், ரூபாதி³ஆரம்மணங் வா பத்வா தத்ரதத்ராபி⁴னந்தி³னீ. தேனாஹ ‘‘உபபத்திட்டா²னே வா’’திஆதி³. பஞ்சகாமகு³ணிகோதி பஞ்சகாமகு³ணாரம்மணோ. ரூபாரூபூபபத்திப⁴வே ராகோ³ ரூபாரூபப⁴வராகோ³. ஜா²னநிகந்தி ஜா²னஸங்கா²தே கம்மப⁴வே ராகோ³. ஸஸ்ஸதாதி³ட்டீ²தி ப⁴வதி³ட்டி², தங்ஸஹக³தோ ராகோ³. அயந்தி ராகோ³ ப⁴வதண்ஹா நாம. உச்சே²த³தி³ட்டி² விப⁴வதி³ட்டி² நாம, தங்ஸஹக³தோ ச²ந்த³ராகோ³ விப⁴வதண்ஹா நாம. ஏஸ புக்³க³லோ க²ந்த⁴பா⁴ரங் ஆதி³யதி தண்ஹாவஸேன படிஸந்தி⁴க்³க³ஹணதோ. ‘‘அஸேஸமெத்த² தண்ஹா விரஜ்ஜதி பலுஜ்ஜதி நிருஜ்ஜ²தி பஹீயதீ’’திஆதி³னா ஸப்³ப³பதா³னி நிப்³பா³னவஸேனேவ வேதி³தப்³பா³னீதி ஆஹ ‘‘ஸப்³ப³ங் நிப்³பா³னஸ்ஸேவ வேவசன’’ந்தி.
Punabbhavakaraṇaṃ punabbhavo, taṃ phalaṃ arahati, tattha niyuttāti vā ponobhavikā. Tabbhāvasahagataṃ yathā ‘‘sanidassanā dhammā’’ti, na saṃsaṭṭhasahagataṃ, nāpi ārammaṇasahagataṃ. ‘‘Tatra tatrā’’ti yaṃ yaṃ uppattiṭṭhānaṃ, rūpādiārammaṇaṃ vā patvā tatratatrābhinandinī. Tenāha ‘‘upapattiṭṭhāne vā’’tiādi. Pañcakāmaguṇikoti pañcakāmaguṇārammaṇo. Rūpārūpūpapattibhave rāgo rūpārūpabhavarāgo. Jhānanikanti jhānasaṅkhāte kammabhave rāgo. Sassatādiṭṭhīti bhavadiṭṭhi, taṃsahagato rāgo. Ayanti rāgo bhavataṇhā nāma. Ucchedadiṭṭhi vibhavadiṭṭhi nāma, taṃsahagato chandarāgo vibhavataṇhā nāma. Esa puggalo khandhabhāraṃ ādiyati taṇhāvasena paṭisandhiggahaṇato. ‘‘Asesamettha taṇhā virajjati palujjati nirujjhati pahīyatī’’tiādinā sabbapadāni nibbānavaseneva veditabbānīti āha ‘‘sabbaṃ nibbānasseva vevacana’’nti.
பா⁴ரஸுத்தவண்ணனா நிட்டி²தா.
Bhārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பா⁴ரஸுத்தங் • 1. Bhārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பா⁴ரஸுத்தவண்ணனா • 1. Bhārasuttavaṇṇanā
