| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૧૧. સોતાપત્તિસંયુત્તં
11. Sotāpattisaṃyuttaṃ
૧. વેળુદ્વારવગ્ગો
1. Veḷudvāravaggo
૧. ચક્કવત્તિરાજસુત્તવણ્ણના
1. Cakkavattirājasuttavaṇṇanā
૯૯૭. અનુગ્ગહગરહણેસુ નિપાતોતિ અનુગ્ગણ્હનગરહત્થજોતકો નિપાતો. કિમેત્થ અનુગ્ગણ્હાતિ, કિં વા ગરહતીતિ આહ ‘‘ચતુન્ન’’ન્તિઆદિ. તત્થ અનુગ્ગણ્હન્તો અનુચ્છવિકં કત્વા ગણ્હન્તો. ગરહન્તો નિન્દન્તો. ઇસ્સરસીલો ઇસ્સરો, તસ્સ ભાવો ઇસ્સરિયં, પભુતા. અધીનં પતિ અધિપતિ, તસ્સ ભાવો આધિપચ્ચં, સામિભાવોતિ આહ – ‘‘ઇસ્સરિયાધિપચ્ચ’’ન્તિઆદિ. અનન્તકાનીતિ અન્તરહિતાનિ.
997.Anuggahagarahaṇesunipātoti anuggaṇhanagarahatthajotako nipāto. Kimettha anuggaṇhāti, kiṃ vā garahatīti āha ‘‘catunna’’ntiādi. Tattha anuggaṇhanto anucchavikaṃ katvā gaṇhanto. Garahanto nindanto. Issarasīlo issaro, tassa bhāvo issariyaṃ, pabhutā. Adhīnaṃ pati adhipati, tassa bhāvo ādhipaccaṃ, sāmibhāvoti āha – ‘‘issariyādhipacca’’ntiādi. Anantakānīti antarahitāni.
અવેચ્ચપ્પસાદેનાતિ વત્થુત્તયસ્સ ગુણે યાથાવતો અવેચ્ચ પવિસિત્વા પસાદો. સો પન કેનચિ ચલનરહિતોતિ આહ ‘‘અચલપ્પસાદેના’’તિ. મગ્ગેનાતિ અરિયમગ્ગેન. આગતપ્પસાદો તસ્સ અધિગમેન લદ્ધપ્પસાદો. અપુબ્બં અચરિમન્તિ એકજ્ઝં. અરિયસાવકાનઞ્હિ અરિયમગ્ગો ઉપ્પજ્જન્તોવ તીસુ વત્થૂસુ અવેચ્ચપ્પસાદં આવહન્તો એવ ઉપ્પજ્જતિ. તેસન્તિ વિસયભૂતાનં તિણ્ણં વત્થૂનં વસેન તિધા વુત્તો. યસ્મા ચ અત્થતો એકો, તસ્માવ નિન્નાનાકરણો હોતિ પવત્તટ્ઠાનભેદે સતિપિ. અરિયસાવકસ્સ હીતિઆદિના નયેન તમત્થં વિવરતિ. પસાદો ઓકપ્પના. પેમં ભત્તિ. ગારવં ગરુકરણં. મહન્તં ઉળારં. એતં વિભાગેન નત્થિ સબ્બત્થ સમાનત્તા.
Aveccappasādenāti vatthuttayassa guṇe yāthāvato avecca pavisitvā pasādo. So pana kenaci calanarahitoti āha ‘‘acalappasādenā’’ti. Maggenāti ariyamaggena. Āgatappasādo tassa adhigamena laddhappasādo. Apubbaṃ acarimanti ekajjhaṃ. Ariyasāvakānañhi ariyamaggo uppajjantova tīsu vatthūsu aveccappasādaṃ āvahanto eva uppajjati. Tesanti visayabhūtānaṃ tiṇṇaṃ vatthūnaṃ vasena tidhā vutto. Yasmā ca atthato eko, tasmāva ninnānākaraṇo hoti pavattaṭṭhānabhede satipi. Ariyasāvakassa hītiādinā nayena tamatthaṃ vivarati. Pasādo okappanā. Pemaṃ bhatti. Gāravaṃ garukaraṇaṃ. Mahantaṃ uḷāraṃ. Etaṃ vibhāgena natthi sabbattha samānattā.
એવન્તિ ભવન્તરેપિ અકોપનીયતાય. સદિસવસેનાતિ અઞ્ઞેહિ અખણ્ડાદીહિ સદિસવસેન. તેનાહ ‘‘મુખવટ્ટિ યઞ્હિ છિન્ને’’તિઆદિ. ખણ્ડા એતિસ્સા અત્થીતિ ખણ્ડા. એસ નયો સેસેસુપિ. પાતિમોક્ખે આગતાનુક્કમેન સીલસ્સ આદિમજ્ઝવિભાગો વેદિતબ્બો. દ્વિન્નં વા તિણ્ણં વાતિ સીલકોટ્ઠાસાનં. એકન્તરં ભિન્નન્તિ અભિન્નેન એકન્તરં હુત્વા ભિન્નં. તેસં ખણ્ડાદીનં. ‘‘ભુજિસ્સેહી’’તિ ઉત્તરપદલોપેન નિદ્દેસોતિ આહ ‘‘ભુજિસ્સભાવકરેહી’’તિ. ઇદં વીતિક્કન્તન્તિ ઇદમ્પિ સીલં વીતિક્કન્તં. ‘‘અયં સીલસ્સ વીતિક્કમો’’તિ એવં પરામસિતું અસક્કુણેય્યેહિ.
Evanti bhavantarepi akopanīyatāya. Sadisavasenāti aññehi akhaṇḍādīhi sadisavasena. Tenāha ‘‘mukhavaṭṭi yañhi chinne’’tiādi. Khaṇḍā etissā atthīti khaṇḍā. Esa nayo sesesupi. Pātimokkhe āgatānukkamena sīlassa ādimajjhavibhāgo veditabbo. Dvinnaṃ vā tiṇṇaṃ vāti sīlakoṭṭhāsānaṃ. Ekantaraṃ bhinnanti abhinnena ekantaraṃ hutvā bhinnaṃ. Tesaṃ khaṇḍādīnaṃ. ‘‘Bhujissehī’’ti uttarapadalopena niddesoti āha ‘‘bhujissabhāvakarehī’’ti. Idaṃvītikkantanti idampi sīlaṃ vītikkantaṃ. ‘‘Ayaṃ sīlassa vītikkamo’’ti evaṃ parāmasituṃ asakkuṇeyyehi.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. ચક્કવત્તિરાજસુત્તં • 1. Cakkavattirājasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. ચક્કવત્તિરાજસુત્તવણ્ણના • 1. Cakkavattirājasuttavaṇṇanā
