| Library / Tipiṭaka / તિપિટક • Tipiṭaka / મજ્ઝિમનિકાય (અટ્ઠકથા) • Majjhimanikāya (aṭṭhakathā) |
૩. ચૂળમાલુક્યસુત્તવણ્ણના
3. Cūḷamālukyasuttavaṇṇanā
૧૨૨. એવં મે સુતન્તિ માલુક્યસુત્તં. તત્થ માલુક્યપુત્તસ્સાતિ એવંનામકસ્સ થેરસ્સ. ઠપિતાનિ પટિક્ખિત્તાનીતિ દિટ્ઠિગતાનિ નામ ન બ્યાકાતબ્બાનીતિ એવં ઠપિતાનિ ચેવ પટિક્ખિત્તાનિ ચ. તથાગતોતિ સત્તો. તં મે ન રુચ્ચતીતિ તં અબ્યાકરણં મય્હં ન રુચ્ચતિ. સિક્ખં પચ્ચક્ખાયાતિ સિક્ખં પટિક્ખિપિત્વા.
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
૧૨૫. કો સન્તો કં પચ્ચાચિક્ખસીતિ યાચકો વા હિ યાચિતકં પચ્ચાચિક્ખેય્ય, યાચિતકો વા યાચકં. ત્વં નેવ યાચકો ન યાચિતકો, સો દાનિ ત્વં કો સન્તો કં પચ્ચાચિક્ખસીતિ અત્થો.
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
૧૨૬. વિદ્ધો અસ્સાતિ પરસેનાય ઠિતેન વિદ્ધો ભવેય્ય. ગાળ્હપલેપનેનાતિ બહલલેપનેન. ભિસક્કન્તિ વેજ્જં. સલ્લકત્તન્તિ સલ્લકન્તનં સલ્લકન્તિયસુત્તવાચકં. અક્કસ્સાતિ અક્કવાકે ગહેત્વા જિયં કરોન્તિ. તેન વુત્તં ‘‘અક્કસ્સા’’તિ. સણ્હસ્સાતિ વેણુવિલીવસ્સ. મરુવાખીરપણ્ણીનમ્પિ વાકેહિયેવ કરોન્તિ. તેન વુત્તં યદિ વા મરુવાય યદિ વા ખીરપણ્ણિનોતિ. ગચ્છન્તિ પબ્બતગચ્છનદીગચ્છાદીસુ જાતં. રોપિમન્તિ રોપેત્વા વડ્ઢિતં સરવનતો સરં ગહેત્વા કતં. સિથિલહનુનોતિ એવંનામકસ્સ પક્ખિનો. ભેરવસ્સાતિ કાળસીહસ્સ. સેમ્હારસ્સાતિ મક્કટસ્સ. એવં નોતિ એતાય દિટ્ઠિયા સતિ ન હોતીતિ અત્થો.
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
૧૨૭. અત્થેવ જાતીતિ એતાય દિટ્ઠિયા સતિ બ્રહ્મચરિયવાસોવ નત્થિ, જાતિ પન અત્થિયેવ. તથા જરામરણાદીનીતિ દસ્સેતિ. યેસાહન્તિ યેસં અહં. નિઘાતન્તિ ઉપઘાતં વિનાસં. મમ સાવકા હિ એતેસુ નિબ્બિન્ના ઇધેવ નિબ્બાનં પાપુણન્તીતિ અધિપ્પાયો.
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
૧૨૮. તસ્માતિહાતિ યસ્મા અબ્યાકતમેતં, ચતુસચ્ચમેવ મયા બ્યાકતં, તસ્માતિ અત્થો. ન હેતં માલુક્યપુત્ત અત્થસંહિતન્તિ એતં દિટ્ઠિગતં વા એતં બ્યાકરણં વા કારણનિસ્સિતં ન હોતિ. ન આદિબ્રહ્મચરિયકન્તિ બ્રહ્મચરિયસ્સ આદિમત્તમ્પિ પુબ્બભાગસીલમત્તમ્પિ ન હોતિ. ન નિબ્બિદાયાતિઆદીસુ વટ્ટે નિબ્બિન્દનત્થાય વા વિરજ્ઝનત્થાય વા વટ્ટનિરોધાય વા રાગાદિવૂપસમનત્થાય વા અભિઞ્ઞેય્યે ધમ્મે અભિજાનનત્થાય વા ચતુમગ્ગસઙ્ખાતસમ્બોધત્થાય વા અસઙ્ખતનિબ્બાનસચ્છિકિરિયત્થાય વા ન હોતિ. એતં હીતિ એતં ચતુસચ્ચબ્યાકરણં. આદિબ્રહ્મચરિયકન્તિ બ્રહ્મચરિયસ્સ આદિભૂતં પુબ્બપદટ્ઠાનં. સેસં વુત્તપટિવિપક્ખનયેન વેદિતબ્બં. ઇમમ્પિ દેસનં ભગવા નેય્યપુગ્ગલવસેન નિટ્ઠાપેસીતિ.
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
પપઞ્ચસૂદનિયા મજ્ઝિમનિકાયટ્ઠકથાય
Papañcasūdaniyā majjhimanikāyaṭṭhakathāya
ચૂળમાલુક્યસુત્તવણ્ણના નિટ્ઠિતા.
Cūḷamālukyasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / મજ્ઝિમનિકાય • Majjhimanikāya / ૩. ચૂળમાલુક્યસુત્તં • 3. Cūḷamālukyasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / મજ્ઝિમનિકાય (ટીકા) • Majjhimanikāya (ṭīkā) / ૩. ચૂળમાલુક્યસુત્તવણ્ણના • 3. Cūḷamālukyasuttavaṇṇanā
