| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૨૨. બાવીસતિમવગ્ગો
22. Bāvīsatimavaggo
(૨૧૧) ૪. ધમ્માભિસમયકથા
(211) 4. Dhammābhisamayakathā
૮૯૭. અત્થિ ગબ્ભસેય્યાય ધમ્માભિસમયોતિ? આમન્તા. અત્થિ ગબ્ભસેય્યાય ધમ્મદેસના, ધમ્મસ્સવનં, ધમ્મસાકચ્છા, પરિપુચ્છા, સીલસમાદાનં , ઇન્દ્રિયેસુ ગુત્તદ્વારતા, ભોજને મત્તઞ્ઞુતા, પુબ્બરત્તાપરરત્તં જાગરિયાનુયોગોતિ ? ન હેવં વત્તબ્બે…પે॰… નત્થિ ગબ્ભસેય્યાય ધમ્મદેસના, ધમ્મસ્સવનં…પે॰… પુબ્બરત્તાપરરત્તં જાગરિયાનુયોગોતિ? આમન્તા. હઞ્ચિ નત્થિ ગબ્ભસેય્યાય ધમ્મદેસના, ધમ્મસ્સવનં…પે॰… પુબ્બરત્તાપરરત્તં જાગરિયાનુયોગો, નો ચ વત રે વત્તબ્બે – ‘‘અત્થિ ગબ્ભસેય્યાય ધમ્માભિસમયો’’તિ.
897. Atthi gabbhaseyyāya dhammābhisamayoti? Āmantā. Atthi gabbhaseyyāya dhammadesanā, dhammassavanaṃ, dhammasākacchā, paripucchā, sīlasamādānaṃ , indriyesu guttadvāratā, bhojane mattaññutā, pubbarattāpararattaṃ jāgariyānuyogoti ? Na hevaṃ vattabbe…pe… natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogoti? Āmantā. Hañci natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogo, no ca vata re vattabbe – ‘‘atthi gabbhaseyyāya dhammābhisamayo’’ti.
અત્થિ ગબ્ભસેય્યાય ધમ્માભિસમયોતિ? આમન્તા. નનુ દ્વે પચ્ચયા સમ્માદિટ્ઠિયા ઉપ્પાદાય – પરતો ચ ઘોસો, યોનિસો ચ મનસિકારોતિ? આમન્તા. હઞ્ચિ દ્વે પચ્ચયા સમ્માદિટ્ઠિયા ઉપ્પાદાય – પરતો ચ ઘોસો, યોનિસો ચ મનસિકારો, નો ચ વત રે વત્તબ્બે – ‘‘અત્થિ ગબ્ભસેય્યાય ધમ્માભિસમયો’’તિ.
Atthi gabbhaseyyāya dhammābhisamayoti? Āmantā. Nanu dve paccayā sammādiṭṭhiyā uppādāya – parato ca ghoso, yoniso ca manasikāroti? Āmantā. Hañci dve paccayā sammādiṭṭhiyā uppādāya – parato ca ghoso, yoniso ca manasikāro, no ca vata re vattabbe – ‘‘atthi gabbhaseyyāya dhammābhisamayo’’ti.
અત્થિ ગબ્ભસેય્યાય ધમ્માભિસમયોતિ? આમન્તા. સુત્તસ્સ પમત્તસ્સ મુટ્ઠસ્સતિસ્સ અસમ્પજાનસ્સ ધમ્માભિસમયોતિ? ન હેવં વત્તબ્બે…પે॰….
Atthi gabbhaseyyāya dhammābhisamayoti? Āmantā. Suttassa pamattassa muṭṭhassatissa asampajānassa dhammābhisamayoti? Na hevaṃ vattabbe…pe….
ધમ્માભિસમયકથા નિટ્ઠિતા.
Dhammābhisamayakathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૪. ધમ્માભિસમયકથાવણ્ણના • 4. Dhammābhisamayakathāvaṇṇanā
