| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. த⁴ம்மதி³ன்னஸுத்தவண்ணனா
3. Dhammadinnasuttavaṇṇanā
1049. ஸத்தஸு ஜனேஸூதி ஸத்தஸு கித்தியமானேஸு உபாஸகஜனேஸு. க³ம்பீ⁴ராதிஆதீ³ஸு த⁴ம்மக³ம்பீ⁴ராதி பாளிக³தியா க³ம்பீ⁴ரா, ததா² ச ஸல்லஸுத்தங் ஹெட்டா² பகாஸிதமேவ. ‘‘சேதனாஹங், பி⁴க்க²வே, கம்மங் வதா³மீ’’திஆதி³னா (அ॰ நி॰ 6.63; கதா²॰ 539) ஆக³தங் சேதனாஸுத்தங் . தத்த² ‘‘சேதனாஸஹஜாதங் நானாக்க²ணிக’’ந்திஆதி³னா பட்டா²னே ஆக³தனயேன, ஸுத்தேஸு (அ॰ நி॰ 3.101) ச ‘‘தி³ட்ட²த⁴ம்மவேத³னீய’’ந்திஆதி³னா ஆக³தனயேன க³ம்பீ⁴ரபா⁴வோ வேதி³தப்³போ³, நிப்³பா³னஸ்ஸ சேவ அரியமக்³க³ஸ்ஸ ச பகாஸனதோ அஸங்க²தஸங்யுத்தஸ்ஸ லோகுத்தரத்த²தீ³பகதா. ‘‘அதீதங்பாஹங் ரூபேன க²ஜ்ஜிங், ஏதரஹி க²ஜ்ஜாமீ’’திஆதி³னா பஞ்சன்னங் க²ந்தா⁴னங் கா²த³கபா⁴வஸ்ஸ, புக்³க³லஸ்ஸ கா²தி³தப்³ப³தாய விபா⁴வனேன க²ஜ்ஜனீயபரியாயே (ஸங்॰ நி॰ 3.79) விஸேஸதோ நிஸ்ஸத்தனிஜ்ஜீவதா தீ³பிதாதி வுத்தங் ‘‘ஸத்தஸுஞ்ஞதாதீ³பகா க²ஜ்ஜனிகஸுத்தந்தாத³யோ’’தி. உபஸம்பஜ்ஜ விஹரிஸ்ஸாமாதி யே தேஸு ஸுத்தேஸு வுத்தபடிபத³ங் ஸம்மதே³வ பரிபூரெந்தி, தே தேஸு உபஸம்பஜ்ஜ விஹரந்தி நாம . எத்தா²தி ‘‘ந கோ² நேத’’ந்தி எத்த² ந-காரோ ‘‘அஞ்ஞமஞ்ஞ’’ந்தி எத்த² ம-காரோ விய ப்³யஞ்ஜனஸந்தி⁴மத்தமேவ, நாஸ்ஸ கோசி அத்தோ².
1049.Sattasu janesūti sattasu kittiyamānesu upāsakajanesu. Gambhīrātiādīsu dhammagambhīrāti pāḷigatiyā gambhīrā, tathā ca sallasuttaṃ heṭṭhā pakāsitameva. ‘‘Cetanāhaṃ, bhikkhave, kammaṃ vadāmī’’tiādinā (a. ni. 6.63; kathā. 539) āgataṃ cetanāsuttaṃ. Tattha ‘‘cetanāsahajātaṃ nānākkhaṇika’’ntiādinā paṭṭhāne āgatanayena, suttesu (a. ni. 3.101) ca ‘‘diṭṭhadhammavedanīya’’ntiādinā āgatanayena gambhīrabhāvo veditabbo, nibbānassa ceva ariyamaggassa ca pakāsanato asaṅkhatasaṃyuttassa lokuttaratthadīpakatā. ‘‘Atītaṃpāhaṃ rūpena khajjiṃ, etarahi khajjāmī’’tiādinā pañcannaṃ khandhānaṃ khādakabhāvassa, puggalassa khāditabbatāya vibhāvanena khajjanīyapariyāye (saṃ. ni. 3.79) visesato nissattanijjīvatā dīpitāti vuttaṃ ‘‘sattasuññatādīpakā khajjanikasuttantādayo’’ti. Upasampajja viharissāmāti ye tesu suttesu vuttapaṭipadaṃ sammadeva paripūrenti, te tesu upasampajja viharanti nāma . Etthāti ‘‘na kho neta’’nti ettha na-kāro ‘‘aññamañña’’nti ettha ma-kāro viya byañjanasandhimattameva, nāssa koci attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. த⁴ம்மதி³ன்னஸுத்தங் • 3. Dhammadinnasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. த⁴ம்மதி³ன்னஸுத்தவண்ணனா • 3. Dhammadinnasuttavaṇṇanā
