| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
12. தி³ட்டி²க³தஸுத்தவண்ணனா
12. Diṭṭhigatasuttavaṇṇanā
49. த்³வாத³ஸமே த்³வீஹி தி³ட்டி²க³தேஹீதி எத்த² தி³ட்டி²யோவ தி³ட்டி²க³தானி ‘‘கூ³த²க³தங் முத்தக³த’’ந்திஆதீ³ஸு (அ॰ நி॰ 9.11) விய. க³ஹிதாகாரஸுஞ்ஞதாய வா தி³ட்டீ²னங் க³தமத்தானீதி தி³ட்டி²க³தானி, தேஹி தி³ட்டி²க³தேஹி. பரியுட்டி²தாதி அபி⁴பூ⁴தா பலிபு³த்³தா⁴ வா. பலிபோ³த⁴த்தோ² வாபி ஹி பரியுட்டா²னஸத்³தோ³ ‘‘சோரா மக்³கே³ பரியுட்டி²ங்ஸூ’’திஆதீ³ஸு (சூளவ॰ 430) விய. தே³வாதி உபபத்திதே³வா. தே ஹி தி³ப்³ப³ந்தி உளாரதமேஹி காமகு³ணேஹி ஜா²னாதீ³ஹி ச கீளந்தி, இத்³தா⁴னுபா⁴வேன வா யதி²ச்சி²தமத்த²ங் க³ச்ச²ந்தி அதி⁴க³ச்ச²ந்தீதி ச தே³வாதி வுச்சந்தி. மனஸ்ஸ உஸ்ஸன்னத்தா மனுஸ்ஸா, உக்கட்ட²னித்³தே³ஸவஸேன சேதங் வுத்தங் யதா² ‘‘ஸத்தா² தே³வமனுஸ்ஸான’’ந்தி. ஓலீயந்தி ஏகேதி ‘‘ஸஸ்ஸதோ அத்தா ச லோகோ சா’’தி ப⁴வேஸு ஓலீயனாபி⁴னிவேஸபூ⁴தேன ஸஸ்ஸதபா⁴வேன ஏகச்சே தே³வா மனுஸ்ஸா ச அவலீயந்தி அல்லீயந்தி ஸங்கோசங் ஆபஜ்ஜந்தி, ந ததோ நிஸ்ஸரந்தி. அதிதா⁴வந்தீதி பரமத்த²தோ பி⁴ன்னஸபா⁴வானம்பி ஸபா⁴வத⁴ம்மானங் ய்வாயங் ஹேதுப²லபா⁴வேன ஸம்ப³ந்தோ⁴, தங் அக்³க³ஹெத்வா நானத்தனயஸ்ஸபி க³ஹணேன தத்த² தத்தே²வ தா⁴வந்தி, தஸ்மா ‘‘உச்சி²ஜ்ஜதி அத்தா ச லோகோ ச, ந ஹோதி பரங் மரணா’’தி உச்சே²தே³ வா ப⁴வனிரோத⁴படிபத்தியா படிக்கே²பத⁴ம்மதங் அதிதா⁴வந்தி அதிக்கமந்தி. சக்கு²மந்தோ ச பஸ்ஸந்தீதி சஸத்³தோ³ ப்³யதிரேகே. புப்³ப³யோக³ஸம்பத்தியா ஞாணபரிபாகேன பஞ்ஞாசக்கு²மந்தோ பன தே³வமனுஸ்ஸா தேனேவ பஞ்ஞாசக்கு²னா ஸஸ்ஸதங் உச்சே²த³ஞ்ச அந்தத்³வயங் அனுபக³ம்ம மஜ்ஜி²மபடிபத்தித³ஸ்ஸனேன பச்சக்க²ங் கரொந்தி. தே ஹி ‘‘நாமரூபமத்தமித³ங் படிச்சஸமுப்பன்னங், தஸ்மா ந ஸஸ்ஸதங், நாபி உச்சி²ஜ்ஜதீ’’தி அவிபரீததோ பஸ்ஸந்தி.
49. Dvādasame dvīhi diṭṭhigatehīti ettha diṭṭhiyova diṭṭhigatāni ‘‘gūthagataṃ muttagata’’ntiādīsu (a. ni. 9.11) viya. Gahitākārasuññatāya vā diṭṭhīnaṃ gatamattānīti diṭṭhigatāni, tehi diṭṭhigatehi. Pariyuṭṭhitāti abhibhūtā palibuddhā vā. Palibodhattho vāpi hi pariyuṭṭhānasaddo ‘‘corā magge pariyuṭṭhiṃsū’’tiādīsu (cūḷava. 430) viya. Devāti upapattidevā. Te hi dibbanti uḷāratamehi kāmaguṇehi jhānādīhi ca kīḷanti, iddhānubhāvena vā yathicchitamatthaṃ gacchanti adhigacchantīti ca devāti vuccanti. Manassa ussannattā manussā, ukkaṭṭhaniddesavasena cetaṃ vuttaṃ yathā ‘‘satthā devamanussāna’’nti. Olīyanti eketi ‘‘sassato attā ca loko cā’’ti bhavesu olīyanābhinivesabhūtena sassatabhāvena ekacce devā manussā ca avalīyanti allīyanti saṅkocaṃ āpajjanti, na tato nissaranti. Atidhāvantīti paramatthato bhinnasabhāvānampi sabhāvadhammānaṃ yvāyaṃ hetuphalabhāvena sambandho, taṃ aggahetvā nānattanayassapi gahaṇena tattha tattheva dhāvanti, tasmā ‘‘ucchijjati attā ca loko ca, na hoti paraṃ maraṇā’’ti ucchede vā bhavanirodhapaṭipattiyā paṭikkhepadhammataṃ atidhāvanti atikkamanti. Cakkhumanto ca passantīti casaddo byatireke. Pubbayogasampattiyā ñāṇaparipākena paññācakkhumanto pana devamanussā teneva paññācakkhunā sassataṃ ucchedañca antadvayaṃ anupagamma majjhimapaṭipattidassanena paccakkhaṃ karonti. Te hi ‘‘nāmarūpamattamidaṃ paṭiccasamuppannaṃ, tasmā na sassataṃ, nāpi ucchijjatī’’ti aviparītato passanti.
ஏவங் ஓலீயனாதி³கே புக்³க³லாதி⁴ட்டா²னேன உத்³தி³ஸிதுங் ‘‘கத²ஞ்ச, பி⁴க்க²வே’’திஆதி³ வுத்தங். தத்த² ப⁴வாதி காமப⁴வோ, ரூபப⁴வோ, அரூபப⁴வோ. அபரேபி தயோ ப⁴வா ஸஞ்ஞீப⁴வோ, அஸஞ்ஞீப⁴வோ, நேவஸஞ்ஞீனாஸஞ்ஞீப⁴வோ. அபரேபி தயோ ப⁴வா ஏகவோகாரப⁴வோ, சதுவோகாரப⁴வோ, பஞ்சவோகாரப⁴வோதி. ஏதேஹி ப⁴வேஹி ஆரமந்தி அபி⁴னந்த³ந்தீதி ப⁴வாராமா. ப⁴வேஸு ரதா அபி⁴ரதாதி ப⁴வரதா. ப⁴வேஸு ஸுட்டு² முதி³தாதி ப⁴வஸம்முதி³தா. ப⁴வனிரோதா⁴யாதி தேஸங் ப⁴வானங் அச்சந்தனிரோதா⁴ய அனுப்பாத³னத்தா²ய. த⁴ம்மே தே³ஸியமானேதி ததா²க³தப்பவேதி³தே நிய்யானிகத⁴ம்மே வுச்சமானே. ந பக்க²ந்த³தீதி ஸஸ்ஸதாபி⁴னிவிட்ட²த்தா ஸங்கி²த்தத⁴ம்மத்தா ந பவிஸதி ந ஓகா³ஹதி. ந பஸீத³தீதி பஸாத³ங் நாபஜ்ஜதி ந தங் ஸத்³த³ஹதி. ந ஸந்திட்ட²தீதி தஸ்ஸங் தே³ஸனாயங் ந திட்ட²தி நாதி⁴முச்சதி. ஏவங் ஸஸ்ஸததோ அபி⁴னிவிஸனேன ப⁴வேஸு ஓலீயந்தி.
Evaṃ olīyanādike puggalādhiṭṭhānena uddisituṃ ‘‘kathañca, bhikkhave’’tiādi vuttaṃ. Tattha bhavāti kāmabhavo, rūpabhavo, arūpabhavo. Aparepi tayo bhavā saññībhavo, asaññībhavo, nevasaññīnāsaññībhavo. Aparepi tayo bhavā ekavokārabhavo, catuvokārabhavo, pañcavokārabhavoti. Etehi bhavehi āramanti abhinandantīti bhavārāmā. Bhavesu ratā abhiratāti bhavaratā. Bhavesu suṭṭhu muditāti bhavasammuditā. Bhavanirodhāyāti tesaṃ bhavānaṃ accantanirodhāya anuppādanatthāya. Dhamme desiyamāneti tathāgatappavedite niyyānikadhamme vuccamāne. Na pakkhandatīti sassatābhiniviṭṭhattā saṃkhittadhammattā na pavisati na ogāhati. Na pasīdatīti pasādaṃ nāpajjati na taṃ saddahati. Na santiṭṭhatīti tassaṃ desanāyaṃ na tiṭṭhati nādhimuccati. Evaṃ sassatato abhinivisanena bhavesu olīyanti.
அட்டீயமானாதி ப⁴வே ஜராரோக³மரணாதீ³னி வத⁴ப³ந்த⁴னச்சே²த³னாதீ³னி ச தி³ஸ்வா ஸங்விஜ்ஜனேன தேஹி ஸமங்கி³பா⁴வேன ப⁴வேன பீளியமானா து³க்கா²பியமானா. ஹராயமானாதி லஜ்ஜமானா ஜிகு³ச்ச²மானாதி படிகூலதோ த³ஹந்தா. விப⁴வந்தி உச்சே²த³ங். அபி⁴னந்த³ந்தீதி தண்ஹாதி³ட்டா²பி⁴னந்த³னாஹி அஜ்ஜோ²ஸாய நந்த³ந்தி. யதோ கிர போ⁴திஆதி³ தேஸங் அபி⁴னந்த³னாகாரத³ஸ்ஸனங். தத்த² யதோதி யதா³. போ⁴தி ஆலபனங். அயங் அத்தாதி காரகாதி³பா⁴வேன அத்தனா பரிகப்பிதங் ஸந்தா⁴ய வத³தி. உச்சி²ஜ்ஜதீதி உபச்சி²ஜ்ஜதி. வினஸ்ஸதீதி ந தி³ஸ்ஸதி, வினாஸங் அபா⁴வங் க³ச்ச²தி. ந ஹோதி பரங் மரணாதி மரணேன உத்³த⁴ங் ந ப⁴வதி. ஏதங் ஸந்தந்தி யதே³தங் அத்தனோ உச்சே²தா³தி³, ஏதங் ஸப்³ப³ப⁴வவூபஸமதோ ஸப்³ப³ஸந்தாபவூபஸமதோ ச ஸந்தங், ஸந்தத்தா ஏவ பணீதங், தச்சா²விபரீதபா⁴வதோ யாதா²வங். தத்த² ‘‘ஸந்தங் பணீத’’ந்தி இத³ங் த்³வயங் தண்ஹாபி⁴னந்த³னாய வத³ந்தி, ‘‘யாதா²வ’’ந்தி தி³ட்டா²பி⁴னந்த³னாய. ஏவந்தி ஏவங் யதா²வுத்தஉச்சே²தா³பி⁴னிவேஸனேன.
Aṭṭīyamānāti bhave jarārogamaraṇādīni vadhabandhanacchedanādīni ca disvā saṃvijjanena tehi samaṅgibhāvena bhavena pīḷiyamānā dukkhāpiyamānā. Harāyamānāti lajjamānā jigucchamānāti paṭikūlato dahantā. Vibhavanti ucchedaṃ. Abhinandantīti taṇhādiṭṭhābhinandanāhi ajjhosāya nandanti. Yatokirabhotiādi tesaṃ abhinandanākāradassanaṃ. Tattha yatoti yadā. Bhoti ālapanaṃ. Ayaṃ attāti kārakādibhāvena attanā parikappitaṃ sandhāya vadati. Ucchijjatīti upacchijjati. Vinassatīti na dissati, vināsaṃ abhāvaṃ gacchati. Na hoti paraṃ maraṇāti maraṇena uddhaṃ na bhavati. Etaṃ santanti yadetaṃ attano ucchedādi, etaṃ sabbabhavavūpasamato sabbasantāpavūpasamato ca santaṃ, santattā eva paṇītaṃ, tacchāviparītabhāvato yāthāvaṃ. Tattha ‘‘santaṃ paṇīta’’nti idaṃ dvayaṃ taṇhābhinandanāya vadanti, ‘‘yāthāva’’nti diṭṭhābhinandanāya. Evanti evaṃ yathāvuttaucchedābhinivesanena.
பூ⁴தந்தி க²ந்த⁴பஞ்சகங். தஞ்ஹி பச்சயஸம்பூ⁴தத்தா பரமத்த²தோ விஜ்ஜமானத்தா ச பூ⁴தந்தி வுச்சதி. தேனாஹ ‘‘பூ⁴தமித³ங், பி⁴க்க²வே, ஸமனுபஸ்ஸதா²’’தி (ம॰ நி॰ 1.401). பூ⁴ததோ அவிபரீதஸபா⁴வதோ ஸலக்க²ணதோ ஸாமஞ்ஞலக்க²ணதோ ச பஸ்ஸதி. இத³ஞ்ஹி க²ந்த⁴பஞ்சகங் நாமரூபமத்தங். தத்த² ‘‘இமே பத²வீஆத³யோ த⁴ம்மா ரூபங், இமே ப²ஸ்ஸாத³யோ த⁴ம்மா நாமங், இமானி நேஸங் லக்க²ணாதீ³னி, இமே நேஸங் அவிஜ்ஜாத³யோ பச்சயா’’தி ஏவங் ஸபச்சயனாமரூபத³ஸ்ஸனவஸேன சேவ, ‘‘ஸப்³பே³பிமே த⁴ம்மா அஹுத்வா ஸம்பொ⁴ந்தி, ஹுத்வா படிவெந்தி, தஸ்மா அனிச்சா, அனிச்சத்தா து³க்கா², து³க்க²த்தா அனத்தா’’தி ஏவங் அனிச்சானுபஸ்ஸனாதி³வஸேன ச பஸ்ஸதீதி அத்தோ². எத்தாவதா தருணவிபஸ்ஸனாபரியோஸானா விபஸ்ஸனாபூ⁴மி த³ஸ்ஸிதா. நிப்³பி³தா³யாதி பூ⁴தஸங்கா²தஸ்ஸ தேபூ⁴மகத⁴ம்மஜாதஸ்ஸ நிப்³பி³ந்த³னத்தா²ய, ஏதேன ப³லவவிபஸ்ஸனங் த³ஸ்ஸேதி. விராகா³யாதி விராக³த்த²ங் விரஜ்ஜனத்த²ங், இமினா மக்³க³ங் த³ஸ்ஸேதி. நிரோதா⁴யாதி நிருஜ்ஜ²னத்த²ங், இமினாபி மக்³க³மேவ த³ஸ்ஸேதி. நிரோதா⁴யாதி வா படிப்பஸ்ஸத்³தி⁴னிரோதே⁴ன ஸத்³தி⁴ங் அனுபாதி³ஸேஸனிப்³பா³னங் த³ஸ்ஸேதி. ஏவங் கோ², பி⁴க்க²வே, சக்கு²மந்தோ பஸ்ஸந்தீதி ஏவங் பஞ்ஞாசக்கு²மந்தோ ஸபுப்³ப³பா⁴கே³ன மக்³க³பஞ்ஞாசக்கு²னா சதுஸச்சத⁴ம்மங் பஸ்ஸந்தி.
Bhūtanti khandhapañcakaṃ. Tañhi paccayasambhūtattā paramatthato vijjamānattā ca bhūtanti vuccati. Tenāha ‘‘bhūtamidaṃ, bhikkhave, samanupassathā’’ti (ma. ni. 1.401). Bhūtato aviparītasabhāvato salakkhaṇato sāmaññalakkhaṇato ca passati. Idañhi khandhapañcakaṃ nāmarūpamattaṃ. Tattha ‘‘ime pathavīādayo dhammā rūpaṃ, ime phassādayo dhammā nāmaṃ, imāni nesaṃ lakkhaṇādīni, ime nesaṃ avijjādayo paccayā’’ti evaṃ sapaccayanāmarūpadassanavasena ceva, ‘‘sabbepime dhammā ahutvā sambhonti, hutvā paṭiventi, tasmā aniccā, aniccattā dukkhā, dukkhattā anattā’’ti evaṃ aniccānupassanādivasena ca passatīti attho. Ettāvatā taruṇavipassanāpariyosānā vipassanābhūmi dassitā. Nibbidāyāti bhūtasaṅkhātassa tebhūmakadhammajātassa nibbindanatthāya, etena balavavipassanaṃ dasseti. Virāgāyāti virāgatthaṃ virajjanatthaṃ, iminā maggaṃ dasseti. Nirodhāyāti nirujjhanatthaṃ, imināpi maggameva dasseti. Nirodhāyāti vā paṭippassaddhinirodhena saddhiṃ anupādisesanibbānaṃ dasseti. Evaṃ kho, bhikkhave, cakkhumanto passantīti evaṃ paññācakkhumanto sapubbabhāgena maggapaññācakkhunā catusaccadhammaṃ passanti.
கா³தா²ஸு யே பூ⁴தங் பூ⁴ததோ தி³ஸ்வாதி யே அரியஸாவகா பூ⁴தங் க²ந்த⁴பஞ்சகங் பூ⁴ததோ அவிபரீதஸபா⁴வதோ விபஸ்ஸனாபஞ்ஞாஸஹிதாய மக்³க³பஞ்ஞாய தி³ஸ்வா. ஏதேன பரிஞ்ஞாபி⁴ஸமயங் த³ஸ்ஸேதி. பூ⁴தஸ்ஸ ச அதிக்கமந்தி பா⁴வனாபி⁴ஸமயங். அரியமக்³கோ³ ஹி பூ⁴தங் அதிக்கமதி ஏதேனாதி ‘‘பூ⁴தஸ்ஸ அதிக்கமோ’’தி வுத்தோ. யதா²பூ⁴தேதி அவிபரீதஸச்சஸபா⁴வே நிப்³பா³னே. விமுச்சந்தி அதி⁴முச்சந்தி, ஏதேன ஸச்சி²கிரியாபி⁴ஸமயங் த³ஸ்ஸேதி. ப⁴வதண்ஹாபரிக்க²யாதி ப⁴வதண்ஹாய ஸப்³ப³ஸோ கே²பனா ஸமுச்சி²ந்த³னதோ, ஏதேன ஸமுத³யப்பஹானங் த³ஸ்ஸேதி.
Gāthāsu ye bhūtaṃ bhūtato disvāti ye ariyasāvakā bhūtaṃ khandhapañcakaṃ bhūtato aviparītasabhāvato vipassanāpaññāsahitāya maggapaññāya disvā. Etena pariññābhisamayaṃ dasseti. Bhūtassa ca atikkamanti bhāvanābhisamayaṃ. Ariyamaggo hi bhūtaṃ atikkamati etenāti ‘‘bhūtassa atikkamo’’ti vutto. Yathābhūteti aviparītasaccasabhāve nibbāne. Vimuccanti adhimuccanti, etena sacchikiriyābhisamayaṃ dasseti. Bhavataṇhāparikkhayāti bhavataṇhāya sabbaso khepanā samucchindanato, etena samudayappahānaṃ dasseti.
ஸவே பூ⁴தபரிஞ்ஞோ ஸோதி எத்த² பன ஸவேதி நிபாதமத்தங். ஸோ பூ⁴தபரிஞ்ஞோ பூ⁴தஸ்ஸ அதிக்கமனூபாயேன மக்³கே³ன ப⁴வதண்ஹாபரிக்க²யா பரிஞ்ஞாதக்க²ந்தோ⁴ ததோ ஏவ யதா²பூ⁴தே நிப்³பா³னே அதி⁴முத்தோ. ப⁴வாப⁴வேதி கு²த்³த³கே சேவ மஹந்தே ச, உச்சே²தா³தி³த³ஸ்ஸனே வா வீததண்ஹோ பி⁴ன்னகிலேஸோ. பி⁴க்கு² பூ⁴தஸ்ஸ உபாதா³னக்க²ந்த⁴ஸங்கா²தஸ்ஸ அத்தபா⁴வஸ்ஸ விப⁴வா, ஆயதிங் அனுப்பாதா³ புனப்³ப⁴வங் நாக³ச்ச²தி, அபஞ்ஞத்திகபா⁴வமேவ க³ச்ச²தீதி அனுபாதி³ஸேஸாய நிப்³பா³னதா⁴துயா தே³ஸனங் நிட்டா²பேஸி.
Save bhūtapariñño soti ettha pana saveti nipātamattaṃ. So bhūtapariñño bhūtassa atikkamanūpāyena maggena bhavataṇhāparikkhayā pariññātakkhandho tato eva yathābhūte nibbāne adhimutto. Bhavābhaveti khuddake ceva mahante ca, ucchedādidassane vā vītataṇho bhinnakileso. Bhikkhu bhūtassa upādānakkhandhasaṅkhātassa attabhāvassa vibhavā, āyatiṃ anuppādā punabbhavaṃ nāgacchati, apaññattikabhāvameva gacchatīti anupādisesāya nibbānadhātuyā desanaṃ niṭṭhāpesi.
இதி இமஸ்மிங் வக்³கே³ ஏகாத³ஸமே வட்டங் கதி²தங், ததியசதுத்த²பஞ்சமேஸு பரியோஸானஸுத்தே ச வட்டவிவட்டங் கதி²தங், ஸேஸேஸு விவட்டமேவாதி வேதி³தப்³ப³ங்.
Iti imasmiṃ vagge ekādasame vaṭṭaṃ kathitaṃ, tatiyacatutthapañcamesu pariyosānasutte ca vaṭṭavivaṭṭaṃ kathitaṃ, sesesu vivaṭṭamevāti veditabbaṃ.
த்³வாத³ஸமஸுத்தவண்ணனா நிட்டி²தா.
Dvādasamasuttavaṇṇanā niṭṭhitā.
பரமத்த²தீ³பனியா கு²த்³த³கனிகாய-அட்ட²கதா²ய
Paramatthadīpaniyā khuddakanikāya-aṭṭhakathāya
இதிவுத்தகஸ்ஸ து³கனிபாதவண்ணனா நிட்டி²தா.
Itivuttakassa dukanipātavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 12. தி³ட்டி²க³தஸுத்தங் • 12. Diṭṭhigatasuttaṃ
