| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૮. દુતિયછિગ્ગળયુગસુત્તં
8. Dutiyachiggaḷayugasuttaṃ
૧૧૧૮. ‘‘સેય્યથાપિ , ભિક્ખવે, અયં મહાપથવી એકોદકા અસ્સ. તત્ર પુરિસો એકચ્છિગ્ગળં યુગં પક્ખિપેય્ય. તમેનં પુરત્થિમો વાતો પચ્છિમેન સંહરેય્ય, પચ્છિમો વાતો પુરત્થિમેન સંહરેય્ય, ઉત્તરો વાતો દક્ખિણેન સંહરેય્ય, દક્ખિણો વાતો ઉત્તરેન સંહરેય્ય. તત્રસ્સ કાણો કચ્છપો. સો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જેય્ય. તં કિં મઞ્ઞથ, ભિક્ખવે, અપિ નુ ખો કાણો કચ્છપો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જન્તો અમુસ્મિં એકચ્છિગ્ગળે યુગે ગીવં પવેસેય્યા’’તિ? ‘‘અધિચ્ચમિદં, ભન્તે, યં સો કાણો કચ્છપો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જન્તો અમુસ્મિં એકચ્છિગ્ગળે યુગે ગીવં પવેસેય્યા’’તિ.
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘એવં અધિચ્ચમિદં, ભિક્ખવે, યં મનુસ્સત્તં લભતિ. એવં અધિચ્ચમિદં, ભિક્ખવે, યં તથાગતો લોકે ઉપ્પજ્જતિ અરહં સમ્માસમ્બુદ્ધો. એવં અધિચ્ચમિદં, ભિક્ખવે, યં તથાગતપ્પવેદિતો ધમ્મવિનયો લોકે દિબ્બતિ. તસ્સિદં 1, ભિક્ખવે, મનુસ્સત્તં લદ્ધં, તથાગતો લોકે ઉપ્પન્નો અરહં સમ્માસમ્બુદ્ધો, તથાગતપ્પવેદિતો ચ ધમ્મવિનયો લોકે દિબ્બતિ.
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘તસ્માતિહ, ભિક્ખવે, ‘ઇદં દુક્ખ’ન્તિ યોગો કરણીયો…પે॰… ‘અયં દુક્ખનિરોધગામિની પટિપદા’તિ યોગો કરણીયો’’તિ. અટ્ઠમં.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. દુતિયછિગ્ગળયુગસુત્તવણ્ણના • 8. Dutiyachiggaḷayugasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. દુતિયછિગ્ગળયુગસુત્તવણ્ણના • 8. Dutiyachiggaḷayugasuttavaṇṇanā
