| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
5. து³தியனானாதித்தி²யஸுத்தவண்ணனா
5. Dutiyanānātitthiyasuttavaṇṇanā
55. பஞ்சமே ஸஸ்ஸதோ அத்தா ச லோகோ சாதி ரூபாதீ³ஸு அஞ்ஞதரங் அத்தாதி ச லோகோதி ச க³ஹெத்வா தங் ஸஸ்ஸதங் நிச்சந்தி அஞ்ஞேபி ச ததா² கா³ஹெந்தா வோஹரந்தி. யதா²ஹ –
55. Pañcame sassato attā ca loko cāti rūpādīsu aññataraṃ attāti ca lokoti ca gahetvā taṃ sassataṃ niccanti aññepi ca tathā gāhentā voharanti. Yathāha –
‘‘ரூபங் அத்தா சேவ லோகோ ச ஸஸ்ஸதோ சாதி அத்தானஞ்ச லோகஞ்ச பஞ்ஞபெந்தி. வேத³னங்… ஸஞ்ஞங்… ஸங்கா²ரே… விஞ்ஞாணங் அத்தா ச லோகோ ச ஸஸ்ஸதோ சாதி அத்தானஞ்ச லோகஞ்ச பஞ்ஞபெந்தீ’’தி.
‘‘Rūpaṃ attā ceva loko ca sassato cāti attānañca lokañca paññapenti. Vedanaṃ… saññaṃ… saṅkhāre… viññāṇaṃ attā ca loko ca sassato cāti attānañca lokañca paññapentī’’ti.
அத² வா அத்தாதி அஹங்காரவத்து², லோகோதி மமங்காரவத்து², யங் ‘‘அத்தனிய’’ந்தி வுச்சதி. அத்தாதி வா ஸயங், லோகோதி பரோ. அத்தாதி வா பஞ்சஸு உபாதா³னக்க²ந்தே⁴ஸு ஏகோ க²ந்தோ⁴, இதரோ லோகோ . அத்தாதி வா ஸவிஞ்ஞாணகோ க²ந்த⁴ஸந்தானோ, அவிஞ்ஞாணகோ லோகோ. ஏவங் தங் தங் அத்தாதி ச லோகோதி ச யதா²த³ஸ்ஸனங் த்³விதா⁴ க³ஹெத்வா தது³ப⁴யங் ‘‘நிச்சோ து⁴வோ ஸஸ்ஸதோ’’தி அபி⁴னிவிஸ்ஸ வோஹரந்தி. ஏதேன சத்தாரோ ஸஸ்ஸதவாதா³ த³ஸ்ஸிதா. அஸஸ்ஸதோதி ஸத்தபி உச்சே²த³வாதா³ த³ஸ்ஸிதா. ஸஸ்ஸதோ ச அஸஸ்ஸதோ சாதி ஏகச்சோ அத்தா ச லோகோ ச ஸஸ்ஸதோ, ஏகச்சோ அஸஸ்ஸதோதி ஏவங் ஸஸ்ஸதோ ச அஸஸ்ஸதோ சாதி அத்தோ². அத² வா ஸ்வேவ அத்தா ச லோகோ ச அத்தக³திதி³ட்டி²கானங் விய ஸஸ்ஸதோ ச அஸஸ்ஸதோ ச, ஸியா ஸஸ்ஸதோதி ஏவமெத்த² அத்தோ² வேதி³தப்³போ³. ஸப்³ப³தா²பி இமினா ஏகச்சஸஸ்ஸதவாதோ³ த³ஸ்ஸிதோ. நேவ ஸஸ்ஸதோ நாஸஸ்ஸதோதி இமினா அமராவிக்கே²பவாதோ³ த³ஸ்ஸிதோ. தே ஹி ஸஸ்ஸதவாதே³ அஸஸ்ஸதவாதே³ ச தோ³ஸங் தி³ஸ்வா ‘‘நேவ ஸஸ்ஸதோ நாஸஸ்ஸதோ அத்தா ச லோகோ சா’’தி விக்கே²பங் கரொந்தா விவத³ந்தி.
Atha vā attāti ahaṅkāravatthu, lokoti mamaṅkāravatthu, yaṃ ‘‘attaniya’’nti vuccati. Attāti vā sayaṃ, lokoti paro. Attāti vā pañcasu upādānakkhandhesu eko khandho, itaro loko. Attāti vā saviññāṇako khandhasantāno, aviññāṇako loko. Evaṃ taṃ taṃ attāti ca lokoti ca yathādassanaṃ dvidhā gahetvā tadubhayaṃ ‘‘nicco dhuvo sassato’’ti abhinivissa voharanti. Etena cattāro sassatavādā dassitā. Asassatoti sattapi ucchedavādā dassitā. Sassato ca asassato cāti ekacco attā ca loko ca sassato, ekacco asassatoti evaṃ sassato ca asassato cāti attho. Atha vā sveva attā ca loko ca attagatidiṭṭhikānaṃ viya sassato ca asassato ca, siyā sassatoti evamettha attho veditabbo. Sabbathāpi iminā ekaccasassatavādo dassito. Neva sassato nāsassatoti iminā amarāvikkhepavādo dassito. Te hi sassatavāde asassatavāde ca dosaṃ disvā ‘‘neva sassato nāsassato attā ca loko cā’’ti vikkhepaṃ karontā vivadanti.
ஸயங்கதோதி அத்தனா கதோ. யதா² ஹி தேஸங் தேஸங் ஸத்தானங் அத்தா ச அத்தனோ த⁴ம்மானுத⁴ம்மங் கத்வா ஸுக²து³க்கா²னி படிஸங்வேதே³தி, ஏவங் அத்தாவ அத்தானங் தஸ்ஸ ச உபபோ⁴க³பூ⁴தங் கிஞ்சனங் பலிபோ³த⁴ஸங்கா²தங் லோகஞ்ச கரோதி, அபி⁴னிம்மினாதீதி அத்தலத்³தி⁴ விய அயம்பி தேஸங் லத்³தி⁴. பரங்கதோதி பரேன கதோ, அத்ததோ பரேன இஸ்ஸரேன வா புரிஸேன வா பஜாபதினா வா காலேன வா பகதியா வா அத்தா ச லோகோ ச கதோ , நிம்மிதோதி அத்தோ². ஸயங்கதோ ச பரங்கதோ சாதி யஸ்மா அத்தானஞ்ச லோகஞ்ச நிம்மினந்தா இஸ்ஸராத³யோ ந கேவலங் ஸயமேவ நிம்மினந்தி, அத² கோ² தேஸங் தேஸங் ஸத்தானங் த⁴ம்மாத⁴ம்மானங் ஸஹகாரீகாரணங் லபி⁴த்வாவ, தஸ்மா ஸயங்கதோ ச பரங்கதோ ச அத்தா ச லோகோ சாதி ஏகச்சானங் லத்³தி⁴. அஸயங்காரோ அபரங்காரோதி நத்தி² ஏதஸ்ஸ ஸயங்காரோதி அஸயங்காரோ, நத்தி² ஏதஸ்ஸ பரகாரோதி அபரகாரோ. அனுனாஸிகாக³மங் கத்வா வுத்தங் ‘‘அபரங்காரோ’’தி. அயங் உப⁴யத்த² தோ³ஸங் தி³ஸ்வா உப⁴யங் படிக்கி²பதி. அத² கத²ங் உப்பன்னோதி ஆஹ – அதி⁴ச்சஸமுப்பன்னோதி யதி³ச்சா²ய ஸமுப்பன்னோ கேனசி காரணேன வினா உப்பன்னோதி அதி⁴ச்சஸமுப்பன்னவாதோ³ த³ஸ்ஸிதோ. தேன ச அஹேதுகவாதோ³பி ஸங்க³ஹிதோ ஹோதி.
Sayaṃkatoti attanā kato. Yathā hi tesaṃ tesaṃ sattānaṃ attā ca attano dhammānudhammaṃ katvā sukhadukkhāni paṭisaṃvedeti, evaṃ attāva attānaṃ tassa ca upabhogabhūtaṃ kiñcanaṃ palibodhasaṅkhātaṃ lokañca karoti, abhinimminātīti attaladdhi viya ayampi tesaṃ laddhi. Paraṃkatoti parena kato, attato parena issarena vā purisena vā pajāpatinā vā kālena vā pakatiyā vā attā ca loko ca kato , nimmitoti attho. Sayaṃkato ca paraṃkato cāti yasmā attānañca lokañca nimminantā issarādayo na kevalaṃ sayameva nimminanti, atha kho tesaṃ tesaṃ sattānaṃ dhammādhammānaṃ sahakārīkāraṇaṃ labhitvāva, tasmā sayaṃkato ca paraṃkato ca attā ca loko cāti ekaccānaṃ laddhi. Asayaṃkāro aparaṃkāroti natthi etassa sayaṃkāroti asayaṃkāro, natthi etassa parakāroti aparakāro. Anunāsikāgamaṃ katvā vuttaṃ ‘‘aparaṃkāro’’ti. Ayaṃ ubhayattha dosaṃ disvā ubhayaṃ paṭikkhipati. Atha kathaṃ uppannoti āha – adhiccasamuppannoti yadicchāya samuppanno kenaci kāraṇena vinā uppannoti adhiccasamuppannavādo dassito. Tena ca ahetukavādopi saṅgahito hoti.
இதா³னி யே தி³ட்டி²க³திகா அத்தானங் விய ஸுக²து³க்க²ம்பி தஸ்ஸ கு³ணபூ⁴தங் கிஞ்சனபூ⁴தங் வா ஸஸ்ஸதாதி³வஸேன அபி⁴னிவிஸ்ஸ வோஹரந்தி, தேஸங் தங் வாத³ங் த³ஸ்ஸேதுங் ‘‘ஸந்தேகே ஸமணப்³ராஹ்மணா’’திஆதி³ வுத்தங். தங் வுத்தனயமேவ.
Idāni ye diṭṭhigatikā attānaṃ viya sukhadukkhampi tassa guṇabhūtaṃ kiñcanabhūtaṃ vā sassatādivasena abhinivissa voharanti, tesaṃ taṃ vādaṃ dassetuṃ ‘‘santeke samaṇabrāhmaṇā’’tiādi vuttaṃ. Taṃ vuttanayameva.
ஏதமத்த²ங் விதி³த்வாதி எத்த² பன இத⁴ ஜச்சந்தூ⁴பமாய அனாக³தத்தா தங் ஹித்வா ஹெட்டா² வுத்தனயேனேவ அத்தோ² யோஜேதப்³போ³, ததா² கா³தா²ய.
Etamatthaṃ viditvāti ettha pana idha jaccandhūpamāya anāgatattā taṃ hitvā heṭṭhā vuttanayeneva attho yojetabbo, tathā gāthāya.
தத்த² அந்தராவ விஸீத³ந்தி, அபத்வாவ தமோக³த⁴ந்தி அயங் விஸேஸோ. தஸ்ஸத்தோ² – ஏவங் தி³ட்டி²க³தேஸு தி³ட்டி²னிஸ்ஸயேஸு ஆஸஜ்ஜமானா தி³ட்டி²க³திகா காமோகா⁴தீ³னங் சதுன்னங் ஓகா⁴னங், ஸங்ஸாரமஹோக⁴ஸ்ஸேவ வா அந்தராவ வேமஜ்ஜே² ஏவ யங் தேஸங் பாரபா⁴வேன பதிட்ட²ட்டே²ன வா ஓக³த⁴ஸங்கா²தங் நிப்³பா³னங் தத³தி⁴க³மூபாயோ வா அரியமக்³கோ³ தங் அப்பத்வாவ அனதி⁴க³ந்த்வாவ விஸீத³ந்தி ஸங்ஸீத³ந்தி. ஓகா³த⁴ந்தி பதிட்ட²ஹந்தி ஏதேன, எத்த² வாதி ஓகா³தோ⁴, அரியமக்³கோ³ நிப்³பா³னஞ்ச. ஓகா³த⁴மேவெத்த² ரஸ்ஸத்தங் கத்வா ஓக³த⁴ந்தி வுத்தங். தங் ஓக³த⁴ங் தமோக³த⁴ந்தி பத³விபா⁴கோ³.
Tattha antarāva visīdanti, apatvāva tamogadhanti ayaṃ viseso. Tassattho – evaṃ diṭṭhigatesu diṭṭhinissayesu āsajjamānā diṭṭhigatikā kāmoghādīnaṃ catunnaṃ oghānaṃ, saṃsāramahoghasseva vā antarāva vemajjhe eva yaṃ tesaṃ pārabhāvena patiṭṭhaṭṭhena vā ogadhasaṅkhātaṃ nibbānaṃ tadadhigamūpāyo vā ariyamaggo taṃ appatvāva anadhigantvāva visīdanti saṃsīdanti. Ogādhanti patiṭṭhahanti etena, ettha vāti ogādho, ariyamaggo nibbānañca. Ogādhamevettha rassattaṃ katvā ogadhanti vuttaṃ. Taṃ ogadhaṃ tamogadhanti padavibhāgo.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 5. து³தியனானாதித்தி²யஸுத்தங் • 5. Dutiyanānātitthiyasuttaṃ
