| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
2. து³தியனிப்³பா³னபடிஸங்யுத்தஸுத்தவண்ணனா
2. Dutiyanibbānapaṭisaṃyuttasuttavaṇṇanā
72. து³தியே இமங் உதா³னந்தி இமங் நிப்³பா³னஸ்ஸ பகதியா க³ம்பீ⁴ரபா⁴வதோ து³த்³த³ஸபா⁴வதீ³பனங் உதா³னங் உதா³னேஸி. தத்த² து³த்³த³ஸந்தி ஸபா⁴வக³ம்பீ⁴ரத்தா அதிஸுகு²மஸண்ஹஸபா⁴வத்தா ச அனுபசிதஞாணஸம்பா⁴ரேஹி பஸ்ஸிதுங் ந ஸக்காதி து³த்³த³ஸங். வுத்தஞ்ஹேதங் – ‘‘தஞ்ஹி தே, மாக³ண்டி³ய, அரியங் பஞ்ஞாசக்கு² நத்தி², யேன த்வங் ஆரொக்³யங் ஜானெய்யாஸி, நிப்³பா³னம்பி பஸ்ஸெய்யாஸீ’’தி (ம॰ நி॰ 2.218). அபரம்பி வுத்தங் – ‘‘இத³ம்பி கோ² டா²னங் து³த்³த³ஸங், யதி³த³ங் ஸப்³ப³ஸங்கா²ரஸமதோ²’’திஆதி³ (மஹாவ॰ 8; ம॰ நி॰ 1.281; 2.337). அனதந்தி ரூபாதி³ஆரம்மணேஸு, காமாதீ³ஸு ச ப⁴வேஸு நமனதோ தன்னின்னபா⁴வேன பவத்திதோ ஸத்தானஞ்ச தத்த² நமனதோ தண்ஹா நதா நாம, நத்தி² எத்த² நதாதி அனதங், நிப்³பா³னந்தி அத்தோ². ‘‘அனந்த’’ந்திபி பட²ந்தி, நிச்சஸபா⁴வத்தா அந்தவிரஹிதங், அசவனத⁴ம்மங் நிரோத⁴ங் அமதந்தி அத்தோ². கேசி பன ‘‘அனந்த’’ந்தி பத³ஸ்ஸ ‘‘அப்பமாண’’ந்தி அத்த²ங் வத³ந்தி. எத்த² ச ‘‘து³த்³த³ஸ’’ந்தி இமினா பஞ்ஞாய து³ப்³ப³லீகரணேஹி ராகா³தி³கிலேஸேஹி சிரகாலபா⁴விதத்தா ஸத்தானங் அபச்சயபா⁴வனா ந ஸுகராதி நிப்³பா³னஸ்ஸ கிச்சே²ன அதி⁴க³மனீயதங் த³ஸ்ஸேதி. ந ஹி ஸச்சங் ஸுத³ஸ்ஸனந்தி இமினாபி தமேவத்த²ங் பாகடங் கரோதி. தத்த² ஸச்சந்தி நிப்³பா³னங். தஞ்ஹி கேனசி பரியாயேன அஸந்தஸபா⁴வாபா⁴வதோ ஏகந்தேனேவ ஸந்தத்தா அவிபரீதட்டே²ன ஸச்சங். ந ஹி தங் ஸுத³ஸ்ஸனங் ந ஸுகே²ன பஸ்ஸிதப்³ப³ங், ஸுசிரம்பி காலங் புஞ்ஞஞாணஸம்பா⁴ரே ஸமானெந்தேஹிபி கஸிரேனேவ ஸமதி⁴க³ந்தப்³ப³தோ. ததா² ஹி வுத்தங் ப⁴க³வதா – ‘‘கிச்சே²ன மே அதி⁴க³த’’ந்தி (மஹாவ॰ 8; ம॰ நி॰ 1.281; 2.337).
72. Dutiye imaṃ udānanti imaṃ nibbānassa pakatiyā gambhīrabhāvato duddasabhāvadīpanaṃ udānaṃ udānesi. Tattha duddasanti sabhāvagambhīrattā atisukhumasaṇhasabhāvattā ca anupacitañāṇasambhārehi passituṃ na sakkāti duddasaṃ. Vuttañhetaṃ – ‘‘tañhi te, māgaṇḍiya, ariyaṃ paññācakkhu natthi, yena tvaṃ ārogyaṃ jāneyyāsi, nibbānampi passeyyāsī’’ti (ma. ni. 2.218). Aparampi vuttaṃ – ‘‘idampi kho ṭhānaṃ duddasaṃ, yadidaṃ sabbasaṅkhārasamatho’’tiādi (mahāva. 8; ma. ni. 1.281; 2.337). Anatanti rūpādiārammaṇesu, kāmādīsu ca bhavesu namanato tanninnabhāvena pavattito sattānañca tattha namanato taṇhā natā nāma, natthi ettha natāti anataṃ, nibbānanti attho. ‘‘Ananta’’ntipi paṭhanti, niccasabhāvattā antavirahitaṃ, acavanadhammaṃ nirodhaṃ amatanti attho. Keci pana ‘‘ananta’’nti padassa ‘‘appamāṇa’’nti atthaṃ vadanti. Ettha ca ‘‘duddasa’’nti iminā paññāya dubbalīkaraṇehi rāgādikilesehi cirakālabhāvitattā sattānaṃ apaccayabhāvanā na sukarāti nibbānassa kicchena adhigamanīyataṃ dasseti. Na hi saccaṃ sudassananti imināpi tamevatthaṃ pākaṭaṃ karoti. Tattha saccanti nibbānaṃ. Tañhi kenaci pariyāyena asantasabhāvābhāvato ekanteneva santattā aviparītaṭṭhena saccaṃ. Na hi taṃ sudassanaṃ na sukhena passitabbaṃ, sucirampi kālaṃ puññañāṇasambhāre samānentehipi kasireneva samadhigantabbato. Tathā hi vuttaṃ bhagavatā – ‘‘kicchena me adhigata’’nti (mahāva. 8; ma. ni. 1.281; 2.337).
படிவித்³தா⁴ தண்ஹா ஜானதோ பஸ்ஸதோ நத்தி² கிஞ்சனந்தி தஞ்ச நிரோத⁴ஸச்சங் ஸச்சி²கிரியாபி⁴ஸமயவஸேன அபி⁴ஸமெந்தேன விஸயதோ கிச்சதோ ச ஆரம்மணதோ ச ஆரம்மணப்படிவேதே⁴ன அஸம்மோஹப்படிவேதே⁴ன ச படிவித்³த⁴ங், யதா²பரிஞ்ஞாபி⁴ஸமயவஸேன து³க்க²ஸச்சங், பா⁴வனாபி⁴ஸமயவஸேன மக்³க³ஸச்சஞ்ச அஸம்மோஹதோ படிவித்³த⁴ங் ஹோதி, ஏவங் பஹானாபி⁴ஸமயவஸேன அஸம்மோஹதோ ச படிவித்³தா⁴ தண்ஹா ஹோதி. ஏவஞ்ச சத்தாரி ஸச்சானி யதா²பூ⁴தங் அரியமக்³க³பஞ்ஞாய ஜானதோ பஸ்ஸதோ ப⁴வாதீ³ஸு நதபூ⁴தா தண்ஹா நத்தி², தத³பா⁴வே ஸப்³ப³ஸ்ஸபி கிலேஸவட்டஸ்ஸ அபா⁴வோ, ததோவ கம்மவிபாகவட்டானங் அஸம்ப⁴வோயேவாதி ஏவங் ப⁴க³வா தேஸங் பி⁴க்கூ²னங் அனவஸேஸவட்டது³க்க²வூபஸமஹேதுபூ⁴தங் அமதமஹானிப்³பா³னஸ்ஸ ஆனுபா⁴வங் பகாஸேஸி. ஸேஸங் வுத்தனயமேவ.
Paṭividdhā taṇhā jānato passato natthi kiñcananti tañca nirodhasaccaṃ sacchikiriyābhisamayavasena abhisamentena visayato kiccato ca ārammaṇato ca ārammaṇappaṭivedhena asammohappaṭivedhena ca paṭividdhaṃ, yathāpariññābhisamayavasena dukkhasaccaṃ, bhāvanābhisamayavasena maggasaccañca asammohato paṭividdhaṃ hoti, evaṃ pahānābhisamayavasena asammohato ca paṭividdhā taṇhā hoti. Evañca cattāri saccāni yathābhūtaṃ ariyamaggapaññāya jānato passato bhavādīsu natabhūtā taṇhā natthi, tadabhāve sabbassapi kilesavaṭṭassa abhāvo, tatova kammavipākavaṭṭānaṃ asambhavoyevāti evaṃ bhagavā tesaṃ bhikkhūnaṃ anavasesavaṭṭadukkhavūpasamahetubhūtaṃ amatamahānibbānassa ānubhāvaṃ pakāsesi. Sesaṃ vuttanayameva.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 2. து³தியனிப்³பா³னபடிஸங்யுத்தஸுத்தங் • 2. Dutiyanibbānapaṭisaṃyuttasuttaṃ
