| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
8. க³ணிகாஸுத்தவண்ணனா
8. Gaṇikāsuttavaṇṇanā
58. அட்ட²மே த்³வே பூகா³தி த்³வே க³ணா. அஞ்ஞதரிஸ்ஸா க³ணிகாயாதி அஞ்ஞதராய நக³ரஸோபி⁴னியா. ஸாரத்தாதி ஸுட்டு² ரத்தா. படிப³த்³த⁴சித்தாதி கிலேஸவஸேன ப³த்³த⁴சித்தா. ராஜக³ஹே கிர ஏகஸ்மிங் ச²ணதி³வஸே ப³ஹூ து⁴த்தபுரிஸா க³ணப³ந்த⁴னேன விசரந்தா ஏகமேகஸ்ஸ ஏகமேகங் வேஸிங் ஆனெத்வா உய்யானங் பவிஸித்வா ச²ணகீளங் கீளிங்ஸு. ததோ பரம்பி த்³வே தயோ ச²ணதி³வஸே தங் தங்யேவ வேஸிங் ஆனெத்வா ச²ணகீளங் கீளிங்ஸு. அதா²பரஸ்மிங் ச²ணதி³வஸே அஞ்ஞேபி து⁴த்தா ததே²வ ச²ணகீளங் கீளிதுகாமா வேஸியோ ஆனெந்தா புரிமது⁴த்தேஹி புப்³பே³ ஆனீதங் ஏகங் வேஸிங் ஆனெந்தி. இதரே தங் தி³ஸ்வா ‘‘அயங் அம்ஹாகங் பரிக்³க³ஹோ’’தி ஆஹங்ஸு. தேபி ததே²வ ஆஹங்ஸு. ‘‘ஏவங் அம்ஹாகங் பரிக்³க³ஹோ, அம்ஹாகங் பரிக்³க³ஹோ’’தி கலஹங் வட்³டெ⁴த்வா பாணிப்பஹாராதீ³னி அகங்ஸு. தேன வுத்தங் – ‘‘தேன கோ² பன ஸமயேன ராஜக³ஹே த்³வே பூகா³’’திஆதி³. தத்த² உபக்கமந்தீதி பஹரந்தி. மரணம்பி நிக³ச்ச²ந்தீதி ப³லவூபக்கமேஹி மரணங் உபக³ச்ச²ந்தி, இதரேபி மரணமத்தங் மரணப்பமாணது³க்க²ங் பாபுணந்தி.
58. Aṭṭhame dve pūgāti dve gaṇā. Aññatarissā gaṇikāyāti aññatarāya nagarasobhiniyā. Sārattāti suṭṭhu rattā. Paṭibaddhacittāti kilesavasena baddhacittā. Rājagahe kira ekasmiṃ chaṇadivase bahū dhuttapurisā gaṇabandhanena vicarantā ekamekassa ekamekaṃ vesiṃ ānetvā uyyānaṃ pavisitvā chaṇakīḷaṃ kīḷiṃsu. Tato parampi dve tayo chaṇadivase taṃ taṃyeva vesiṃ ānetvā chaṇakīḷaṃ kīḷiṃsu. Athāparasmiṃ chaṇadivase aññepi dhuttā tatheva chaṇakīḷaṃ kīḷitukāmā vesiyo ānentā purimadhuttehi pubbe ānītaṃ ekaṃ vesiṃ ānenti. Itare taṃ disvā ‘‘ayaṃ amhākaṃ pariggaho’’ti āhaṃsu. Tepi tatheva āhaṃsu. ‘‘Evaṃ amhākaṃ pariggaho, amhākaṃ pariggaho’’ti kalahaṃ vaḍḍhetvā pāṇippahārādīni akaṃsu. Tena vuttaṃ – ‘‘tena kho pana samayena rājagahe dve pūgā’’tiādi. Tattha upakkamantīti paharanti. Maraṇampi nigacchantīti balavūpakkamehi maraṇaṃ upagacchanti, itarepi maraṇamattaṃ maraṇappamāṇadukkhaṃ pāpuṇanti.
ஏதமத்த²ங் விதி³த்வாதி ஏதங் காமேஸு கே³த⁴ங் விவாத³மூலங் ஸப்³பா³னத்த²மூலந்தி ஸப்³பா³காரதோ விதி³த்வா. இமங் உதா³னந்தி அந்தத்³வயே ச மஜ்ஜி²மாய படிபத்தியா ஆதீ³னவானிஸங்ஸவிபா⁴வனங் இமங் உதா³னங் உதா³னேஸி.
Etamatthaṃ viditvāti etaṃ kāmesu gedhaṃ vivādamūlaṃ sabbānatthamūlanti sabbākārato viditvā. Imaṃ udānanti antadvaye ca majjhimāya paṭipattiyā ādīnavānisaṃsavibhāvanaṃ imaṃ udānaṃ udānesi.
தத்த² யஞ்ச பத்தந்தி யங் ரூபாதி³பஞ்சகாமகு³ணஜாதங் பத்தங் ‘‘நத்தி² காமேஸு தோ³ஸோ’’தி தி³ட்டி²ங் புரக்க²த்வா வா அபுரக்க²த்வா வா ஏதரஹி லத்³த⁴ங் அனுபு⁴ய்யமானங். யஞ்ச பத்தப்³ப³ந்தி யஞ்ச காமகு³ணஜாதமேவ ‘‘பு⁴ஞ்ஜிதப்³பா³ காமா, பரிபு⁴ஞ்ஜிதப்³பா³ காமா, ஆஸேவிதப்³பா³ காமா, படிஸேவிதப்³பா³ காமா, யோ காமே பரிபு⁴ஞ்ஜதி, ஸோ லோகங் வட்³டே⁴தி, யோ லோகங் வட்³டே⁴தி, ஸோ ப³ஹுங் புஞ்ஞங் பஸவதீ’’தி தி³ட்டி²ங் உபனிஸ்ஸாய தங் அனிஸ்ஸஜ்ஜித்வா கதேன கம்முனா அனாக³தே பத்தப்³ப³ங் அனுப⁴விதப்³ப³ஞ்ச. உப⁴யமேதங் ரஜானுகிண்ணந்தி ஏதங் உப⁴யங் பத்தங் பத்தப்³ப³ஞ்ச ராக³ரஜாதீ³ஹி அனுகிண்ணங். ஸம்பத்தே ஹி வத்து²காமே அனுப⁴வந்தோ ராக³ரஜேன வோகிண்ணோ ஹோதி, தத்த² பன ஸங்கிலிட்ட²சித்தஸ்ஸ ப²லே ஆயதிங் ஆபன்னே தோ³மனஸ்ஸுப்பத்தியா தோ³ஸரஜேன வோகிண்ணோ ஹோதி, உப⁴யத்தா²பி மோஹரஜேன வோகிண்ணோ ஹோதி. கஸ்ஸ பனேதங் ரஜானுகிண்ணந்தி ஆஹ – ‘‘ஆதுரஸ்ஸானுஸிக்க²தோ’’தி காமபத்த²னாவஸேன கிலேஸாதுரஸ்ஸ, தஸ்ஸ ச ப²லேன து³க்கா²துரஸ்ஸ ச உப⁴யத்தா²பி படிகாராபி⁴லாஸாய கிலேஸப²லே அனுஸிக்க²தோ.
Tattha yañca pattanti yaṃ rūpādipañcakāmaguṇajātaṃ pattaṃ ‘‘natthi kāmesu doso’’ti diṭṭhiṃ purakkhatvā vā apurakkhatvā vā etarahi laddhaṃ anubhuyyamānaṃ. Yañca pattabbanti yañca kāmaguṇajātameva ‘‘bhuñjitabbā kāmā, paribhuñjitabbā kāmā, āsevitabbā kāmā, paṭisevitabbā kāmā, yo kāme paribhuñjati, so lokaṃ vaḍḍheti, yo lokaṃ vaḍḍheti, so bahuṃ puññaṃ pasavatī’’ti diṭṭhiṃ upanissāya taṃ anissajjitvā katena kammunā anāgate pattabbaṃ anubhavitabbañca. Ubhayametaṃ rajānukiṇṇanti etaṃ ubhayaṃ pattaṃ pattabbañca rāgarajādīhi anukiṇṇaṃ. Sampatte hi vatthukāme anubhavanto rāgarajena vokiṇṇo hoti, tattha pana saṃkiliṭṭhacittassa phale āyatiṃ āpanne domanassuppattiyā dosarajena vokiṇṇo hoti, ubhayatthāpi moharajena vokiṇṇo hoti. Kassa panetaṃ rajānukiṇṇanti āha – ‘‘āturassānusikkhato’’ti kāmapatthanāvasena kilesāturassa, tassa ca phalena dukkhāturassa ca ubhayatthāpi paṭikārābhilāsāya kilesaphale anusikkhato.
ததா² யஞ்ச பத்தந்தி யங் அசேலகவதாதி³வஸேன பத்தங் அத்தபரிதாபனங் . யஞ்ச பத்தப்³ப³ந்தி யங் மிச்சா²தி³ட்டி²கம்மஸமாதா³னஹேது அபாயேஸு பத்தப்³ப³ங் ப²லங். உப⁴யமேதங் ரஜானுகிண்ணந்தி தது³ப⁴யங் து³க்க²ரஜானுகிண்ணங். ஆதுரஸ்ஸாதி காயகிலமதே²ன து³க்கா²துரஸ்ஸ. அனுஸிக்க²தோதி மிச்சா²தி³ட்டி²ங், தஸ்ஸா ஸமாதா³யகே புக்³க³லே ச அனுஸிக்க²தோ.
Tathā yañca pattanti yaṃ acelakavatādivasena pattaṃ attaparitāpanaṃ . Yañca pattabbanti yaṃ micchādiṭṭhikammasamādānahetu apāyesu pattabbaṃ phalaṃ. Ubhayametaṃ rajānukiṇṇanti tadubhayaṃ dukkharajānukiṇṇaṃ. Āturassāti kāyakilamathena dukkhāturassa. Anusikkhatoti micchādiṭṭhiṃ, tassā samādāyake puggale ca anusikkhato.
யே ச ஸிக்கா²ஸாராதி யேஹி யதா²ஸமாதி³ன்னங் ஸீலப்³ப³தாதி³ஸங்கா²தங் ஸிக்க²ங் ஸாரதோ க³ஹெத்வா ‘‘இமினா ஸங்ஸாரஸுத்³தீ⁴’’தி கதி²தா. தேனாஹ – ஸீலப்³ப³தங் ஜீவிதங் ப்³ரஹ்மசரியங் உபட்டா²னஸாராதி. தத்த² யங் ‘‘ந கரோமீ’’தி ஓரமதி, தங் ஸீலங், விஸபோ⁴ஜனகிச்சா²சரணாதி³கங் வதங், ஸாகப⁴க்க²தாதி³ஜீவிகா ஜீவிதங், மேது²னவிரதி ப்³ரஹ்மசரியங், ஏதேஸங் அனுதிட்ட²னங் உபட்டா²னங், பூ⁴தபிண்ட³கபரிப⁴ண்டா³தி³வஸேன க²ந்த⁴தே³வஸிவாதி³பரிசரணங் வா உபட்டா²னங், ஏவமேதேஹி யதா²வுத்தேஹி ஸீலாதீ³ஹி ஸங்ஸாரஸுத்³தி⁴ ஹோதீதி தானி ஸாரதோ க³ஹெத்வா டி²தா ஸமணப்³ராஹ்மணா ஸிக்கா²ஸாரா ஸீலப்³ப³தங் ஜீவிதங் ப்³ரஹ்மசரியங் ‘‘உபட்டா²னஸாரா’’தி வேதி³தப்³பா³. அயமேகோ அந்தோதி அயங் ஸீலப்³ப³தபராமாஸவஸேன அத்தகிலமதா²னுயோக³ஸங்கா²தோ மஜ்ஜி²மாய படிபத்தியா உப்பத²பூ⁴தோ லாமகட்டே²ன ச ஏகோ அந்தோ. அயங் து³தியோ அந்தோதி அயங் காமஸுக²ல்லிகானுயோகோ³ காமேஸு பாதப்³யதாபத்திஸங்கா²தோ து³தியோ வுத்தனயேன அந்தோ.
Ye ca sikkhāsārāti yehi yathāsamādinnaṃ sīlabbatādisaṅkhātaṃ sikkhaṃ sārato gahetvā ‘‘iminā saṃsārasuddhī’’ti kathitā. Tenāha – sīlabbataṃ jīvitaṃ brahmacariyaṃ upaṭṭhānasārāti. Tattha yaṃ ‘‘na karomī’’ti oramati, taṃ sīlaṃ, visabhojanakicchācaraṇādikaṃ vataṃ, sākabhakkhatādijīvikā jīvitaṃ, methunavirati brahmacariyaṃ, etesaṃ anutiṭṭhanaṃ upaṭṭhānaṃ, bhūtapiṇḍakaparibhaṇḍādivasena khandhadevasivādiparicaraṇaṃ vā upaṭṭhānaṃ, evametehi yathāvuttehi sīlādīhi saṃsārasuddhi hotīti tāni sārato gahetvā ṭhitā samaṇabrāhmaṇā sikkhāsārā sīlabbataṃ jīvitaṃ brahmacariyaṃ ‘‘upaṭṭhānasārā’’ti veditabbā. Ayameko antoti ayaṃ sīlabbataparāmāsavasena attakilamathānuyogasaṅkhāto majjhimāya paṭipattiyā uppathabhūto lāmakaṭṭhena ca eko anto. Ayaṃ dutiyo antoti ayaṃ kāmasukhallikānuyogo kāmesu pātabyatāpattisaṅkhāto dutiyo vuttanayena anto.
இச்சேதே உபோ⁴ அந்தாதி காமஸுக²ல்லிகானுயோகோ³ அத்தகிலமதா²னுயோகோ³ ச இதி ஏதே உபோ⁴ அந்தா. தே ச கோ² ஏதரஹி பத்தே, ஆயதிங் பத்தப்³பே³ ச கிலேஸது³க்க²ரஜானுகிண்ணே காமகு³ணே அத்தபரிதாபனே ச அல்லீனேஹி கிலேஸது³க்கா²துரானங் அனுஸிக்க²ந்தேஹி, ஸயஞ்ச கிலேஸது³க்கா²துரேஹி படிபஜ்ஜிதப்³ப³த்தா லாமகா உப்பத²பூ⁴தா சாதி அந்தா. கடஸிவட்³ட⁴னாதி அந்த⁴புது²ஜ்ஜனேஹி அபி⁴கங்கி²தப்³ப³ட்டே²ன கடஸிஸங்கா²தானங் தண்ஹாஅவிஜ்ஜானங் அபி⁴வட்³ட⁴னா. கடஸியோ தி³ட்டி²ங் வட்³டெ⁴ந்தீதி தா பன கடஸியோ நானப்பகாரதி³ட்டி²ங் வட்³டெ⁴ந்தி. வத்து²காமேஸு அஸ்ஸாதா³னுபஸ்ஸினோ ஹி தே பஜஹிதுங் அஸக்கொந்தஸ்ஸ தண்ஹாஅவிஜ்ஜாஸஹகாரீகாரணங் லபி⁴த்வா ‘‘நத்தி² தி³ன்ன’’ந்திஆதி³னா (த⁴॰ ஸ॰ 1221; விப⁴॰ 938) நத்தி²கதி³ட்டி²ங் அகிரியதி³ட்டி²ங் அஹேதுகதி³ட்டி²ஞ்ச க³ண்ஹாபெந்தி, அத்தபரிதாபனங் அனுயுத்தஸ்ஸ பன அவிஜ்ஜாதண்ஹாஸஹகாரீகாரணங் லபி⁴த்வா ‘‘ஸீலேன ஸுத்³தி⁴ வதேன ஸுத்³தீ⁴’’திஆதி³னா அத்தஸுத்³தி⁴அபி⁴லாஸேன ஸீலப்³ப³தபராமாஸதி³ட்டி²ங் க³ண்ஹாபெந்தி. ஸக்காயதி³ட்டி²யா பன தேஸங் பச்சயபா⁴வோ பாகடோயேவ. ஏவங் அந்தத்³வயூபனிஸ்ஸயேன தண்ஹாஅவிஜ்ஜானங் தி³ட்டி²வட்³ட⁴கதா வேதி³தப்³பா³. கேசி பன ‘‘கடஸீதி பஞ்சன்னங் க²ந்தா⁴னங் அதி⁴வசன’’ந்தி வத³ந்தி. தேஸங் யத³க்³கே³ன ததோ அந்தத்³வயதோ ஸங்ஸாரஸுத்³தி⁴ ந ஹோதி, தத³க்³கே³ன தே உபாதா³னக்க²ந்தே⁴ அபி⁴வட்³டே⁴தீதி அதி⁴ப்பாயோ. அபரே பன ‘‘கடஸிவட்³ட⁴னா’’தி பத³ஸ்ஸ ‘‘அபராபரங் ஜராமரணேஹி ஸிவதி²கவட்³ட⁴னா’’தி அத்த²ங் வத³ந்தி. தேஹிபி அந்தத்³வயஸ்ஸ ஸங்ஸாரஸுத்³தி⁴ஹேதுபா⁴வாபா⁴வோயேவ வுத்தோ, கடஸியா பன தி³ட்டி²வட்³ட⁴னகாரணபா⁴வோ வத்தப்³போ³.
Iccete ubho antāti kāmasukhallikānuyogo attakilamathānuyogo ca iti ete ubho antā. Te ca kho etarahi patte, āyatiṃ pattabbe ca kilesadukkharajānukiṇṇe kāmaguṇe attaparitāpane ca allīnehi kilesadukkhāturānaṃ anusikkhantehi, sayañca kilesadukkhāturehi paṭipajjitabbattā lāmakā uppathabhūtā cāti antā. Kaṭasivaḍḍhanāti andhaputhujjanehi abhikaṅkhitabbaṭṭhena kaṭasisaṅkhātānaṃ taṇhāavijjānaṃ abhivaḍḍhanā. Kaṭasiyo diṭṭhiṃ vaḍḍhentīti tā pana kaṭasiyo nānappakāradiṭṭhiṃ vaḍḍhenti. Vatthukāmesu assādānupassino hi te pajahituṃ asakkontassa taṇhāavijjāsahakārīkāraṇaṃ labhitvā ‘‘natthi dinna’’ntiādinā (dha. sa. 1221; vibha. 938) natthikadiṭṭhiṃ akiriyadiṭṭhiṃ ahetukadiṭṭhiñca gaṇhāpenti, attaparitāpanaṃ anuyuttassa pana avijjātaṇhāsahakārīkāraṇaṃ labhitvā ‘‘sīlena suddhi vatena suddhī’’tiādinā attasuddhiabhilāsena sīlabbataparāmāsadiṭṭhiṃ gaṇhāpenti. Sakkāyadiṭṭhiyā pana tesaṃ paccayabhāvo pākaṭoyeva. Evaṃ antadvayūpanissayena taṇhāavijjānaṃ diṭṭhivaḍḍhakatā veditabbā. Keci pana ‘‘kaṭasīti pañcannaṃ khandhānaṃ adhivacana’’nti vadanti. Tesaṃ yadaggena tato antadvayato saṃsārasuddhi na hoti, tadaggena te upādānakkhandhe abhivaḍḍhetīti adhippāyo. Apare pana ‘‘kaṭasivaḍḍhanā’’ti padassa ‘‘aparāparaṃ jarāmaraṇehi sivathikavaḍḍhanā’’ti atthaṃ vadanti. Tehipi antadvayassa saṃsārasuddhihetubhāvābhāvoyeva vutto, kaṭasiyā pana diṭṭhivaḍḍhanakāraṇabhāvo vattabbo.
ஏதே தே உபோ⁴ அந்தே அனபி⁴ஞ்ஞாயாதி தே ஏதே யதா²வுத்தே உபோ⁴பி அந்தே அஜானித்வா ‘‘இமே அந்தா தே ச ஏவங்க³ஹிதா ஏவங்அனுட்டி²தா ஏவங்க³திகா ஏவங்அபி⁴ஸம்பராயா’’தி ஏவங் அஜானநஹேது அஜானநகாரணா. ‘‘பஞ்ஞாய சஸ்ஸ தி³ஸ்வா ஆஸவா பரிக்கீ²ணா’’திஆதீ³ஸு (பு॰ ப॰ 208; அ॰ நி॰ 9.43) வியஸ்ஸ ஹேதுஅத்த²தா த³ட்ட²ப்³பா³. ஓலீயந்தி ஏகேதி ஏகே காமஸுகா²னுயோக³வஸேன ஸங்கோசங் ஆபஜ்ஜந்தி. அதிதா⁴வந்தி ஏகேதி ஏகே அத்தகிலமதா²னுயோக³வஸேன அதிக்கமந்தி. காமஸுக²மனுயுத்தா ஹி வீரியஸ்ஸ அகரணதோ கோஸஜ்ஜவஸேன ஸம்மாபடிபத்திதோ ஸங்கோசமாபன்னதா ஓலீயந்தி நாம, அத்தபரிதாபனமனுயுத்தா பன கோஸஜ்ஜங் பஹாய அனுபாயேன வீரியாரம்ப⁴ங் கரொந்தா ஸம்மாபடிபத்தியா அதிக்கமனதோ அதிதா⁴வந்தி நாம, தது³ப⁴யங் பன தத்த² ஆதீ³னவாத³ஸ்ஸனதோ. தேன வுத்தங் – ‘‘உபோ⁴ அந்தே அனபி⁴ஞ்ஞாய ஓலீயந்தி ஏகே அதிதா⁴வந்தி ஏகே’’தி. தத்த² தண்ஹாபி⁴னந்த³னவஸேன ஓலீயந்தி, தி³ட்டா²பி⁴னந்த³னவஸேன அதிதா⁴வந்தீதி வேதி³தப்³ப³ங்.
Ete te ubho ante anabhiññāyāti te ete yathāvutte ubhopi ante ajānitvā ‘‘ime antā te ca evaṃgahitā evaṃanuṭṭhitā evaṃgatikā evaṃabhisamparāyā’’ti evaṃ ajānanahetu ajānanakāraṇā. ‘‘Paññāya cassa disvā āsavā parikkhīṇā’’tiādīsu (pu. pa. 208; a. ni. 9.43) viyassa hetuatthatā daṭṭhabbā. Olīyanti eketi eke kāmasukhānuyogavasena saṅkocaṃ āpajjanti. Atidhāvanti eketi eke attakilamathānuyogavasena atikkamanti. Kāmasukhamanuyuttā hi vīriyassa akaraṇato kosajjavasena sammāpaṭipattito saṅkocamāpannatā olīyanti nāma, attaparitāpanamanuyuttā pana kosajjaṃ pahāya anupāyena vīriyārambhaṃ karontā sammāpaṭipattiyā atikkamanato atidhāvanti nāma, tadubhayaṃ pana tattha ādīnavādassanato. Tena vuttaṃ – ‘‘ubho ante anabhiññāya olīyanti eke atidhāvanti eke’’ti. Tattha taṇhābhinandanavasena olīyanti, diṭṭhābhinandanavasena atidhāvantīti veditabbaṃ.
அத² வா ஸஸ்ஸதாபி⁴னிவேஸவஸேன ஓலீயந்தி ஏகே, உச்சே²தா³பி⁴னிவேஸவஸேன அதிதா⁴வந்தி ஏகே. கோ³ஸீலாதி³வஸேன ஹி அத்தபரிதாபனமனுயுத்தா ஏகச்சே ‘‘இமினாஹங் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா, தத்த² நிச்சோ து⁴வோ ஸஸ்ஸதோ அவிபரிணாமத⁴ம்மோ ஸஸ்ஸதிஸமங் ததே²வ ட²ஸ்ஸாமீ’’தி ஸஸ்ஸதத³ஸ்ஸனங் அபி⁴னிவிஸந்தா ஸங்ஸாரே ஓலீயந்தி நாம, காமஸுக²மனுயுத்தா பன ஏகச்சே யங்கிஞ்சி கத்வா இந்த்³ரியானி ஸந்தப்பேதுகாமா லோகாயதிகா விய தத³னுகு³ணங் உச்சே²த³த³ஸ்ஸனங் அபி⁴னிவிஸந்தா அனுபாயேன வட்டுபச்சே²த³ஸ்ஸ பரியேஸனதோ அதிதா⁴வந்தி நாம. ஏவங் ஸஸ்ஸதுச்சே²த³வஸேனபி ஓலீயனாதிதா⁴வனானி வேதி³தப்³பா³னி.
Atha vā sassatābhinivesavasena olīyanti eke, ucchedābhinivesavasena atidhāvanti eke. Gosīlādivasena hi attaparitāpanamanuyuttā ekacce ‘‘imināhaṃ sīlena vā vatena vā tapena vā brahmacariyena vā devo vā bhavissāmi devaññataro vā, tattha nicco dhuvo sassato avipariṇāmadhammo sassatisamaṃ tatheva ṭhassāmī’’ti sassatadassanaṃ abhinivisantā saṃsāre olīyanti nāma, kāmasukhamanuyuttā pana ekacce yaṃkiñci katvā indriyāni santappetukāmā lokāyatikā viya tadanuguṇaṃ ucchedadassanaṃ abhinivisantā anupāyena vaṭṭupacchedassa pariyesanato atidhāvanti nāma. Evaṃ sassatucchedavasenapi olīyanātidhāvanāni veditabbāni.
யே ச கோ² தே அபி⁴ஞ்ஞாயாதி யே ச கோ² பன அரியபுக்³க³லா தே யதா²வுத்தே உபோ⁴ அந்தே ‘‘இமே அந்தா ஏவங்க³ஹிதா ஏவங்அனுட்டி²தா ஏவங்க³திகா ஏவங்அபி⁴ஸம்பராயா’’தி அபி⁴விஸிட்டே²ன ஞாணேன விபஸ்ஸனாஸஹிதாய மக்³க³பஞ்ஞாய ஜானித்வா மஜ்ஜி²மபடிபத³ங் ஸம்மாபடிபன்னா, தாய ஸம்மாபடிபத்தியா. தத்ர ச நாஹேஸுந்தி தத்ர தஸ்மிங் அந்தத்³வயே பதிதா ந அஹேஸுங், தங் அந்தத்³வயங் பஜஹிங்ஸூதி அத்தோ². தேன ச நாமஞ்ஞிங்ஸூதி தேன அந்தத்³வயபஹானேன ‘‘மம இத³ங் அந்தத்³வயபஹானங், அஹங் அந்தத்³வயங் பஹாஸிங், இமினா அந்தத்³வயபஹானேன ஸெய்யோ’’திஆதி³னா தண்ஹாதி³ட்டி²மானமஞ்ஞனாவஸேன ந அமஞ்ஞிங்ஸு ஸப்³ப³மஞ்ஞனானங் ஸம்மதே³வ பஹீனத்தா. எத்த² ச அக்³க³ப²லே டி²தே அரியபுக்³க³லே ஸந்தா⁴ய ‘‘தத்ர ச நாஹேஸுங், தேன ச நாமஞ்ஞிங்ஸூ’’தி அதீதகாலவஸேன அயங் தே³ஸனா பவத்தா, மக்³க³க்க²ணே பன அதி⁴ப்பேதே வத்தமானகாலவஸேனேவ வத்தப்³ப³ங் ஸியா. வட்டங் தேஸங் நத்தி² பஞ்ஞாபனாயாதி யே ஏவங் பஹீனஸப்³ப³மஞ்ஞனா உத்தமபுரிஸா, தேஸங் அனுபாதா³பரினிப்³பு³தானங் கம்மவிபாககிலேஸவஸேன திவித⁴ம்பி வட்டங் நத்தி² பஞ்ஞாபனாய, வத்தமானக்க²ந்த⁴பே⁴த³தோ உத்³த⁴ங் அனுபாதா³னோ விய ஜாதவேதோ³ அபஞ்ஞத்திகபா⁴வமேவ க³ச்ச²தீதி அத்தோ².
Ye ca kho te abhiññāyāti ye ca kho pana ariyapuggalā te yathāvutte ubho ante ‘‘ime antā evaṃgahitā evaṃanuṭṭhitā evaṃgatikā evaṃabhisamparāyā’’ti abhivisiṭṭhena ñāṇena vipassanāsahitāya maggapaññāya jānitvā majjhimapaṭipadaṃ sammāpaṭipannā, tāya sammāpaṭipattiyā. Tatra ca nāhesunti tatra tasmiṃ antadvaye patitā na ahesuṃ, taṃ antadvayaṃ pajahiṃsūti attho. Tena ca nāmaññiṃsūti tena antadvayapahānena ‘‘mama idaṃ antadvayapahānaṃ, ahaṃ antadvayaṃ pahāsiṃ, iminā antadvayapahānena seyyo’’tiādinā taṇhādiṭṭhimānamaññanāvasena na amaññiṃsu sabbamaññanānaṃ sammadeva pahīnattā. Ettha ca aggaphale ṭhite ariyapuggale sandhāya ‘‘tatra ca nāhesuṃ, tena ca nāmaññiṃsū’’ti atītakālavasena ayaṃ desanā pavattā, maggakkhaṇe pana adhippete vattamānakālavaseneva vattabbaṃ siyā. Vaṭṭaṃ tesaṃ natthi paññāpanāyāti ye evaṃ pahīnasabbamaññanā uttamapurisā, tesaṃ anupādāparinibbutānaṃ kammavipākakilesavasena tividhampi vaṭṭaṃ natthi paññāpanāya, vattamānakkhandhabhedato uddhaṃ anupādāno viya jātavedo apaññattikabhāvameva gacchatīti attho.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 8. க³ணிகாஸுத்தங் • 8. Gaṇikāsuttaṃ
