| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૩. જરામરણસુત્તં
3. Jarāmaraṇasuttaṃ
૧૧૪. સાવત્થિનિદાનં . એકમન્તં નિસિન્નો ખો રાજા પસેનદિ કોસલો ભગવન્તં એતદવોચ – ‘‘અત્થિ નુ ખો, ભન્તે, જાતસ્સ અઞ્ઞત્ર જરામરણા’’તિ? ‘‘નત્થિ ખો, મહારાજ, જાતસ્સ અઞ્ઞત્ર જરામરણા. યેપિ તે, મહારાજ, ખત્તિયમહાસાલા અડ્ઢા મહદ્ધના મહાભોગા પહૂતજાતરૂપરજતા પહૂતવિત્તૂપકરણા પહૂતધનધઞ્ઞા, તેસમ્પિ જાતાનં નત્થિ અઞ્ઞત્ર જરામરણા. યેપિ તે, મહારાજ, બ્રાહ્મણમહાસાલા…પે॰… ગહપતિમહાસાલા અડ્ઢા મહદ્ધના મહાભોગા પહૂતજાતરૂપરજતા પહૂતવિત્તૂપકરણા પહૂતધનધઞ્ઞા, તેસમ્પિ જાતાનં નત્થિ અઞ્ઞત્ર જરામરણા. યેપિ તે, મહારાજ, ભિક્ખૂ અરહન્તો ખીણાસવા વુસિતવન્તો કતકરણીયા ઓહિતભારા અનુપ્પત્તસદત્થા પરિક્ખીણભવસંયોજના સમ્મદઞ્ઞાવિમુત્તા, તેસં પાયં કાયો ભેદનધમ્મો નિક્ખેપનધમ્મો’’તિ. ઇદમવોચ…પે॰…
114. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘atthi nu kho, bhante, jātassa aññatra jarāmaraṇā’’ti? ‘‘Natthi kho, mahārāja, jātassa aññatra jarāmaraṇā. Yepi te, mahārāja, khattiyamahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, brāhmaṇamahāsālā…pe… gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññāvimuttā, tesaṃ pāyaṃ kāyo bhedanadhammo nikkhepanadhammo’’ti. Idamavoca…pe…
‘‘જીરન્તિ વે રાજરથા સુચિત્તા,
‘‘Jīranti ve rājarathā sucittā,
અથો સરીરમ્પિ જરં ઉપેતિ;
Atho sarīrampi jaraṃ upeti;
સતઞ્ચ ધમ્મો ન જરં ઉપેતિ,
Satañca dhammo na jaraṃ upeti,
સન્તો હવે સબ્ભિ પવેદયન્તી’’તિ.
Santo have sabbhi pavedayantī’’ti.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. જરામરણસુત્તવણ્ણના • 3. Jarāmaraṇasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૩. જરામરણસુત્તવણ્ણના • 3. Jarāmaraṇasuttavaṇṇanā
