| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
9. ஜடிலஸுத்தவண்ணனா
9. Jaṭilasuttavaṇṇanā
9. நவமே க³யாயந்தி எத்த² க³யாதி கா³மோபி தித்த²ம்பி வுச்சதி. க³யாகா³மஸ்ஸ ஹி அவிதூ³ரே விஹரந்தோ ப⁴க³வா ‘‘க³யாயங் விஹரதீ’’தி வுச்சதி, ததா² க³யாதித்த²ஸ்ஸ. க³யாதித்த²ந்தி ஹி க³யாகா³மஸ்ஸ அவிதூ³ரே ஏகா பொக்க²ரணீ அத்தி² நதீ³பி, தது³ப⁴யங் ‘‘பாபபவாஹனதித்த²’’ந்தி லோகியமஹாஜனோ ஸமுதா³சரதி. க³யாஸீஸேதி க³ஜஸீஸஸதி³ஸஸிக²ரோ தத்த² ஏகோ பப்³ப³தோ க³யாஸீஸனாமகோ, யத்த² ஹத்தி²கும்ப⁴ஸதி³ஸோ பிட்டி²பாஸாணோ பி⁴க்கு²ஸஹஸ்ஸஸ்ஸ ஓகாஸோ பஹோதி, தத்ர ப⁴க³வா விஹரதி. தேன வுத்தங் – ‘‘க³யாயங் விஹரதி க³யாஸீஸே’’தி.
9. Navame gayāyanti ettha gayāti gāmopi titthampi vuccati. Gayāgāmassa hi avidūre viharanto bhagavā ‘‘gayāyaṃ viharatī’’ti vuccati, tathā gayātitthassa. Gayātitthanti hi gayāgāmassa avidūre ekā pokkharaṇī atthi nadīpi, tadubhayaṃ ‘‘pāpapavāhanatittha’’nti lokiyamahājano samudācarati. Gayāsīseti gajasīsasadisasikharo tattha eko pabbato gayāsīsanāmako, yattha hatthikumbhasadiso piṭṭhipāsāṇo bhikkhusahassassa okāso pahoti, tatra bhagavā viharati. Tena vuttaṃ – ‘‘gayāyaṃ viharati gayāsīse’’ti.
ஜடிலாதி தாபஸா. தே ஹி ஜடாதா⁴ரிதாய இத⁴ ‘‘ஜடிலா’’தி வுத்தா. அந்தரட்ட²கே ஹிமபாதஸமயேதி ஹேமந்தஸ்ஸ உதுனோ அப்³ப⁴ந்தரபூ⁴தே மாக⁴மாஸஸ்ஸ அவஸானே சத்தாரோ ப²க்³கு³ணமாஸஸ்ஸ ஆதி³ம்ஹி சத்தாரோதி அட்ட²தி³வஸபரிமாணே ஹிமஸ்ஸ பதனகாலே. க³யாயங் உம்முஜ்ஜந்தீதி கேசி தஸ்மிங் தித்த²ஸம்மதே உத³கே பட²மங் நிமுக்³க³ஸகலஸரீரா ததோ உம்முஜ்ஜந்தி வுட்ட²ஹந்தி உப்பிலவந்தி. நிமுஜ்ஜந்தீதி ஸஸீஸங் உத³கே ஓஸீத³ந்தி. உம்முஜ்ஜனிமுஜ்ஜம்பி கரொந்தீதி புனப்புனங் உம்முஜ்ஜனநிமுஜ்ஜனானிபி கரொந்தி.
Jaṭilāti tāpasā. Te hi jaṭādhāritāya idha ‘‘jaṭilā’’ti vuttā. Antaraṭṭhake himapātasamayeti hemantassa utuno abbhantarabhūte māghamāsassa avasāne cattāro phagguṇamāsassa ādimhi cattāroti aṭṭhadivasaparimāṇe himassa patanakāle. Gayāyaṃ ummujjantīti keci tasmiṃ titthasammate udake paṭhamaṃ nimuggasakalasarīrā tato ummujjanti vuṭṭhahanti uppilavanti. Nimujjantīti sasīsaṃ udake osīdanti. Ummujjanimujjampi karontīti punappunaṃ ummujjananimujjanānipi karonti.
தத்த² ஹி கேசி ‘‘ஏகும்முஜ்ஜனேனேவ பாபஸுத்³தி⁴ ஹோதீ’’தி ஏவங்தி³ட்டி²கா, தே உம்முஜ்ஜனமேவ கத்வா க³ச்ச²ந்தி. உம்முஜ்ஜனங் பன நிமுஜ்ஜனமந்தரேன நத்தீ²தி அவினாபா⁴வதோ நிமுஜ்ஜனம்பி தே கரொந்தியேவ. யேபி ‘‘ஏகனிமுஜ்ஜனேனேவ பாபஸுத்³தி⁴ ஹோதீ’’தி ஏவங்தி³ட்டி²கா, தேபி ஏகவாரமேவ நிமுஜ்ஜித்வா வுத்தனயேன அவினாபா⁴வதோ உம்முஜ்ஜனம்பி கத்வா பக்கமந்தி. யே பன ‘‘தஸ்மிங் தித்தே² நிமுஜ்ஜனேனேவ பாபஸுத்³தி⁴ ஹோதீ’’தி ஏவங்தி³ட்டி²கா, தே தத்த² நிமுஜ்ஜித்வா அஸ்ஸாஸே ஸன்னிரும்பி⁴த்வா மருப்பபாதபதிதா விய தத்தே²வ ஜீவிதக்க²யங் பாபுணந்தி . அபரே ‘‘புனப்புனங் உம்முஜ்ஜனநிமுஜ்ஜனானி கத்வா ந்ஹாதே பாபஸுத்³தி⁴ ஹோதீ’’தி ஏவங்தி³ட்டி²கா, தே காலேன காலங் உம்முஜ்ஜனநிமுஜ்ஜனானி கரொந்தி. தே ஸப்³பே³பி ஸந்தா⁴ய வுத்தங் – ‘‘உம்முஜ்ஜந்திபி நிமுஜ்ஜந்திபி உம்முஜ்ஜனிமுஜ்ஜம்பி கரொந்தீ’’தி. எத்த² ச கிஞ்சாபி நிமுஜ்ஜனபுப்³ப³கங் உம்முஜ்ஜனங், நிமுஜ்ஜனமேவ பன கரொந்தா கதிபயா, உம்முஜ்ஜனங் தது³ப⁴யஞ்ச கரொந்தா ப³ஹூதி தேஸங் யேபு⁴ய்யபா⁴வத³ஸ்ஸனத்த²ங் உம்முஜ்ஜனங் பட²மங் வுத்தங். ததா² ஸம்ப³ஹுலா ஜடிலாதி ஜடிலானங் யேபு⁴ய்யதாய வுத்தங், முண்ட³ஸிக²ண்டி³னோபி ச ப்³ராஹ்மணா உத³கஸுத்³தி⁴கா தஸ்மிங் காலே தத்த² ததா² கரொந்தி.
Tattha hi keci ‘‘ekummujjaneneva pāpasuddhi hotī’’ti evaṃdiṭṭhikā, te ummujjanameva katvā gacchanti. Ummujjanaṃ pana nimujjanamantarena natthīti avinābhāvato nimujjanampi te karontiyeva. Yepi ‘‘ekanimujjaneneva pāpasuddhi hotī’’ti evaṃdiṭṭhikā, tepi ekavārameva nimujjitvā vuttanayena avinābhāvato ummujjanampi katvā pakkamanti. Ye pana ‘‘tasmiṃ titthe nimujjaneneva pāpasuddhi hotī’’ti evaṃdiṭṭhikā, te tattha nimujjitvā assāse sannirumbhitvā maruppapātapatitā viya tattheva jīvitakkhayaṃ pāpuṇanti . Apare ‘‘punappunaṃ ummujjananimujjanāni katvā nhāte pāpasuddhi hotī’’ti evaṃdiṭṭhikā, te kālena kālaṃ ummujjananimujjanāni karonti. Te sabbepi sandhāya vuttaṃ – ‘‘ummujjantipi nimujjantipi ummujjanimujjampi karontī’’ti. Ettha ca kiñcāpi nimujjanapubbakaṃ ummujjanaṃ, nimujjanameva pana karontā katipayā, ummujjanaṃ tadubhayañca karontā bahūti tesaṃ yebhuyyabhāvadassanatthaṃ ummujjanaṃ paṭhamaṃ vuttaṃ. Tathā sambahulā jaṭilāti jaṭilānaṃ yebhuyyatāya vuttaṃ, muṇḍasikhaṇḍinopi ca brāhmaṇā udakasuddhikā tasmiṃ kāle tattha tathā karonti.
ஓஸிஞ்சந்தீதி கேசி க³யாய உத³கங் ஹத்தே²ன க³ஹெத்வா அத்தனோ ஸீஸே ச ஸரீரே ச ஓஸிஞ்சந்தி, அபரே க⁴டேஹி உத³கங் க³ஹெத்வா தீரே ட²த்வா ததா² கரொந்தி. அக்³கி³ங் ஜுஹந்தீதி கேசி க³யாதீரே வேதி³ங் ஸஜ்ஜெத்வா தூ⁴மத³ப்³பி⁴பூஜாதி³கே உபகரணே உபனெத்வா அக்³கி³ஹுதங் ஜுஹந்தி அக்³கி³ஹுதங் பரிசரந்தி. இமினா ஸுத்³தீ⁴தி இமினா க³யாயங் உம்முஜ்ஜனாதி³னா அக்³கி³பரிசரணேன ச பாபமலதோ ஸுத்³தி⁴ பாபபவாஹனா ஸங்ஸாரஸுத்³தி⁴ ஏவ வா ஹோதீதி ஏவங்தி³ட்டி²கா ஹுத்வாதி அத்தோ².
Osiñcantīti keci gayāya udakaṃ hatthena gahetvā attano sīse ca sarīre ca osiñcanti, apare ghaṭehi udakaṃ gahetvā tīre ṭhatvā tathā karonti. Aggiṃ juhantīti keci gayātīre vediṃ sajjetvā dhūmadabbhipūjādike upakaraṇe upanetvā aggihutaṃ juhanti aggihutaṃ paricaranti. Iminā suddhīti iminā gayāyaṃ ummujjanādinā aggiparicaraṇena ca pāpamalato suddhi pāpapavāhanā saṃsārasuddhi eva vā hotīti evaṃdiṭṭhikā hutvāti attho.
உம்முஜ்ஜனாதி³ செத்த² நித³ஸ்ஸனமத்தங் வுத்தந்தி த³ட்ட²ப்³ப³ங். தேஸு ஹி கேசி உத³கவாஸங் வஸந்தி, கேசி உத³கஸ்ஸஞ்ஜலிங் தெ³ந்தி, கேசி தஸ்மிங் உத³கே ட²த்வா சந்தி³மஸூரியே அனுபரிவத்தந்தி, கேசி அனேகஸஹஸ்ஸவாரங் ஸாவித்திஆதி³கே ஜபந்தி, கேசி ‘‘இந்த³ ஆக³ச்சா²’’திஆதி³னா விஜ்ஜாஜபங் அவ்ஹாயந்தி, கேசி மஹதுபட்டா²னங் கரொந்தி, ஏவஞ்ச கரொந்தா கேசி ஓதரந்தி, கேசி உத்தரந்தி கேசி உத்தரித்வா ஸுத்³தி⁴கஆசமனங் கரொந்தி, கேசி அந்தோஉத³கே டி²தா தந்தீ வாதெ³ந்தி, வீணங் வாதெ³ந்தீதி ஏவமாதி³கா நானப்பகாரகிரியா த³ஸ்ஸெந்தி. யஸ்மா வா தே ஏவரூபா விகாரகிரியா கரொந்தாபி தஸ்மிங் உத³கே நிமுஜ்ஜனஉம்முஜ்ஜனபுப்³ப³கமேவ கரொந்தி, தஸ்மா தங் ஸப்³ப³ங் நிமுஜ்ஜனும்முஜ்ஜனந்தோக³த⁴மேவ கத்வா ‘‘உம்முஜ்ஜந்தீ’’திபிஆதி³ வுத்தங். ஏவங் தத்த² ஆகுலப்³யாகுலே வத்தமானே உபரிபப்³ப³தே டி²தோ ப⁴க³வா தேஸங் தங் கோலாஹலங் ஸுத்வா ‘‘கின்னு கோ² ஏத’’ந்தி ஓலோகெந்தோ தங் கிரியவிகாரங் அத்³த³ஸ, தங் ஸந்தா⁴ய வுத்தங் – ‘‘அத்³த³ஸா கோ² ப⁴க³வா…பே॰… இமினா ஸுத்³தீ⁴’’தி, தங் வுத்தத்த²மேவ.
Ummujjanādi cettha nidassanamattaṃ vuttanti daṭṭhabbaṃ. Tesu hi keci udakavāsaṃ vasanti, keci udakassañjaliṃ denti, keci tasmiṃ udake ṭhatvā candimasūriye anuparivattanti, keci anekasahassavāraṃ sāvittiādike japanti, keci ‘‘inda āgacchā’’tiādinā vijjājapaṃ avhāyanti, keci mahatupaṭṭhānaṃ karonti, evañca karontā keci otaranti, keci uttaranti keci uttaritvā suddhikaācamanaṃ karonti, keci antoudake ṭhitā tantī vādenti, vīṇaṃ vādentīti evamādikā nānappakārakiriyā dassenti. Yasmā vā te evarūpā vikārakiriyā karontāpi tasmiṃ udake nimujjanaummujjanapubbakameva karonti, tasmā taṃ sabbaṃ nimujjanummujjanantogadhameva katvā ‘‘ummujjantī’’tipiādi vuttaṃ. Evaṃ tattha ākulabyākule vattamāne uparipabbate ṭhito bhagavā tesaṃ taṃ kolāhalaṃ sutvā ‘‘kinnu kho eta’’nti olokento taṃ kiriyavikāraṃ addasa, taṃ sandhāya vuttaṃ – ‘‘addasā kho bhagavā…pe… iminā suddhī’’ti, taṃ vuttatthameva.
ஏதமத்த²ங் விதி³த்வாதி ஏதங் அத்த²ங் உத³கோரோஹனாதி³அஸுத்³தி⁴மக்³கே³ தேஸங் ஸுத்³தி⁴மக்³க³பராமஸனங் ஸச்சாதி³கே ச ஸுத்³தி⁴மக்³கே³ அத்தனோ அவிபரீதாவபோ³த⁴ங் ஸப்³பா³காரதோ விதி³த்வா. இமங் உதா³னந்தி இமங் உத³கஸுத்³தி⁴யா அஸுத்³தி⁴மக்³க³பா⁴வதீ³பகங் ஸச்சாதி³த⁴ம்மானஞ்ச யாதா²வதோ ஸுத்³தி⁴மக்³க³பா⁴வதீ³பகங் உதா³னங் உதா³னேஸி.
Etamatthaṃviditvāti etaṃ atthaṃ udakorohanādiasuddhimagge tesaṃ suddhimaggaparāmasanaṃ saccādike ca suddhimagge attano aviparītāvabodhaṃ sabbākārato viditvā. Imaṃ udānanti imaṃ udakasuddhiyā asuddhimaggabhāvadīpakaṃ saccādidhammānañca yāthāvato suddhimaggabhāvadīpakaṃ udānaṃ udānesi.
தத்த² ந உத³கேன ஸுசீ ஹோதீதி எத்த² உத³கேனாதி உத³கும்முஜ்ஜனாதி³னா. உத³கும்முஜ்ஜனாதி³ ஹி இத⁴ உத்தரபத³லோபேன ‘‘உத³க’’ந்தி வுத்தங் யதா² ரூபப⁴வோ ரூபந்தி. அத² வா உத³கேனாதி உம்முஜ்ஜனாதி³கிரியாய ஸாத⁴னபூ⁴தேன உத³கேன ஸுசி ஸத்தஸ்ஸ ஸுத்³தி⁴ நாம ந ஹோதி, நத்தீ²தி அத்தோ². அத² வா ஸுசீதி தேன யதா²வுத்தேன உத³கேன ஸுசி பாபமலதோ ஸுத்³தோ⁴ நாம ஸத்தோ ந ஹோதி. கஸ்மா? ப³ஹ்வெத்த² ந்ஹாயதீ ஜனோ. யதி³ ஹி உத³கோரோஹனாதி³னா யதா²வுத்தேன பாபஸுத்³தி⁴ நாம ஸியா, ப³ஹு எத்த² உத³கே ஜனோ ந்ஹாயதி, மாதுகா⁴தாதி³பாபகம்மகாரீ அஞ்ஞோ ச கோ³மஹிங்ஸாதி³கோ அந்தமஸோ மச்ச²கச்ச²பே உபாதா³ய, தஸ்ஸ ஸப்³ப³ஸ்ஸாபி பாபஸுத்³தி⁴ ஸியா, ந பனேவங் ஹோதி. கஸ்மா? ந்ஹானஸ்ஸ பாபஹேதூனங் அப்படிபக்க²பா⁴வதோ. யஞ்ஹி யங் வினாஸேதி, ஸோ தஸ்ஸ படிபக்கோ² யதா² ஆலோகோ அந்த⁴காரஸ்ஸ, விஜ்ஜா ச அவிஜ்ஜாய, ந ஏவங் ந்ஹானங் பாபஸ்ஸ. தஸ்மா நிட்ட²மெத்த² க³ந்தப்³ப³ங் ‘‘ந உத³கேன ஸுசி ஹோதீ’’தி.
Tattha na udakena sucī hotīti ettha udakenāti udakummujjanādinā. Udakummujjanādi hi idha uttarapadalopena ‘‘udaka’’nti vuttaṃ yathā rūpabhavo rūpanti. Atha vā udakenāti ummujjanādikiriyāya sādhanabhūtena udakena suci sattassa suddhi nāma na hoti, natthīti attho. Atha vā sucīti tena yathāvuttena udakena suci pāpamalato suddho nāma satto na hoti. Kasmā? Bahvettha nhāyatī jano. Yadi hi udakorohanādinā yathāvuttena pāpasuddhi nāma siyā, bahu ettha udake jano nhāyati, mātughātādipāpakammakārī añño ca gomahiṃsādiko antamaso macchakacchape upādāya, tassa sabbassāpi pāpasuddhi siyā, na panevaṃ hoti. Kasmā? Nhānassa pāpahetūnaṃ appaṭipakkhabhāvato. Yañhi yaṃ vināseti, so tassa paṭipakkho yathā āloko andhakārassa, vijjā ca avijjāya, na evaṃ nhānaṃ pāpassa. Tasmā niṭṭhamettha gantabbaṃ ‘‘na udakena suci hotī’’ti.
யேன பன ஸுசி ஹோதி, தங் த³ஸ்ஸேதுங் ‘‘யம்ஹி ஸச்சஞ்சா’’திஆதி³மாஹ. தத்த² யம்ஹீதி யஸ்மிங் புக்³க³லே . ஸச்சந்தி வசீஸச்சஞ்சேவ விரதிஸச்சஞ்ச. அத² வா ஸச்சந்தி ஞாணஸச்சஞ்சேவ பரமத்த²ஸச்சஞ்ச. த⁴ம்மோதி அரியமக்³க³த⁴ம்மோ, ப²லத⁴ம்மோ ச, ஸோ ஸப்³போ³பி யஸ்மிங் புக்³க³லே உபலப்³ப⁴தி, ஸோ ஸுசீ ஸோ ச ப்³ராஹ்மணோதி ஸோ அரியபுக்³க³லோ விஸேஸதோ கீ²ணாஸவோ அச்சந்தஸுத்³தி⁴யா ஸுசி ச ப்³ராஹ்மணோ சாதி. கஸ்மா பனெத்த² ஸச்சங் த⁴ம்மதோ விஸுங் கத்வா க³ஹிதங்? ஸச்சஸ்ஸ ப³ஹூபகாரத்தா. ததா² ஹி ‘‘ஸச்சங் வே அமதா வாசா (ஸு॰ நி॰ 455), ஸச்சங் ஹவே ஸாது³தரங் ரஸானங் (ஸங்॰ நி॰ 1.246; ஸு॰ நி॰ 184), ஸச்சே அத்தே² ச த⁴ம்மே ச, ஆஹு ஸந்தோ பதிட்டி²தா (ஸு॰ நி॰ 455), ஸச்சே டி²தா ஸமணப்³ராஹ்மணா சா’’திஆதி³னா (ஜா॰ 2.21.433) அனேகேஸு ஸுத்தபதே³ஸு ஸச்சகு³ணா பகாஸிதா. ஸச்சவிபரியஸ்ஸ ச ‘‘ஏகங் த⁴ம்மங் அதீதஸ்ஸ, முஸாவாதி³ஸ்ஸ ஜந்துனோ (த⁴॰ ப॰ 176), அபூ⁴தவாதீ³ நிரயங் உபேதீ’’தி (த⁴॰ ப॰ 306) ச ஆதி³னா பகாஸிதாதி.
Yena pana suci hoti, taṃ dassetuṃ ‘‘yamhi saccañcā’’tiādimāha. Tattha yamhīti yasmiṃ puggale . Saccanti vacīsaccañceva viratisaccañca. Atha vā saccanti ñāṇasaccañceva paramatthasaccañca. Dhammoti ariyamaggadhammo, phaladhammo ca, so sabbopi yasmiṃ puggale upalabbhati, so sucī so ca brāhmaṇoti so ariyapuggalo visesato khīṇāsavo accantasuddhiyā suci ca brāhmaṇo cāti. Kasmā panettha saccaṃ dhammato visuṃ katvā gahitaṃ? Saccassa bahūpakārattā. Tathā hi ‘‘saccaṃ ve amatā vācā (su. ni. 455), saccaṃ have sādutaraṃ rasānaṃ (saṃ. ni. 1.246; su. ni. 184), sacce atthe ca dhamme ca, āhu santo patiṭṭhitā (su. ni. 455), sacce ṭhitā samaṇabrāhmaṇā cā’’tiādinā (jā. 2.21.433) anekesu suttapadesu saccaguṇā pakāsitā. Saccavipariyassa ca ‘‘ekaṃ dhammaṃ atītassa, musāvādissa jantuno (dha. pa. 176), abhūtavādī nirayaṃ upetī’’ti (dha. pa. 306) ca ādinā pakāsitāti.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 9. ஜடிலஸுத்தங் • 9. Jaṭilasuttaṃ
