| Library / Tipiṭaka / તિપિટક • Tipiṭaka / મહાવિભઙ્ગ • Mahāvibhaṅga |
૨. કાયસંસગ્ગસિક્ખાપદં
2. Kāyasaṃsaggasikkhāpadaṃ
૨૬૯. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન આયસ્મા ઉદાયી અરઞ્ઞે વિહરતિ. તસ્સાયસ્મતો વિહારો અભિરૂપો હોતિ દસ્સનીયો પાસાદિકો, મજ્ઝેગબ્ભો, સમન્તાપરિયાગારો, સુપઞ્ઞત્તં મઞ્ચપીઠં ભિસિબિમ્બોહનં, પાનીયં પરિભોજનીયં સુપટ્ઠિતં, પરિવેણં સુસમ્મટ્ઠં. બહૂ મનુસ્સા આયસ્મતો ઉદાયિસ્સ વિહારપેક્ખકા આગચ્છન્તિ. અઞ્ઞતરોપિ બ્રાહ્મણો સપજાપતિકો યેનાયસ્મા ઉદાયી તેનુપસઙ્કમિ; ઉપસઙ્કમિત્વા આયસ્મન્તં ઉદાયિં એતદવોચ – ‘‘ઇચ્છામ મયં ભોતો ઉદાયિસ્સ વિહારં પેક્ખિતુ’’ન્તિ. ‘‘તેન હિ, બ્રાહ્મણ, પેક્ખસ્સૂ’’તિ, અવાપુરણં 1 આદાય ઘટિકં ઉગ્ઘાટેત્વા કવાટં પણામેત્વા વિહારં પાવિસિ. સોપિ ખો બ્રાહ્મણો આયસ્મતો ઉદાયિસ્સ પિટ્ઠિતો પાવિસિ. સાપિ ખો બ્રાહ્મણી તસ્સ બ્રાહ્મણસ્સ પિટ્ઠિતો પાવિસિ. અથ ખો આયસ્મા ઉદાયી એકચ્ચે વાતપાને વિવરન્તો એકચ્ચે વાતપાને થકેન્તો ગબ્ભં અનુપરિગન્ત્વા પિટ્ઠિતો આગન્ત્વા તસ્સા બ્રાહ્મણિયા અઙ્ગમઙ્ગાનિ પરામસિ. અથ ખો સો બ્રાહ્મણો આયસ્મતા ઉદાયિના સદ્ધિં પટિસમ્મોદિત્વા અગમાસિ. અથ ખો સો બ્રાહ્મણો અત્તમનો અત્તમનવાચં નિચ્છારેસિ – ‘‘ઉળારા ઇમે સમણા સક્યપુત્તિયા યે ઇમે એવરૂપે અરઞ્ઞે વિહરન્તિ. ભવમ્પિ ઉદાયી ઉળારો યો એવરૂપે અરઞ્ઞે વિહરતી’’તિ.
269. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko, majjhegabbho, samantāpariyāgāro, supaññattaṃ mañcapīṭhaṃ bhisibimbohanaṃ, pānīyaṃ paribhojanīyaṃ supaṭṭhitaṃ, pariveṇaṃ susammaṭṭhaṃ. Bahū manussā āyasmato udāyissa vihārapekkhakā āgacchanti. Aññataropi brāhmaṇo sapajāpatiko yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘icchāma mayaṃ bhoto udāyissa vihāraṃ pekkhitu’’nti. ‘‘Tena hi, brāhmaṇa, pekkhassū’’ti, avāpuraṇaṃ 2 ādāya ghaṭikaṃ ugghāṭetvā kavāṭaṃ paṇāmetvā vihāraṃ pāvisi. Sopi kho brāhmaṇo āyasmato udāyissa piṭṭhito pāvisi. Sāpi kho brāhmaṇī tassa brāhmaṇassa piṭṭhito pāvisi. Atha kho āyasmā udāyī ekacce vātapāne vivaranto ekacce vātapāne thakento gabbhaṃ anuparigantvā piṭṭhito āgantvā tassā brāhmaṇiyā aṅgamaṅgāni parāmasi. Atha kho so brāhmaṇo āyasmatā udāyinā saddhiṃ paṭisammoditvā agamāsi. Atha kho so brāhmaṇo attamano attamanavācaṃ nicchāresi – ‘‘uḷārā ime samaṇā sakyaputtiyā ye ime evarūpe araññe viharanti. Bhavampi udāyī uḷāro yo evarūpe araññe viharatī’’ti.
એવં વુત્તે સા બ્રાહ્મણી તં બ્રાહ્મણં એતદવોચ – ‘‘કુતો તસ્સ ઉળારત્તતા! યથેવ મે ત્વં અઙ્ગમઙ્ગાનિ પરામસિ એવમેવ મે સમણો ઉદાયી અઙ્ગમઙ્ગાનિ પરામસી’’તિ. અથ ખો સો બ્રાહ્મણો ઉજ્ઝાયતિ ખિય્યતિ વિપાચેતિ – ‘‘અલજ્જિનો ઇમે સમણા સક્યપુત્તિયા દુસ્સીલા મુસાવાદિનો. ઇમે હિ નામ ધમ્મચારિનો સમચારિનો બ્રહ્મચારિનો સચ્ચવાદિનો સીલવન્તો કલ્યાણધમ્મા પટિજાનિસ્સન્તિ! નત્થિ ઇમેસં સામઞ્ઞં નત્થિ ઇમેસં બ્રહ્મઞ્ઞં, નટ્ઠં ઇમેસં સામઞ્ઞં નટ્ઠં ઇમેસં બ્રહ્મઞ્ઞં, કુતો ઇમેસં સામઞ્ઞં કુતો ઇમેસં બ્રહ્મઞ્ઞં, અપગતા ઇમે સામઞ્ઞા અપગતા ઇમે બ્રહ્મઞ્ઞા. કથઞ્હિ નામ સમણો ઉદાયી મમ ભરિયાય અઙ્ગમઙ્ગાનિ પરામસિસ્સતિ! ન હિ સક્કા કુલિત્થીહિ કુલધીતાહિ કુલકુમારીહિ કુલસુણ્હાહિ કુલદાસીહિ આરામં વા વિહારં વા ગન્તું. સચે 3 કુલિત્થિયો કુલધીતરો 4 કુલકુમારિયો કુલસુણ્હાયો કુલદાસિયો આરામં વા વિહારં વા ગચ્છેય્યું, તાપિ સમણા સક્યપુત્તિયા દૂસેય્યુ’’ન્તિ!
Evaṃ vutte sā brāhmaṇī taṃ brāhmaṇaṃ etadavoca – ‘‘kuto tassa uḷārattatā! Yatheva me tvaṃ aṅgamaṅgāni parāmasi evameva me samaṇo udāyī aṅgamaṅgāni parāmasī’’ti. Atha kho so brāhmaṇo ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī mama bhariyāya aṅgamaṅgāni parāmasissati! Na hi sakkā kulitthīhi kuladhītāhi kulakumārīhi kulasuṇhāhi kuladāsīhi ārāmaṃ vā vihāraṃ vā gantuṃ. Sace 5 kulitthiyo kuladhītaro 6 kulakumāriyo kulasuṇhāyo kuladāsiyo ārāmaṃ vā vihāraṃ vā gaccheyyuṃ, tāpi samaṇā sakyaputtiyā dūseyyu’’nti!
અસ્સોસું ખો ભિક્ખુ તસ્સ બ્રાહ્મણસ્સ ઉજ્ઝાયન્તસ્સ ખિય્યન્તસ્સ વિપાચેન્તસ્સ. યે તે ભિક્ખૂ અપ્પિચ્છા…પે॰… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ આયસ્મા ઉદાયી માતુગામેન સદ્ધિં કાયસંસગ્ગં સમાપજ્જિસ્સતી’’તિ! અથ ખો તે ભિક્ખૂ આયસ્મન્તં ઉદાયિં અનેકપરિયાયેન વિગરહિત્વા ભગવતો એતમત્થં આરોચેસું. અથ ખો ભગવા એતસ્મિં નિદાને એતસ્મિં પકરણે ભિક્ખુસઙ્ઘં સન્નિપાતાપેત્વા આયસ્મન્તં ઉદાયિં પટિપુચ્છિ – ‘‘સચ્ચં કિર ત્વં, ઉદાયિ, માતુગામેન સદ્ધિં કાયસંસગ્ગં સમાપજ્જસી’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા – ‘‘અનનુચ્છવિકં, મોઘપુરિસ, અનનુલોમિકં અપ્પતિરૂપં અસ્સામણકં અકપ્પિયં અકરણીયં. કથઞ્હિ નામ ત્વં, મોઘપુરિસ, માતુગામેન સદ્ધિં કાયસંસગ્ગં સમાપજ્જિસ્સસિ! નનુ મયા, મોઘપુરિસ, અનેકપરિયાયેન વિરાગાય ધમ્મો દેસિતો નો સરાગાય…પે॰… કામપરિળાહાનં વૂપસમો અક્ખાતો. નેતં, મોઘપુરિસ, અપ્પસન્નાનં વા પસાદાય…પે॰… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –
Assosuṃ kho bhikkhu tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ kāyasaṃsaggaṃ samāpajjissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmena saddhiṃ kāyasaṃsaggaṃ samāpajjasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmena saddhiṃ kāyasaṃsaggaṃ samāpajjissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
૨૭૦. ‘‘યો પન ભિક્ખુ ઓતિણ્ણો વિપરિણતેન ચિત્તેન માતુગામેન સદ્ધિં કાયસંસગ્ગં સમાપજ્જેય્ય હત્થગ્ગાહં વા વેણિગ્ગાહં વા અઞ્ઞતરસ્સ વા અઞ્ઞતરસ્સ વા અઙ્ગસ્સ પરામસનં, સઙ્ઘાદિસેસો’’તિ.
270.‘‘Yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyya hatthaggāhaṃ vā veṇiggāhaṃ vā aññatarassa vā aññatarassa vā aṅgassa parāmasanaṃ, saṅghādiseso’’ti.
૨૭૧. યો પનાતિ યો યાદિસો…પે॰… ભિક્ખૂતિ…પે॰… અયં ઇમસ્મિં અત્થે અધિપ્પેતો ભિક્ખૂતિ.
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ઓતિણ્ણો નામ સારત્તો અપેક્ખવા પટિબદ્ધચિત્તો.
Otiṇṇo nāma sāratto apekkhavā paṭibaddhacitto.
વિપરિણતન્તિ રત્તમ્પિ ચિત્તં વિપરિણતં. દુટ્ઠમ્પિ ચિત્તં વિપરિણતં. મૂળ્હમ્પિ ચિત્તં વિપરિણતં. અપિચ, રત્તં ચિત્તં ઇમસ્મિં અત્થે અધિપ્પેતં વિપરિણતન્તિ.
Vipariṇatanti rattampi cittaṃ vipariṇataṃ. Duṭṭhampi cittaṃ vipariṇataṃ. Mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
માતુગામો નામ મનુસ્સિત્થી, ન યક્ખી ન પેતી, ન તિરચ્છાનગતા. અન્તમસો તદહુજાતાપિ દારિકા, પગેવ મહત્તરી.
Mātugāmo nāma manussitthī, na yakkhī na petī, na tiracchānagatā. Antamaso tadahujātāpi dārikā, pageva mahattarī.
સદ્ધિન્તિ એકતો.
Saddhinti ekato.
કાયસંસગ્ગં સમાપજ્જેય્યાતિ અજ્ઝાચારો વુચ્ચતિ.
Kāyasaṃsaggaṃsamāpajjeyyāti ajjhācāro vuccati.
હત્થો નામ કપ્પરં ઉપાદાયં યાવ અગ્ગનખા.
Hattho nāma kapparaṃ upādāyaṃ yāva agganakhā.
વેણી નામ સુદ્ધકેસા વા, સુત્તમિસ્સા વા, માલામિસ્સા વા, હિરઞ્ઞમિસ્સા વા, સુવણ્ણમિસ્સા વા, મુત્તામિસ્સા વા, મણિમિસ્સા વા.
Veṇī nāma suddhakesā vā, suttamissā vā, mālāmissā vā, hiraññamissā vā, suvaṇṇamissā vā, muttāmissā vā, maṇimissā vā.
અઙ્ગં નામ હત્થઞ્ચ વેણિઞ્ચ ઠપેત્વા અવસેસં અઙ્ગં નામ.
Aṅgaṃ nāma hatthañca veṇiñca ṭhapetvā avasesaṃ aṅgaṃ nāma.
૨૭૨. આમસના , પરામસના, ઓમસના, ઉમ્મસના, ઓલઙ્ઘના, ઉલ્લઙ્ઘના, આકડ્ઢના, પતિકડ્ઢના, અભિનિગ્ગણ્હના, અભિનિપ્પીળના, ગહણં, છુપનં.
272. Āmasanā , parāmasanā, omasanā, ummasanā, olaṅghanā, ullaṅghanā, ākaḍḍhanā, patikaḍḍhanā, abhiniggaṇhanā, abhinippīḷanā, gahaṇaṃ, chupanaṃ.
આમસના નામ આમટ્ઠમત્તા.
Āmasanā nāma āmaṭṭhamattā.
પરામસના નામ ઇતોચિતો ચ સંચોપના.
Parāmasanā nāma itocito ca saṃcopanā.
ઓમસના નામ હેટ્ઠા ઓરોપના.
Omasanā nāma heṭṭhā oropanā.
ઉમ્મસના નામ ઉદ્ધં ઉચ્ચારણા.
Ummasanā nāma uddhaṃ uccāraṇā.
ઓલઙ્ઘના નામ હેટ્ઠા ઓનમના.
Olaṅghanā nāma heṭṭhā onamanā.
ઉલ્લઙ્ઘના નામ ઉદ્ધં ઉચ્ચારણા.
Ullaṅghanā nāma uddhaṃ uccāraṇā.
પતિકડ્ઢના નામ પતિપ્પણામના.
Patikaḍḍhanā nāma patippaṇāmanā.
અભિનિગ્ગણ્હના નામ અઙ્ગં ગહેત્વા નિપ્પીળના.
Abhiniggaṇhanā nāma aṅgaṃ gahetvā nippīḷanā.
અભિનિપ્પીળના નામ કેનચિ સહ નિપ્પીળના.
Abhinippīḷanā nāma kenaci saha nippīḷanā.
ગહણં નામ ગહિતમત્તં.
Gahaṇaṃ nāma gahitamattaṃ.
છુપનં નામ ફુટ્ઠમત્તં.
Chupanaṃ nāma phuṭṭhamattaṃ.
સઙ્ઘાદિસેસોતિ…પે॰… તેનપિ વુચ્ચતિ સઙ્ઘાદિસેસોતિ.
Saṅghādisesoti…pe… tenapi vuccati saṅghādisesoti.
૨૭૩. ઇત્થી ચ હોતિ ઇત્થિસઞ્ઞી સારત્તો ચ ભિક્ખુ ચ. નં ઇત્થિયા કાયેન કાયં આમસતિ પરામસતિ ઓમસતિ ઉમ્મસતિ ઓલઙ્ઘેતિ ઉલ્લઙ્ઘેતિ આકડ્ઢતિ પતિકડ્ઢતિ અભિનિગ્ગણ્હાતિ અભિનિપ્પીળેતિ ગણ્હાતિ છુપતિ, આપત્તિ સઙ્ઘાદિસેસસ્સ.
273. Itthī ca hoti itthisaññī sāratto ca bhikkhu ca. Naṃ itthiyā kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, āpatti saṅghādisesassa.
ઇત્થી ચ હોતિ વેમતિકો સારત્તો ચ. ભિક્ખુ ચ નં ઇત્થિયા કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ.
Itthī ca hoti vematiko sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ઇત્થી ચ હોતિ પણ્ડકસઞ્ઞી સારત્તો ચ. ભિક્ખુ ચ નં ઇત્થિયા કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ.
Itthī ca hoti paṇḍakasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ઇત્થી ચ હોતિ પુરિસસઞ્ઞી સારત્તો ચ. ભિક્ખુ ચ નં ઇત્થિયા કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ.
Itthī ca hoti purisasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
ઇત્થી ચ હોતિ તિરચ્છાનગતસઞ્ઞી સારત્તો ચ. ભિક્ખુ ચ નં ઇત્થિયા કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ.
Itthī ca hoti tiracchānagatasaññī sāratto ca. Bhikkhu ca naṃ itthiyā kāyena kāyaṃ āmasati parāmasati…pe… gaṇhāti chupati, āpatti thullaccayassa.
પણ્ડકો ચ હોતિ પણ્ડકસઞ્ઞી સારત્તો ચ. ભિક્ખુ ચ નં પણ્ડકસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ.
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti thullaccayassa.
પણ્ડકો ચ હોતિ વેમતિકો સારત્તો ચ. ભિક્ખુ ચ નં પણ્ડકસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Paṇḍako ca hoti vematiko sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
પણ્ડકો ચ હોતિ પુરિસસઞ્ઞી સારત્તો ચ. ભિક્ખુ ચ નં પણ્ડકસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Paṇḍako ca hoti purisasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
પણ્ડકો ચ હોતિ તિરચ્છાનગતસઞ્ઞી સારત્તો ચ. ભિક્ખુ ચ નં પણ્ડકસ્સ કાયેન કાયં આમસતિ પરામસતિ…પે॰… ગણ્હાતિ છુપતિ , આપત્તિ દુક્કટસ્સ.
Paṇḍako ca hoti tiracchānagatasaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati , āpatti dukkaṭassa.
પણ્ડકો ચ હોતિ ઇત્થિસઞ્ઞી સારત્તો ચ. ભિક્ખુ ચ નં પણ્ડકસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Paṇḍako ca hoti itthisaññī sāratto ca. Bhikkhu ca naṃ paṇḍakassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
પુરિસો ચ હોતિ પુરિસસઞ્ઞી સારત્તો ચ. ભિક્ખુ ચ નં પુરિસસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Puriso ca hoti purisasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
પુરિસો ચ હોતિ વેમતિકો…પે॰… પુરિસો ચ હોતિ તિરચ્છાનગતસઞ્ઞી… પુરિસો ચ હોતિ ઇત્થિસઞ્ઞી… પુરિસો ચ હોતિ પણ્ડકસઞ્ઞી સારત્તો ચ. ભિક્ખુ ચ નં પુરિસસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Puriso ca hoti vematiko…pe… puriso ca hoti tiracchānagatasaññī… puriso ca hoti itthisaññī… puriso ca hoti paṇḍakasaññī sāratto ca. Bhikkhu ca naṃ purisassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
તિરચ્છાનગતો ચ હોતિ તિરચ્છાનગતસઞ્ઞી સારત્તો ચ. ભિક્ખુ ચ નં તિરચ્છાનગતસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Tiracchānagato ca hoti tiracchānagatasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
તિરચ્છાનગતો ચ હોતિ વેમતિકો…પે॰… તિરચ્છાનગતો ચ હોતિ ઇત્થિસઞ્ઞી… તિરચ્છાનગતો ચ હોતિ પણ્ડકસઞ્ઞી… તિરચ્છાનગતો ચ હોતિ. પુરિસસઞ્ઞી સારત્તો ચ. ભિક્ખુ ચ નં તિરચ્છાનગતસ્સ કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ.
Tiracchānagato ca hoti vematiko…pe… tiracchānagato ca hoti itthisaññī… tiracchānagato ca hoti paṇḍakasaññī… tiracchānagato ca hoti. Purisasaññī sāratto ca. Bhikkhu ca naṃ tiracchānagatassa kāyena kāyaṃ āmasati parāmasati…pe… gaṇhāti chupati, āpatti dukkaṭassa.
એકમૂલકં નિટ્ઠિતં.
Ekamūlakaṃ niṭṭhitaṃ.
૨૭૪. દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં સઙ્ઘાદિસેસાનં.
274. Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ saṅghādisesānaṃ.
દ્વે ઇત્થિયો દ્વિન્નં ઇત્થીનં વેમતિકો સારત્તો ચ. ભિક્ખુ ચ નં દ્વિન્નં ઇત્થીનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં.
Dve itthiyo dvinnaṃ itthīnaṃ vematiko sāratto ca. Bhikkhu ca naṃ dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
દ્વે ઇત્થિયો દ્વિન્નં ઇત્થીનં પણ્ડકસઞ્ઞી…પે॰… પુરિસસઞ્ઞી… તિરચ્છાનગતસઞ્ઞી સારત્તો ચ. ભિક્ખુ ચ દ્વિન્નં ઇત્થીનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં.
Dve itthiyo dvinnaṃ itthīnaṃ paṇḍakasaññī…pe… purisasaññī… tiracchānagatasaññī sāratto ca. Bhikkhu ca dvinnaṃ itthīnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
દ્વે પણ્ડકા દ્વિન્નં પણ્ડકાનં પણ્ડકસઞ્ઞી સારત્તો ચ ભિક્ખુ ચ નં દ્વિન્નં પણ્ડકાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં.
Dve paṇḍakā dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
દ્વે પણ્ડકા દ્વિન્નં પણ્ડકાનં વેમતિકો…પે॰… પુરિસસઞ્ઞી… તિરચ્છાનગતસઞ્ઞી… ઇત્થિસઞ્ઞી સારત્તો ચ. ભિક્ખુ ચ નં દ્વિન્નં પણ્ડકાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Dve paṇḍakā dvinnaṃ paṇḍakānaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ dvinnaṃ paṇḍakānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
દ્વે પુરિસા દ્વિન્નં પુરિસાનં પુરિસસઞ્ઞી સારત્તો ચ ભિક્ખુ ચ નં દ્વિન્નં પુરિસાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Dve purisā dvinnaṃ purisānaṃ purisasaññī sāratto ca bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
દ્વે પુરિસા દ્વિન્નં પુરિસાનં વેમતિકો…પે॰… તિરચ્છાનગતસઞ્ઞી… ઇત્થિસઞ્ઞી… પણ્ડકસઞ્ઞી સારત્તો ચ. ભિક્ખુ ચ નં દ્વિન્નં પુરિસાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Dve purisā dvinnaṃ purisānaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ dvinnaṃ purisānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
દ્વે તિરચ્છાનગતા દ્વિન્નં તિરચ્છાનગતાનં તિરચ્છાનગતસઞ્ઞી સારત્તો ચ. ભિક્ખુ ચ નં દ્વિન્નં તિરચ્છાનગતાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Dve tiracchānagatā dvinnaṃ tiracchānagatānaṃ tiracchānagatasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
દ્વે તિરચ્છાનગતા દ્વિન્નં તિરચ્છાનગતાનં વેમતિકો…પે॰… ઇત્થિસઞ્ઞી… પણ્ડકસઞ્ઞી … પુરિસસઞ્ઞી સારત્તો ચ. ભિક્ખુ ચ નં દ્વિન્નં તિરચ્છાનગતાનં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Dve tiracchānagatā dvinnaṃ tiracchānagatānaṃ vematiko…pe… itthisaññī… paṇḍakasaññī … purisasaññī sāratto ca. Bhikkhu ca naṃ dvinnaṃ tiracchānagatānaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
૨૭૫. ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ સઙ્ઘાદિસેસેન દુક્કટસ્સ.
275. Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ઇત્થી ચ પણ્ડકો ચ ઉભિન્નં વેમતિકો સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Itthī ca paṇḍako ca ubhinnaṃ vematiko sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ઇત્થી ચ પણ્ડકો ચ ઉભિન્નં પણ્ડકસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં.
Itthī ca paṇḍako ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ.
ઇત્થી ચ પણ્ડકો ચ ઉભિન્નં પુરિસસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Itthī ca paṇḍako ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ઇત્થી ચ પણ્ડકો ચ ઉભિન્નં તિરચ્છાનગતસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Itthī ca paṇḍako ca ubhinnaṃ tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ઇત્થી ચ પુરિસો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ સઙ્ઘાદિસેસેન દુક્કટસ્સ.
Itthī ca puriso ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ઇત્થી ચ પુરિસો ચ ઉભિન્નં વેમતિકો…પે॰… પણ્ડકસઞ્ઞી… પુરિસસઞ્ઞી… તિરચ્છાનગતસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Itthī ca puriso ca ubhinnaṃ vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
ઇત્થી ચ તિરચ્છાનગતો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ સઙ્ઘાદિસેસેન દુક્કટસ્સ.
Itthī ca tiracchānagato ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti saṅghādisesena dukkaṭassa.
ઇત્થી ચ તિરચ્છાનગતો ચ ઉભિન્નં વેમતિકો…પે॰… પણ્ડકસઞ્ઞી… પુરિસસઞ્ઞી … તિરચ્છાનગતસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Itthī ca tiracchānagato ca ubhinnaṃ vematiko…pe… paṇḍakasaññī… purisasaññī … tiracchānagatasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
પણ્ડકો ચ પુરિસો ચ ઉભિન્નં પણ્ડકસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Paṇḍako ca puriso ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
પણ્ડકો ચ પુરિસો ચ ઉભિન્નં વેમતિકો…પે॰… પુરિસસઞ્ઞી… તિરચ્છાનગતસઞ્ઞી… ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Paṇḍako ca puriso ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
પણ્ડકો ચ તિરચ્છાનગતો ચ ઉભિન્નં પણ્ડકસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ.
Paṇḍako ca tiracchānagato ca ubhinnaṃ paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa.
પણ્ડકો ચ તિરચ્છાનગતો ચ ઉભિન્નં વેમતિકો…પે॰… પુરિસસઞ્ઞી… તિરચ્છાનગતસઞ્ઞી… ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Paṇḍako ca tiracchānagato ca ubhinnaṃ vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
પુરિસો ચ તિરચ્છાનગતો ચ ઉભિન્નં પુરિસસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Puriso ca tiracchānagato ca ubhinnaṃ purisasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
પુરિસો ચ તિરચ્છાનગતો ચ ઉભિન્નં વેમતિકો…પે॰… તિરચ્છાનગતસઞ્ઞી… ઇત્થિસઞ્ઞી… પણ્ડકસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં.
Puriso ca tiracchānagato ca ubhinnaṃ vematiko…pe… tiracchānagatasaññī… itthisaññī… paṇḍakasaññī sāratto ca. Bhikkhu ca naṃ ubhinnaṃ kāyena kāyaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ.
દુમૂલકં નિટ્ઠિતં.
Dumūlakaṃ niṭṭhitaṃ.
૨૭૬. ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા કાયેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ…પે॰….
276. Itthī ca hoti itthisaññī sāratto ca. Bhikkhu ca naṃ itthiyā kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં કાયેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં …પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ …pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyena kāyapaṭibaddhaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા કાયપટિબદ્ધેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયસ્સ…પે॰….
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં કાયપટિબદ્ધેન કાયં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં થુલ્લચ્ચયાનં…પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti dvinnaṃ thullaccayānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયપટિબદ્ધેન કાયં આમસતિ પરામસતિ…પે॰… ગણ્હાતિ છુપતિ, આપત્તિ થુલ્લચ્ચયેન દુક્કટસ્સ…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyaṃ āmasati parāmasati…pe… gaṇhāti chupati, āpatti thullaccayena dukkaṭassa…pe….
ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા કાયપટિબદ્ધેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં કાયપટિબદ્ધેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં કાયપટિબદ્ધેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા નિસ્સગ્ગિયેન કાયં આમસતિ આપત્તિ દુક્કટસ્સ…પે॰….
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyaṃ āmasati āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં નિસ્સગ્ગિયેન કાયં આમસતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં નિસ્સગ્ગિયેન કાયં આમસતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyaṃ āmasati, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા નિસ્સગ્ગિયેન કાયપટિબદ્ધં આમસતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Bhikkhu ca naṃ itthiyā nissaggiyena kāyapaṭibaddhaṃ āmasati, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં નિસ્સગ્ગિયેન કાયપટિબદ્ધં આમસતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં નિસ્સગ્ગિયેન કાયપટિબદ્ધં આમસતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena kāyapaṭibaddhaṃ āmasati, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ભિક્ખુ ચ નં ઇત્થિયા નિસ્સગ્ગિયેન નિસ્સગ્ગિયં આમસતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Bhikkhu ca naṃ itthiyā nissaggiyena nissaggiyaṃ āmasati, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ભિક્ખુ ચ નં દ્વિન્નં ઇત્થીનં નિસ્સગ્ગિયેન નિસ્સગ્ગિયં આમસતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ભિક્ખુ ચ નં ઉભિન્નં નિસ્સગ્ગિયેન નિસ્સગ્ગિયં આમસતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ nissaggiyena nissaggiyaṃ āmasati, āpatti dvinnaṃ dukkaṭānaṃ…pe….
ભિક્ખુપેય્યાલો નિટ્ઠિતો.
Bhikkhupeyyālo niṭṭhito.
૨૭૭. ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ કાયેન કાયં આમસતિ પરામસતિ ઓમસતિ ઉમ્મસતિ ઓલઙ્ઘેતિ ઉલ્લઙ્ઘેતિ આકડ્ઢતિ પતિકડ્ઢતિ અભિનિગ્ગણ્હાતિ અભિનિપ્પીળેતિ ગણ્હાતિ છુપતિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ સઙ્ઘાદિસેસસ્સ…પે॰….
277. Itthī ca hoti itthisaññī sāratto ca. Itthī ca naṃ bhikkhussa kāyena kāyaṃ āmasati parāmasati omasati ummasati olaṅgheti ullaṅgheti ākaḍḍhati patikaḍḍhati abhiniggaṇhāti abhinippīḷeti gaṇhāti chupati, sevanādhippāyo kāyena vāyamati phassaṃ paṭivijānāti, āpatti saṅghādisesassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ કાયેન કાયં આમસન્તિ પરામસન્તિ ઓમસન્તિ ઉમ્મસન્તિ ઓલઙ્ઘેન્તિ ઉલ્લઙ્ઘેન્તિ આકડ્ઢન્તિ પતિકડ્ઢન્તિ અભિનિગ્ગણ્હન્તિ અભિનિપ્પીળેન્તિ ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં સઙ્ઘાદિસેસાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyaṃ āmasanti parāmasanti omasanti ummasanti olaṅghenti ullaṅghenti ākaḍḍhanti patikaḍḍhanti abhiniggaṇhanti abhinippīḷenti gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ saṅghādisesānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ કાયેન કાયં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ સઙ્ઘાદિસેસેન દુક્કટસ્સ…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti saṅghādisesena dukkaṭassa…pe….
ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ કાયેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ થુલ્લચ્ચયસ્સ…પે॰….
Itthī ca hoti itthisaññī sāratto ca. Itthī ca naṃ bhikkhussa kāyena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti thullaccayassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ કાયેન કાયપટિબદ્ધં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં થુલ્લચ્ચયાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ કાયેન કાયપટિબદ્ધં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ થુલ્લચ્ચયેન દુક્કટસ્સ…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ કાયપટિબદ્ધેન કાયં આમસતિ પરામસતિ…પે॰… ગણ્હાતિ છુપતિ સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ થુલ્લચ્ચયસ્સ…પે॰….
Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyaṃ āmasati parāmasati…pe… gaṇhāti chupati sevanādhippāyo kāyena vāyamati phassaṃ paṭivijānāti, āpatti thullaccayassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ કાયપટિબદ્ધેન કાયં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં થુલ્લચ્ચયાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ thullaccayānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ કાયપટિબદ્ધેન કાયં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ થુલ્લચ્ચયેન દુક્કટસ્સ…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti thullaccayena dukkaṭassa…pe….
૨૭૮. ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ કાયપટિબદ્ધેન કાયપટિબદ્ધં આમસતિ પરામસતિ…પે॰… ગણ્હાતિ છુપતિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દુક્કટસ્સ…પે॰….
278. Itthī ca hoti itthisaññī sāratto ca. Itthī ca naṃ bhikkhussa kāyapaṭibaddhena kāyapaṭibaddhaṃ āmasati parāmasati…pe… gaṇhāti chupati, sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ કાયપટિબદ્ધેન કાયપટિબદ્ધં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ કાયપટિબદ્ધેન કાયપટિબદ્ધં આમસન્તિ પરામસન્તિ…પે॰… ગણ્હન્તિ છુપન્તિ, સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa kāyapaṭibaddhena kāyapaṭibaddhaṃ āmasanti parāmasanti…pe… gaṇhanti chupanti, sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ નિસ્સગ્ગિયેન કાયં આમસતિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ નિસ્સગ્ગિયેન કાયં આમસન્તિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ નિસ્સગ્ગિયેન કાયં આમસન્તિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ નિસ્સગ્ગિયેન કાયપટિબદ્ધં આમસતિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Itthī ca naṃ bhikkhussa nissaggiyena kāyapaṭibaddhaṃ āmasati. Sevanādhippāyo kāyena vāyamati phassaṃ paṭivijānāti, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ નિસ્સગ્ગિયેન કાયપટિબદ્ધં આમસન્તિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ નિસ્સગ્ગિયેન કાયપટિબદ્ધં આમસન્તિ. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena kāyapaṭibaddhaṃ āmasanti. Sevanādhippāyo kāyena vāyamati phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ હોતિ ઇત્થિસઞ્ઞી સારત્તો ચ. ઇત્થી ચ નં ભિક્ખુસ્સ નિસ્સગ્ગિયેન નિસ્સગ્ગિયં આમસતિ. સેવનાધિપ્પાયો કાયેન વાયમતિ, ન ચ ફસ્સં પટિવિજાનાતિ, આપત્તિ દુક્કટસ્સ…પે॰….
Itthī ca hoti itthisaññī sāratto ca. Itthī ca naṃ bhikkhussa nissaggiyena nissaggiyaṃ āmasati. Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa…pe….
દ્વે ઇત્થિયો દ્વિન્નં ઇત્થીનં ઇત્થિસઞ્ઞી સારત્તો ચ. ઇત્થિયો ચ નં ભિક્ખુસ્સ નિસ્સગ્ગિયેન નિસ્સગ્ગિયં આમસન્તિ. સેવનાધિપ્પાયો કાયેન વાયમતિ, ન ચ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Dve itthiyo dvinnaṃ itthīnaṃ itthisaññī sāratto ca. Itthiyo ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
ઇત્થી ચ પણ્ડકો ચ ઉભિન્નં ઇત્થિસઞ્ઞી સારત્તો ચ. ઉભો ચ નં ભિક્ખુસ્સ નિસ્સગ્ગિયેન નિસ્સગ્ગિયં આમસન્તિ. સેવનાધિપ્પાયો કાયેન વાયમતિ, ન ચ ફસ્સં પટિવિજાનાતિ, આપત્તિ દ્વિન્નં દુક્કટાનં…પે॰….
Itthī ca paṇḍako ca ubhinnaṃ itthisaññī sāratto ca. Ubho ca naṃ bhikkhussa nissaggiyena nissaggiyaṃ āmasanti. Sevanādhippāyo kāyena vāyamati, na ca phassaṃ paṭivijānāti, āpatti dvinnaṃ dukkaṭānaṃ…pe….
૨૭૯. સેવનાધિપ્પાયો કાયેન વાયમતિ ફસ્સં પટિવિજાનાતિ, આપત્તિ સઙ્ઘાદિસેસસ્સ.
279. Sevanādhippāyo kāyena vāyamati phassaṃ paṭivijānāti, āpatti saṅghādisesassa.
સેવનાધિપ્પાયો કાયેન વાયમતિ, ન ચ ફસ્સં પટિવિજાનાતિ, આપત્તિ દુક્કટસ્સ.
Sevanādhippāyo kāyena vāyamati, na ca phassaṃ paṭivijānāti, āpatti dukkaṭassa.
સેવનાધિપ્પાયો ન ચ કાયેન વાયમતિ, ફસ્સં પટિવિજાનાતિ, અનાપત્તિ.
Sevanādhippāyo na ca kāyena vāyamati, phassaṃ paṭivijānāti, anāpatti.
સેવનાધિપ્પાયો ન ચ કાયેન વાયમતિ, ન ચ ફસ્સં પટિવિજાનાતિ, અનાપત્તિ.
Sevanādhippāyo na ca kāyena vāyamati, na ca phassaṃ paṭivijānāti, anāpatti.
મોક્ખાધિપ્પાયો કાયેન વાયમતિ, ફસ્સં પટિવિજાનાતિ, અનાપત્તિ.
Mokkhādhippāyo kāyena vāyamati, phassaṃ paṭivijānāti, anāpatti.
મોક્ખાધિપ્પાયો કાયેન વાયમતિ, ન ચ ફસ્સં પટિવિજાનાતિ , અનાપત્તિ.
Mokkhādhippāyo kāyena vāyamati, na ca phassaṃ paṭivijānāti , anāpatti.
મોક્ખાધિપ્પાયો ન ચ કાયેન વાયમતિ, ફસ્સં પટિવિજાનાતિ, અનાપત્તિ.
Mokkhādhippāyo na ca kāyena vāyamati, phassaṃ paṭivijānāti, anāpatti.
મોક્ખાધિપ્પાયો ન ચ કાયેન વાયમતિ, ન ચ ફસ્સં પટિવિજાનાતિ, અનાપત્તિ.
Mokkhādhippāyo na ca kāyena vāyamati, na ca phassaṃ paṭivijānāti, anāpatti.
૨૮૦. અનાપત્તિ અસઞ્ચિચ્ચ, અસતિયા, અજાનન્તસ્સ, અસાદિયન્તસ્સ, ઉમ્મત્તકસ્સ, ખિત્તચિત્તસ્સ, વેદનાટ્ટસ્સ, આદિકમ્મિકસ્સાતિ.
280. Anāpatti asañcicca, asatiyā, ajānantassa, asādiyantassa, ummattakassa, khittacittassa, vedanāṭṭassa, ādikammikassāti.
વિનીતવત્થુઉદ્દાનગાથા
Vinītavatthuuddānagāthā
માતા ધીતા ભગિની ચ, જાયા યક્ખી ચ પણ્ડકો;
Mātā dhītā bhaginī ca, jāyā yakkhī ca paṇḍako;
સુત્તા મતા તિરચ્છાના, દારુધિતલિકાય ચ.
Suttā matā tiracchānā, dārudhitalikāya ca.
સમ્પીળે સઙ્કમો મગ્ગો, રુક્ખો નાવા ચ રજ્જુ ચ;
Sampīḷe saṅkamo maggo, rukkho nāvā ca rajju ca;
દણ્ડો પત્તં પણામેસિ, વન્દે વાયમિ નચ્છુપેતિ.
Daṇḍo pattaṃ paṇāmesi, vande vāyami nacchupeti.
વિનીતવત્થુ
Vinītavatthu
૨૮૧. તેન ખો પન સમયેન અઞ્ઞતરો ભિક્ખુ માતુયા માતુપેમેન આમસિ. તસ્સ કુક્કુચ્ચં અહોસિ – ‘‘ભગવતા સિક્ખાપદં પઞ્ઞત્તં, કચ્ચિ નુ ખો અહં સઙ્ઘાદિસેસં આપત્તિં આપન્નો’’તિ? ભગવતો એતમત્થં આરોચેસિ. ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
281. Tena kho pana samayena aññataro bhikkhu mātuyā mātupemena āmasi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ ધીતુયા ધીતુપેમેન આમસિ…પે॰… ભગિનિયા ભગિનિપેમેન આમસિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu dhītuyā dhītupemena āmasi…pe… bhaginiyā bhaginipemena āmasi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ પુરાણદુતિયિકાય કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘આપત્તિં ત્વં, ભિક્ખુ, આપન્નો સઙ્ઘાદિસેસ’’ન્તિ.
Tena kho pana samayena aññataro bhikkhu purāṇadutiyikāya kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
તેન ખો પન સમયેન અઞ્ઞતરો ભિક્ખુ યક્ખિનિયા કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu yakkhiniyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ પણ્ડકસ્સ કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘અનાપત્તિ , ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu paṇḍakassa kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti , bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ સુત્તિત્થિયા કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘આપત્તિં ત્વં, ભિક્ખુ, આપન્નો સઙ્ઘાદિસેસ’’ન્તિ.
Tena kho pana samayena aññataro bhikkhu suttitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
તેન ખો પન સમયેન અઞ્ઞતરો ભિક્ખુ મતિત્થિયા કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu matitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ તિરચ્છાનગતિત્થિયા કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu tiracchānagatitthiyā kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ દારુધીતલિકાય કાયસંસગ્ગં સમાપજ્જિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu dārudhītalikāya kāyasaṃsaggaṃ samāpajji. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
૨૮૨. તેન ખો પન સમયેન સમ્બહુલા ઇત્થિયો અઞ્ઞતરં ભિક્ખું સમ્પીળેત્વા બાહાપરમ્પરાય આનેસું. તસ્સ કુક્કુચ્ચં અહોસિ…પે॰… ‘‘સાદિયિ ત્વં, ભિક્ખૂ’’તિ? ‘‘નાહં, ભગવા, સાદિયિ’’ન્તિ. ‘‘અનાપત્તિ, ભિક્ખૂ, અસાદિયન્તસ્સા’’તિ.
282. Tena kho pana samayena sambahulā itthiyo aññataraṃ bhikkhuṃ sampīḷetvā bāhāparamparāya ānesuṃ. Tassa kukkuccaṃ ahosi…pe… ‘‘sādiyi tvaṃ, bhikkhū’’ti? ‘‘Nāhaṃ, bhagavā, sādiyi’’nti. ‘‘Anāpatti, bhikkhū, asādiyantassā’’ti.
તેન ખો પન સમયેન અઞ્ઞતરો ભિક્ખુ ઇત્થિયા અભિરૂળ્હં સઙ્કમં સારત્તો સઞ્ચાલેસિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu itthiyā abhirūḷhaṃ saṅkamaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ ઇત્થિં પટિપથે પસ્સિત્વા સારત્તો અંસકૂટેન પહારં અદાસિ. તસ્સ કુક્કુચ્ચં અહોસિ…પે॰… ‘‘આપત્તિં ત્વં, ભિક્ખુ, આપન્નો સઙ્ઘાદિસેસ’’ન્તિ.
Tena kho pana samayena aññataro bhikkhu itthiṃ paṭipathe passitvā sāratto aṃsakūṭena pahāraṃ adāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
તેન ખો પન સમયેન અઞ્ઞતરો ભિક્ખુ ઇત્થિયા અભિરૂળ્હં રુક્ખં સારત્તો સઞ્ચાલેસિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu itthiyā abhirūḷhaṃ rukkhaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ ઇત્થિયા અભિરૂળ્હં નાવં સારત્તો સઞ્ચાલેસિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tena kho pana samayena aññataro bhikkhu itthiyā abhirūḷhaṃ nāvaṃ sāratto sañcālesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
તેન ખો પન સમયેન અઞ્ઞતરો ભિક્ખુ ઇત્થિયા ગહિતં રજ્જું સારત્તો આવિઞ્છિ 9. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu itthiyā gahitaṃ rajjuṃ sāratto āviñchi 10. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ ઇત્થિયા ગહિતં દણ્ડં સારત્તો આવિઞ્છિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu itthiyā gahitaṃ daṇḍaṃ sāratto āviñchi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ સારત્તો ઇત્થિં પત્તેન પણામેસિ. તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ થુલ્લચ્ચયસ્સા’’તિ.
Tena kho pana samayena aññataro bhikkhu sāratto itthiṃ pattena paṇāmesi. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
તેન ખો પન સમયેન અઞ્ઞતરો ભિક્ખુ ઇત્થિયા વન્દન્તિયા સારત્તો પાદં ઉચ્ચારેસિ. તસ્સ કુક્કુચ્ચં અહોસિ…પે॰… ‘‘આપત્તિં ત્વં, ભિક્ખુ, આપન્નો સઙ્ઘાદિસેસ’’ન્તિ.
Tena kho pana samayena aññataro bhikkhu itthiyā vandantiyā sāratto pādaṃ uccāresi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
તેન ખો પન સમયેન અઞ્ઞતરો ભિક્ખુ ઇત્થિં ગહેસ્સામીતિ વાયમિત્વા ન છુપિ.
Tena kho pana samayena aññataro bhikkhu itthiṃ gahessāmīti vāyamitvā na chupi.
તસ્સ કુક્કુચ્ચં અહોસિ…પે॰… ‘‘અનાપત્તિ, ભિક્ખુ, સઙ્ઘાદિસેસસ્સ; આપત્તિ દુક્કટસ્સા’’તિ.
Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
કાયસંસગ્ગસિક્ખાપદં નિટ્ઠિતં દુતિયં.
Kāyasaṃsaggasikkhāpadaṃ niṭṭhitaṃ dutiyaṃ.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૨. કાયસંસગ્ગસિક્ખાપદવણ્ણના • 2. Kāyasaṃsaggasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૨. કાયસંસગ્ગસિક્ખાપદવણ્ણના • 2. Kāyasaṃsaggasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā
૨. કાયસંસગ્ગસિક્ખાપદવણ્ણના • 2. Kāyasaṃsaggasikkhāpadavaṇṇanā
પદભાજનીયવણ્ણના • Padabhājanīyavaṇṇanā
વિનીતવત્થુવણ્ણના • Vinītavatthuvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૨. કાયસંસગ્ગસિક્ખાપદવણ્ણના • 2. Kāyasaṃsaggasikkhāpadavaṇṇanā
