| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૨. ખદિરપત્તસુત્તં
2. Khadirapattasuttaṃ
૧૧૦૨. ‘‘યો, ભિક્ખવે, એવં વદેય્ય – ‘અહં દુક્ખં અરિયસચ્ચં યથાભૂતં અનભિસમેચ્ચ, દુક્ખસમુદયં અરિયસચ્ચં યથાભૂતં અનભિસમેચ્ચ, દુક્ખનિરોધં અરિયસચ્ચં યથાભૂતં અનભિસમેચ્ચ, દુક્ખનિરોધગામિનિં પટિપદં અરિયસચ્ચં યથાભૂતં અનભિસમેચ્ચ સમ્મા દુક્ખસ્સન્તં કરિસ્સામી’તિ – નેતં ઠાનં વિજ્જતિ.
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘સેય્યથાપિ , ભિક્ખવે, યો એવં વદેય્ય – ‘અહં ખદિરપત્તાનં વા સરલપત્તાનં 1 વા આમલકપત્તાનં વા પુટં કરિત્વા ઉદકં વા તાલપત્તં વા આહરિસ્સામી’તિ – નેતં ઠાનં વિજ્જતિ; એવમેવ ખો, ભિક્ખવે, યો એવં વદેય્ય – ‘અહં દુક્ખં અરિયસચ્ચં યથાભૂતં અનભિસમેચ્ચ…પે॰… દુક્ખનિરોધગામિનિં પટિપદં અરિયસચ્ચં યથાભૂતં અનભિસમેચ્ચ સમ્મા દુક્ખસ્સન્તં કરિસ્સામી’તિ – નેતં ઠાનં વિજ્જતિ.
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘યો ચ ખો, ભિક્ખવે, એવં વદેય્ય – ‘અહં દુક્ખં અરિયસચ્ચં યથાભૂતં અભિસમેચ્ચ, દુક્ખસમુદયં અરિયસચ્ચં યથાભૂતં અભિસમેચ્ચ, દુક્ખનિરોધં અરિયસચ્ચં યથાભૂતં અભિસમેચ્ચ, દુક્ખનિરોધગામિનિં પટિપદં અરિયસચ્ચં યથાભૂતં અભિસમેચ્ચ સમ્મા દુક્ખસ્સન્તં કરિસ્સામી’તિ – ઠાનમેતં વિજ્જતિ.
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘સેય્યથાપિ, ભિક્ખવે, યો એવં વદેય્ય – ‘અહં પદુમપત્તાનં વા પલાસપત્તાનં વા માલુવપત્તાનં વા પુટં કરિત્વા ઉદકં વા તાલપત્તં વા આહરિસ્સામી’તિ – ઠાનમેતં વિજ્જતિ; એવમેવ ખો, ભિક્ખવે, યો એવં વદેય્ય – ‘અહં દુક્ખં અરિયસચ્ચં યથાભૂતં અભિસમેચ્ચ …પે॰… દુક્ખનિરોધગામિનિં પટિપદં અરિયસચ્ચં યથાભૂતં અભિસમેચ્ચ સમ્મા દુક્ખસ્સન્તં કરિસ્સામી’તિ – ઠાનમેતં વિજ્જતિ.
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘તસ્માતિહ, ભિક્ખવે, ‘ઇદં દુક્ખ’ન્તિ યોગો કરણીયો…પે॰… ‘અયં દુક્ખનિરોધગામિની પટિપદા’તિ યોગો કરણીયો’’તિ. દુતિયં.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨. ખદિરપત્તસુત્તવણ્ણના • 2. Khadirapattasuttavaṇṇanā
