| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. க²ணஸுத்தவண்ணனா
2. Khaṇasuttavaṇṇanā
135. ச²ப²ஸ்ஸாயதனிகாதி ச²ஹி ப²ஸ்ஸாயதனேஹி அனிட்ட²ஸங்வேத³னியா. ச²த்³வாரப²ஸ்ஸபடிவிஞ்ஞத்தீதி ச²ஹிபி த்³வாரேஹி ஆரம்மணஸ்ஸ படிஸங்வேத³னா ஹோதியேவ ஸப்³ப³ஸோ து³க்கா²னுப⁴வனத்த²ங். தாவதிங்ஸபுரந்தி ஸுத³ஸ்ஸனமஹானக³ரங். அபா⁴வோ நாம நத்தி² ஸப்³ப³தா² ஸுகா²னுப⁴வனதோ. நிரயேதி இமினா து³க்³க³தி ப⁴வஸாமஞ்ஞேன இதராபாயாபி க³ஹிதா ஏவ. மக்³க³ப்³ரஹ்மசரியவாஸங் வஸிதுங் ந ஸக்காதி இமினா பன ஸப்³பே³ஸம்பி அச்சி²ந்தி³கட்டா²னானங் க³ஹணங் த³ட்ட²ப்³ப³ங். இமேவாதி இமஸ்மிங் மனுஸ்ஸலோகே ஏவ. அபாயோபி பஞ்ஞாயதி அபாயது³க்க²ஸதி³ஸஸ்ஸ து³க்க²ஸ்ஸ கதா³சி படிஸங்வேத³னதோ. ஸக்³கோ³பி பஞ்ஞாயதி தே³வபோ⁴க³ஸதி³ஸஸம்பத்தியா கதா³சி படிலபி⁴தப்³ப³தோ.
135.Chaphassāyatanikāti chahi phassāyatanehi aniṭṭhasaṃvedaniyā. Chadvāraphassapaṭiviññattīti chahipi dvārehi ārammaṇassa paṭisaṃvedanā hotiyeva sabbaso dukkhānubhavanatthaṃ. Tāvatiṃsapuranti sudassanamahānagaraṃ. Abhāvo nāma natthi sabbathā sukhānubhavanato. Nirayeti iminā duggati bhavasāmaññena itarāpāyāpi gahitā eva. Maggabrahmacariyavāsaṃ vasituṃ na sakkāti iminā pana sabbesampi acchindikaṭṭhānānaṃ gahaṇaṃ daṭṭhabbaṃ. Imevāti imasmiṃ manussaloke eva. Apāyopi paññāyati apāyadukkhasadisassa dukkhassa kadāci paṭisaṃvedanato. Saggopi paññāyati devabhogasadisasampattiyā kadāci paṭilabhitabbato.
அயங் கம்மபூ⁴மீதி அயங் மனுஸ்ஸலோகோ புரிஸதா²மகரணாய கம்மபூ⁴மி நாம தாஸங் யொக்³யட்டா²னபா⁴வதோ. தத்த² பதா⁴னகம்மங் த³ஸ்ஸெந்தோ ‘‘இத⁴ மக்³க³பா⁴வனா’’தி ஆஹ. டா²னானீதி காரணானி. ஸங்வேஜனியானீதி ஸங்வேக³ஜனநானி ப³ஹூனி ஜாதிஆதீ³னி. ததா² ஹி ஜாதி, ஜரா, ப்³யாதி⁴, மரணங், அபாயப⁴வங், தத்த²பி நிரயூபபத்திஹேதுகங், திரச்சா²னுபபத்திஹேதுகங், அஸூரகாயூபபத்திஹேதுகங், அதீதே வட்டமூலகங், அனாக³தே வட்டமூலகங், பச்சுப்பன்னே ஆஹாரபரியெட்டி²மூலகந்தி ப³ஹூனி ஸங்வேக³வத்தூ²னி பச்சவெக்கி²த்வா ஸங்வேக³ஜாதோ ஸஞ்ஜாதஸங்வேகோ³ யோனிஸோ பதா⁴னமனுயுஞ்ஜஸ்ஸு. ஸங்வேகா³தி ஸங்வேக³மாபஜ்ஜஸ்ஸு.
Ayaṃ kammabhūmīti ayaṃ manussaloko purisathāmakaraṇāya kammabhūmi nāma tāsaṃ yogyaṭṭhānabhāvato. Tattha padhānakammaṃ dassento ‘‘idha maggabhāvanā’’ti āha. Ṭhānānīti kāraṇāni. Saṃvejaniyānīti saṃvegajananāni bahūni jātiādīni. Tathā hi jāti, jarā, byādhi, maraṇaṃ, apāyabhavaṃ, tatthapi nirayūpapattihetukaṃ, tiracchānupapattihetukaṃ, asūrakāyūpapattihetukaṃ, atīte vaṭṭamūlakaṃ, anāgate vaṭṭamūlakaṃ, paccuppanne āhārapariyeṭṭhimūlakanti bahūni saṃvegavatthūni paccavekkhitvā saṃvegajāto sañjātasaṃvego yoniso padhānamanuyuñjassu. Saṃvegāti saṃvegamāpajjassu.
க²ணஸுத்தவண்ணனா நிட்டி²தா.
Khaṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. க²ணஸுத்தங் • 2. Khaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. க²ணஸுத்தவண்ணனா • 2. Khaṇasuttavaṇṇanā
