| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
4. குமாரகஸுத்தவண்ணனா
4. Kumārakasuttavaṇṇanā
44. சதுத்தே² குமாரகாதி தருணபுக்³க³லா. யே ஸுபா⁴ஸிதது³ப்³பா⁴ஸிதஸ்ஸ அத்த²ங் ஜானந்தி, தே இத⁴ குமாரகாதி அதி⁴ப்பேதா. இமே ஹி ஸத்தா ஜாததி³வஸதோ பட்டா²ய யாவ பஞ்சத³ஸவஸ்ஸகா, தாவ ‘‘குமாரகா, பா³லா’’தி ச வுச்சந்தி, ததோ பரங் வீஸதிவஸ்ஸானி ‘‘யுவானோ’’தி. மச்ச²கே பா³தெ⁴ந்தீதி மக்³க³ஸமீபே ஏகஸ்மிங் தளாகே நிதா³க⁴காலே உத³கே பரிக்கீ²ணே நின்னட்டா²னே டி²தங் உத³கங் உஸ்ஸிஞ்சித்வா கு²த்³த³கமச்சே² க³ண்ஹந்தி சேவ ஹனந்தி ச ‘‘பசித்வா கா²தி³ஸ்ஸாமா’’தி. தேனுபஸங்கமீதி மக்³க³தோ தோ²கங் தளாகங் அதிக்கமித்வா டி²தோ, தஸ்மா ‘‘உபஸங்கமீ’’தி வத³தி. கஸ்மா பன உபஸங்கமி? தே குமாரகே அத்தனி விஸ்ஸாஸங் ஜனேதுங் உபஸங்கமி. பா⁴யத² வோதி எத்த² வோதி நிபாதமத்தங். து³க்க²ஸ்ஸாதி நிஸ்ஸக்கே ஸாமிவசனங், து³க்க²ஸ்மாதி அத்தோ². அப்பியங் வோ து³க்க²ந்தி ‘‘கிங் தும்ஹாகங் ஸரீரே உப்பஜ்ஜனகது³க்க²ங் அப்பியங் அனிட்ட²’’ந்தி புச்ச²தி.
44. Catutthe kumārakāti taruṇapuggalā. Ye subhāsitadubbhāsitassa atthaṃ jānanti, te idha kumārakāti adhippetā. Ime hi sattā jātadivasato paṭṭhāya yāva pañcadasavassakā, tāva ‘‘kumārakā, bālā’’ti ca vuccanti, tato paraṃ vīsativassāni ‘‘yuvāno’’ti. Macchake bādhentīti maggasamīpe ekasmiṃ taḷāke nidāghakāle udake parikkhīṇe ninnaṭṭhāne ṭhitaṃ udakaṃ ussiñcitvā khuddakamacche gaṇhanti ceva hananti ca ‘‘pacitvā khādissāmā’’ti. Tenupasaṅkamīti maggato thokaṃ taḷākaṃ atikkamitvā ṭhito, tasmā ‘‘upasaṅkamī’’ti vadati. Kasmā pana upasaṅkami? Te kumārake attani vissāsaṃ janetuṃ upasaṅkami. Bhāyatha voti ettha voti nipātamattaṃ. Dukkhassāti nissakke sāmivacanaṃ, dukkhasmāti attho. Appiyaṃ vo dukkhanti ‘‘kiṃ tumhākaṃ sarīre uppajjanakadukkhaṃ appiyaṃ aniṭṭha’’nti pucchati.
ஏதமத்த²ங் விதி³த்வாதி இமே ஸத்தா அத்தனோ து³க்க²ங் அனிச்ச²ந்தா ஏவ ஹுத்வா து³க்க²ஹேதுங் படிபஜ்ஜந்தா அத்தனோ தங் இச்ச²ந்தா ஏவ நாம ஹொந்தீதி ஏதமத்த²ங் ஸப்³பா³காரதோ விதி³த்வா. இமங் உதா³னந்தி இமங் பாபகிரியாய நிஸேத⁴னங் ஆதீ³னவவிபா⁴வனஞ்ச உதா³னங் உதா³னேஸி.
Etamatthaṃ viditvāti ime sattā attano dukkhaṃ anicchantā eva hutvā dukkhahetuṃ paṭipajjantā attano taṃ icchantā eva nāma hontīti etamatthaṃ sabbākārato viditvā. Imaṃ udānanti imaṃ pāpakiriyāya nisedhanaṃ ādīnavavibhāvanañca udānaṃ udānesi.
தஸ்ஸத்தோ² – யதி³ தும்ஹாகங் ஸகலமாபாயிகங், ஸுக³தியஞ்ச அப்பாயுகதாமனுஸ்ஸதோ³ப⁴க்³கி³யாதி³பே⁴த³ங் து³க்க²ங் அப்பியங் அனிட்ட²ங், யதி³ தும்ஹே ததோ பா⁴யத², ஆவி வா பரேஸங் பாகடபா⁴வவஸேன அப்படிச்ச²ன்னங் கத்வா காயேன வா வாசாய வா பாணாதிபாதாதி³ப்பபே⁴த³ங் யதி³ வா ரஹோ அபாகடபா⁴வவஸேன படிச்ச²ன்னங் கத்வா மனொத்³வாரே ஏவ அபி⁴ஜ்ஜா²தி³ப்பபே⁴த³ங் அணுமத்தம்பி பாபகங் லாமகத⁴ம்மங் மாகத்த² மா கரித்த², அத² பன தங் பாபகம்மங் ஏதரஹி கரோத², ஆயதிங் வா கரிஸ்ஸத², நிரயாதீ³ஸு சதூஸு அபாயேஸு மனுஸ்ஸேஸு ச தஸ்ஸ ப²லபூ⁴தங் து³க்க²ங் இதோ வா எத்தோ வா பலாயந்தே அம்ஹே நானுப³ந்தி⁴ஸ்ஸதீதி அதி⁴ப்பாயேன உபேச்ச அபேச்ச பலாயதம்பி தும்ஹாகங் ததோ முத்தி மொக்கோ² நத்தி². க³திகாலாதி³பச்சயந்தரஸமவாயே விபச்சிஸ்ஸதியேவாதி த³ஸ்ஸேதி. ‘‘பலாயனே’’திபி பட²ந்தி, வுத்தனயேன யத்த² கத்த²சி க³மனே பக்கமனே ஸதீதி அத்தோ². அயஞ்ச அத்தோ² ‘‘ந அந்தலிக்கே² ந ஸமுத்³த³மஜ்ஜே²…பே॰… பாபகம்மா’’தி (த⁴॰ ப॰ 127; மி॰ ப॰ 4.2.4) இமாய கா³தா²ய தீ³பேதப்³போ³.
Tassattho – yadi tumhākaṃ sakalamāpāyikaṃ, sugatiyañca appāyukatāmanussadobhaggiyādibhedaṃ dukkhaṃ appiyaṃ aniṭṭhaṃ, yadi tumhe tato bhāyatha, āvi vā paresaṃ pākaṭabhāvavasena appaṭicchannaṃ katvā kāyena vā vācāya vā pāṇātipātādippabhedaṃ yadi vā raho apākaṭabhāvavasena paṭicchannaṃ katvā manodvāre eva abhijjhādippabhedaṃ aṇumattampi pāpakaṃ lāmakadhammaṃ mākattha mā karittha, atha pana taṃ pāpakammaṃ etarahi karotha, āyatiṃ vā karissatha, nirayādīsu catūsu apāyesu manussesu ca tassa phalabhūtaṃ dukkhaṃ ito vā etto vā palāyante amhe nānubandhissatīti adhippāyena upecca apecca palāyatampi tumhākaṃ tato mutti mokkho natthi. Gatikālādipaccayantarasamavāye vipaccissatiyevāti dasseti. ‘‘Palāyane’’tipi paṭhanti, vuttanayena yattha katthaci gamane pakkamane satīti attho. Ayañca attho ‘‘na antalikkhe na samuddamajjhe…pe… pāpakammā’’ti (dha. pa. 127; mi. pa. 4.2.4) imāya gāthāya dīpetabbo.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 4. குமாரகஸுத்தங் • 4. Kumārakasuttaṃ
