| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
10. லோகஸுத்தவண்ணனா
10. Lokasuttavaṇṇanā
30. த³ஸமே பு³த்³த⁴சக்கு²னாதி எத்த² ஆஸயானுஸயஞாணங் இந்த்³ரியபரோபரியத்தஞாணஞ்ச பு³த்³த⁴சக்கு² நாம. யதா²ஹ –
30. Dasame buddhacakkhunāti ettha āsayānusayañāṇaṃ indriyaparopariyattañāṇañca buddhacakkhu nāma. Yathāha –
‘‘அத்³த³ஸா கோ² ப⁴க³வா பு³த்³த⁴சக்கு²னா லோகங் வோலோகெந்தோ ஸத்தே அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே’’திஆதி³ (ம॰ நி॰ 1.283; 2.339).
‘‘Addasā kho bhagavā buddhacakkhunā lokaṃ volokento satte apparajakkhe mahārajakkhe tikkhindriye mudindriye’’tiādi (ma. ni. 1.283; 2.339).
லோகந்தி தயோ லோகா – ஓகாஸலோகோ, ஸங்கா²ரலோகோ, ஸத்தலோகோதி. தத்த² –
Lokanti tayo lokā – okāsaloko, saṅkhāraloko, sattalokoti. Tattha –
‘‘யாவதா சந்தி³மஸூரியா பரிஹரந்தி,
‘‘Yāvatā candimasūriyā pariharanti,
தி³ஸா ப⁴ந்தி விரோசனா;
Disā bhanti virocanā;
தாவ ஸஹஸ்ஸதா⁴ லோகோ,
Tāva sahassadhā loko,
எத்த² தே வத்ததீ வஸோ’’தி. –
Ettha te vattatī vaso’’ti. –
ஆதீ³ஸு (ம॰ நி॰ 1.503) ஓகாஸலோகோ. ‘‘ஏகோ லோகோ – ஸப்³பே³ ஸத்தா ஆஹாரட்டி²திகா, த்³வே லோகா – நாமஞ்ச ரூபஞ்ச, தயோ லோகா – திஸ்ஸோ வேத³னா , சத்தாரோ லோகா – சத்தாரோ ஆஹாரா, பஞ்ச லோகா – பஞ்சுபாதா³னக்க²ந்தா⁴, ச² லோகா – ச² அஜ்ஜ²த்திகானி ஆயதனானி, ஸத்த லோகா – ஸத்த விஞ்ஞாணட்டி²தியோ, அட்ட² லோகா – அட்ட² லோகத⁴ம்மா, நவ லோகா – நவ ஸத்தாவாஸா, த³ஸ லோகா – த³ஸாயதனானி, த்³வாத³ஸ லோகா – த்³வாத³ஸாயதனானி, அட்டா²ரஸ லோகா – அட்டா²ரஸ தா⁴துயோ’’திஆதீ³ஸு (படி॰ ம॰ 1.112) ஸங்கா²ரலோகோ. ‘‘ஸஸ்ஸதோ லோகோ, அஸஸ்ஸதோ லோகோ’’திஆதீ³ஸு ஸத்தலோகோ வுத்தோ. இதா⁴பி ஸத்தலோகோ வேதி³தப்³போ³.
Ādīsu (ma. ni. 1.503) okāsaloko. ‘‘Eko loko – sabbe sattā āhāraṭṭhitikā, dve lokā – nāmañca rūpañca, tayo lokā – tisso vedanā , cattāro lokā – cattāro āhārā, pañca lokā – pañcupādānakkhandhā, cha lokā – cha ajjhattikāni āyatanāni, satta lokā – satta viññāṇaṭṭhitiyo, aṭṭha lokā – aṭṭha lokadhammā, nava lokā – nava sattāvāsā, dasa lokā – dasāyatanāni, dvādasa lokā – dvādasāyatanāni, aṭṭhārasa lokā – aṭṭhārasa dhātuyo’’tiādīsu (paṭi. ma. 1.112) saṅkhāraloko. ‘‘Sassato loko, asassato loko’’tiādīsu sattaloko vutto. Idhāpi sattaloko veditabbo.
தத்த² லோகீயதி விசித்தாகாரதோ தி³ஸ்ஸதீதி சக்கவாளஸங்கா²தோ லோகோ ஓகாஸலோகோ, ஸங்கா²ரோ லுஜ்ஜதி பலுஜ்ஜதீதி லோகோ, லோகீயதி எத்த² புஞ்ஞபாபங் தப்³பி³பாகோ சாதி ஸத்தலோகோ. தேஸு ப⁴க³வா மஹாகருணாய அனுகம்பமானோ ஸங்ஸாரது³க்க²தோ மோசேதுகாமோ ஸத்தலோகங் ஓலோகேஸி. கதமஸ்ஸ பன ஸத்தாஹஸ்ஸ அச்சயேன ஓலோகேஸி? பட²மஸ்ஸ ஸத்தாஹஸ்ஸ. ப⁴க³வா ஹி பல்லங்கஸத்தாஹஸ்ஸ பரியோஸானே பச்சி²மயாமாவஸானே ‘‘யதா³ ஹவே பாதுப⁴வந்தி த⁴ம்மா…பே॰… ஸூரியோவ ஓபா⁴ஸயமந்தலிக்க²’’ந்தி (உதா³॰ 1-3; கதா²॰ 321; மஹாவ॰ 1-3) இமங் அரியமக்³கா³னுபா⁴வதீ³பகங் உதா³னங் உதா³னெத்வா, ‘‘அஹங் தாவ ஏவங் ஸுது³த்தரங் ஸங்ஸாரமஹோக⁴ங் இமாய த⁴ம்மனாவாய ஸமுத்தரித்வா நிப்³பா³னபாரே டி²தோ, ஹந்த³ தா³னி லோகம்பி தாரெஸ்ஸாமி, கீதி³ஸோ நு கோ² லோகோ’’தி லோகங் வோலோகேஸி. தங் ஸந்தா⁴ய வுத்தங் – ‘‘அத² கோ² ப⁴க³வா தஸ்ஸ ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா பு³த்³த⁴சக்கு²னா லோகங் வோலோகேஸீ’’தி.
Tattha lokīyati vicittākārato dissatīti cakkavāḷasaṅkhāto loko okāsaloko, saṅkhāro lujjati palujjatīti loko, lokīyati ettha puññapāpaṃ tabbipāko cāti sattaloko. Tesu bhagavā mahākaruṇāya anukampamāno saṃsāradukkhato mocetukāmo sattalokaṃ olokesi. Katamassa pana sattāhassa accayena olokesi? Paṭhamassa sattāhassa. Bhagavā hi pallaṅkasattāhassa pariyosāne pacchimayāmāvasāne ‘‘yadā have pātubhavanti dhammā…pe… sūriyova obhāsayamantalikkha’’nti (udā. 1-3; kathā. 321; mahāva. 1-3) imaṃ ariyamaggānubhāvadīpakaṃ udānaṃ udānetvā, ‘‘ahaṃ tāva evaṃ suduttaraṃ saṃsāramahoghaṃ imāya dhammanāvāya samuttaritvā nibbānapāre ṭhito, handa dāni lokampi tāressāmi, kīdiso nu kho loko’’ti lokaṃ volokesi. Taṃ sandhāya vuttaṃ – ‘‘atha kho bhagavātassa sattāhassa accayena tamhā samādhimhā vuṭṭhahitvā buddhacakkhunā lokaṃ volokesī’’ti.
தத்த² வோலோகேஸீதி விவிதே⁴ஹி ஆகாரேஹி பஸ்ஸி, ஹத்த²தலே ட²பிதஆமலகங் விய அத்தனோ ஞாணேன பச்சக்க²ங் அகாஸி. அனேகேஹி ஸந்தாபேஹீதிஆதி³ வோலோகிதாகாரத³ஸ்ஸனங். அனேகேஹி ஸந்தாபேஹீதி அனேகேஹி து³க்கே²ஹி. து³க்க²ஞ்ஹி ஸந்தாபனபீளனட்டே²ன ஸந்தாபோதி வுச்சதி. யதா²ஹ – ‘‘து³க்க²ஸ்ஸ பீளனட்டோ² ஸங்க²தட்டோ² ஸந்தாபட்டோ² விபரிணாமட்டோ²’’தி (படி॰ ம॰ 1.17). தஞ்ச து³க்க²து³க்கா²தி³வஸேன சேவ ஜாதிஆதி³வஸேன ச அனேகப்பகாரங். தேன வுத்தங் ‘‘அனேகேஹி ஸந்தாபேஹீ’’தி. அனேகேஹி து³க்கே²ஹி ஸந்தப்பமானே பீளியமானே பா³தி⁴யமானே. பரிளாஹேஹீதி பரிதா³ஹேஹி. பரிட³ய்ஹமானேதி இந்த⁴னங் விய அக்³கி³னா ஸமந்ததோ ட³ய்ஹமானே. ராக³ஜேஹீதி ராக³ஸம்பூ⁴தேஹி . ஏஸ நயோ ஸேஸேஸுபி. ராகா³த³யோ ஹி யஸ்மிங் ஸந்தானே உப்பஜ்ஜந்தி, தங் நித்³த³ஹந்தா விய விபா³தெ⁴ந்தி, தேன வுத்தங் – ‘‘தயோமே, பி⁴க்க²வே, அக்³கீ³ – ராக³க்³கி³, தோ³ஸக்³கி³, மோஹக்³கீ³’’தி (இதிவு॰ 93). யதோ தே சித்தங் காயஞ்ச கிலேஸெந்தீதி கிலேஸாதி வுச்சந்தி. எத்த² ச பரிட³ய்ஹமானேதி ஏதேன ப⁴க³வா ராகா³தி³கிலேஸானங் பவத்திது³க்க²தங், தேன ச ஸத்தானங் அபி⁴பூ⁴ததங் த³ஸ்ஸேதி. ஸந்தப்பமானேதி இமினா பன தேஸங் காலந்தரது³க்க²தங், தேன நிரந்தரோபத்³த³வதஞ்ச த³ஸ்ஸேதி.
Tattha volokesīti vividhehi ākārehi passi, hatthatale ṭhapitaāmalakaṃ viya attano ñāṇena paccakkhaṃ akāsi. Anekehi santāpehītiādi volokitākāradassanaṃ. Anekehi santāpehīti anekehi dukkhehi. Dukkhañhi santāpanapīḷanaṭṭhena santāpoti vuccati. Yathāha – ‘‘dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho’’ti (paṭi. ma. 1.17). Tañca dukkhadukkhādivasena ceva jātiādivasena ca anekappakāraṃ. Tena vuttaṃ ‘‘anekehi santāpehī’’ti. Anekehi dukkhehi santappamāne pīḷiyamāne bādhiyamāne. Pariḷāhehīti paridāhehi. Pariḍayhamāneti indhanaṃ viya agginā samantato ḍayhamāne. Rāgajehīti rāgasambhūtehi . Esa nayo sesesupi. Rāgādayo hi yasmiṃ santāne uppajjanti, taṃ niddahantā viya vibādhenti, tena vuttaṃ – ‘‘tayome, bhikkhave, aggī – rāgaggi, dosaggi, mohaggī’’ti (itivu. 93). Yato te cittaṃ kāyañca kilesentīti kilesāti vuccanti. Ettha ca pariḍayhamāneti etena bhagavā rāgādikilesānaṃ pavattidukkhataṃ, tena ca sattānaṃ abhibhūtataṃ dasseti. Santappamāneti iminā pana tesaṃ kālantaradukkhataṃ, tena nirantaropaddavatañca dasseti.
ப⁴க³வா ஹி போ³தி⁴ருக்க²மூலே அபராஜிதபல்லங்கே நிஸின்னோ பட²மயாமே புப்³பே³னிவாஸங் அனுஸ்ஸரித்வா மஜ்ஜி²மயாமே தி³ப்³ப³சக்கு²ங் விஸோதெ⁴த்வா பச்சி²மயாமே படிச்சஸமுப்பாதே³ ஞாணங் ஓதாரெத்வா கிலேஸமூலகங் வட்டது³க்க²ங் அபி⁴ஞ்ஞாய ஸங்கா²ரே பரிக்³க³ஹெத்வா ஸம்மஸந்தோ அனுக்கமேன விபஸ்ஸனங் வட்³டெ⁴த்வா அரியமக்³கா³தி⁴க³மேன ஸயங் விக³தவித்³த⁴ஸ்தகிலேஸோ அபி⁴ஸம்பு³த்³தோ⁴ ஹுத்வா பச்சவெக்க²ணானந்தரங் அனவஸேஸானங் கிலேஸானங் பஹீனத்தா அத்தனோ வட்டது³க்க²ஸ்ஸ பரிக்கீ²ணபா⁴வதீ³பகங் ஸப்³ப³பு³த்³தா⁴னங் அவிஜஹிதங் ‘‘அனேகஜாதிஸங்ஸார’’ந்தி (த⁴॰ ப॰ 153) உதா³னங் உதா³னெத்வா தேனேவ பல்லங்கேன ஸத்தாஹங் விமுத்திஸுக²படிஸங்வேதீ³ நிஸின்னோ ஸத்தமாய ரத்தியா தீஸு யாமேஸு வுத்தனயேன தீணி உதா³னானி உதா³னெத்வா ததியஉதா³னானந்தரங் பு³த்³த⁴சக்கு²னா லோகங் வோலோகெந்தோ ‘‘ஸகலமித³ங் ஸத்தானங் வட்டது³க்க²ங் கிலேஸமூலகங், கிலேஸா நாமேதே பவத்திது³க்கா² ஆயதிம்பி து³க்க²ஹேதுபூ⁴தா, தேஹி இமே ஸத்தா ஸந்தப்பந்தி பரிட³ய்ஹந்தி சா’’தி பஸ்ஸி. தேன வுத்தங் ‘‘அத்³த³ஸா கோ² ப⁴க³வா…பே॰… மோஹஜேஹிபீ’’தி.
Bhagavā hi bodhirukkhamūle aparājitapallaṅke nisinno paṭhamayāme pubbenivāsaṃ anussaritvā majjhimayāme dibbacakkhuṃ visodhetvā pacchimayāme paṭiccasamuppāde ñāṇaṃ otāretvā kilesamūlakaṃ vaṭṭadukkhaṃ abhiññāya saṅkhāre pariggahetvā sammasanto anukkamena vipassanaṃ vaḍḍhetvā ariyamaggādhigamena sayaṃ vigataviddhastakileso abhisambuddho hutvā paccavekkhaṇānantaraṃ anavasesānaṃ kilesānaṃ pahīnattā attano vaṭṭadukkhassa parikkhīṇabhāvadīpakaṃ sabbabuddhānaṃ avijahitaṃ ‘‘anekajātisaṃsāra’’nti (dha. pa. 153) udānaṃ udānetvā teneva pallaṅkena sattāhaṃ vimuttisukhapaṭisaṃvedī nisinno sattamāya rattiyā tīsu yāmesu vuttanayena tīṇi udānāni udānetvā tatiyaudānānantaraṃ buddhacakkhunā lokaṃ volokento ‘‘sakalamidaṃ sattānaṃ vaṭṭadukkhaṃ kilesamūlakaṃ, kilesā nāmete pavattidukkhā āyatimpi dukkhahetubhūtā, tehi ime sattā santappanti pariḍayhanti cā’’ti passi. Tena vuttaṃ ‘‘addasā kho bhagavā…pe… mohajehipī’’ti.
ஏதமத்த²ங் விதி³த்வாதி ஏதங் லோகஸ்ஸ யதா²வுத்தஸந்தாபபரிளாஹேஹி அபி⁴பு⁴ய்யமானதங் ஸப்³பா³காரதோ விதி³த்வா. இமங் உதா³னந்தி இமங் ஸப்³ப³ஸந்தாபபரிளாஹதோ பரினிப்³பா³னவிபா⁴வனங் மஹாஉதா³னங் உதா³னேஸி.
Etamatthaṃviditvāti etaṃ lokassa yathāvuttasantāpapariḷāhehi abhibhuyyamānataṃ sabbākārato viditvā. Imaṃ udānanti imaṃ sabbasantāpapariḷāhato parinibbānavibhāvanaṃ mahāudānaṃ udānesi.
தத்த² அயங் லோகோ ஸந்தாபஜாதோதி அயங் ஸப்³போ³பி லோகோ ஜராரோக³மரணேஹி சேவ நானாவித⁴ப்³யஸனேஹி ச கிலேஸபரியுட்டா²னேஹி ச ஜாதஸந்தாபோ, உப்பன்னகாயிகசேதஸிகது³க்கா²பி⁴ப⁴வோதி அத்தோ². ப²ஸ்ஸபரேதோதி ததோ ஏவ அனேகேஹி து³க்க²ஸம்ப²ஸ்ஸேஹி பரிஹதோ உபத்³து³தோ. அத² வா ப²ஸ்ஸபரேதோதி ஸுகா²தி³ஸங்கா²தானங் திஸ்ஸன்னங் து³க்க²தானங் பச்சயபூ⁴தேஹி ச²ஹி ப²ஸ்ஸேஹி அபி⁴பூ⁴தோ, ததோ ததோ த்³வாரதோ தஸ்மிங் தஸ்மிங் ஆரம்மணே பவத்திவஸேன உபஸ்ஸட்டோ². ரோக³ங் வத³தி அத்ததோதி ப²ஸ்ஸபச்சயா உப்பஜ்ஜமானங் வேத³னாஸங்கா²தங் ரோக³ங் து³க்க²ங், க²ந்த⁴பஞ்சகமேவ வா யதா²பூ⁴தங் அஜானந்தோ ‘‘அஹ’’ந்தி ஸஞ்ஞாய தி³ட்டி²கா³ஹவஸேன ‘‘அஹங் ஸுகி²தோ து³க்கி²தோ’’தி அத்ததோ வத³தி. ‘‘அத்தனோ’’திபி பட²ந்தி. தஸ்ஸத்தோ² – ய்வாயங் லோகோ கேனசி து³க்க²த⁴ம்மேன பு²ட்டோ² அபா⁴விதத்ததாய அதி⁴வாஸேதுங் அஸக்கொந்தோ ‘‘அஹோ து³க்க²ங், ஈதி³ஸங் து³க்க²ங் மய்ஹங் அத்தனோபி மா ஹோதூ’’திஆதி³னா விப்பலபந்தோ கேவலங் அத்தனோ ரோக³ங் வத³தி, தஸ்ஸ பன பஹானாய ந படிபஜ்ஜதீதி அதி⁴ப்பாயோ. அத² வா தங் யதா²வுத்தங் து³க்க²ங் யதா²பூ⁴தங் அஜானந்தோ தண்ஹாகா³ஹவஸேன ‘‘மம’’ந்தி ஸஞ்ஞாய அத்ததோ வத³தி, ‘‘மம இத³’’ந்தி வாசங் நிச்சா²ரேதி.
Tattha ayaṃ loko santāpajātoti ayaṃ sabbopi loko jarārogamaraṇehi ceva nānāvidhabyasanehi ca kilesapariyuṭṭhānehi ca jātasantāpo, uppannakāyikacetasikadukkhābhibhavoti attho. Phassaparetoti tato eva anekehi dukkhasamphassehi parihato upadduto. Atha vā phassaparetoti sukhādisaṅkhātānaṃ tissannaṃ dukkhatānaṃ paccayabhūtehi chahi phassehi abhibhūto, tato tato dvārato tasmiṃ tasmiṃ ārammaṇe pavattivasena upassaṭṭho. Rogaṃ vadati attatoti phassapaccayā uppajjamānaṃ vedanāsaṅkhātaṃ rogaṃ dukkhaṃ, khandhapañcakameva vā yathābhūtaṃ ajānanto ‘‘aha’’nti saññāya diṭṭhigāhavasena ‘‘ahaṃ sukhito dukkhito’’ti attato vadati. ‘‘Attano’’tipi paṭhanti. Tassattho – yvāyaṃ loko kenaci dukkhadhammena phuṭṭho abhāvitattatāya adhivāsetuṃ asakkonto ‘‘aho dukkhaṃ, īdisaṃ dukkhaṃ mayhaṃ attanopi mā hotū’’tiādinā vippalapanto kevalaṃ attano rogaṃ vadati, tassa pana pahānāya na paṭipajjatīti adhippāyo. Atha vā taṃ yathāvuttaṃ dukkhaṃ yathābhūtaṃ ajānanto taṇhāgāhavasena ‘‘mama’’nti saññāya attato vadati, ‘‘mama ida’’nti vācaṃ nicchāreti.
யேன யேன ஹி மஞ்ஞதீதி ஏவமிமங் ரோக³பூ⁴தங் க²ந்த⁴பஞ்சகங் அத்ததோ அத்தனோ வா வத³ந்தோ லோகோ யேன யேன ரூபவேத³னாதி³னா காரணபூ⁴தேன, யேன வா ஸஸ்ஸதாதி³னா பகாரேன தி³ட்டி²மானதண்ஹாமஞ்ஞனாஹி மஞ்ஞதி. ததோ தங் ஹோதி அஞ்ஞதா²தி ததோ அத்தனா பரிகப்பிதாகாரதோ தங் மஞ்ஞனாய வத்து²பூ⁴தங் க²ந்த⁴பஞ்சகங் அஞ்ஞதா² அனத்தானத்தனியமேவ ஹோதி. வஸே வத்தேதுங் அஸக்குணெய்யதாய அஹங்காரமமங்காரத்தங் ந நிப்பா²தே³தீதி அத்தோ². அத² வா ததோதி தஸ்மா மஞ்ஞனாமத்தபா⁴வதோ தங் க²ந்த⁴பஞ்சகங் நிச்சாதி³வஸேன மஞ்ஞிதங் அஞ்ஞதா² அனிச்சாதி³ஸபா⁴வமேவ ஹோதி. ந ஹி மஞ்ஞனா பா⁴வஞ்ஞத²த்தங் வா லக்க²ணஞ்ஞத²த்தங் வா காதுங் ஸக்கோதி.
Yena yena hi maññatīti evamimaṃ rogabhūtaṃ khandhapañcakaṃ attato attano vā vadanto loko yena yena rūpavedanādinā kāraṇabhūtena, yena vā sassatādinā pakārena diṭṭhimānataṇhāmaññanāhi maññati. Tato taṃ hoti aññathāti tato attanā parikappitākārato taṃ maññanāya vatthubhūtaṃ khandhapañcakaṃ aññathā anattānattaniyameva hoti. Vase vattetuṃ asakkuṇeyyatāya ahaṅkāramamaṅkārattaṃ na nipphādetīti attho. Atha vā tatoti tasmā maññanāmattabhāvato taṃ khandhapañcakaṃ niccādivasena maññitaṃ aññathā aniccādisabhāvameva hoti. Na hi maññanā bhāvaññathattaṃ vā lakkhaṇaññathattaṃ vā kātuṃ sakkoti.
அஞ்ஞதா²பா⁴வீ ப⁴வஸத்தோதி அஸம்ப⁴வே வட்³டி⁴யங் ஹிதஸுகே² ஸத்தோ லக்³கோ³ ஸத்தலோகோ மஞ்ஞனாய யதா²ருசி சிந்தியமானோபி விபரீதப்படிபத்தியா ததோ அஞ்ஞதா²பா⁴வீ அஹிதது³க்க²பா⁴வீ விகா⁴தங்யேவ பாபுணாதி. ப⁴வமேவாபி⁴னந்த³தீதி ஏவங் ஸந்தேபி தங் மஞ்ஞனாபரிகப்பிதங் அவிஜ்ஜமானங் ப⁴வங் வட்³டி⁴ங் அபி⁴னந்த³தி ஏவ அபி⁴கங்க²தி ஏவ. அத² வா அஞ்ஞதா²பா⁴வீதி ‘‘நிச்சோ மே அத்தா’’திஆதி³னா மஞ்ஞனாய பரிகப்பிதாகாரதோ ஸயங் அஞ்ஞதா²பா⁴வீ ஸமானோ அனிச்சோ அது⁴வோதி அத்தோ². ப⁴வஸத்தோதி காமாதி³ப⁴வேஸு ப⁴வதண்ஹாய ஸத்தோ லக்³கோ³ க³தி⁴தோ. ப⁴வமேவாபி⁴னந்த³தீதி அனிச்சாதி³ஸபா⁴வங் ப⁴வமேவ நிச்சாதி³வஸேன பராமஸித்வா, தத்த² வா அதி⁴முத்திஸஞ்ஞங் தண்ஹாதி³ட்டா²பி⁴னந்த³னாஹி அபி⁴னந்த³தி, ந தத்த² நிப்³பி³ந்த³தி . யத³பி⁴னந்த³தி தங் ப⁴யந்தி யங் வட்³டி⁴ஸங்கா²தங் ப⁴வங் காமாதி³ப⁴வங் வா அபி⁴னந்த³தி, தங் அனிச்சாதி³விபரிணாமஸபா⁴வத்தா அனேகப்³யஸனானுப³ந்த⁴த்தா ச ப⁴வஹேதுபா⁴வதோ அதிவிய ப⁴யானகட்டே²ன ப⁴யங். யஸ்ஸ பா⁴யதீதி யதோ ஜராமரணாதி³தோ பா⁴யதி, தங் ஜராமரணாதி³ து³க்கா²தி⁴ட்டா²னபா⁴வதோ து³க்க²து³க்க²பா⁴வதோ ச து³க்க²ங். அத² வா யஸ்ஸ பா⁴யதீதி ப⁴வாபி⁴னந்த³னேன யஸ்ஸ விப⁴வஸ்ஸ பா⁴யதி , ஸோ உச்சே²த³ஸங்கா²தோ விப⁴வோ, ததோ பா⁴யனஞ்ச து³க்க²வத்து²பா⁴வதோ ஜாதிஆதி³து³க்க²ஸ்ஸ அனதிவத்தனதோ ச து³க்க²ங் து³க்க²ஸபா⁴வமேவாதி அத்தோ². அத² வா யஸ்ஸ பா⁴யதி தங் து³க்க²ந்தி யஸ்ஸ அனிச்சாதி³கஸ்ஸ பா⁴யதி தங் நிஸ்ஸரணங் அஜானந்தோ, தங் ப⁴யங் தஸ்ஸ து³க்க²ங் ஹோதி, து³க்க²ங் ஆவஹதீதி அத்தோ².
Aññathābhāvī bhavasattoti asambhave vaḍḍhiyaṃ hitasukhe satto laggo sattaloko maññanāya yathāruci cintiyamānopi viparītappaṭipattiyā tato aññathābhāvī ahitadukkhabhāvī vighātaṃyeva pāpuṇāti. Bhavamevābhinandatīti evaṃ santepi taṃ maññanāparikappitaṃ avijjamānaṃ bhavaṃ vaḍḍhiṃ abhinandati eva abhikaṅkhati eva. Atha vā aññathābhāvīti ‘‘nicco me attā’’tiādinā maññanāya parikappitākārato sayaṃ aññathābhāvī samāno anicco adhuvoti attho. Bhavasattoti kāmādibhavesu bhavataṇhāya satto laggo gadhito. Bhavamevābhinandatīti aniccādisabhāvaṃ bhavameva niccādivasena parāmasitvā, tattha vā adhimuttisaññaṃ taṇhādiṭṭhābhinandanāhi abhinandati, na tattha nibbindati . Yadabhinandati taṃ bhayanti yaṃ vaḍḍhisaṅkhātaṃ bhavaṃ kāmādibhavaṃ vā abhinandati, taṃ aniccādivipariṇāmasabhāvattā anekabyasanānubandhattā ca bhavahetubhāvato ativiya bhayānakaṭṭhena bhayaṃ. Yassa bhāyatīti yato jarāmaraṇādito bhāyati, taṃ jarāmaraṇādi dukkhādhiṭṭhānabhāvato dukkhadukkhabhāvato ca dukkhaṃ. Atha vā yassa bhāyatīti bhavābhinandanena yassa vibhavassa bhāyati , so ucchedasaṅkhāto vibhavo, tato bhāyanañca dukkhavatthubhāvato jātiādidukkhassa anativattanato ca dukkhaṃ dukkhasabhāvamevāti attho. Atha vā yassa bhāyati taṃ dukkhanti yassa aniccādikassa bhāyati taṃ nissaraṇaṃ ajānanto, taṃ bhayaṃ tassa dukkhaṃ hoti, dukkhaṃ āvahatīti attho.
எத்தகேன வட்டங் த³ஸ்ஸெத்வா இதா³னி விவட்டங் த³ஸ்ஸேதுங், ‘‘ப⁴வவிப்பஹானாய கோ² பனித³ங் ப்³ரஹ்மசரியங் வுஸ்ஸதீ’’தி ஆஹ. தத்த² ப⁴வவிப்பஹானாயாதி காமாதி³ப⁴வஸ்ஸ பஜஹனத்தா²ய. கோ²தி அவதா⁴ரணே, பனாதி பத³பூரணே நிபாதோ. இத³ந்தி ஆஸன்னபச்சக்க²வசனங். ப்³ரஹ்மசரியந்தி மக்³க³ப்³ரஹ்மசரியங். வுஸ்ஸதீதி பூரெஸ்ஸதி. இத³ங் வுத்தங் ஹோதி – ஏகந்தேனேவ காமாதி³ப⁴வஸ்ஸ ஸமுத³யப்பஹானேன அனவஸேஸபஜஹனத்தா²ய இத³ங் மயா ஸதஸஹஸ்ஸகப்பாதி⁴கானி சத்தாரி அஸங்க்²யெய்யானி அதிது³க்கரானி ஆசரித்வா பாரமியோ பூரெத்வா போ³தி⁴மண்டே³ திண்ணங் மாரானங் மத்த²கங் மத்³தி³த்வா அதி⁴க³தங் ஸீலாதி³க்க²ந்த⁴த்தயஸங்க³ஹங் அட்ட²ங்கி³கமக்³க³ப்³ரஹ்மசரியங் சரியதி பா⁴வியதீதி.
Ettakena vaṭṭaṃ dassetvā idāni vivaṭṭaṃ dassetuṃ, ‘‘bhavavippahānāya kho panidaṃ brahmacariyaṃ vussatī’’ti āha. Tattha bhavavippahānāyāti kāmādibhavassa pajahanatthāya. Khoti avadhāraṇe, panāti padapūraṇe nipāto. Idanti āsannapaccakkhavacanaṃ. Brahmacariyanti maggabrahmacariyaṃ. Vussatīti pūressati. Idaṃ vuttaṃ hoti – ekanteneva kāmādibhavassa samudayappahānena anavasesapajahanatthāya idaṃ mayā satasahassakappādhikāni cattāri asaṅkhyeyyāni atidukkarāni ācaritvā pāramiyo pūretvā bodhimaṇḍe tiṇṇaṃ mārānaṃ matthakaṃ madditvā adhigataṃ sīlādikkhandhattayasaṅgahaṃ aṭṭhaṅgikamaggabrahmacariyaṃ cariyati bhāviyatīti.
ஏவங் அரியமக்³க³ஸ்ஸ ஏகங்ஸேனேவ நிய்யானிகபா⁴வங் த³ஸ்ஸெத்வா இதா³னி அஞ்ஞமக்³க³ஸ்ஸ தத³பா⁴வங் த³ஸ்ஸெந்தோ ‘‘யே ஹி கேசீ’’திஆதி³மாஹ. தத்த² யேதி அனியமனித்³தே³ஸோ. ஹீதி நிபாதமத்தங். கேசீதி ஏகச்சே. பத³த்³வயேனாபி ததா²வாதி³னோ தி³ட்டி²க³திகே அனியமதோ பரியாதி³யதி. ஸமணாதி பப்³ப³ஜ்ஜூபக³மனமத்தேன ஸமணா, ந ஸமிதபாபா. ப்³ராஹ்மணாதி ஜாதிமத்தேன ப்³ராஹ்மணா, ந பா³ஹிதபாபா. வாஸத்³தோ³ விகப்பத்தோ². ப⁴வேன ப⁴வஸ்ஸ விப்பமொக்க²மாஹங்ஸூதி ஏகச்சே காமப⁴வேன ரூபப⁴வேன வா ஸப்³ப³ப⁴வதோ விமுத்திங் ஸங்ஸாரஸுத்³தி⁴ங் கத²யிங்ஸு.
Evaṃ ariyamaggassa ekaṃseneva niyyānikabhāvaṃ dassetvā idāni aññamaggassa tadabhāvaṃ dassento ‘‘ye hi kecī’’tiādimāha. Tattha yeti aniyamaniddeso. Hīti nipātamattaṃ. Kecīti ekacce. Padadvayenāpi tathāvādino diṭṭhigatike aniyamato pariyādiyati. Samaṇāti pabbajjūpagamanamattena samaṇā, na samitapāpā. Brāhmaṇāti jātimattena brāhmaṇā, na bāhitapāpā. Vāsaddo vikappattho. Bhavena bhavassa vippamokkhamāhaṃsūti ekacce kāmabhavena rūpabhavena vā sabbabhavato vimuttiṃ saṃsārasuddhiṃ kathayiṃsu.
கே பனேவங் வத³ந்தீதி? தி³ட்ட²த⁴ம்மனிப்³பா³னவாதி³னோ தேஸு ஹி கேசி ‘‘உளாரேஹி பஞ்சஹி காமகு³ணேஹி ஸமப்பிதோ அத்தா தி³ட்டே²வ த⁴ம்மே பரமங் நிப்³பு³திங் பத்தோ ஹோதீ’’தி வத³ந்தி. கேசி ‘‘ரூபாவசரஜ்ஜா²னேஸு பட²மஜ்ஜா²னஸமங்கீ³…பே॰… கேசி ‘‘து³தியததியசதுத்த²ஜ்ஜா²னஸமங்கீ³ அத்தா தி³ட்டே²வ த⁴ம்மே பரமங் நிப்³பு³திங் பத்தோ ஹோதீ’’தி வத³ந்தி. யதா²ஹ –
Ke panevaṃ vadantīti? Diṭṭhadhammanibbānavādino tesu hi keci ‘‘uḷārehi pañcahi kāmaguṇehi samappito attā diṭṭheva dhamme paramaṃ nibbutiṃ patto hotī’’ti vadanti. Keci ‘‘rūpāvacarajjhānesu paṭhamajjhānasamaṅgī…pe… keci ‘‘dutiyatatiyacatutthajjhānasamaṅgī attā diṭṭheva dhamme paramaṃ nibbutiṃ patto hotī’’ti vadanti. Yathāha –
‘‘இத⁴ , பி⁴க்க²வே, ஏகச்சோ ஸமணோ வா ப்³ராஹ்மணோ வா ஏவங்வாதீ³ ஹோதி ஏவங்தி³ட்டி² ‘யதோ கோ² போ⁴ அயங் அத்தா பஞ்சஹி காமகு³ணேஹி ஸமப்பிதோ’’’தி (தீ³॰ நி॰ 1.94) வித்தா²ரோ.
‘‘Idha , bhikkhave, ekacco samaṇo vā brāhmaṇo vā evaṃvādī hoti evaṃdiṭṭhi ‘yato kho bho ayaṃ attā pañcahi kāmaguṇehi samappito’’’ti (dī. ni. 1.94) vitthāro.
தே பன யஸ்மா யாவத³த்த²ங் பீதத்தா ஸுஹிதாய ஜலூகாய விய ருஹிரபிபாஸா காமாதி³ஸுகே²ஹி ஸமப்பிதஸ்ஸ தஸ்ஸ அத்தனோ காமேஸனாத³யோ ந ப⁴விஸ்ஸந்தி, தத³பா⁴வே ச ப⁴வஸ்ஸ அபா⁴வோயேவ, யஸ்மிங் யஸ்மிஞ்ச ப⁴வே டி²தஸ்ஸ அயங் நயோ லப்³ப⁴தி, தேன தேன ப⁴வேன ஸப்³ப³ப⁴வதோ விமுத்தி ஹோதீதி வத³ந்தி, தஸ்மா ‘‘ப⁴வேன ப⁴வஸ்ஸ விப்பமொக்க²மாஹங்ஸூ’’தி வுத்தா. யேஸஞ்ச ‘‘எத்தகங் நாம காலங் ஸங்ஸரித்வா பா³லா ச பண்டி³தா ச பரியோஸானப⁴வே ட²த்வா ஸங்ஸாரதோ விமுச்சந்தீ’’தி லத்³தி⁴, தேபி ப⁴வேன ப⁴வஸ்ஸ விப்பமொக்க²ங் வத³ந்தி நாம. வுத்தஞ்ஹேதங் –
Te pana yasmā yāvadatthaṃ pītattā suhitāya jalūkāya viya ruhirapipāsā kāmādisukhehi samappitassa tassa attano kāmesanādayo na bhavissanti, tadabhāve ca bhavassa abhāvoyeva, yasmiṃ yasmiñca bhave ṭhitassa ayaṃ nayo labbhati, tena tena bhavena sabbabhavato vimutti hotīti vadanti, tasmā ‘‘bhavena bhavassa vippamokkhamāhaṃsū’’ti vuttā. Yesañca ‘‘ettakaṃ nāma kālaṃ saṃsaritvā bālā ca paṇḍitā ca pariyosānabhave ṭhatvā saṃsārato vimuccantī’’ti laddhi, tepi bhavena bhavassa vippamokkhaṃ vadanti nāma. Vuttañhetaṃ –
‘‘சுல்லாஸீதி மஹாகப்பினோ ஸதஸஹஸ்ஸானி யானி பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தீ’’தி (தீ³॰ நி॰ 1.168).
‘‘Cullāsīti mahākappino satasahassāni yāni bāle ca paṇḍite ca sandhāvitvā saṃsaritvā dukkhassantaṃ karissantī’’ti (dī. ni. 1.168).
அத² வா ப⁴வேனாதி ப⁴வதி³ட்டி²யா. ப⁴வதி ஸஸ்ஸதங் திட்ட²தீதி பவத்தனதோ ஸஸ்ஸததி³ட்டி² ப⁴வதி³ட்டீ²தி வுச்சதி, ப⁴வதி³ட்டி² ஏவெத்த² உத்தரபத³லோபேன ப⁴வதண்ஹாதிஆதீ³ஸு விய ப⁴வோதி வுத்தோ. ப⁴வதி³ட்டி²வஸேன ச ஏகச்சே ப⁴வவிஸேஸங்யேவ கிலேஸானங் வூபஸந்தவுத்தியா ஆயுனோ ச தீ³கா⁴வாஸதாய நிச்சாதி³ஸபா⁴வங் ப⁴வவிமொக்க²ங் மஞ்ஞந்தி, ஸெய்யதா²பி ப³கோ ப்³ரஹ்மா ‘‘இத³ங் நிச்சங், இத³ங் து⁴வங், இத³ங் ஸஸ்ஸதங், இத³ங் அவிபரிணாமத⁴ம்ம’’ந்தி (ம॰ நி॰ 1.501) அவோச. தேஸமேவங் விபரீதகா³ஹீனங் அனிஸ்ஸரணே நிஸ்ஸரணதி³ட்டீ²னங் குதோ ப⁴வவிமொக்கோ². தேனாஹ ப⁴க³வா – ‘‘ஸப்³பே³ தே ‘அவிப்பமுத்தா ப⁴வஸ்மா’தி வதா³மீ’’தி.
Atha vā bhavenāti bhavadiṭṭhiyā. Bhavati sassataṃ tiṭṭhatīti pavattanato sassatadiṭṭhi bhavadiṭṭhīti vuccati, bhavadiṭṭhi evettha uttarapadalopena bhavataṇhātiādīsu viya bhavoti vutto. Bhavadiṭṭhivasena ca ekacce bhavavisesaṃyeva kilesānaṃ vūpasantavuttiyā āyuno ca dīghāvāsatāya niccādisabhāvaṃ bhavavimokkhaṃ maññanti, seyyathāpi bako brahmā ‘‘idaṃ niccaṃ, idaṃ dhuvaṃ, idaṃ sassataṃ, idaṃ avipariṇāmadhamma’’nti (ma. ni. 1.501) avoca. Tesamevaṃ viparītagāhīnaṃ anissaraṇe nissaraṇadiṭṭhīnaṃ kuto bhavavimokkho. Tenāha bhagavā – ‘‘sabbe te ‘avippamuttā bhavasmā’ti vadāmī’’ti.
விப⁴வேனாதி உச்சே²தே³ன. ப⁴வஸ்ஸ நிஸ்ஸரணமாஹங்ஸூதி ஸப்³ப³ப⁴வதோ நிக்³க³மனங் நிக்க²ந்திங் ஸங்ஸாரஸுத்³தி⁴ங் வதி³ங்ஸு. தே ஹி ‘‘ப⁴வேன ப⁴வஸ்ஸ விப்பமொக்கோ²’’தி வத³ந்தானங் வாத³ங் அனநுஜானந்தா ப⁴வூபச்சே²தே³ன நிஸ்ஸரணங் படிஜானிங்ஸு. விப⁴வேனாதி வா உச்சே²த³தி³ட்டி²யா. விப⁴வதி வினஸ்ஸதி உச்சி²ஜ்ஜதி அத்தா ச லோகோ சாதி பவத்தனதோ உச்சே²த³தி³ட்டி² வுத்தனயேன ‘‘விப⁴வோ’’தி வுச்சதி. உச்சே²த³தி³ட்டி²வஸேன ஹி ஸத்தா அதி⁴முச்சித்வா தத்த² தத்த² உப்பன்னா உச்சி²ஜ்ஜந்தி, ஸா ஏவ ஸங்ஸாரஸுத்³தீ⁴தி உச்சே²த³வாதி³னோ. வுத்தஞ்ஹேதங் –
Vibhavenāti ucchedena. Bhavassa nissaraṇamāhaṃsūti sabbabhavato niggamanaṃ nikkhantiṃ saṃsārasuddhiṃ vadiṃsu. Te hi ‘‘bhavena bhavassa vippamokkho’’ti vadantānaṃ vādaṃ ananujānantā bhavūpacchedena nissaraṇaṃ paṭijāniṃsu. Vibhavenāti vā ucchedadiṭṭhiyā. Vibhavati vinassati ucchijjati attā ca loko cāti pavattanato ucchedadiṭṭhi vuttanayena ‘‘vibhavo’’ti vuccati. Ucchedadiṭṭhivasena hi sattā adhimuccitvā tattha tattha uppannā ucchijjanti, sā eva saṃsārasuddhīti ucchedavādino. Vuttañhetaṃ –
‘‘யதோ கோ² போ⁴ அயங் அத்தா ரூபீ சாதுமஹாபூ⁴திகோ…பே॰… நேவஸஞ்ஞானாஸஞ்ஞாயதனங் உபஸம்பஜ்ஜ விஹரதி, எத்தாவதா கோ² போ⁴ அயங் அத்தா ஸம்மா ஸமுச்சி²ன்னோ ஹோதீ’’தி (தீ³॰ நி॰ 1.85).
‘‘Yato kho bho ayaṃ attā rūpī cātumahābhūtiko…pe… nevasaññānāsaññāyatanaṃ upasampajja viharati, ettāvatā kho bho ayaṃ attā sammā samucchinno hotī’’ti (dī. ni. 1.85).
ததா² –
Tathā –
‘‘நத்தி², மஹாராஜ, தி³ன்னங், நத்தி² யிட்ட²ங் நத்தி² ஹுதங்…பே॰… பா³லே ச பண்டி³தே ச காயஸ்ஸ பே⁴தா³ உச்சி²ஜ்ஜந்தி வினஸ்ஸந்தி ந ஹொந்தி பரங் மரணா’’தி ச (தீ³॰ நி॰ 1.171).
‘‘Natthi, mahārāja, dinnaṃ, natthi yiṭṭhaṃ natthi hutaṃ…pe… bāle ca paṇḍite ca kāyassa bhedā ucchijjanti vinassanti na honti paraṃ maraṇā’’ti ca (dī. ni. 1.171).
தேஸம்பி ஏவங் விபரீதகா³ஹீனங் குதோ ப⁴வனிஸ்ஸரணங். தேனாஹ ப⁴க³வா – ‘‘ஸப்³பே³ தே ‘அனிஸ்ஸடா ப⁴வஸ்மா’தி வதா³மீ’’தி. ந ஹி அரியமக்³க³பா⁴வனாய அனவஸேஸகிலேஸங் அஸமுக்³கா⁴தெத்வா கதா³சிபி ப⁴வதோ நிஸ்ஸரணவிமுத்தி ஸம்ப⁴வதி. ததா² ஹி தேஸங் ஸமணப்³ராஹ்மணானங் யதா²பூ⁴தாவபோ³தா⁴பா⁴வதோ ‘‘அத்தி² நத்தீ²’’தி அந்தத்³வயனிபதிதானங் தண்ஹாதி³ட்டி²வஸேன ஸம்பரிதஸிதவிப்ப²ந்தி³தமத்தங், யதோ தே தி³ட்டி²க³திகா பவத்திஹேதூஸுபி ஸம்மூள்ஹா ஸக்காயபூ⁴மியங் ஸுனிகா²தே விபரீதத³ஸ்ஸனத²ம்பே⁴ தண்ஹாப³ந்த⁴னேன ப³த்³தா⁴ க³த்³தூ³லப³ந்த⁴னா விய ஸா ந விஜஹந்தி ப³ந்த⁴னட்டா²னங், குதோ நேஸங் விமொக்கோ²?
Tesampi evaṃ viparītagāhīnaṃ kuto bhavanissaraṇaṃ. Tenāha bhagavā – ‘‘sabbe te ‘anissaṭā bhavasmā’ti vadāmī’’ti. Na hi ariyamaggabhāvanāya anavasesakilesaṃ asamugghātetvā kadācipi bhavato nissaraṇavimutti sambhavati. Tathā hi tesaṃ samaṇabrāhmaṇānaṃ yathābhūtāvabodhābhāvato ‘‘atthi natthī’’ti antadvayanipatitānaṃ taṇhādiṭṭhivasena samparitasitavipphanditamattaṃ, yato te diṭṭhigatikā pavattihetūsupi sammūḷhā sakkāyabhūmiyaṃ sunikhāte viparītadassanathambhe taṇhābandhanena baddhā gaddūlabandhanā viya sā na vijahanti bandhanaṭṭhānaṃ, kuto nesaṃ vimokkho?
யே பன சதுஸச்சவிபா⁴வனேன பவத்திஆதீ³ஸு அஸம்மோஹதோ தங் அந்தத்³வயங் அனுபக³ம்ம மஜ்ஜி²மங் படிபத³ங் ஸமாருள்ஹா, தேஸங்யேவ ப⁴வவிப்பமொக்கோ² நிஸ்ஸரணஞ்சாதி த³ஸ்ஸெந்தோ ஸத்தா² ‘‘உபதி⁴ங் ஹீ’’திஆதி³மாஹ. தத்த² உபதி⁴ந்தி க²ந்தா⁴தி³உபதி⁴ங். ஹீதி நிபாதமத்தங். படிச்சாதி நிஸ்ஸாய, பச்சயங் கத்வா. து³க்க²ந்தி ஜாதிஆதி³ து³க்க²ங். கிங் வுத்தங் ஹோதி? யத்தி²மே தி³ட்டி²க³திகா விமொக்க²ஸஞ்ஞினோ, தத்த² க²ந்த⁴கிலேஸாபி⁴ஸங்கா²ரூபத⁴யோ அதி⁴க³தா, குதோ தத்த² து³க்க²னிஸ்ஸரணங்? யத்ர ஹி கிலேஸா, தத்ராபி⁴ஸங்கா²ரஸம்ப⁴வதோ ப⁴வபப³ந்த⁴ஸ்ஸ அவிச்சே²தோ³யேவாதி வட்டது³க்க²ஸ்ஸ அனிவத்தி. தேன வுத்தங் – ‘‘உபதி⁴ஞ்ஹி படிச்ச து³க்க²மித³ங் ஸம்போ⁴தீ’’தி.
Ye pana catusaccavibhāvanena pavattiādīsu asammohato taṃ antadvayaṃ anupagamma majjhimaṃ paṭipadaṃ samāruḷhā, tesaṃyeva bhavavippamokkho nissaraṇañcāti dassento satthā ‘‘upadhiṃ hī’’tiādimāha. Tattha upadhinti khandhādiupadhiṃ. Hīti nipātamattaṃ. Paṭiccāti nissāya, paccayaṃ katvā. Dukkhanti jātiādi dukkhaṃ. Kiṃ vuttaṃ hoti? Yatthime diṭṭhigatikā vimokkhasaññino, tattha khandhakilesābhisaṅkhārūpadhayo adhigatā, kuto tattha dukkhanissaraṇaṃ? Yatra hi kilesā, tatrābhisaṅkhārasambhavato bhavapabandhassa avicchedoyevāti vaṭṭadukkhassa anivatti. Tena vuttaṃ – ‘‘upadhiñhi paṭicca dukkhamidaṃ sambhotī’’ti.
இதா³னி யங் பரமத்த²தோ து³க்க²ஸ்ஸ நிஸ்ஸரணங், தங் த³ஸ்ஸேதுங், ‘‘ஸப்³பு³பாதா³னக்க²யா நத்தி² து³க்க²ஸ்ஸ ஸம்ப⁴வோ’’தி வுத்தங். தத்த² ஸப்³பு³பாதா³னக்க²யாதி காமுபாதா³னங் தி³ட்டு²பாதா³னங் ஸீலப்³ப³துபாதா³னங் அத்தவாது³பாதா³னந்தி ஸப்³பே³ஸங் இமேஸங் சதுன்னம்பி உபாதா³னானங் அரியமக்³கா³தி⁴க³மேன அனவஸேஸப்பஹானதோ. தத்த² தி³ட்டு²பாதா³னங் ஸீலப்³ப³துபாதா³னங் அத்தவாது³பாதா³னந்தி இமானி தீணி உபாதா³னானி ஸோதாபத்திமக்³கே³ன கீ²யந்தி, அனுப்பத்தித⁴ம்மதங் ஆபஜ்ஜந்தி. காமுபாதா³னங் அபாயக³மனீயங் பட²மேன, காமராக³பூ⁴தங் ப³ஹலங் து³தியேன, ஸுகு²மங் ததியேன, ரூபராகா³ரூபராக³ப்பஹானங் சதுத்தே²னாதி சதூஹிபி மக்³கே³ஹி கீ²யதி, அனுப்பத்தித⁴ம்மதங் ஆபஜ்ஜதீதி வேதி³தப்³ப³ங். நத்தி² து³க்க²ஸ்ஸ ஸம்ப⁴வோதி ஏவங் ஸப்³ப³ஸோ உபாதா³னக்க²யா ததே³கட்ட²தாய ஸப்³ப³ஸ்ஸபி கிலேஸக³ணஸ்ஸ அனுப்பாத³னதோ அப்பமத்தகஸ்ஸபி வட்டது³க்க²ஸ்ஸ ஸம்ப⁴வோ பாதுபா⁴வோ நத்தி².
Idāni yaṃ paramatthato dukkhassa nissaraṇaṃ, taṃ dassetuṃ, ‘‘sabbupādānakkhayā natthi dukkhassa sambhavo’’ti vuttaṃ. Tattha sabbupādānakkhayāti kāmupādānaṃ diṭṭhupādānaṃ sīlabbatupādānaṃ attavādupādānanti sabbesaṃ imesaṃ catunnampi upādānānaṃ ariyamaggādhigamena anavasesappahānato. Tattha diṭṭhupādānaṃ sīlabbatupādānaṃ attavādupādānanti imāni tīṇi upādānāni sotāpattimaggena khīyanti, anuppattidhammataṃ āpajjanti. Kāmupādānaṃ apāyagamanīyaṃ paṭhamena, kāmarāgabhūtaṃ bahalaṃ dutiyena, sukhumaṃ tatiyena, rūparāgārūparāgappahānaṃ catutthenāti catūhipi maggehi khīyati, anuppattidhammataṃ āpajjatīti veditabbaṃ. Natthi dukkhassa sambhavoti evaṃ sabbaso upādānakkhayā tadekaṭṭhatāya sabbassapi kilesagaṇassa anuppādanato appamattakassapi vaṭṭadukkhassa sambhavo pātubhāvo natthi.
ஏவங் ப⁴க³வா ஹேதுனா ஸத்³தி⁴ங் பவத்திங் நிவத்திஞ்ச த³ஸ்ஸெத்வா ‘‘இமங் நயங் அஜானந்தோ அயங் ஸத்தலோகோ வட்டதோபி ஸீஸங் ந உக்கி²பதீ’’தி த³ஸ்ஸெந்தோ ‘‘லோகமிமங் பஸ்ஸா’’திஆதி³மாஹ. தத்த² லோகமிமங் பஸ்ஸாதி அத்தனோ பு³த்³த⁴சக்கு²னா பச்சக்க²தோ விஸயபா⁴வஸ்ஸ உபக³தத்தா ‘‘லோகமிமங் பஸ்ஸா’’தி ப⁴க³வாத³ஸ்ஸனகிரியாய நியோஜெந்தோ அத்தானமேவாலபதி. புதூ²தி ப³ஹூ, விஸுங் விஸுங் வா. அவிஜ்ஜாய பரேதாதி ‘‘து³க்கே² அஞ்ஞாண’’ந்திஆதி³னா (த⁴॰ ஸ॰ 1106; விப⁴॰ 226) நயேன வுத்தாய சதுஸச்சபடிச்சா²தி³காய அவிஜ்ஜாய அபி⁴பூ⁴தா. பூ⁴தாதி கம்மகிலேஸேஹி ஜாதா நிப்³ப³த்தா. பூ⁴தரதாதி பூ⁴தேஸு மாதாபிதுபுத்ததா³ராதி³ஸஞ்ஞாய அஞ்ஞஸத்தேஸு தண்ஹாய ரதா, பூ⁴தே வா க²ந்த⁴பஞ்சகே அனிச்சாஸுப⁴து³க்கா²னத்தஸபா⁴வே தங்ஸபா⁴வானவபோ³த⁴தோ இத்தி²புரிஸாதி³பரிகப்பவஸேன நிச்சாதி³வஸேன அத்தத்தனியகா³ஹவஸேன ச அபி⁴ரதா. ப⁴வா அபரிமுத்தாதி யதா²வுத்தேன தண்ஹாதி³ட்டி²கா³ஹேன ப⁴வதோ ஸங்ஸாரதோ ந பரிமுத்தா.
Evaṃ bhagavā hetunā saddhiṃ pavattiṃ nivattiñca dassetvā ‘‘imaṃ nayaṃ ajānanto ayaṃ sattaloko vaṭṭatopi sīsaṃ na ukkhipatī’’ti dassento ‘‘lokamimaṃ passā’’tiādimāha. Tattha lokamimaṃ passāti attano buddhacakkhunā paccakkhato visayabhāvassa upagatattā ‘‘lokamimaṃ passā’’ti bhagavādassanakiriyāya niyojento attānamevālapati. Puthūti bahū, visuṃ visuṃ vā. Avijjāya paretāti ‘‘dukkhe aññāṇa’’ntiādinā (dha. sa. 1106; vibha. 226) nayena vuttāya catusaccapaṭicchādikāya avijjāya abhibhūtā. Bhūtāti kammakilesehi jātā nibbattā. Bhūtaratāti bhūtesu mātāpituputtadārādisaññāya aññasattesu taṇhāya ratā, bhūte vā khandhapañcake aniccāsubhadukkhānattasabhāve taṃsabhāvānavabodhato itthipurisādiparikappavasena niccādivasena attattaniyagāhavasena ca abhiratā. Bhavā aparimuttāti yathāvuttena taṇhādiṭṭhigāhena bhavato saṃsārato na parimuttā.
எத்த² ச ‘‘லோகமிம’’ந்தி பட²மங் தாவ ஸகலம்பி ஸத்தனிகாயங் ஸாமஞ்ஞதோ ஏகத்தங் உபனெந்தோ ஏகவசனேன அனோதி⁴ஸோ க³ஹணங் தீ³பெத்வா ‘‘ஸ்வாயங் லோகோ ப⁴வயோனிக³திடி²திஸத்தாவாஸாதி³வஸேன சேவ தத்தா²பி தங்தங்ஸத்தனிகாயாதி³வஸேன ச அனேகபே⁴த³பி⁴ன்னோ பச்சேகங் மயா வோலோகிதோ’’தி அத்தனோ பு³த்³த⁴சக்கு²ஞாணானுபா⁴வங் பகாஸெந்தோ ஸத்தா² புன வசனபே⁴த³ங் கத்வா ப³ஹுவசனேன ஓதி⁴ஸோ க³ஹணங் தீ³பேதி ‘‘புதூ² அவிஜ்ஜாய பரேதா பூ⁴தா’’திஆதி³னா. ஏவஞ்ச கத்வா ‘‘லோகமிம’’ந்தி உபயோக³வசனங் கத்வா ‘‘அவிஜ்ஜாய பரேதா’’திஆதி³னா பச்சத்தப³ஹுவசனநித்³தே³ஸோபி அவிருத்³தோ⁴ ஹோதி பி⁴ன்னவாக்யத்தா. கேசி பன ஏகவாக்யதாதி⁴ப்பாயேன ‘‘அவிஜ்ஜாய பரேதங் பூ⁴தங் பூ⁴தரதங் ப⁴வா அபரிமுத்த’’ந்தி பட²ந்தி, விப⁴த்திபே⁴த³வஸேனேவ பன புராணபாடோ².
Ettha ca ‘‘lokamima’’nti paṭhamaṃ tāva sakalampi sattanikāyaṃ sāmaññato ekattaṃ upanento ekavacanena anodhiso gahaṇaṃ dīpetvā ‘‘svāyaṃ loko bhavayonigatiṭhitisattāvāsādivasena ceva tatthāpi taṃtaṃsattanikāyādivasena ca anekabhedabhinno paccekaṃ mayā volokito’’ti attano buddhacakkhuñāṇānubhāvaṃ pakāsento satthā puna vacanabhedaṃ katvā bahuvacanena odhiso gahaṇaṃ dīpeti ‘‘puthū avijjāya paretā bhūtā’’tiādinā. Evañca katvā ‘‘lokamima’’nti upayogavacanaṃ katvā ‘‘avijjāya paretā’’tiādinā paccattabahuvacananiddesopi aviruddho hoti bhinnavākyattā. Keci pana ekavākyatādhippāyena ‘‘avijjāya paretaṃ bhūtaṃ bhūtarataṃ bhavā aparimutta’’nti paṭhanti, vibhattibhedavaseneva pana purāṇapāṭho.
இதா³னி யேன உபாயேன ப⁴வவிப்பமொக்கோ² ஹோதி, தங் ஸப்³ப³ங் தித்தி²யானங் அவிஸயபூ⁴தங் பு³த்³த⁴கோ³சரங் விபஸ்ஸனாவீதி²ங் த³ஸ்ஸெந்தோ ‘‘யே ஹி கேசீ’’திஆதி³மாஹ. தத்த² யே ஹி கேசி ப⁴வாதி காமப⁴வாதி³ ஸஞ்ஞீப⁴வாதி³ ஏகவோகாரப⁴வாதி³விபா⁴கே³ன நானாபே⁴த³பி⁴ன்னா ஸாதவந்தோ வா அஸாதவந்தோ வா தீ³கா⁴யுகா வா இத்தரக்க²ணா வா யே ஹி கேசி ப⁴வா. ஸப்³ப³தீ⁴தி உத்³த⁴ங் அதோ⁴ திரியந்தி ஆதி³விபா⁴கே³ன ஸப்³ப³த்த². ஸப்³ப³த்த²தாயாதி ஸக்³கா³பாயமனுஸ்ஸாதி³விபா⁴கே³ன. ஸப்³பே³ தேதிஆதீ³ஸு ஸப்³பே³பி தே ப⁴வா ரூபவேத³னாதி³த⁴ம்மா ஹுத்வா அபா⁴வட்டே²ன அனிச்சா, உத³யப்³ப³யபடிபீளிதத்தா து³க்கா², ஜராய மரணேன சாதி த்³விதா⁴ விபரிணாமேதப்³ப³தாய விபரிணாமத⁴ம்மா. இதிஸத்³தோ³ ஆதி³அத்தோ² பகாரத்தோ² வா, தேன அனத்தலக்க²ணம்பி ஸங்க³ஹெத்வா அவஸவத்தனட்டே²ன அனத்தா, விபரிணாமத⁴ம்மதாய வா அவஸவத்தனட்டே²ன அனத்தாதி வுத்தா.
Idāni yena upāyena bhavavippamokkho hoti, taṃ sabbaṃ titthiyānaṃ avisayabhūtaṃ buddhagocaraṃ vipassanāvīthiṃ dassento ‘‘ye hi kecī’’tiādimāha. Tattha ye hi keci bhavāti kāmabhavādi saññībhavādi ekavokārabhavādivibhāgena nānābhedabhinnā sātavanto vā asātavanto vā dīghāyukā vā ittarakkhaṇā vā ye hi keci bhavā. Sabbadhīti uddhaṃ adho tiriyanti ādivibhāgena sabbattha. Sabbatthatāyāti saggāpāyamanussādivibhāgena. Sabbe tetiādīsu sabbepi te bhavā rūpavedanādidhammā hutvā abhāvaṭṭhena aniccā, udayabbayapaṭipīḷitattā dukkhā, jarāya maraṇena cāti dvidhā vipariṇāmetabbatāya vipariṇāmadhammā. Itisaddo ādiattho pakārattho vā, tena anattalakkhaṇampi saṅgahetvā avasavattanaṭṭhena anattā, vipariṇāmadhammatāya vā avasavattanaṭṭhena anattāti vuttā.
ஏவங் லக்க²ணத்தயபடிவிஜ்ஜ²னாகாரேன ஏதங் ப⁴வஸங்கா²தங் க²ந்த⁴பஞ்சகங் யதா²பூ⁴தங் அவிபரீதங் ஸம்மப்பஞ்ஞாய ஸம்மா ஞாயேன விபஸ்ஸனாஸஹிதாய மக்³க³பஞ்ஞாய பஸ்ஸதோ பரிஞ்ஞாபி⁴ஸமயாதி³வஸேன படிவிஜ்ஜ²தோ ‘‘ப⁴வோ நிச்சோ’’தி ஆதி³னயப்பவத்தா ப⁴வேஸு தண்ஹா பஹீயதி, அக்³க³மக்³க³ப்பத்திஸமகாலமேவ அனவஸேஸங் நிருஜ்ஜ²தி, உச்சே²த³தி³ட்டி²யா ஸப்³ப³ஸோ பஹீனத்தா விப⁴வங் விச்சே²த³ங் நாபி⁴னந்த³தி ந பத்தே²தி. ஏவங்பூ⁴தஸ்ஸ தஸ்ஸ யா காமதண்ஹாதி³வஸேன அட்ட²ஸதபே⁴தா³ அவத்தா²தி³விபா⁴கே³ன அனந்தபே⁴தா³ ச, தாஸங் ஸப்³ப³ஸோ ஸப்³ப³ப்பகாரேன தண்ஹானங் க²யா பஹானா, ததே³கட்ட²தாய ஸப்³ப³ஸ்ஸபி ஸங்கிலேஸபக்க²ஸ்ஸ அஸேஸங் நிஸ்ஸேஸங் விராகே³ன அரியமக்³கே³ன யோ அனுப்பாத³னிரோதோ⁴, தங் நிப்³பா³னந்தி.
Evaṃ lakkhaṇattayapaṭivijjhanākārena etaṃ bhavasaṅkhātaṃ khandhapañcakaṃ yathābhūtaṃ aviparītaṃ sammappaññāya sammā ñāyena vipassanāsahitāya maggapaññāya passato pariññābhisamayādivasena paṭivijjhato ‘‘bhavo nicco’’ti ādinayappavattā bhavesu taṇhā pahīyati, aggamaggappattisamakālameva anavasesaṃ nirujjhati, ucchedadiṭṭhiyā sabbaso pahīnattā vibhavaṃ vicchedaṃ nābhinandati na pattheti. Evaṃbhūtassa tassa yā kāmataṇhādivasena aṭṭhasatabhedā avatthādivibhāgena anantabhedā ca, tāsaṃ sabbaso sabbappakārena taṇhānaṃ khayā pahānā, tadekaṭṭhatāya sabbassapi saṃkilesapakkhassa asesaṃ nissesaṃ virāgena ariyamaggena yo anuppādanirodho, taṃ nibbānanti.
ஏவங் தண்ஹாய பஹானமுகே²ன ஸஉபாதி³ஸேஸனிப்³பா³னங் த³ஸ்ஸெத்வா இதா³னி அனுபாதி³ஸேஸனிப்³பா³னங் த³ஸ்ஸெந்தோ ‘‘தஸ்ஸ நிப்³பு³தஸ்ஸா’’திஆதி³மாஹ. தஸ்ஸத்தோ² – யோ ஸோ ஸப்³ப³ஸோ தண்ஹானங் க²யா கிலேஸபரினிப்³பா³னேன நிப்³பு³தோ வுத்தனயேன பி⁴ன்னகிலேஸோ கீ²ணாஸவபி⁴க்கு², தஸ்ஸ நிப்³பு³தஸ்ஸ பி⁴க்கு²னோ அனுபாதா³ உபாதா³னாபா⁴வதோ கிலேஸாபி⁴ஸங்கா²ரமாரானங் வா அக்³க³ஹணதோ புனப்³ப⁴வோ ந ஹோதி, ஆயதிங் படிஸந்தி⁴வஸேன உபபத்திப⁴வோ நத்தி². ஏவங்பூ⁴தேன ச தேன அபி⁴பூ⁴தோ மாரோ, அரியமக்³க³க்க²ணே கிலேஸமாரோ அபி⁴ஸங்கா²ரமாரோ தே³வபுத்தமாரோ ச சரிமகசித்தக்க²ணே க²ந்த⁴மாரோ மச்சுமாரோ சாதி பஞ்சவிதோ⁴ மாரோ அபி⁴பூ⁴தோ பராஜிதோ, புன ஸீஸங் உக்கி²பிதுங் அப்பதா³னேன நிப்³பி³ஸேவனோ கதோ, யதோ தேன விஜிதோ ஸங்கா³மோ மாரேஹி தத்த² தத்த² பவத்திதோ. ஏவங் விஜிதஸங்கா³மோ பன இட்டா²தீ³ஸு ஸப்³பே³ஸு விகாராபா⁴வேன தாதி³லக்க²ணப்பத்தியா தாதீ³ அரஹா ஸப்³ப³ப⁴வானி யதா²வுத்தபே⁴தே³ ஸப்³பே³பி ப⁴வே உபச்சகா³ ஸமதிக்கந்தோ, ந யத்த² கத்த²சி ஸங்க²ங் உபேதி, அஞ்ஞத³த்து² அனுபாதா³னோ விய ஜாதவேதோ³ பரினிப்³பா³னதோ உத்³த⁴ங் அபஞ்ஞத்திகோவ ஹோதீதி. இதி ப⁴க³வா இமங் மஹாஉதா³னங் அனுபாதி³ஸேஸாய நிப்³பா³னதா⁴துயா கூடங் க³ஹெத்வா நிட்ட²பேஸி.
Evaṃ taṇhāya pahānamukhena saupādisesanibbānaṃ dassetvā idāni anupādisesanibbānaṃ dassento ‘‘tassa nibbutassā’’tiādimāha. Tassattho – yo so sabbaso taṇhānaṃ khayā kilesaparinibbānena nibbuto vuttanayena bhinnakileso khīṇāsavabhikkhu, tassa nibbutassa bhikkhuno anupādā upādānābhāvato kilesābhisaṅkhāramārānaṃ vā aggahaṇato punabbhavo na hoti, āyatiṃ paṭisandhivasena upapattibhavo natthi. Evaṃbhūtena ca tena abhibhūto māro, ariyamaggakkhaṇe kilesamāro abhisaṅkhāramāro devaputtamāro ca carimakacittakkhaṇe khandhamāro maccumāro cāti pañcavidho māro abhibhūto parājito, puna sīsaṃ ukkhipituṃ appadānena nibbisevano kato, yato tena vijito saṅgāmo mārehi tattha tattha pavattito. Evaṃ vijitasaṅgāmo pana iṭṭhādīsu sabbesu vikārābhāvena tādilakkhaṇappattiyā tādī arahā sabbabhavāni yathāvuttabhede sabbepi bhave upaccagā samatikkanto, na yattha katthaci saṅkhaṃ upeti, aññadatthu anupādāno viya jātavedo parinibbānato uddhaṃ apaññattikova hotīti. Iti bhagavā imaṃ mahāudānaṃ anupādisesāya nibbānadhātuyā kūṭaṃ gahetvā niṭṭhapesi.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
நிட்டி²தா ச நந்த³வக்³க³வண்ணனா.
Niṭṭhitā ca nandavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 10. லோகஸுத்தங் • 10. Lokasuttaṃ
