| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૨૦. વીસતિમવગ્ગો
20. Vīsatimavaggo
(૧૯૮) ૫. મગ્ગકથા
(198) 5. Maggakathā
૮૭૨. પઞ્ચઙ્ગિકો મગ્ગોતિ? આમન્તા. નનુ અટ્ઠઙ્ગિકો મગ્ગો વુત્તો ભગવતા, સેય્યથિદં – સમ્માદિટ્ઠિ…પે॰… સમ્માસમાધીતિ? આમન્તા. હઞ્ચિ અટ્ઠઙ્ગિકો મગ્ગો વુત્તો ભગવતા , સેય્યથિદં – સમ્માદિટ્ઠિ …પે॰… સમ્માસમાધિ, નો ચ વત રે વત્તબ્બે – ‘‘પઞ્ચઙ્ગિકો મગ્ગો’’તિ.
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
પઞ્ચઙ્ગિકો મગ્ગોતિ? આમન્તા. નનુ વુત્તં ભગવતા –
Pañcaṅgiko maggoti? Āmantā. Nanu vuttaṃ bhagavatā –
‘‘મગ્ગાનં અટ્ઠઙ્ગિકો સેટ્ઠો, સચ્ચાનં ચતુરો પદા;
‘‘Maggānaṃ aṭṭhaṅgiko seṭṭho, saccānaṃ caturo padā;
વિરાગો સેટ્ઠો ધમ્માનં, દ્વિપદાનઞ્ચ ચક્ખુમા’’તિ 1.
Virāgo seṭṭho dhammānaṃ, dvipadānañca cakkhumā’’ti 2.
અત્થેવ સુત્તન્તોતિ? આમન્તા. તેન હિ અટ્ઠઙ્ગિકો મગ્ગોતિ.
Attheva suttantoti? Āmantā. Tena hi aṭṭhaṅgiko maggoti.
૮૭૩. સમ્માવાચા મગ્ગઙ્ગં, સા ચ ન મગ્ગોતિ? આમન્તા. સમ્માદિટ્ઠિ મગ્ગઙ્ગં, સા ચ ન મગ્ગોતિ? ન હેવં વત્તબ્બે…પે॰… સમ્માવાચા મગ્ગઙ્ગં, સા ચ ન મગ્ગોતિ? આમન્તા. સમ્માસઙ્કપ્પો…પે॰… સમ્માવાયામો…પે॰… સમ્માસતિ…પે॰… સમ્માસમાધિ મગ્ગઙ્ગં, સો ચ ન મગ્ગોતિ? ન હેવં વત્તબ્બે…પે॰….
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
સમ્માકમ્મન્તો…પે॰… સમ્માઆજીવો મગ્ગઙ્ગં, સો ચ ન મગ્ગોતિ? આમન્તા. સમ્માદિટ્ઠિ…પે॰… સમ્માસમાધિ મગ્ગઙ્ગં, સો ચ ન મગ્ગોતિ? ન હેવં વત્તબ્બે…પે॰….
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
સમ્માદિટ્ઠિ મગ્ગઙ્ગં, સા ચ મગ્ગોતિ? આમન્તા. સમ્માવાચા મગ્ગઙ્ગં, સા ચ મગ્ગોતિ? ન હેવં વત્તબ્બે…પે॰… સમ્માદિટ્ઠિ મગ્ગઙ્ગં, સા ચ મગ્ગોતિ? આમન્તા. સમ્માકમ્મન્તો…પે॰… સમ્માઆજીવો મગ્ગઙ્ગં, સો ચ મગ્ગોતિ? ન હેવં વત્તબ્બે…પે॰….
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
સમ્માસઙ્કપ્પો…પે॰… સમ્માવાયામો…પે॰… સમ્માસતિ…પે॰… સમ્માસમાધિ મગ્ગઙ્ગં, સો ચ મગ્ગોતિ? આમન્તા. સમ્માવાચા…પે॰… સમ્માકમ્મન્તો…પે॰… સમ્માઆજીવો મગ્ગઙ્ગં, સો ચ મગ્ગોતિ? ન હેવં વત્તબ્બે…પે॰….
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
૮૭૪. અરિયો અટ્ઠઙ્ગિકો મગ્ગોતિ? આમન્તા. નનુ વુત્તં ભગવતા – ‘‘પુબ્બેવ ખો પનસ્સ કાયકમ્મં વચીકમ્મં આજીવો સુપરિસુદ્ધો હોતિ; એવમસ્સાયં અરિયો અટ્ઠઙ્ગિકો મગ્ગો ભાવનાપારિપૂરિં ગચ્છતી’’તિ 3! અત્થેવ સુત્તન્તોતિ? આમન્તા. તેન હિ પઞ્ચઙ્ગિકો મગ્ગોતિ.
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
૮૭૫. પઞ્ચઙ્ગિકો મગ્ગોતિ? આમન્તા. નનુ વુત્તં ભગવતા – ‘‘યસ્મિં ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ન ઉપલબ્ભતિ, સમણોપિ તત્થ ન ઉપલબ્ભતિ, દુતિયોપિ તત્થ સમણો ન ઉપલબ્ભતિ, તતિયોપિ તત્થ સમણો ન ઉપલબ્ભતિ, ચતુત્થોપિ તત્થ સમણો ન ઉપલબ્ભતિ. યસ્મિઞ્ચ ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ઉપલબ્ભતિ, સમણોપિ તત્થ ઉપલબ્ભતિ, દુતિયોપિ…પે॰… તતિયોપિ…પે॰… ચતુત્થોપિ તત્થ સમણો ઉપલબ્ભતિ. ઇમસ્મિં ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ઉપલબ્ભતિ. ઇધેવ, સુભદ્દ , સમણો, ઇધ દુતિયો સમણો, ઇધ તતિયો સમણો, ઇધ ચતુત્થો સમણો. સુઞ્ઞા પરપ્પવાદા સમણેભિ અઞ્ઞેહી’’તિ 5! અત્થેવ સુત્તન્તોતિ? આમન્તા. તેન હિ અટ્ઠઙ્ગિકો મગ્ગોતિ.
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
મગ્ગકથા નિટ્ઠિતા.
Maggakathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૫. મગ્ગકથાવણ્ણના • 5. Maggakathāvaṇṇanā
