| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
3. திகனிபாதோ
3. Tikanipāto
1. பட²மவக்³கோ³
1. Paṭhamavaggo
1. மூலஸுத்தவண்ணனா
1. Mūlasuttavaṇṇanā
50. திகனிபாதஸ்ஸ பட²மே தீணீதி க³ணனபரிச்சே²தோ³. இமானீதி அபி⁴முகீ²கரணங். அகுஸலமூலானீதி பரிச்சி²ன்னத⁴ம்மனித³ஸ்ஸனங். தத்த² அகுஸலானி ச தானி மூலானி சாதி அகுஸலமூலானி. அத² வா அகுஸலானங் ஹேதுபச்சயபப⁴வஜனகஸமுட்டா²பகனிப்³ப³த்தகட்டே²ன மூலானி சாதி அகுஸலமூலானி, அகுஸலத⁴ம்மானங் காரணானீதி அத்தோ². காரணஞ்ஹி யதா² ஹினோதி ஏதஸ்மா ப²லங் பவத்ததீதி ஹேது, படிச்ச ஏதஸ்மா ஏதீதி பச்சயோ, பப⁴வதி ஏதஸ்மாதி பப⁴வோ, அத்தனோ ப²லங் ஜனேதீதி ஜனகங், ஸமுட்டா²பேதீதி ஸமுட்டா²பகங், நிப்³ப³த்தேதீதி நிப்³ப³த்தகந்தி ச வுச்சதி. ஏவங் பதிட்ட²ட்டே²ன மூலந்தி, தஸ்மா அகுஸலமூலானீதி அகுஸலானங் ஸுப்பதிட்டி²தபா⁴வஸாத⁴னானி, காரணானீதி வுத்தங் ஹோதி.
50. Tikanipātassa paṭhame tīṇīti gaṇanaparicchedo. Imānīti abhimukhīkaraṇaṃ. Akusalamūlānīti paricchinnadhammanidassanaṃ. Tattha akusalāni ca tāni mūlāni cāti akusalamūlāni. Atha vā akusalānaṃ hetupaccayapabhavajanakasamuṭṭhāpakanibbattakaṭṭhena mūlāni cāti akusalamūlāni, akusaladhammānaṃ kāraṇānīti attho. Kāraṇañhi yathā hinoti etasmā phalaṃ pavattatīti hetu, paṭicca etasmā etīti paccayo, pabhavati etasmāti pabhavo, attano phalaṃ janetīti janakaṃ, samuṭṭhāpetīti samuṭṭhāpakaṃ, nibbattetīti nibbattakanti ca vuccati. Evaṃ patiṭṭhaṭṭhena mūlanti, tasmā akusalamūlānīti akusalānaṃ suppatiṭṭhitabhāvasādhanāni, kāraṇānīti vuttaṃ hoti.
கேசி பன ‘‘ஸாலிஆதீ³னங் ஸாலிபீ³ஜாதீ³னி விய மணிப்பபா⁴தீ³னங் மணிவண்ணாத³யோ விய ச அகுஸலானங் அகுஸலபா⁴வஸாத⁴கோ லோபா⁴தீ³னங் மூலட்டோ²’’தி வத³ந்தி. ஏவங் ஸந்தே அகுஸலசித்தஸமுட்டா²னரூபேஸு தேஸங் ஹேதுபச்சயபா⁴வோ ந ஸியா. ந ஹி தானி தேஸங் அகுஸலபா⁴வங் ஸாதெ⁴ந்தி, ந ச பச்சயா ந ஹொந்தி. வுத்தஞ்ஹேதங் –
Keci pana ‘‘sāliādīnaṃ sālibījādīni viya maṇippabhādīnaṃ maṇivaṇṇādayo viya ca akusalānaṃ akusalabhāvasādhako lobhādīnaṃ mūlaṭṭho’’ti vadanti. Evaṃ sante akusalacittasamuṭṭhānarūpesu tesaṃ hetupaccayabhāvo na siyā. Na hi tāni tesaṃ akusalabhāvaṃ sādhenti, na ca paccayā na honti. Vuttañhetaṃ –
‘‘ஹேதூ ஹேதுஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் ஹேதுபச்சயேன பச்சயோ’’தி (பட்டா²॰ 1.பச்சயனித்³தே³ஸ.1).
‘‘Hetū hetusampayuttakānaṃ dhammānaṃ taṃsamuṭṭhānānañca rūpānaṃ hetupaccayena paccayo’’ti (paṭṭhā. 1.paccayaniddesa.1).
அஹேதுகஸ்ஸ ச மோஹஸ்ஸ அகுஸலபா⁴வோ ந ஸியா அகுஸலபா⁴வஸாத⁴கஸ்ஸ மூலந்தரஸ்ஸ அபா⁴வதோ. அதா²பி ஸியா லோபா⁴தீ³னங் ஸபா⁴வஸித்³தோ⁴ அகுஸலாதி³பா⁴வோ, தங்ஸம்பயுத்தானங் பன லோபா⁴தி³படிப³த்³தோ⁴தி. ஏவம்பி யதா² லோபா⁴தீ³னங், ஏவங் அலோபா⁴தீ³னம்பி ஸபா⁴வஸித்³தோ⁴ குஸலாதி³பா⁴வோதி அலோபா⁴த³யோ குஸலா ஏவ ஸியுங், ந அப்³யாகதா, ந ச ஹொந்தி. தஸ்மா யதா² ஸம்பயுத்தேஸு, ஏவங் மூலேஸுபி குஸலாதி³பா⁴வோ பரியேஸிதப்³போ³. யோனிஸோமனஸிகாராதி³கோ விய ஹி குஸலபா⁴வஸ்ஸ, அயோனிஸோமனஸிகாராதி³கோ அகுஸலபா⁴வஸ்ஸ காரணந்தி க³ஹேதப்³ப³ங். ஏவங் அகுஸலபா⁴வஸாத⁴னவஸேன லோபா⁴தீ³னங் மூலட்ட²ங் அக்³க³ஹெத்வா ஸுப்பதிட்டி²தபா⁴வஸாத⁴னவஸேன க³ய்ஹமானே ந கோசி தோ³ஸோ. லத்³த⁴ஹேதுபச்சயா ஹி த⁴ம்மா விரூள்ஹமூலா விய பாத³பா தி²ரா ஹொந்தி ஸுப்பதிட்டி²தா, ஹேதுரஹிதா பன திலபீ³ஜகாதி³ஸேவாலா விய ந ஸுப்பதிட்டி²தாதி ஹேதுஆதி³அத்தே²ன அகுஸலானங் உபகாரகத்தா மூலானீதி அகுஸலமூலானி. யஸ்மா பன மூலேன முத்தோ அகுஸலசித்துப்பாதோ³ நத்தி², தஸ்மா தீஹி மூலேஹி ஸப்³போ³ அகுஸலராஸி பரியாதி³யித்வா த³ஸ்ஸிதோதி த³ட்ட²ப்³ப³ங்.
Ahetukassa ca mohassa akusalabhāvo na siyā akusalabhāvasādhakassa mūlantarassa abhāvato. Athāpi siyā lobhādīnaṃ sabhāvasiddho akusalādibhāvo, taṃsampayuttānaṃ pana lobhādipaṭibaddhoti. Evampi yathā lobhādīnaṃ, evaṃ alobhādīnampi sabhāvasiddho kusalādibhāvoti alobhādayo kusalā eva siyuṃ, na abyākatā, na ca honti. Tasmā yathā sampayuttesu, evaṃ mūlesupi kusalādibhāvo pariyesitabbo. Yonisomanasikārādiko viya hi kusalabhāvassa, ayonisomanasikārādiko akusalabhāvassa kāraṇanti gahetabbaṃ. Evaṃ akusalabhāvasādhanavasena lobhādīnaṃ mūlaṭṭhaṃ aggahetvā suppatiṭṭhitabhāvasādhanavasena gayhamāne na koci doso. Laddhahetupaccayā hi dhammā virūḷhamūlā viya pādapā thirā honti suppatiṭṭhitā, heturahitā pana tilabījakādisevālā viya na suppatiṭṭhitāti hetuādiatthena akusalānaṃ upakārakattā mūlānīti akusalamūlāni. Yasmā pana mūlena mutto akusalacittuppādo natthi, tasmā tīhi mūlehi sabbo akusalarāsi pariyādiyitvā dassitoti daṭṭhabbaṃ.
தானி அகுஸலமூலானி ஸரூபதோ த³ஸ்ஸேதுங் ‘‘லோபோ⁴ அகுஸலமூல’’ந்திஆதி³ வுத்தங். தத்த² லோபா⁴தீ³ஸு யங் வத்தப்³ப³ங், தங் ஹெட்டா² வுத்தமேவ. தத்த² பன ததியமக்³க³வஜ்ஜா² லோபா⁴த³யோ ஆக³தா, இத⁴ பன அனவஸேஸாதி அயமேவ விஸேஸோ.
Tāni akusalamūlāni sarūpato dassetuṃ ‘‘lobho akusalamūla’’ntiādi vuttaṃ. Tattha lobhādīsu yaṃ vattabbaṃ, taṃ heṭṭhā vuttameva. Tattha pana tatiyamaggavajjhā lobhādayo āgatā, idha pana anavasesāti ayameva viseso.
கா³தா²யங் பாபசேதஸந்தி அகுஸலத⁴ம்மஸமாயோக³தோ லாமகசித்தங். ஹிங்ஸந்தீதி அத்தனோ பவத்திக்க²ணே ஆயதிங் விபாகக்க²ணே ச விபா³தெ⁴ந்தி. அத்தஸம்பூ⁴தாதி அத்தனி ஜாதா. தசஸாரந்தி க³ண்டி²தங், வேளுந்தி அத்தோ². ஸம்ப²லந்தி அத்தனோ ப²லங். இத³ங் வுத்தங் ஹோதி – க²தி³ரஸீஸபாத³யோ விய அந்தோஸாரோ அஹுத்வா ப³ஹிஸாரதாய தசஸாரந்தி லத்³த⁴னாமங் வேளுஆதி³ங் யதா² அத்தஸம்பூ⁴தமேவ ப²லங் ஹிங்ஸதி வினாஸேதி, ஏவமேவ அந்தோ ஸீலாதி³ஸாரரஹிதங் லாமகசித்தங் புக்³க³லங் அத்தஸம்பூ⁴தாயேவ லோபா⁴த³யோ வினாஸெந்தீதி.
Gāthāyaṃ pāpacetasanti akusaladhammasamāyogato lāmakacittaṃ. Hiṃsantīti attano pavattikkhaṇe āyatiṃ vipākakkhaṇe ca vibādhenti. Attasambhūtāti attani jātā. Tacasāranti gaṇṭhitaṃ, veḷunti attho. Samphalanti attano phalaṃ. Idaṃ vuttaṃ hoti – khadirasīsapādayo viya antosāro ahutvā bahisāratāya tacasāranti laddhanāmaṃ veḷuādiṃ yathā attasambhūtameva phalaṃ hiṃsati vināseti, evameva anto sīlādisārarahitaṃ lāmakacittaṃ puggalaṃ attasambhūtāyeva lobhādayo vināsentīti.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 1. மூலஸுத்தங் • 1. Mūlasuttaṃ
