| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૯. નવમવગ્ગો
9. Navamavaggo
(૮૮) ૫. ઞાણં અનારમ્મણન્તિકથા
(88) 5. Ñāṇaṃ anārammaṇantikathā
૫૫૭. ઞાણં અનારમ્મણન્તિ? આમન્તા. રૂપં નિબ્બાનં ચક્ખાયતનં…પે॰… ફોટ્ઠબ્બાયતનન્તિ? ન હેવં વત્તબ્બે…પે॰… ઞાણં અનારમ્મણન્તિ? આમન્તા. પઞ્ઞા પઞ્ઞિન્દ્રિયં પઞ્ઞાબલં સમ્માદિટ્ઠિ ધમ્મવિચયસમ્બોજ્ઝઙ્ગો અનારમ્મણોતિ? ન હેવં વત્તબ્બે…પે॰… પઞ્ઞા પઞ્ઞિન્દ્રિયં પઞ્ઞાબલં સમ્માદિટ્ઠિ ધમ્મવિચયસમ્બોજ્ઝઙ્ગો સારમ્મણોતિ? આમન્તા. ઞાણં સારમ્મણન્તિ? ન હેવં વત્તબ્બે…પે॰….
557. Ñāṇaṃ anārammaṇanti? Āmantā. Rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… ñāṇaṃ anārammaṇanti? Āmantā. Paññā paññindriyaṃ paññābalaṃ sammādiṭṭhi dhammavicayasambojjhaṅgo anārammaṇoti? Na hevaṃ vattabbe…pe… paññā paññindriyaṃ paññābalaṃ sammādiṭṭhi dhammavicayasambojjhaṅgo sārammaṇoti? Āmantā. Ñāṇaṃ sārammaṇanti? Na hevaṃ vattabbe…pe….
ઞાણં અનારમ્મણન્તિ? આમન્તા. કતમક્ખન્ધપરિયાપન્નન્તિ? સઙ્ખારક્ખન્ધપરિયાપન્નન્તિ. સઙ્ખારક્ખન્ધો અનારમ્મણોતિ? ન હેવં વત્તબ્બે…પે॰… સઙ્ખારક્ખન્ધો અનારમ્મણોતિ ? આમન્તા. વેદનાક્ખન્ધો સઞ્ઞાક્ખન્ધો વિઞ્ઞાણક્ખન્ધો અનારમ્મણોતિ? ન હેવં વત્તબ્બે…પે॰… ઞાણં સઙ્ખારક્ખન્ધપરિયાપન્નં અનારમ્મણન્તિ? આમન્તા. પઞ્ઞા સઙ્ખારક્ખન્ધપરિયાપન્ના અનારમ્મણાતિ? ન હેવં વત્તબ્બે…પે॰… પઞ્ઞા સઙ્ખારક્ખન્ધપરિયાપન્ના સારમ્મણાતિ? આમન્તા. ઞાણં સઙ્ખારક્ખન્ધપરિયાપન્નં સારમ્મણન્તિ? ન હેવં વત્તબ્બે…પે॰….
Ñāṇaṃ anārammaṇanti? Āmantā. Katamakkhandhapariyāpannanti? Saṅkhārakkhandhapariyāpannanti. Saṅkhārakkhandho anārammaṇoti? Na hevaṃ vattabbe…pe… saṅkhārakkhandho anārammaṇoti ? Āmantā. Vedanākkhandho saññākkhandho viññāṇakkhandho anārammaṇoti? Na hevaṃ vattabbe…pe… ñāṇaṃ saṅkhārakkhandhapariyāpannaṃ anārammaṇanti? Āmantā. Paññā saṅkhārakkhandhapariyāpannā anārammaṇāti? Na hevaṃ vattabbe…pe… paññā saṅkhārakkhandhapariyāpannā sārammaṇāti? Āmantā. Ñāṇaṃ saṅkhārakkhandhapariyāpannaṃ sārammaṇanti? Na hevaṃ vattabbe…pe….
ઞાણં સઙ્ખારક્ખન્ધપરિયાપન્નં અનારમ્મણં, પઞ્ઞા સઙ્ખારક્ખન્ધપરિયાપન્ના સારમ્મણાતિ? આમન્તા. સઙ્ખારક્ખન્ધો એકદેસો સારમ્મણો એકદેસો અનારમ્મણોતિ? ન હેવં વત્તબ્બે…પે॰… સઙ્ખારક્ખન્ધો એકદેસો સારમ્મણો એકદેસો અનારમ્મણોતિ? આમન્તા. વેદનાક્ખન્ધો સઞ્ઞાક્ખન્ધો વિઞ્ઞાણક્ખન્ધો એકદેસો સારમ્મણો એકદેસો અનારમ્મણોતિ? ન હેવં વત્તબ્બે…પે॰….
Ñāṇaṃ saṅkhārakkhandhapariyāpannaṃ anārammaṇaṃ, paññā saṅkhārakkhandhapariyāpannā sārammaṇāti? Āmantā. Saṅkhārakkhandho ekadeso sārammaṇo ekadeso anārammaṇoti? Na hevaṃ vattabbe…pe… saṅkhārakkhandho ekadeso sārammaṇo ekadeso anārammaṇoti? Āmantā. Vedanākkhandho saññākkhandho viññāṇakkhandho ekadeso sārammaṇo ekadeso anārammaṇoti? Na hevaṃ vattabbe…pe….
૫૫૮. ન વત્તબ્બં – ‘‘ઞાણં અનારમ્મણ’’ન્તિ? આમન્તા. અરહા ચક્ખુવિઞ્ઞાણસમઙ્ગી ઞાણીતિ વત્તબ્બોતિ? આમન્તા. અત્થિ તસ્સ ઞાણસ્સ આરમ્મણન્તિ? ન હેવં વત્તબ્બે…પે॰… તેન હિ ઞાણં અનારમ્મણન્તિ. અરહા ચક્ખુવિઞ્ઞાણસમઙ્ગી પઞ્ઞવાતિ વત્તબ્બોતિ? આમન્તા. અત્થિ તાય પઞ્ઞાય આરમ્મણન્તિ? ન હેવં વત્તબ્બે…પે॰…. તેન હિ પઞ્ઞા અનારમ્મણાતિ.
558. Na vattabbaṃ – ‘‘ñāṇaṃ anārammaṇa’’nti? Āmantā. Arahā cakkhuviññāṇasamaṅgī ñāṇīti vattabboti? Āmantā. Atthi tassa ñāṇassa ārammaṇanti? Na hevaṃ vattabbe…pe… tena hi ñāṇaṃ anārammaṇanti. Arahā cakkhuviññāṇasamaṅgī paññavāti vattabboti? Āmantā. Atthi tāya paññāya ārammaṇanti? Na hevaṃ vattabbe…pe…. Tena hi paññā anārammaṇāti.
ઞાણં અનારમ્મણન્તિકથા નિટ્ઠિતા.
Ñāṇaṃ anārammaṇantikathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૫. ઞાણં અનારમ્મણન્તિકથાવણ્ણના • 5. Ñāṇaṃ anārammaṇantikathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૫. ઞાણંઅનારમ્મણન્તિકથાવણ્ણના • 5. Ñāṇaṃanārammaṇantikathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૫. ઞાણંઅનારમ્મણન્તિકથાવણ્ણના • 5. Ñāṇaṃanārammaṇantikathāvaṇṇanā
