| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૮. નન્દસુત્તં
8. Nandasuttaṃ
૨૪૨. સાવત્થિયં વિહરતિ. અથ ખો આયસ્મા નન્દો ભગવતો માતુચ્છાપુત્તો આકોટિતપચ્ચાકોટિતાનિ ચીવરાનિ પારુપિત્વા અક્ખીનિ અઞ્જેત્વા અચ્છં પત્તં ગહેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં નન્દં ભગવા એતદવોચ – ‘‘ન ખો તે તં, નન્દ, પતિરૂપં કુલપુત્તસ્સ સદ્ધા અગારસ્મા અનગારિયં પબ્બજિતસ્સ, યં ત્વં આકોટિતપચ્ચાકોટિતાનિ ચીવરાનિ પારુપેય્યાસિ, અક્ખીનિ ચ અઞ્જેય્યાસિ, અચ્છઞ્ચ પત્તં ધારેય્યાસિ. એતં ખો તે, નન્દ, પતિરૂપં કુલપુત્તસ્સ સદ્ધા અગારસ્મા અનગારિયં પબ્બજિતસ્સ, યં ત્વં આરઞ્ઞિકો ચ અસ્સસિ, પિણ્ડપાતિકો ચ પંસુકુલિકો ચ કામેસુ ચ અનપેક્ખો વિહરેય્યાસી’’તિ. ઇદમવોચ ભગવા…પે॰… સત્થા –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘કદાહં નન્દં પસ્સેય્યં, આરઞ્ઞં પંસુકૂલિકં;
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
અઞ્ઞાતુઞ્છેન યાપેન્તં, કામેસુ અનપેક્ખિન’’ન્તિ.
Aññātuñchena yāpentaṃ, kāmesu anapekkhina’’nti.
અથ ખો આયસ્મા નન્દો અપરેન સમયેન આરઞ્ઞિકો ચ પિણ્ડપાતિકો ચ પંસુકૂલિકો ચ કામેસુ ચ અનપેક્ખો વિહાસીતિ. અટ્ઠમં.
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. નન્દસુત્તવણ્ણના • 8. Nandasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. નન્દસુત્તવણ્ણ્ણના • 8. Nandasuttavaṇṇṇanā
