| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૬. સોળસમવગ્ગો
16. Soḷasamavaggo
(૧૫૬) ૧. નિગ્ગહકથા
(156) 1. Niggahakathā
૭૪૩. પરો પરસ્સ ચિત્તં નિગ્ગણ્હાતીતિ? આમન્તા. પરો પરસ્સ ચિત્તં ‘‘મા રજ્જિ’’, ‘‘મા દુસ્સિ’’, ‘‘મા મુય્હિ’’, ‘‘મા કિલિસ્સી’’તિ નિગ્ગણ્હાતીતિ? ન હેવં વત્તબ્બે…પે॰… પરો પરસ્સ ચિત્તં નિગ્ગણ્હાતીતિ? આમન્તા. પરો પરસ્સ ઉપ્પન્નો ફસ્સો ‘‘મા નિરુજ્ઝી’’તિ નિગ્ગણ્હાતીતિ? ન હેવં વત્તબ્બે…પે॰… પરો પરસ્સ ઉપ્પન્ના વેદના…પે॰… ઉપ્પન્ના સઞ્ઞા… ઉપ્પન્ના ચેતના… ઉપ્પન્નં ચિત્તં… ઉપ્પન્ના સદ્ધા… ઉપ્પન્નં વીરિયં … ઉપ્પન્ના સતિ… ઉપ્પન્નો સમાધિ…પે॰… ઉપ્પન્ના પઞ્ઞા ‘‘મા નિરુજ્ઝી’’તિ નિગ્ગણ્હાતીતિ? ન હેવં વત્તબ્બે…પે॰….
743. Paro parassa cittaṃ niggaṇhātīti? Āmantā. Paro parassa cittaṃ ‘‘mā rajji’’, ‘‘mā dussi’’, ‘‘mā muyhi’’, ‘‘mā kilissī’’ti niggaṇhātīti? Na hevaṃ vattabbe…pe… paro parassa cittaṃ niggaṇhātīti? Āmantā. Paro parassa uppanno phasso ‘‘mā nirujjhī’’ti niggaṇhātīti? Na hevaṃ vattabbe…pe… paro parassa uppannā vedanā…pe… uppannā saññā… uppannā cetanā… uppannaṃ cittaṃ… uppannā saddhā… uppannaṃ vīriyaṃ … uppannā sati… uppanno samādhi…pe… uppannā paññā ‘‘mā nirujjhī’’ti niggaṇhātīti? Na hevaṃ vattabbe…pe….
પરો પરસ્સ ચિત્તં નિગ્ગણ્હાતીતિ? આમન્તા. પરો પરસ્સ અત્થાય રાગં પજહતિ… દોસં પજહતિ…પે॰… અનોત્તપ્પં પજહતીતિ? ન હેવં વત્તબ્બે…પે॰….
Paro parassa cittaṃ niggaṇhātīti? Āmantā. Paro parassa atthāya rāgaṃ pajahati… dosaṃ pajahati…pe… anottappaṃ pajahatīti? Na hevaṃ vattabbe…pe….
પરો પરસ્સ ચિત્તં નિગ્ગણ્હાતીતિ? આમન્તા. પરો પરસ્સ અત્થાય મગ્ગં ભાવેતિ… સતિપટ્ઠાનં ભાવેતિ…પે॰… બોજ્ઝઙ્ગં ભાવેતીતિ ? ન હેવં વત્તબ્બે…પે॰….
Paro parassa cittaṃ niggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti ? Na hevaṃ vattabbe…pe….
પરો પરસ્સ ચિત્તં નિગ્ગણ્હાતીતિ? આમન્તા. પરો પરસ્સ અત્થાય દુક્ખં પરિજાનાતિ, સમુદયં પજહતિ, નિરોધં સચ્છિકરોતિ, મગ્ગં ભાવેતીતિ? ન હેવં વત્તબ્બે…પે॰….
Paro parassa cittaṃ niggaṇhātīti? Āmantā. Paro parassa atthāya dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
પરો પરસ્સ ચિત્તં નિગ્ગણ્હાતીતિ? આમન્તા. અઞ્ઞો અઞ્ઞસ્સ કારકો, પરઙ્કતં સુખં દુક્ખં અઞ્ઞો કરોતિ અઞ્ઞો પટિસંવેદેતીતિ? ન હેવં વત્તબ્બે…પે॰….
Paro parassa cittaṃ niggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
પરો પરસ્સ ચિત્તં નિગ્ગણ્હાતીતિ? આમન્તા. નનુ વુત્તં ભગવતા –
Paro parassa cittaṃ niggaṇhātīti? Āmantā. Nanu vuttaṃ bhagavatā –
‘‘અત્તનાવ કતં પાપં, અત્તના સંકિલિસ્સતિ;
‘‘Attanāva kataṃ pāpaṃ, attanā saṃkilissati;
અત્તના અકતં પાપં, અત્તનાવ વિસુજ્ઝતિ;
Attanā akataṃ pāpaṃ, attanāva visujjhati;
સુદ્ધિ અસુદ્ધિ પચ્ચત્તં, નાઞ્ઞો અઞ્ઞં વિસોધયે’’તિ 1.
Suddhi asuddhi paccattaṃ, nāñño aññaṃ visodhaye’’ti 2.
અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘પરો પરસ્સ ચિત્તં નિગ્ગણ્હાતી’’તિ.
Attheva suttantoti? Āmantā. Tena hi na vattabbaṃ – ‘‘paro parassa cittaṃ niggaṇhātī’’ti.
૭૪૪. ન વત્તબ્બં – ‘‘પરો પરસ્સ ચિત્તં નિગ્ગણ્હાતી’’તિ? આમન્તા. નનુ અત્થિ બલપ્પત્તા, અત્થિ વસીભૂતાતિ? આમન્તા. હઞ્ચિ અત્થિ બલપ્પત્તા, અત્થિ વસીભૂતા, તેન વત રે વત્તબ્બે – ‘‘પરો પરસ્સ ચિત્તં નિગ્ગણ્હાતી’’તિ.
744. Na vattabbaṃ – ‘‘paro parassa cittaṃ niggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ niggaṇhātī’’ti.
નિગ્ગહકથા નિટ્ઠિતા.
Niggahakathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧. નિગ્ગહકથાવણ્ણના • 1. Niggahakathāvaṇṇanā
