Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā)

    ૮. વઙ્ગીસસંયુત્તં

    8. Vaṅgīsasaṃyuttaṃ

    ૧. નિક્ખન્તસુત્તવણ્ણના

    1. Nikkhantasuttavaṇṇanā

    ૨૦૯. આળવિયન્તિ આળવિનગરસમીપે. અગ્ગચેતિયેતિ ગોતમકચેતિયાદીહિ ઉત્તમચેતિયે. તં કિર ભૂમિરામણેય્યકભાવેન મનુઞ્ઞતાય પધાનયુત્તતાદિસમ્પત્તિયા ચ ઇતરચેતિયેહિ સેટ્ઠસમ્મતં. કપ્પત્થેરેનાતિ ‘‘કપ્પો’’તિ ગોત્તતો આગતનામો થેરો, સહસ્સપુરાણજટિલાનં અબ્ભન્તરે અયં મહાથેરો. ઓહીનકોતિ થેરેસુ ગામં પિણ્ડાય પવિટ્ઠેસુ વિહારે એવ અવહીનકો ઠિતો. તત્થ કારણમાહ ‘‘વિહારપાલો’’તિઆદિ. સમલઙ્કરિત્વાતિ સમં અલઙ્કારેન અલઙ્કરિત્વા. કુસલચિત્તં વિદ્ધંસેતિ પવત્તિતું અપ્પદાનવસેન. એતસ્મિન્તિ એતસ્મિં રાગે ઉપ્પન્ને. ‘‘એકસ્મિ’’ન્તિ વા પાઠો, એકસ્મિં વિસભાગવત્થુકે રાગે ઉપ્પન્ને. ધમ્મો વાતિ મમ ચિત્તે ઉપ્પજ્જનકતો અઞ્ઞો ધમ્મો વા. યેન કારણેન પરો અનભિરતિં વિનોદેત્વા ઇદાનેવ અભિરતિં ઉપ્પાદેય્ય, તં કારણં કુતો લબ્ભાતિ યોજના, તં કારણં નત્થીતિ અત્થો, તસ્સ અભાવકારણવચનં.

    209.Āḷaviyanti āḷavinagarasamīpe. Aggacetiyeti gotamakacetiyādīhi uttamacetiye. Taṃ kira bhūmirāmaṇeyyakabhāvena manuññatāya padhānayuttatādisampattiyā ca itaracetiyehi seṭṭhasammataṃ. Kappattherenāti ‘‘kappo’’ti gottato āgatanāmo thero, sahassapurāṇajaṭilānaṃ abbhantare ayaṃ mahāthero. Ohīnakoti theresu gāmaṃ piṇḍāya paviṭṭhesu vihāre eva avahīnako ṭhito. Tattha kāraṇamāha ‘‘vihārapālo’’tiādi. Samalaṅkaritvāti samaṃ alaṅkārena alaṅkaritvā. Kusalacittaṃ viddhaṃseti pavattituṃ appadānavasena. Etasminti etasmiṃ rāge uppanne. ‘‘Ekasmi’’nti vā pāṭho, ekasmiṃ visabhāgavatthuke rāge uppanne. Dhammo vāti mama citte uppajjanakato añño dhammo vā. Yena kāraṇena paro anabhiratiṃ vinodetvā idāneva abhiratiṃ uppādeyya, taṃ kāraṇaṃ kuto labbhāti yojanā, taṃ kāraṇaṃ natthīti attho, tassa abhāvakāraṇavacanaṃ.

    અનગારિયન્તિ અગારવિરહતો અનગારં પબ્બજ્જા. તત્થ નિયુત્તત્તા અનગારિયં ક-કારસ્સ ય-કારં કત્વા, પબ્બજિતન્તિ અત્થો. આધાવન્તીતિ હદયં અભિભવિત્વા ધાવન્તિ. ઉગ્ગતાનન્તિ ઉળારાનં પુત્તા. તેનાહ ‘‘મહેસક્ખા રાજઞ્ઞભૂતા’’તિ. ઉત્તમપ્પમાણન્તિ સહસ્સપલં સમન્તાતિ સમન્તતો. પરિકિરેય્યુન્તિ વિજ્ઝેય્યું. એતસ્મા સહસ્સાતિ યથાવુત્તા ધનુગ્ગહસહસ્સતો. અતિરેકતરા અનેકસહસ્સા. ઇત્થિયો ઓલોકનસિતલપિતરોદિતસરે ખિપન્તિયો. નેવ મં બ્યાધયિસ્સન્તિ નેવ મં નિજ્ઝાયિસ્સન્તિ. ‘‘બ્યાધયિસ્સતી’’તિ પાઠોતિ વુત્તં ‘‘ચાલેતું ન સક્ખિસ્સતીતિ અત્થો’’તિ. ધમ્મે સમ્હીતિ સકે સન્તિકે પતિટ્ઠિતે સાસનધમ્મે. તેનાહ ‘‘અનભિરતિં વિનોદેત્વા’’તિઆદિ.

    Anagāriyanti agāravirahato anagāraṃ pabbajjā. Tattha niyuttattā anagāriyaṃ ka-kārassa ya-kāraṃ katvā, pabbajitanti attho. Ādhāvantīti hadayaṃ abhibhavitvā dhāvanti. Uggatānanti uḷārānaṃ puttā. Tenāha ‘‘mahesakkhā rājaññabhūtā’’ti. Uttamappamāṇanti sahassapalaṃ samantāti samantato. Parikireyyunti vijjheyyuṃ. Etasmā sahassāti yathāvuttā dhanuggahasahassato. Atirekatarā anekasahassā. Itthiyo olokanasitalapitaroditasare khipantiyo. Neva maṃ byādhayissanti neva maṃ nijjhāyissanti. ‘‘Byādhayissatī’’ti pāṭhoti vuttaṃ ‘‘cāletuṃ na sakkhissatīti attho’’ti. Dhamme samhīti sake santike patiṭṭhite sāsanadhamme. Tenāha ‘‘anabhiratiṃvinodetvā’’tiādi.

    મગ્ગન્તિ ‘‘મગ્ગો’’તિ વત્તબ્બે લિઙ્ગવિપલ્લાસેન વુત્તં. તેનાહ ‘‘સો હિ નિબ્બાનસ્સ પુબ્બભાગમગ્ગ્ગો’’તિ.

    Magganti ‘‘maggo’’ti vattabbe liṅgavipallāsena vuttaṃ. Tenāha ‘‘so hi nibbānassa pubbabhāgamagggo’’ti.

    નિક્ખન્તસુત્તવણ્ણના નિટ્ઠિતા.

    Nikkhantasuttavaṇṇanā niṭṭhitā.







    Related texts:



    તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. નિક્ખન્તસુત્તં • 1. Nikkhantasuttaṃ

    અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. નિક્ખન્તસુત્તવણ્ણના • 1. Nikkhantasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact