| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૬. સોળસમવગ્ગો
16. Soḷasamavaggo
(૧૫૭) ૨. પગ્ગહકથા
(157) 2. Paggahakathā
૭૪૫. પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ ચિત્તં ‘‘મા રજ્જિ,’’‘‘મા દુસ્સિ,’’‘‘મા મુય્હિ,’’‘‘મા કિલિસ્સી’’તિ પગ્ગણ્હાતીતિ? ન હેવં વત્તબ્બે…પે॰… પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ અલોભં કુસલમૂલં જનેતિ… અદોસં કુસલમૂલં જનેતિ… અમોહં કુસલમૂલં જનેતિ… સદ્ધં જનેતિ… વીરિયં જનેતિ… સતિં જનેતિ… સમાધિં જનેતિ… પઞ્ઞં જનેતીતિ? ન હેવં વત્તબ્બે…પે॰… પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ ઉપ્પન્નો ફસ્સો ‘‘મા નિરુજ્ઝી’’તિ પગ્ગણ્હાતીતિ? ન હેવં વત્તબ્બે…પે॰… પરો પરસ્સ ઉપ્પન્ના વેદના…પે॰… ઉપ્પન્ના પઞ્ઞા ‘‘મા નિરુજ્ઝી’’તિ પગ્ગણ્હાતીતિ? ન હેવં વત્તબ્બે…પે॰….
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ અત્થાય રાગં પજહતિ… દોસં પજહતિ… મોહં પજહતિ…પે॰… અનોત્તપ્પં પજહતીતિ? ન હેવં વત્તબ્બે…પે॰….
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ અત્થાય મગ્ગં ભાવેતિ… સતિપટ્ઠાનં ભાવેતિ…પે॰… બોજ્ઝઙ્ગં ભાવેતીતિ? ન હેવં વત્તબ્બે…પે॰….
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
પરો પરસ્સ ચિત્તં પગ્ગણ્હાતીતિ? આમન્તા. પરો પરસ્સ અત્થાય દુક્ખં પરિજાનાતિ…પે॰… મગ્ગં ભાવેતીતિ? ન હેવં વત્તબ્બે…પે॰….
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
પરો પરસ્સ ચિત્તં પગ્ગણ્હાતીતિ? આમન્તા. અઞ્ઞો અઞ્ઞસ્સ કારકો, પરઙ્કતં સુખં દુક્ખં અઞ્ઞો કરોતિ અઞ્ઞો પટિસંવેદેતીતિ? ન હેવં વત્તબ્બે…પે॰….
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
પરો પરસ્સ ચિત્તં પગ્ગણ્હાતીતિ? આમન્તા. નનુ વુત્તં ભગવતા – ‘‘અત્તનાવ કતં પાપં…પે॰… નાઞ્ઞો અઞ્ઞં વિસોધયે’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘પરો પરસ્સ ચિત્તં પગ્ગણ્હાતી’’તિ.
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
૭૪૬. ન વત્તબ્બં – ‘‘પરો પરસ્સ ચિત્તં પગ્ગણ્હાતી’’તિ? આમન્તા. નનુ અત્થિ બલપ્પત્તા, અત્થિ વસીભૂતાતિ? આમન્તા. હઞ્ચિ અત્થિ બલપ્પત્તા, અત્થિ વસીભૂતા, તેન વત રે વત્તબ્બે – ‘‘પરો પરસ્સ ચિત્તં પગ્ગણ્હાતી’’તિ.
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
પગ્ગહકથા નિટ્ઠિતા.
Paggahakathā niṭṭhitā.
