| Library / Tipiṭaka / તિપિટક • Tipiṭaka / પરિવાર-અટ્ઠકથા • Parivāra-aṭṭhakathā |
(૨) પારાજિકાદિપઞ્હાવણ્ણના
(2) Pārājikādipañhāvaṇṇanā
૪૮૦. છિદ્દં તસ્મિં ઘરે નત્થીતિ અયં પઞ્હા દુસ્સકુટિઆદીનિ સન્થતપેય્યાલઞ્ચ સન્ધાય વુત્તા.
480.Chiddaṃ tasmiṃ ghare natthīti ayaṃ pañhā dussakuṭiādīni santhatapeyyālañca sandhāya vuttā.
તેલં મધું ફાણિતન્તિ ગાથા લિઙ્ગપરિવત્તં સન્ધાય વુત્તા.
Telaṃ madhuṃ phāṇitanti gāthā liṅgaparivattaṃ sandhāya vuttā.
નિસ્સગ્ગિયેનાતિ ગાથા પરિણામનં સન્ધાય વુત્તા. યો હિ સઙ્ઘસ્સ પરિણતલાભતો એકં ચીવરં અત્તનો, એકં અઞ્ઞસ્સાતિ દ્વે ચીવરાનિ ‘‘એકં મય્હં, એકં તસ્સ દેહી’’તિ એકપયઓગેન પરિણામેતિ, સો નિસ્સગ્ગિયપાચિત્તિયઞ્ચેવ સુદ્ધિકપાચિત્તિયઞ્ચ એકતો આપજ્જતિ.
Nissaggiyenāti gāthā pariṇāmanaṃ sandhāya vuttā. Yo hi saṅghassa pariṇatalābhato ekaṃ cīvaraṃ attano, ekaṃ aññassāti dve cīvarāni ‘‘ekaṃ mayhaṃ, ekaṃ tassa dehī’’ti ekapayaogena pariṇāmeti, so nissaggiyapācittiyañceva suddhikapācittiyañca ekato āpajjati.
કમ્મઞ્ચ તં કુપ્પેય્ય વગ્ગપચ્ચયાતિ અયં પઞ્હા દ્વાદસયોજનપમાણેસુ બારાણસિઆદીસુ નગરેસુ ગામસીમં સન્ધાય વુત્તા.
Kammañca taṃ kuppeyya vaggapaccayāti ayaṃ pañhā dvādasayojanapamāṇesu bārāṇasiādīsu nagaresu gāmasīmaṃ sandhāya vuttā.
પદવીતિહારમત્તેનાતિ ગાથા સઞ્ચરિત્તં સન્ધાય વુત્તા, અત્થોપિ ચસ્સા સઞ્ચરિત્તવણ્ણનાયમેવ વુત્તો.
Padavītihāramattenāti gāthā sañcarittaṃ sandhāya vuttā, atthopi cassā sañcarittavaṇṇanāyameva vutto.
સબ્બાનિ તાનિ નિસ્સગ્ગિયાનીતિ અયં પઞ્હા અઞ્ઞાતિકાય ભિક્ખુનિયા ધોવાપનં સન્ધાય વુત્તા. સચે હિ તિણ્ણમ્પિ ચીવરાનં કાકઊહદનં વા કદ્દમમક્ખિતં વા કણ્ણં ગહેત્વા ભિક્ખુની ઉદકેન ધોવતિ, ભિક્ખુસ્સ કાયગતાનેવ નિસ્સગ્ગિયાનિ હોન્તિ.
Sabbāni tāni nissaggiyānīti ayaṃ pañhā aññātikāya bhikkhuniyā dhovāpanaṃ sandhāya vuttā. Sace hi tiṇṇampi cīvarānaṃ kākaūhadanaṃ vā kaddamamakkhitaṃ vā kaṇṇaṃ gahetvā bhikkhunī udakena dhovati, bhikkhussa kāyagatāneva nissaggiyāni honti.
સરણગમનમ્પિ ન તસ્સ અત્થીતિ સરણગમનઉપસમ્પદાપિ નત્થિ. અયં પન પઞ્હા મહાપજાપતિયા ઉપસમ્પદં સન્ધાય વુત્તા.
Saraṇagamanampi na tassa atthīti saraṇagamanaupasampadāpi natthi. Ayaṃ pana pañhā mahāpajāpatiyā upasampadaṃ sandhāya vuttā.
હનેય્ય અનરિયં મન્દોતિ તઞ્હિ ઇત્થિં વા પુરિસં વા અનરિયં હનેય્ય. અયં પઞ્હા લિઙ્ગપરિવત્તેન ઇત્થિભૂતં પિતરં પુરિસભૂતઞ્ચ માતરં સન્ધાય વુત્તા.
Haneyyaanariyaṃ mandoti tañhi itthiṃ vā purisaṃ vā anariyaṃ haneyya. Ayaṃ pañhā liṅgaparivattena itthibhūtaṃ pitaraṃ purisabhūtañca mātaraṃ sandhāya vuttā.
ન તેનાનન્તરં ફુસેતિ અયં પઞ્હા મિગસિઙ્ગતાપસસીહકુમારાદીનં વિય તિરચ્છાનમાતાપિતરો સન્ધાય વુત્તા.
Na tenānantaraṃ phuseti ayaṃ pañhā migasiṅgatāpasasīhakumārādīnaṃ viya tiracchānamātāpitaro sandhāya vuttā.
અચોદયિત્વાતિ ગાથા દૂતેનુપસમ્પદં સન્ધાય વુત્તા. ચોદયિત્વાતિ ગાથા પણ્ડકાદીનં ઉપસમ્પદં સન્ધાય વુત્તા. કુરુન્દિયં પન ‘‘પઠમગાથા અટ્ઠ અસમ્મુખાકમ્માનિ, દુતિયા અનાપત્તિકસ્સ કમ્મં સન્ધાય વુત્તા’’તિ આગતં.
Acodayitvāti gāthā dūtenupasampadaṃ sandhāya vuttā. Codayitvāti gāthā paṇḍakādīnaṃ upasampadaṃ sandhāya vuttā. Kurundiyaṃ pana ‘‘paṭhamagāthā aṭṭha asammukhākammāni, dutiyā anāpattikassa kammaṃ sandhāya vuttā’’ti āgataṃ.
છિન્દન્તસ્સ આપત્તીતિ વનપ્પતિં છિન્દન્તસ્સ પારાજિકં, તિણલતાદિં છિન્દન્તસ્સ પાચિત્તિયં, અઙ્ગજાતં છિન્દન્તસ્સ થુલ્લચ્ચયં. છિન્દન્તસ્સ અનાપત્તીતિ કેસે ચ નખે ચ છિન્દન્તસ્સ અનાપત્તિ. છાદેન્તસ્સ આપત્તીતિ અત્તનો આપત્તિં છાદેન્તસ્સ અઞ્ઞેસં વા આપત્તિં. છાદેન્તસ્સ અનાપત્તીતિ ગેહાદીનિ છાદેન્તસ્સ અનાપત્તિ.
Chindantassa āpattīti vanappatiṃ chindantassa pārājikaṃ, tiṇalatādiṃ chindantassa pācittiyaṃ, aṅgajātaṃ chindantassa thullaccayaṃ. Chindantassa anāpattīti kese ca nakhe ca chindantassa anāpatti. Chādentassa āpattīti attano āpattiṃ chādentassa aññesaṃ vā āpattiṃ. Chādentassa anāpattīti gehādīni chādentassa anāpatti.
સચ્ચં ભણન્તોતિ ગાથાય ‘‘સિખરણીસિ ઉભતોબ્યઞ્જનાસી’’તિ સચ્ચં ભણન્તો ગરુકં આપજ્જતિ, સમ્પજાનમુસાવાદે પન મુસા ભાસતો લહુકાપત્તિ હોતિ, અભૂતારોચને મુસા ભણન્તો ગરુકં આપજ્જતિ, ભૂતારોચને સચ્ચં ભાસતો લહુકાપત્તિ હોતીતિ.
Saccaṃbhaṇantoti gāthāya ‘‘sikharaṇīsi ubhatobyañjanāsī’’ti saccaṃ bhaṇanto garukaṃ āpajjati, sampajānamusāvāde pana musā bhāsato lahukāpatti hoti, abhūtārocane musā bhaṇanto garukaṃ āpajjati, bhūtārocane saccaṃ bhāsato lahukāpatti hotīti.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૨. પારાજિકાદિપઞ્હા • 2. Pārājikādipañhā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / પારાજિકાદિપઞ્હવણ્ણના • Pārājikādipañhavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / પારાજિકાદિપઞ્હાવણ્ણના • Pārājikādipañhāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / પારાજિકાદિપઞ્હાવણ્ણના • Pārājikādipañhāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / (૨) પારાજિકાદિપઞ્હાવણ્ણના • (2) Pārājikādipañhāvaṇṇanā
