| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૭. પઠમએજાસુત્તં
7. Paṭhamaejāsuttaṃ
૯૦. ‘‘એજા , ભિક્ખવે, રોગો, એજા ગણ્ડો, એજા સલ્લં. તસ્માતિહ, ભિક્ખવે, તથાગતો અનેજો વિહરતિ વીતસલ્લો. તસ્માતિહ , ભિક્ખવે, ભિક્ખુ ચેપિ આકઙ્ખેય્ય ‘અનેજો વિહરેય્યં 1 વીતસલ્લો’તિ, ચક્ખું ન મઞ્ઞેય્ય, ચક્ખુસ્મિં ન મઞ્ઞેય્ય, ચક્ખુતો ન મઞ્ઞેય્ય, ચક્ખુ મેતિ ન મઞ્ઞેય્ય; રૂપે ન મઞ્ઞેય્ય, રૂપેસુ ન મઞ્ઞેય્ય, રૂપતો ન મઞ્ઞેય્ય, રૂપા મેતિ ન મઞ્ઞેય્ય; ચક્ખુવિઞ્ઞાણં ન મઞ્ઞેય્ય, ચક્ખુવિઞ્ઞાણસ્મિં ન મઞ્ઞેય્ય, ચક્ખુવિઞ્ઞાણતો ન મઞ્ઞેય્ય, ચક્ખુવિઞ્ઞાણં મેતિ ન મઞ્ઞેય્ય; ચક્ખુસમ્ફસ્સં ન મઞ્ઞેય્ય, ચક્ખુસમ્ફસ્સસ્મિં ન મઞ્ઞેય્ય, ચક્ખુસમ્ફસ્સતો ન મઞ્ઞેય્ય, ચક્ખુસમ્ફસ્સો મેતિ ન મઞ્ઞેય્ય. યમ્પિદં ચક્ખુસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ ન મઞ્ઞેય્ય, તસ્મિમ્પિ ન મઞ્ઞેય્ય, તતોપિ ન મઞ્ઞેય્ય, તં મેતિ ન મઞ્ઞેય્ય.
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘સોતં ન મઞ્ઞેય્ય…પે॰… ઘાનં ન મઞ્ઞેય્ય…પે॰… જિવ્હં ન મઞ્ઞેય્ય, જિવ્હાય ન મઞ્ઞેય્ય, જિવ્હાતો ન મઞ્ઞેય્ય, જિવ્હા મેતિ ન મઞ્ઞેય્ય; રસે ન મઞ્ઞેય્ય…પે॰… જિવ્હાવિઞ્ઞાણં ન મઞ્ઞેય્ય…પે॰… જિવ્હાસમ્ફસ્સં ન મઞ્ઞેય્ય…પે॰… યમ્પિદં જિવ્હાસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ ન મઞ્ઞેય્ય, તસ્મિમ્પિ ન મઞ્ઞેય્ય, તતોપિ ન મઞ્ઞેય્ય, તં મેતિ ન મઞ્ઞેય્ય.
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘કાયં ન મઞ્ઞેય્ય…પે॰… મનં ન મઞ્ઞેય્ય, મનસ્મિં ન મઞ્ઞેય્ય, મનતો ન મઞ્ઞેય્ય, મનો મેતિ ન મઞ્ઞેય્ય; ધમ્મે ન મઞ્ઞેય્ય…પે॰… મનો વિઞ્ઞાણં…પે॰… મનોસમ્ફસ્સં…પે॰… યમ્પિદં મનોસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ ન મઞ્ઞેય્ય, તસ્મિમ્પિ ન મઞ્ઞેય્ય, તતોપિ ન મઞ્ઞેય્ય, તં મેતિ ન મઞ્ઞેય્ય; સબ્બં ન મઞ્ઞેય્ય, સબ્બસ્મિં ન મઞ્ઞેય્ય, સબ્બતો ન મઞ્ઞેય્ય, સબ્બં મેતિ ન મઞ્ઞેય્ય.
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘સો એવં અમઞ્ઞમાનો ન કિઞ્ચિપિ લોકે ઉપાદિયતિ. અનુપાદિયં ન પરિતસ્સતિ. અપરિતસ્સં પચ્ચત્તઞ્ઞેવ પરિનિબ્બાયતિ . ‘ખીણા જાતિ, વુસિતં બ્રહ્મચરિયં, કતં કરણીયં નાપરં ઇત્થત્તાયા’તિ પજાનાતી’’તિ. સત્તમં.
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૭-૮. પઠમએજાસુત્તાદિવણ્ણના • 7-8. Paṭhamaejāsuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૭-૮. પઠમએજાસુત્તાદિવણ્ણના • 7-8. Paṭhamaejāsuttādivaṇṇanā
